خوش آمدید

Keedo (Insects) Ko Bijli Ka Jhatka Dekar Marne Ka Hukm


Alhamdulillah..

Hamare muashre me ye galat fehmi hai ki electrick shock dekar keedo ko marna mana hai kyuki ye machine jalane ka kaam karti hai jisse RasoolAllah ﷺ ne mana farmaya hai. Aiye dekhte hai ki iski haqiqat kya hai.

Shariyat me Aag se jala kar kisi cheez ko maarna mana hai, jaise ki Abu Huraira r.a. ki riwayat hai ke Rasool Allah ﷺ ka farmaan hai : "Beshak aag ka azaab sirf Allah taala hi de sakta hai."

Sahih al Bukhaari, hadith-3016.

Isi tarha Aap ﷺ ne chuntiyon (ants) ki ek abadi dekhi jise kuch sahaba ne aag se jala diya tha to Aap  ne farmaya: "Be-shak yeh baat bilkul bhi munasib nahi hai ke aag ke parwar-digaar ke alawa koi aur bhi aag ka azaab de."

Narrated by Abu Dawood (2675), classed as saheeh by Imam Nawawi in Riyadh as-Saaliheen (519).

Lekin Wo machines jo keedo (insects) ko electric shock dekar marne ka kaam karti ho use istemal karne me koi harj nahi hai. Aur isse ye taabeer karna ki ise istemal karke keeda aag se jal kar marta hai to ye raaye sahih nahi hai kyuki bijli ka jhatka aag nahi hota aur kyunki bijli ke jhatko ke zarye kisi bhi cheez ki khalyaat (cells) intehai buri tarha toot-foot ka shikaar ho jati hain aur fauri taur par khoon ki ragein fat jati hain, aur agar current zyada quwat mein ho to is ki wajah se maqtool ke jism ka rang tabdeel ho jata hai aur basa auqaat koyla ban jata hai aur aisa lagta hai ke jaise use aag se jalaya gaya hai lekin haqeeqat mein woh current hota hai aag nahi.

Shaykh ibn Uthaymeen se isi mutallik sawal kiya gaya jiske jawab me wo farmate hai:

"Ham ye samajte hain ke is mein koi harj nahi hai aur ye aag ke zariye azaab dene ke zumre me shaamil nahi hota kyunki hamein yeh baat maloom hui hai ke is ke zariye hashraat current lagne se marta hai, is ki Daleel yeh hai ke agar ap kagaz (paper) ka tukda laa kar is par rakh de to ye kagaz ke tukde ko nahi jalata, jis se maloom hota hai ke yeh aag nahi hai, balke current hai, jaise ke agar koi insan nangi taar ko haath laga de to jale bagair mar jata hai." End quote.

Liqaa’aat al-Baab il-Maftooh (no. 59/ sawal no. 12).

Aur Allah sab se behtar janta hai.

•٠•●●•٠•

No comments:

Post a Comment