خوش آمدید

Mujh Par Lagaye Gaye Jhute Ilzaamaat Ka Jawab

Asslaam alaykum. 

Alhamdulillah wassalaato wasasslaaam ala RasoolAllah.

Jaisa ki hamesha se kuch logo ka ye amal raha hai ki wo haq ke mukhalifeen ban kar haq ki awaz ko rokna chahte hai. Taareekh is par gawaah hai aur RasoolAllah ﷺ ki seerat bhi is par gawah hai. Jab RasoolAllah ne haq ki awaz buland kari to unke apne unke mukhalif ho gaye, aur ye wo chiz hai jo har shaks ke sath hota h jab wo Haq ki awaz ko buland karta hai.

Jab aapne shirk wa biddat chora hoga to us waqt kuch log zarur honge jo apke khilaf ho gaye honge, aur ho sakta hai wo apke family maise hi ho.

Jaha tak mera muamla hai, mera aqeedah aur manhaj koi chupi hui chiz nahi hai. Maine is site par 'About section' me apne aqeedeh ka izhaar kiya hai daleelo ke sath aur ye raha uska link: https://www.iqrakitab.com/p/about.html

Ab iske baad mere articles me mera nukhta e nazar hota hai us baat ka jo maine Quran sunnah salaf aur ulema e deen se sikha hai. Aur jaise sab ko haq hai ki wo apne nukhta e nazar par amal kare aur usko logo tak pohchaye toh waise hi ye mera bhi haq banta hai.

Mere upar boht se jhute ilzam lagaye jate hai kuch logo ke taraf se. Toh iska faisla mai Allah aur awaam par chorta hu. Ap mere articles padhe aur khud faisla kare ki meri article ki baate Ap logo ko Quran aur sunnat ke nazdeek laati hai ya wo Quran aur sunnat se dur le jaati hai. Baaki mai samajhta hu ki hamare articles ko padhne wale aksar khule zahen ke log hai alhamdulillah.

Ha kyuki mai insan hu to mujhse bhi galtiya hoti hai aur mai baqaida us shaks ke liye duae karta hu jo meri galti mujhe batate hai taaki mai islah kar saku. Lekin ye andaaz ki meri galti mujhe batane ke bajaye use aawaam me faila diya jaye aur ilzam-tarashi aur badzubani ki jaye to ye amal mujhe ajeeb lagta hai kyuki mujhe ye nai lagta ki sahaba e karaam ya hamare salaf as saaleh ne is tarha ka rawayya apnaya hoga ikhtilaf ki halat me.

Khair, khud ko proof karne ke liye mere pas zyada waqt nahi hai, Deen ki kaafi zimmedariya Allah ne mujh par daali hai to akhir me mai bas yahi kahna chahunga ki

Kuch logo ne ye faisla kar rakha hai ki mere bareme wo jhut bolenge, bohtan lagayenge fir logo me usko failaenge fir isko sawab ka kaam samjhenge. Maine is tarah ke sab logo ka muamla Allah ke supurd kar diya hai, wo adalat boht jald lagne wali hai jisme hamare pas chupane ko kuch nahi hoga, darakhto ke patte bhi nahi honge jisse ham apne gunah chupa sake. Us mauke par inlogo ko soch lena chaiye ki is tarha ki baato ke liye ye kya jawab denge.

Abu Huraira r.a. riwayat karte hai ki Rasool ﷺ ne farmaya, tumhe maaloom hai gareeb kaun hai? Sahaba r.a. ne arz kia, hum to gareeb usko samjtay hain jis ke paas rupya-paisa aur saaz o saamaan na ho. 
Toh Aap ﷺ ne farmaya, Meri Ummat mein gareeb wo shaksh hoga jo Qayamat ke din namaaz, roza aur zakaat ke sath aayega magar us ne kisi ko gali di hogi, KISI PAR JHUTA-ILZAM LAGAYA HOGA, kisi ka maaal hadap kiya hoga, kisi ka khoon bahaya ho ga, kisi ko maara hoga, chunache us ne jin jin logon ki haq talfi ki hogi unhain uski nekiya de di jayengi. Aur agar uski nekiya kam pad jaye toh fir un logon ke gunaah la kar us par laad diye jayenge. Aur usey Jahannum (dozakh) mein fenk diya jaayega.

Sahih Muslim, The Book of Virtue, Enjoining Good Manners, and Joining of the Ties of Kinship, Hadith- 6579.

No comments:

Post a Comment