Haq Ki Talaash Aur Ham

Ek Musalmaan aur ek Tailb e Ilm ko hamesha Sach ki talaash karte rahna chahiye. Hame sha'oor ki umar (age) se lekar aakhri saas tak ye safar taye karte rahna chahiye. Kyuki isi tarike ki taleem hame Quran aur Sunnat se milti hai. Sahaba e karaam, salaf as saliheen aur hamare imamo ki zindagi ek behtareen misaal hai is chiz ki. Agar ham ye samjhenge ki bas ab hamari hi soch, hamari hi raaye sahih hai aur isme galti ke chances bhi maujud nahi hai to ye khud ko Nubuwat ke darze par fa'iz karna hua. Kyuki sirf Ambiya karaam ke bareme hi kaha ja sakta hai ki sirf wahi log hai jo Allah ki hifazat me rahte hai. Baaki ham sab ke sab sirf ek insan hai. Ham tahkeek karte hai, baaz aukat hamari tahkeek sahih hoti hai aur baaz aukat hamari tahkeek galat hoti hai. Baaz aukaat hamse choti galtiya hoti hai, baaz aukat hamse badi galtiya ho jati hai. Toh koi ilm me kitne hi bade darje par pohch jaye, galatiya ka imkaan (chances) hamesha bana rahta hai.

Hame apne Dil o Dimag ko hamesha khula rahne dena chahiye. Agar ham yeh samjhenge ki bas ham hi sahih hai, hamari hi soch sahih hai, yahi aakhri nataij hai jo hamne seekh liye hai to ye Islah ka darwaza band karna hua. Aur hamari zahen is tarha ban jayegi ki 'Bhai Islah to Ap apni karo, ham to pahle se hi Haq par hai, ham to pahle se hi Jannati hai.'

Apko Sahabi e Rasool ﷺ, Salman Farsi r.a. ki zindagi ka Ilm hoga. Sabse pahle wo aatish-parast the, fir wo Isaai hue aur fir unhone Islam qubul kiya. Unko Islam ki daulat isi liye mili kyu ki unhone haq ke liye hamesha apna dil o dimag khole rakha. Agar wo hamari hi tarah zahen bana lete ki bas mai hi sahih hu to ap soche ki unhe Islam ki daulat kaise milti. Aur Salman Farsi r.a. ki badi fazilat ayi hai Hadith ki kitabo me. [Allah ne agar zindagi di to aage mai Salman Farsi r.a. ki zindagi par ek khas article publish karunga in shaa Allah]. Salman Farsi r.a. ki puri zindagi Haq talash karne walo aur Ilm ka safar taye karne walo ke liye ek sabak hai.

Toh Haq ki talash karne wala bane, aur Ilm ke safar ke sachhe musafir ban kar zindagi basar kare. Aur Khuda ke liye is tassub aur taqabbur ko apne dil o dimag se nikal fenke ki hamare tahkeek ya raaye me galti nahi ho sakti. Ye galti hame boht bhari pad sakti hai qayamat ke din. Aur khud ka post mortem karte rahe. Yaani Jaizaa Lete Rahe. Kuch sawalat hai jise hame roz khud se puchna chaiye ki:

۩ Kya Humne Apne Apko Taa'subaat Se Pak Karne Ki Koshish Ki Hai ?

۩ Kya Hum Ab Bhi Jazbaat Main Beh Jate Hein ?

۩ Kya Ab Bhi Hum Usi Jagah Par Khade Hain Ke Pahle Agar Ek Shakhs Ki Aqeedat (Andhi-takleed ; Blind-following) Main Mubtala The Toh Ab Kisi Doosray Shakhs Ki Aqeedat Main Mubtala Hogye Hain ?

۩  Kya Is Ilm Ke Safar Main Waqayi Ab Hum Khalis Daleel Ki Bunyaad Par Cheezo Ko Samjhte Hain ?

۩ Agar Koi Hamari Maani Hui Raa'ye Se Mukhtalif Cheez Ki Taraf Humain Bulaye To Hamara Response Gair Tassubana Hota Hai ?

۩ Kya Hum Aj Bhi Poori Tawajjoh Se Uski Bat Sun'nay Ke Liye Amaa'da Hojaty Hain ?

۩ Kya Hamary Andar Ye Cheez Moujood Hai Ke Agar Hamari Ghalti Hum Par Waa'zeh Ki Jayegi Toh Hum Haq Ko Maan Lengay?

Toh iska jaizaa lety rehna chahye hame. Kyuki tassub insan ki aisi kamzori hai ke bade se bade ahle ilm ko ye andaza nahi hota kay wo is kamzori main mubtala ho chuka hai. Toh har raat jab ap apne bed par sone jaye to khud se ye sawal puche.

Ye Ilm ka safar hai, hum sab ke sab Nabi ﷺ ki baat ko samjhne mein masroof hain. Aur aiye ap bhi sath shamil hojaiye.

Related:   ۩ Aadab e Ikhtilaf

                 ۩ Ilm Ki Pahli Manzil

Read More »

Islah Me Sabr Aur Akhlaq Ki Ahmiyat

Ham aur ap jaise log jinke aqeede quran wa sahih hadees ke mutabiq hote hain aur hum biddat(innovation) se bachne ki bharpur koshish karte hai aur biddat ko pehchanthe( identify) bhi hain, hum jaise log apne mulk mai din raat hone wali bidat'o ki khilaf kya karte hai?

Facebook jihadi bankar lambi lambi post karte hain- ye haraam wo haraam. Kisi mahfil mai bidat dekhli to wahi shor barpa kiya aur fir do fareekh (opponent) bana kar ladai(fight) shuru.

Koi ahle biddat sms bheje to jawab me garma garam message bhej diya. Mai batau ke mere mulk ka aik(1) bada tabka bidati kyun hai? Wo biddati hai mere jaise quran wa sahih hadees ke pairokaron(followers) ki waja se. In ahle biddat muslmano ko agar kisi cheez ka ilm na tha , woh agar apnay maa baap kay tareeqay par chal rahe the, lekin humain to ilm tha na humne unko kyun nahi raahe raast par lane ki koshish ki? Aur agar koshish ki to kaisi? Tok kar, gussa karke? Tanqeed(critisize) karke? Khud ko durust sabit  karne ki zid mai bahes karke? 

Hum wo log hai jo andhere mai baithe logo ko chilla chilla(shout) kar andheri khaiyon (deep excavation) se khabardar karne ki koshish kar rahe hai. Chillane se sirf itna hoga ke wo log zara der tharain ge, uljhen ge, magar fir jitna unki ankhe dekhne ki adi ho chuki hain, utne ko bohut samajh kar chalte jainge.

Andheron mai cheekha chillaya thodi na jata hai balkay roshni laayi jati hain. Roshni aay gee to andhera khud ba khud khatam ho jayega. Haq ayega to batil jay ga. Hum musalman yeh baat kyun nahi samjhtay kay bahas, zid, ladayee say koi theek nahi ho sakta. Uloom e hadees seekhne me sahih, hasan, zaeef aur mauzu hadees ka farq aur raawi ki sharait jaannay aur seekhnay me aik arsa lagta hai hum quran o sahih hadees seekhne wale kayi saal laga kar deeni course karte hain, diplomas lete hain, magar doosre se yeh umeed kartay hain ke jo baat  hame khud kayee saal (years) laga kar samjh ayee woh doosra shaks chaar line ke aik sms me samjh jaye. Chillanaa asaan hai per roshni lana mushkil hai. "Amr bil maroof " (yani neki ka hukum do) pahlay ata hai aur "Nahi ‘anil munkar mukir" (burayee se roko ) ka doosra number hai. Ahista ahista narmee se tahammul (patience) se logon ko taleem dee jaye to woh hum se achhe sunnat ke pairokaar (followers) ban saktay hain. Lekin hum Musalman yeh tahammul laye kahan say..

Islah Sirf Alfaz Nahi Hota, Tareeqa Hota Hai Tableegh Ka Jo Sidha Dilon Par Asar Karta Hai.

Read More »

Ilm Ki Pahli Manzil

hi   -

Mai jab logo ko dekhta hu, mashriq-maghrib me unse milta hu to mujhe ye mahsoos hota hai ke in ki zyada dilchaspi ka ba-is ilmi mabaahis (ilmi debates) ban kar rah gai hai.
Ye apni jaga badi qeemti cheez ha lekin jab ham qayamat mein apne Rabb ki barghaah mein uthaye jayenge toh sawalaat is ke mutalliq nahi honge yaani Allah taala ye nahi puchenge ke (acha tum) ye batao tum meraj ko jismaani maante the ya roohani, ye nahi puchenge ke batao Quran majeed ki fulaan ayat se tumne ye matlab nikaala tha ya wo matlab samjha tha.
Wahaan jo cheez zer e bahas aane wali hai Deen me aslan us par nigaah rahni chahiye. Ye sab ilm ko hasil karne ki cheezen hain. Is se insaan taa'subaat ko khatam karta hai. Uske ilm me izaafa hota hai. Nayi nayi dunyaa'en daryaaft karta hai. Isko ek qalbi itmenaan hasil hota hai.

Ye badi qeemti cheez hai. Ilm ka safar koi mamuli safar nahi hai. Lekin asal cheez jis ke uper nigaah rahni chahye wo ye hai ke mai apni zaat mein, apni shakshiyat mein pakeezgi ka safar taye kar raha hoon ya nahi. Ye sawaal har waqat saamne rahna chahiye. Ye mai thodi der baad bataunga ki pakeezgi se Quran kya murad leta hai.

Kyon ke Quran e majeed se yahi maloom hota hai ke Allah taala ne jis imtehaan mein hamko mubtala kiya hai, is imtehaan mein hadaf (aim, goal) ki kaifiyat yahi hai ke ham kitna pakeeza ho kar uski baargah mein jaate hain.
Main aage chal kar wazaahat karunga ke pakeezgi ka content kya hai.. Lekin is waqat jis cheez ki taraf asal mein tawajjoh dilaani maqsood hai wo ye hai ke is hadaf ko kabhi nigaah se ojhal nahi hona chahiye.

Ilmi bahsen (debates) kare, cheezon ko samjhe, nayi nayi pahlu saamne aaye. Un se faida uthaaye. In main se koi cheez esi nahi ke jisko ghalat kaha ja sake. Lekin agar yahi tamaan chize hadaf (maksad) ho kar reh gai hai to ye samajhle ki Deen mehaz ilm nahi hai wo as'lan ek badi manzil hai jiski taraf hamari reh'numaai karne ke liye nazil kiya gaya hai. Aur jaisa ke maine bataya hai ke wo tazkiya (purification of oneself) hai aur ye qQran-e-majeed ne bilkul wazeh bata diya ke:

"Qad aflaha man tazakka"

"Jis ne apny apko pakeeza kar liya, wohi falaah payega"

Quran, 87:14.

Aur pakeezgi ke liye Allah ne pura amal bhi bata diya hai ke hame kya karna chahye. Main is par bhi guftgu karunga aage chal kar

Is me choo'ki ilm se baat shuru hui hai toh agar ap khalis nasb-ul-ain (maksad) ke hawaale se dekhain to jo "Rawaiyya" is se wajood main aata hai wo hai jis k baare mein ham qayamat mein jawaab-deh hongay. Yaani nateeja (result of our research) nahi balki wo rawaiyya (attitude) jo humny ikhtyaar kiya. Ilm ka tazkiya (purification) bhi usi tarah matloob (zarurat) hai jis tarha amal ka tazkiya matloob hai.

Lekin ilm ke tazkiye me hadaf (aim) kya hai ?

Yaani hamara "Attitude towards knowledge" kya hai ?

Yaani humne ilm ke muamle main rawaiyya kya ikhtiyaar kiya hai ?

Kya humne apne apko taa'subaat (badgumani ya bina-tahkeek ke kisi natije par pohchna) se pak karne ki koshish ki hai? Dekhain mainy lafz bola pak karna yahi tazkiyaa hai.

Kya hum ab bhi jazbaat main beh jate hein?

Kya ab bhi hum usi jagah par kharay hain ke pahly agar ek shakhs ki aqeedat (andhi-takleed ; blind-following) me mubtala the toh ab kisi dusre shakhs ki aqeedat me mubtala ho gaye hain? Kya Quran aur sunnat se agar koi baat sabit ho jati hai to kya fir bhi ham ye dekhte hai ki hamare ulema ya muhaddis ki raaye kya hai? Kya apne ulema aur muhaddis ko ham quran aur sunnat se zyada priority dete hai ?

Ye wo jaiza hai jo ham mai se har shakhs ko har waqt lete rehna chahiye yaani agar apne koi neyi tah'teeq jaan li yaa koi nayi raaye maloom kar li to is se ap faida uthayenge. Toh wo apko itmenaan-e-qalb degi lekin jis cheez ke liye ap Allah taala ke huzoor jawaab-deh hain wo ye ke jab ye cheez ap ke saamne ayi ya is say mukhtalif koi cheez apke saamne ayi to apne rawaiyya kya ikhtyaar kiya?

To jis cheez ki islah ilm ki duniya me bhi pesh e nazar rehni chahiye wo ye hai ke ham har tarah ke taa'subaat, har tarah ke jazbaat, aqeedaton se bala'tar (alag) ho ke cheezon ko samjhnae ki tarbi'yat kar le. Yaani is deen ki raah main tarbi'yat ka pahla mar'hala yahi hai ke hamara maqsad yahi ho ke ham apna jaiza lete rahe.

Har raat jab ham bistar par jaye to sone se pahle ek bar khud se puchen ke kya waqayi ham taa'subaat (bad-gumani; apne se alag raaye rakhne wale ke liye bad-gumani) se bala'tar ho gaye hain? Aur is main hamesha ye cheez pesh'nazar rakhain ke taa'sub ek aisi bimaari hai ke ye baaz auqaat aadmi ko ehsaas bhi nahi hota ke yeh is ko lahaq ho chuki hai (lag gai hai). Khud ko jazbaat ke hawale kar dena, insan ki aisi kamzori hai ke bade se bade aadmi ko ye andaza nahi hota kay wo is kamzori main mubtala ho chuka hai. Toh apna postmortem karte rahna chahiye, yaani jaizaa lete rahna chahye ke:

Kya is ilm k safar main waqayi ab hum khalis daleel ki bunyaad par cheezo ko samjhte hain ?
Agar koi hamari maani hui raa'ye se mukhtalif cheez ki taraf humain bulaye to hamara response gair tassubana hota hai?
Kya hum aj bhi poori tawajjoh se uski bat sun'nay ke liye amaa'da hojaty hain?
Kya hamary andar ye cheez moujood hai ke agar hamari galti ham par waa'zeh ki jayegi toh hum haq ko maan lenge?
Toh iska jaiza lete rahna chahiye.

Ye pahli cheez hai jo mein apki khidmat main arz karna chahta tha ke jab ap ilm ka safar karein to aam tor par insan nata'ij fikr (conclusion of a research) me mubtala hojata hai ke yeh ek tehqeeq ho gai, ek nuqta-nazar wazeh ho gya. Ye tahkeek ka natiza boht badi bat hai. Mein iski nafi nahi kar raha lekin misaal ke taur par badi jiddo-jahad ke bawjood apki tahkeek galat ho gai toh ye saza ka zarya nahi banega..

Asal cheez ye hai k galat nuqta e nazar ke maam'le me bhi apka rawaiyya kya raha ?
Yaani ye galti kya taassub ke wajah se hui ?
Ya ye galti jazbaat me mubtala hone ke wajah se hui ?
Ya ye galti kisi ki aqeedat (blind-following) ki wajah se hui ?
Ya ye galati insaan ki fitri kamzoriyan jo hain uske lehaaz se hui?

To jo shuru ki cheezen jo hain wo qabil-e-muafi nahi hai lekin aakhri chiz kabil e muafi hai. Iska poori tarah ehsaas bhi hona chaiye aur is par har lehza sochte bhi rehna chaiye.
Main iski zaroorat is zamane mein boht zyada mahsoos karne laga hoon kyon ki maine yeh dekha hai ke ye chiz hamari ummat me boht aam hoti ja rahi hain.
Ek chiz wo jiski taraf maine ishaara kiya wo nata'ij fikr nikalne me hi shab-o-roz masroof rahte hai aur dusri yeh ke is se ek khaas tarah ka ehsaas-e-bartari (feeling of superiority ; khud ko dusre se behtar samajhna) inki guftgu me, inki baat-chit main, labb-o-lehja main aana shuru hojata hai.Yaani inke lahje me, baat cheet me (ilm ka) ghamand jhalakna shuru ho jata hai.

In dono se khuda ki panaah maangni chahiye. Allah taala ko sab se zyda jo cheez na'pasand hai wo ap jaante hai ke wo ghamand hai aur ghamand ya taqabbur ke baare me farmaya gaya hai ke oont (camel) suyi (needle) ke naake main dakhil ho sakta hai, lekin koi ghamand karne wala shaks jannat me dakhil nahi ho sakta. (for reference see, quran, 7:40.)

Apne andar sacchi aaziz (humbleness) paida karna chahiye aur hamesha sacche ilm ka musafir ban kar rahna chahiye. Is me khaas taur par apna tazkiya karte hue ek usooli baat ko palle baandh lein aur wo yeh hai kay kisi dar'jay mein bhi ibaadat khuda ke siwa kisi ki na ho aur adeeqat (blind-following) Muhammad ﷺ ke siwa kisi se na ho. Baaki jo kuch bhi hai wo zyada se zyada kya hai? Jaisay ap apne bade ka, mu'allim ka ehtraam karte hain.

Agar ehtaraam, adeeqat (blind-follwing) me badalna shuru hojaye toh iska matlab ye hai ke nafs alooda (impure) hona shuru hogaya hai. Jahaan se ap nikle the ab wapis wahi ja rahe hein, jis safar ki apne shuruat ki thi. Ap fir wapis wahi laut rahe hai. Ye ek bada U-turn hoga, jis se har Muslmaan ko, har sacchay ilm ke musafir ko Allah ki panaah maangni chahiye.

Asal cheez jiska qayamat ke hawaale se hame apne andar paida karna hai wo be-taa'subi hai. Wo ilm ki sacchi talab hai.. Wo sahih bat jan'nay ke liye zahni tayaari hai.. Wo aqeedato (blind-following) se hat kar cheezon (ilm) ko dekhna hai..

Iska ek laazmi takaaza ye hai ke jahaan kahee bhi ilm payaa jata hai, ap usse ikhtilaf kare lekin kabhi kisi sahab-e-ilm ke baare main be-ehtraami (disrespect) ka rawaiyya ikhtyaar na karen. Sab ki dil se respect kare. Yahi hamare sahaba ka tarika tha ki wo ikhtilaf to karte the lekin ekdusre ki izzat karte the. Wo ikhtilaf me ek dusre ko gustakh e rasool ya manhajless, etc nahi kahte the.

Kisi shakhs ke baare main raa'ye dete waqat uske mahaa'sin (bhalaiyo) ko kabhi nazar andaaz mat kare. Aapne dekha hoga ke mai apne baaz jaleel-ul-qadr buzurgo se, jin ke saya me maine sha'oor ki aankh kholi hai, bada shadeed ikhtilaaf karta hoon lekin kabhi unki azmat (respect) ke maam'le me mere yahaan koi bura tas'sur apko nahi milega. Main unki badi izzat karta hoon aur unke mahaa'sim (bhalaiyo) par logo ko hamesha tawajjo dilata hu aur batata hu ke wo kaise bade log the aur unko Allah taala ne kaisa behtareen akhlak ata kiya tha.

Ilm me galti hojati hai, us galti ke baare me hum guftgu karenge, islah bhi karenge. Is liye ke kisi ki azmat apko yahaan tak na le jaye ke aap unki galti ki ta'eed (defence) karne lag jaye aur galti par tanqeed (criticize) yahaan tak na le jaye kay aap us shakhs ka waajibi ehtraam karna bhi chor dein. Ye cheez agar paida ho jaye to ap main aur baaki logo mein koi farq nahi reh jayega.
Ye jitne is waqt firqe aur groh bane huye hain ye asal me wo cheez hai jiska lehaaz na rakhne se bane hain. Agar in ke jo rahnuma hain, ulema hain wo har mauqa par inko ye tawajjo dilaate ke hum Muhammad RasoolAllah ﷺ ke pairo (follower) hain [naahi, kisi buzurg ya imam ya muhaddiseen ke]. Koi agar galti se pak hasti hai to wo Allah ka Rasool ﷺ hai, baaki saare ke saare ulema, khawaa wo bade bade aaima hon wo insaan hai. In se galti ho sakti hai aur khud ke baare me bhi ye yahi kahte hain ke ham apni tahqeeq apko bata rahe hain aur khud bhi ham ilm ke safar main har lehza masroof hain.

Koi haqeeqat hum par waa'zeh hojaegi to ham apko bata denge, agar koi galti samajh mein aa jaegi to usko sudhar lenge. Ap par agar kisi dusre shaks ki baat zyada wazeh ho jaye aur agar ap mahsoos kare ke us main haq hai to apko usi ki pairwi karni chahiye. Allah taala ne kisi ek shakhs ke saath apko nahi bandhaa hai aur ye bilkul ek haqeeqat aur ek waqya hai, jo hamare bade bazurg hain, jin se tareekh roshan hai, unki zindgi aur amal se maloom ho jata hai ke un me se kisi ke baare me ye nahi kaha ja sakta hai ke wo 100% darust hai. Yaani ba-haisiyat e majmooi (altogether) hum ahle ilm ki qadr bhi karte hain aur unse koi achhi bat hoti hai toh ise apnaate bhi hain, aur agar koi baat quran aur sunnat ke mutabik na samajh aye to usse ikhtilaf bhi karte hai. To yeh wo rawaiyya hai iske liye hum jawaab-deh hain Allah ke yahan. Yaani hamara yahi rawaiyya hona chahye, ye siraat-e-mustaqeem (sidha rasta) hai.

Ye siraat-e-mustqeem hai. Is par hum ko chalna hai ke ham taa'subaat se bala'tar ho kar zindagi basar kare. Toh ilm ke muamle mein mai ye samjhta hu ke is ki hamko bar-bar yaad-dihani karani chahiye. Ham apni majalis mein, apni study circle mein, jahaan kahee baithen, logon ko hamesha ye bataye ke ye ilm ka safar hai, ye aakhri nataij ka bayan nahi hai.
Is mein ye nahi honi chahiye ke ham par nubuwat khatam ho rahi hai, nubuwat khatam ho gai jis par honi thi. Hum sab ke sab huzur ﷺ ki baat ko samjhne mein masroof hain. Aur aiye ap bhi sath shamil hojaiye.

Is main jab ap dusron ke saath baat karte hain, to apka dawat ka tarika yeh nahi hona chahiye ke ab ye haq ham par nazil ho gaya hai aur hum iski khabar dene ke liye aaye hain. Nahi! balki Ye hona chahiye ke jaisa ek saccha talib-ilm karta hai ke dekho bhai baat ye hai ke mai bhi tumhari tarah ilm ka musafir hoon, mere ilm main ek nayi baat ayi hai, yeh mujhe appeal karti hai. Tum bhi is par gaur kar lo.
Aaiye mil kar is par gaur kar lete hain. Mil kar iska mutala kar lete hain, mil kar isko dekh lete hain. Toh ye jo attitude aur rawaiyya hai yeh ilm ke tazqiye (purification) ki pahli manzil hai iska hamesha khayal rakhna chahiye.

                                                                •٠•●●•٠•

From a series that was started on Iqra' Whats App broadcast Service: 009779868212118 .

Wama Alaina Illal Balagul Mubeen - Aur Mera Kaam To Nahi Hai Lekin Sirf Pohcha Dena.

Read More »

Aadab e Ikhtilaf

Allah pak Quran e majeed me farmate hai

Dehaati log kehtay hain kay hum emaan laye. Aap keh dijiye kay darhaqeeqat tum emaan nahi laye lekin tum yun kaho kay hum islam laye(Muslim hue) halankay eeman to abhi tak tumharay dilon mein dakhil hi nahi hua hai.

Surah Hujurat (49), ayat: 14.

RasoolAllah ﷺ ne farmaya

“Wo Log jinhone Eeman ki kalemaat kahe hai lekin eeman to abhi tumhare dilo me dakhil bhi nahi hua hai! Musalmano ki burai mat karo na hi unki galtiya nikalo, kyuki jo bhi unki galtiya nikalega toh Allah uski galtiya nikalega wo kyuna apne ghar me hi ho.”

Narrated by Abu Dawood, no. 4880; classed as saheeh (authentic) by al-Albaani.

Aj Hamare Ummat ka haal kya hai? Gaur se dekha jaye toh jhagda, fasaad, bughz hi nazar ayega. Jab ki Ummat me ulfat aur Muhabbat farz hai aur Mustahab aamaal me ikhtilaf ho jaye to usme koi baat nahi hoti. Kyuki ikhtilaf sahaba ke daur se chalte aa rahe hai, ye aam baat hai lekin ye alag baat hai ki Kuch log bhul gaye hai ki ham sab ka zahen ek tarha ke nahi hai, ham sab ki soch alag hai to isi wajah se ham sab ki raaye alag ho sakti hai isme koi badi baat nahi.

Agar ham Quran aur sunnah padhenge to hame pata chalega ki sahaba me bhi ikhtilaf hota tha, lekin kya wo ek dusre par kufr, gushtakh e Rasool, manhajless ka fatawa dete the? Balki wo khule hue zahen se ek dusri ki baat sunte the aur jo kitab wa sunnah se nazdeek raaye ho usko maan liya karte the. Aur aj hmara Islam kya h? Agar ham 99% me ek ho lekin zara sa bhi hamne ek dusre se kisi muamle me ikhtilaf kar liya to us par pahle gumrah ke fatwo ki barish karte hai fir bad zubani aur aakhir me bure alfaz aur gali galoch par utar aate hai. Kya isi ka naam Islam hai? ki ham zara sa bhi ek dusre ko bardasht na kare? Allah ki Panaah!

Ham ye kyu soch lete hai ki sirf ham Hi sahih ho sakte hai. Kya ham Nabi ﷺ ke tarha masum hai? Beshak Nahi. Ham insan hai aur insan se Galatia hoti hai. Ham apne apko farishto ka darja kyu de dete hai ki hamse kabhi koi galti nahi ho sakti. Bas sirf ham sahih hai, hmara firqa haq hai baaki sab galat hai. Khuda ke liye zara aql istemal kare. Ham khud apas me aese Hi ladte rahenge to dusro ko Islam ki dawat kab denge. Gair Muslimo ke samne hmari izzat kya rah jaegi.

Aur Ham Islamic Speakers tak ko nahi chhorte jinhone tab Islam ke liye awaz buland ki thi jab ham sab shirk-biddat aur khurafaat me dube hue the. In sab se nikalne wale Hi wo speakers the. Par afsos un ko tak ham ne na chhora aur wo bhi sirf isliye kyuki ek ya kuch chizo me wo hamse muktalif raaye rakhte hai. Jin speakers ne dunya ke kone kone me ja kar Islam ki dawat di, jinhone hame aur ham jaise laakho Musalmano ko shirk biddat khurafaat se bahar nikala, jinhone ham ko bataya ki Islam kis chiz ka naam hai aur Muslim kise kahte hai? Aj ham gairo se pahle khud unpar hamla kar dete hai aur unko gumrah aur pata nahi kya kya bol jaate hai apni jahalat aur kam ilmi ki wajah se aur afsos dar afsos wo bhi sirf isliye ki wo hmse kuch baato me ikhtilaf rakhte h aur wo bhool jate hai ki sahaba me bhi ikhtilaf hua karte the.

Afsos ki hame Aadab e Ikhtilaf hi nahi pata aur ham badi badi Quran aur sunnat ki baate karte hai.

Ham is tarha khud garz aur jahalat me aachuke hai ki ab ham khud ko jannati aur baaki sabko gumraah aur Dozakhi kahne lage hai. Subhan Allah, Allah hu Akbar. Ye kis tarha ki jahalat hai. Wo sahaba e karaam jinhe Allah ne kaha ki Allah unse raazi aur wo Allah se raazi, kuch ko dunya me Hi jannat ki basharat mil gai. Iske bawujud unhone kabhi ye dawa nahi kiya ki wo jannati hai. Balki hmesha Allah se darte aur usse magfirat ki Ummeed rakhte rahe. Aur hairani ki baat hai ki aj ke log itne bade bade dawe krne lage hai jab ki unke amal aur sahaba ke amal ke bich ki duri wo Hazaar saal ke waqfe me bhi puri nahi kar sakte.

۩ Anas r.a. riwayat karte hai ki RasoolAllah ek jawan ladke ke pas tashreef farmaya hue jo Maut ki halat me tha. RasoolAllah ﷺ ne us ladke se farmaya, "Apko kaisa lag raha hai?" Usne kaha, "Ae Allah ke Rasool, Mujhe Allah par Ummeed hai lekin mai apne gunaho se darta hu". 

RasoolAllah ﷺ ne Farmaya, "Ye do chiz (Ummeed aur Khauf) is surat e haal me ek shaks ke dil me nahi rahta lekin ye ki Allah use ata kar dega jiski wo ummeed karta hai aur use mahfooz rakhega us chiz se jisse wo Khauf me hai."

Sunan Ibn Majah, Kitabul Zuhd, Vol. 5, Book 37, Hadith 4261. Classed as Hasan by Sheikh Zubair Ali Zai r.h. 

SubhanAllah, ye hai ek sahaba ka Attitude. Ye sahabi ne ye nahi kaha ki Ae Allah ke Rasool Mai Haq pe hu, firqa e Najia se hu, Mai to apki sohbat me raha, Quran me Allah ne gawahi diya ki Allah Mujh se raazi, mai Allah se raazi, Nahiii!!! Balki Khauf aur ummeed ke bich ke maut par jo mara wo haq par mara.  SubhanAllah bade bade sahaba ne aesa nahi kaha ki mai Jannat me jaunga balki ummeed hamesha ki ke Allah Jannat de aur Jahannam se najaat de. 

Yaha to ham duniya me jite ji kah rahe hote hai ki mai hi Haq par hu, Mai hi Firqa e Najia se hu, hamara hi firqa jannati hai. Ye kah kar hamne apni islah ke purey darwaze band kar diye hai ki bhai Islah to tu kar apni mai to pahle se hi us jamaat se hu jo puri ki puri jannat jane wali hai. Yahi to tarika hai shaitaan ka ek Muslim ko gumraah karne ka. Tou lihaja hum ummid karte hai ke firqa-e-najia me rahe! Lekin Hum dawa nahi kar sakte ke hum firqa-e-najia se hai. Sahaba ne nahi kiya, bade bade Tabayeen ne nahi kiya, Khud Ulema ne nahi kiya to hamari kyu auqaat fir ki ham dawa kare, Jo Khairul Quroon me the, sabse behtareen zamane me the, jiski gawahi Allah ne di, RasoolAllah ne di, wo aese daawe na karte the, Ye ajeeb baat hai ki aaj ke baad ke daur ke log kaise himmat se karte hai. Pata nahi ye log aesi himmat kaha se laate hai ye bolne ke liye.

Khud ka manhaj sahih baaki sab ka manhaj galat, khud jannati baaki sab dozakhi, Khud Haq par baaki sab gumraah, khud aashiqe Rasool baaki sab gustakh e Rasool. Allah hu Akbar. Kya yahi Islam sikhata h? Islam toh gairo ko bhi apnane ki taleemat deta hai aur ham Apne Musalman bhai ke zara si ikhtilaf ko bhi bardasht nahi kar sakte. Ek dusre ke piche namaze nahi padhte, ek dusre ko salaam nahi karte, Jab ki sahaba Khwarij ko bhi salam kiya karte the aur unke piche namaz padha karte the jab ki khwarij sahaba ko unke muh par Kafir kaha karte the.

۩ Tariq bin Shihaab (Tabayee) r.h. bayan karte hai ke Mai Ali ibn e abi talib r.a. ke paas tha to unse sawal kiya gaya ke Kya Ahl e Neherwaan (ya'ni khawarij) mushrikeen hai? Ap r.a. ne farmaya ke (Nahi), Shirk se to wo Bhage hai. Fir pucha gaya to kya Fir wo munafiq hai? Ap r.a. ne Farmaya: Nahi! Munafiqeen to Allah ta'ala ko bahut hi kam yaad karne wale hote hai (ya'ani khawarij to had se zyada ibadat guzaar hai to wo munafiq kyun kar ho sakte hai). Fir pucha gaya ke aakhir wo (khawarij) kya hai?

Ali r.a. ne farmaya ye (hamare) aise (Musalman bhai) log hai jinhone hamare khilaaf baghawat ki hai.

Al Musannaf ibn Abi Shaiba, Hadith no- 39097, Isnad Sahih.

۩ Abu Shihaab riwayat karte hai ki Hazrat Ibn Umar r.a. Khasbiya aur Khawarij ko salam kiya karte the jab ki wo apas me jang kiya karte the, aur wo (ibn Umar) kaha karte the ki Jo bhi koi “Hayya Alal Salaah” kahega mai is ka jawab dunga (matlab unke masjid me namaz padhunga) aur jo bhi “Hayya Alal Falaah” kahega mai uska bhi jawab dunga, lekin agar koi kahe ki ham Musalman bhaiyo ka katl kare ya unka maal lute tab ham inka sath nahi denge.

Sunan Kubra Baihaqi, Volume : 3, Hadith Number: 5305. Isnad Sahih.

Shaykh Ibn Taymiyya farmate hai,

Khawaarij jo gumrah hue, jinse ladne ka hukm RasoolAllah ne diya tha, aur jinse Ameer al-Mu’mineen ‘Ali r.a., ek hidayat-yafta Khalifa ne jang kari, aur jinse Sahaabah, Taabi‘een aur unke baad aane wale bade ulema bina ikhtilaf unse jang karne se muttakif hue, unhe ‘Ali ibn Abi Taalib, Sa‘d ibn Abi Waqqaas aur durse Sahaabah ne kafir nahi kaha; balki (in sahaba ne) unhe Musalman mana agarche unlogo ne inse jang ki thi…

Majmoo‘ al-Fataawa, 3/282. source: https://islamqa.info/en/182237

Ham aadab e ikhtilaf ke muamle me Sahaba aur salaf ke bilkul ulta kar rahe hai aur daawa karte hai ki ham salaf me tarike par chalne wale hai. Zara Kitab khol kar padhe toh ki hamare asal buzurgaane Deen, hmare salaf ka ikhtilaf ki halat me kya muamla hua karta tha fir apko pata chalega ki ham kidhar jaa rahe hai.

Shaykh Muhammad ibn ‘Uthaymeen ne farmaya

Jadeed daur me Kuch log jinhone salafiyyah ka rasta apnaya unlogo ne har us shaks ko gumraah kahna shuru kar diya jo unse ikhtilaf karta hai yaha tak ke agar wo shaks sahih ho, aur kuch logo ne Hibz ka rasta apnaya jis tarha se dusre groh(parties) ne apnaya tha jo apne ap ko Mazhab e Islam se hone ka dawah karte hai. Ye kuch aesa hai jo na-pasandida hai aur jiski manzuri nahi di ja sakti, aur unlogo se ye kahna chaiye: Salaf as saleh ke tarike ko dekho, wo kya kiya karte the? Un ke tarike ko dekho aur kaise wo khule dil ke the jab ikhtilaf ki surat aati thi jisme ijtihaad jaiyz hai (aur ikhtilaf kabile qubul hai). Woh bade masail me bhi Ikhtilaf karte the, eeman aur amal ke masail me. Ap ko kuch chize milengi, jaise, RasoolAllah ﷺ ka Allah ko dekhne pe inkar karna jab ki dusro ne kaha ki unhone dekha hai. Apne  kuch ko ye kahte hue dekha hoga ki qayamat ke din jo chiz tauli(weighted)  jayegi wo hai aamaal jab ki dusre log kahte the ki wo  to aamaal ki kitab hai jo tauli jayengi. Ap unhe dekhenge ki wo Fiqh ke muamlo me bhi kafi had tak ikhtilaf karte the, jaise Nikah, wirasat ka hissa, khareed aur farokhqt, aur dusre muamlo me. Lekin is ke bawujud unhone ek dusre ko gumraah nahi kaha.

Salafiyyah ek khas Jamaat ke taur par jiski alag khushusiyat ho jisme log un logo ke siwa sabko gumraah kahe, in logo ka salafiyyah se kuch lena-dena nahi hai. Jaha tak ke salafiya jiska matlab salaf ki pairwi karna eeman me, kalimaat aur aamaal me, ittihad, mutabqat aur shafkat aur muhabbat ke taraf bulana jaisa ki RasoolAllah ﷺ ne farmaya: “Momin ke Misaal ek jism me Muhabbat, rahmat aur shafkat ki tarha hai; jab koi ek hisse me takleef hoti hai toh fir baaki hissa bhi us ke sath jaagta hai aur bukhar me shamil ho jata hai- YE ASAL SALAFIYYAH HAI

[Liqaa’aat al-Baab al-Maftooh, 3/246]

Agar ikhtlaf ho bhi jaye kisi masle pe, toh ikhtilaf gusse, gazab, ladai-jhagda, kisi ki izzat utarne ya lanat-malamat karne pe hame aamada na kare. Agar apko waqai lagta hai ki apke kisi bhai me koi kami hai to usse pyar se baat kare, uske hidayat ke liye duae kare, use ache aqhlaq ke sath samjhaye na ki use badnaam kare use buri baate sunaye ya Fatawa baazi kare. Ye hai Hamare salaf ka aqhlaq aur unka manhaj.

Thabit bin Ad-Dahhak r.a. riwayat karte hai ki RasoolAllah ﷺ ne farmaya, “Jisne ek momin pe lanat ki to wo aesa hai ki usne uska katl kiya aur jisne ek momin ko Kafir kaha to ye aesa hai ki usne usko maar dala.”

 Sahih al-Bukhari, 6105.

Allama Iqbal Musalmano kahte hai,

Wa Na Karna Firqa Bandi Ke Liye Apni Zuban

Chup Ke Hai Baitha Huwa Hangama-e-Mehshar Yahan

Do not use your tongue for sectarianism

Resurrection Day’s tumult for booty is stalking

"Wasl Ke Asbab Paida Hon Teri Tehreer Se
Dekh! Koi Dil Na Dukh Jaye Teri Taqreer Se"

Your writings should pave the way for unity
Beware! No heart should be hurt by your speech

•٠•●●•٠•

Allah se dua hai ki wo hame aadab e Ikhtilaf ata kare. aameen.

Read More »

Islah Aur Hamara Rawayya

hi  -

Allah tala ne insan ko aqal se nawaza hai!

Jab kisi dunyawi ya deeni muamle ko samjhne ke liye insan apni aqal istemal karta hai toh usme ikhtilaf paida hona fitri (natural) hai! Aur ye baat deeni aur dunyawi dono taur pe hota hai.

Hame ye sochna chahiye ki ham par haq Allah ke taraf se nazil nahi hoti hai ki usme koi galti ka imkaan (possibility) na ho balki ham insan hai, ham tahkeek karte hai, baaz aukat ham sahih natije par pohchte hai aur baaz aukat hamse galtiya bhi ho jati hai. Bade bade sahabao se galti hui hai, misaal ke taur par umar r.a. ko RasoolAllah ﷺ ko ye samajhna ki un par maut nahi ayi hai fir baad me Abu bakr r.a. ne unhe Quran ka hawala dekar samjhaya tab unhone ye baat tasleem ki ki huzur wafat paa chuke hai. Is waqye ki tafseel ki link is article ke comment box me share kar de raha hu.

Hamare bade bade Imamo se bhi galtiya hui hai, asal me hame ye samajhna chahiye ki ham insan hai paigambar nahi, nubuwat ham par khatm nahi ho rahi hai, jin par khatm honi thi ho chuki hai. Lekin hamare yaha to har banda paigambar hai, ham apni raaye ko is tarha pesh karte hai ki ham par baraherast wahee (revelation) ayi hui hai.

Insan ke akhlak aur kirdar ka asal imtehan hi ye hai ki wo is ikhtilaf ko kaise bardasht karta hai aur apne se alag raaye (opinion) rakhne walo ke liye wo kaisa rawayya ikhtiyar karta hai! Badkismati se hamare muashre mein logo ko ikhtilaf bardasht karne ki taaleem nahi di jaati! Jis mahol, jis firke, jis mazhab, jin riwayato me ham pale-bade hote hum uske khilaf ek lafz sunna bhi bardasht nahi karte! Hum sirf apne mazhab, apne firke, apni riwayat ko hi durust samjhte hai! 

Yahi wo rawayya hai jiski quran jagah jagah mukhalifat karta hai!

Allah pak quran me farmate hai,

Aur Un Se Jab Kabhi Kaha Jata Hai Ke Allah Ta’ala Ki Utaari Hui Kitaab Ki Taraf Aao, Toh Wo Jawaab Dete Hai Ke Hum To Usi Tariqe Ki Pairwi Karenge Jis Par Hum Ne Apne Baap-dadaao Ko Paya Hai, Goya Un Ke Baap Dada Be-ilm Ho Aur Hidayt-yafta Bhi Na Ho.

Surah baqara, ayat-170.

Aur jab koi hum se ikhtilaf karta hai, koi sawal karta hai toh uska jawab shayistagi (narmi) se dene ke bajaye hum uski niyat, uske ilm par hamlawar ho jate hai! Uski personal zindgi ko nishana banana shuru kar dete hai, uske mazhab ko bura-bhala kahne lag jate hai! Ye maan lete hai ki wo gumrah ho gaya hai, ye maan lete hai ki falan shaks ko hidayat nahi mil sakti aur usko jahannam ki basharat dene lag jate hai! Hamara rawaya ek daroga ka hota hai ki kisi tarah tamam insano se apni baat manwa le. Ham logo ko apni baat ke kayal nahi karna chahte balki use un par thopna chahte hai! Hum sawalo se bahut jaldi ghabra jate hai aur jazbati ho jate hai!

Agar gaur kare toh is rawayye se log aap ki baat ke qayal toh nahi honge balki ap se chid zarur jayenge. Koi baat agar dhang se batane par wo apki baat maan bhi lega lekin ap ke is rawaye se nahi maanenge aur uski ek wajah ap bhi honge!

Iski ek wajah ye bhi hai ki hum maan lete hai ki sirf hum hi sahih hai aur baki sab galat hai!

Hamara rawaya ek taalib e ilm (student) ka hona chahiye! Hume hamesha muamlo ko daleel ki roshni me samajhna chahiye. Hame khud apne ander sawal karne ki adat ko zinda rakhna chahiye. Baat karne ke dauran kisi ki niyat par nahi jana chahiye. Kisi ko koi chiz nahi pata ho toh use taana nahi dena chahiye ki tumhe toh itni buniyadi baat bhi nahi pata. Apne ilm ki shokhi nahi bagharmi chahiye. Apne maukif (viewpoint) ke baare me hamsha is maqam par khada rahna chahiye ki mai ek insan hu aur maine falan baat ko puri eemandari se samajhne ki koshish ki hai aur uske baad maine is raaye ko apnaya hai. Mumkin hai ki mujhse smjhne mei galti ho gayi ho! Aagr aap dalil ki bina par meri galti waazeh kar de toh mai gaur aur fikr ke baad apni raayi badal lunga. Agar kisi baat par guftugu karne ke baad mein ikhtilaf baaki rahe toh aisa kyun nahi ho sakta ki hum ikhtilaf ke baad bhi ek dusre se acha aur narmi se pesh aye jaise sahaba ka tarz e amal hota tha ki wo bade bade ikhtilaf ke bawujud apas me pyar muhabbat se rahte the! Hame sahabao ki seerat padhne ki khaas zarurat hai taaki ham aadab e ikhtilaf seekh sake unse.

Ek ahem baat ye bhi hai ki jab ilm ki baat ho toh jazbat ko thodi der ke liye side me rakh dena chahiye kyunki ilm ke maidan mei jazbat ki koi jagah nahi hoti!

Aaj ke science ke daur mei ap sirf jazbat ki bina par kisi ko apni baat ka kayal nahi kar skte! Aaj ap se sawal kiya jayenge, aapke mazhab ke bare me, ap ki riwayat ke baare me, ek -do nahi balki 100 sawal kiye jayenge aur agar ap deen ki dawat le kar uthe hai toh ap ko unko makul jawab dene hi hoga wo bhi narmi ke saath, adab ke sath dene hoga. Aap isse bhag nahi sakte. Hamara rawaya ye nahi hona chahiye ki hum kisi shaks ko kisi tarah zaleel ya be-izzt ya lajawab karde!

Balki hamara maksad logon tak apni baat ko adab se pohuncha dena hai! Kisi shaks ko sirf chup karne ki niyat ya use zaleel kar dene ki niyat dil se nikal bahar fekiye! Isse na uska fayda hoga aur na hi aapka! Balki usse ye kahna chaiye ki dekhen baat ye hai kay mein bhi tumhari tarah ilm ka musafir hoon, mere ilm me ek nayi baat aayi hai aur yeh mujhe boht appeal karti hai. Tum bhi is par gaur kar lo. Aaiye mil kar is par gaur karte hain.

•٠•●●•٠•

Read More »