Haq Chupane Ki Saza – Salaf Ke Fahm Ke Mutabik

Allah pak Quran me farmate hai,

Beshak Jo Log Hamari Nazil Ki Huyi Wazeh Ayaat Aur Hidayat Ko Chipaate Hai, Ba-wajood Ye Ke Hum Ne Use Apni Kitaab Mein Logo Ke Liye Khoob Bayan Kar Diya Hai, Toh Un Logo Par Allah Ki Laanat Aur Tamaam Laanat Karne Waalo Ki Laanat Hai.

Magar Wo Log Jo Tauba Karle Aur Islah Karle Aur (Us Chupaye Hue Ilm Ko) Bayaan Karde, To Main Un Ki Tauba Qubool Kar Leta Hoon Aur Main Tauba Qubool Karne Wala Aur Rahem Wa Karam Karne Waala Hoon.

Surah Baqara, Ayat : 159 And 160.

۩ Abu Huraira r.a. riwayat karte hai ki RasoolAllah ﷺ ne irshad farmaya, "Jis shaks se koi ilm ki baat puchi gai jo us shaks ko malum thi fir bhi usne us (ilm) ki baat ko chupa liya to aese shaks ko qayamat ke din (Allah ki taraf se saza ke taur pe) aag ki lagaam dali jayegi."

Jamia tirmidhi, hadith: 2649; Sunan abu Dawud, hadith-3658. Classed as sahih by Shaykh Zubair ali zai and Shaykh Albani.

۩ Imam Muslim (apne shagird ka zikr karte hue) farmate hai:

"Allah taala tumko hidayat de ke tumne us baat ka iradah zahir kiya hai ke mai is qism ki tamam ahadith ka ek majmua tayar kar ke ikhtisaar ke sath tumare liye jama kardu. Allah taala tumhe izzat ata farmaye jab maine tumhari is farmaish par gaur kiya aur is ke anjaam ki taraf tawajjah ki aur Allah kare iska anjaam achha ho toh mujhe ye andaza hua ke aur logo se pahle khud mujhe bhi ye majmua tayar karne ka fayda hoga.

Mazbuti aur sehat ke sath thodi si ahadith ko yad rakhna zyada aasan hai khas taur pe awamun-naas ke liye jinhe sahih aur gair-sahih ahadith me tameez hasil hi nahi ho sakti jab tak ke dusre log unko bata na de. Pas aisi surat e haal me thodi tadad me sahih riwayaat jama karne ka iradah karna boht zyada tadad me zaif riwayaat jama karne se zyada behtar aur mufeed hoga."

Muqaddamah Sahih Muslim (introduction). [muqammal muqaddamah padhe]

۩ Abu Hurairah r.a. riwayat karte hai aur kahte hai ki, log kahte hai ke Abu Hurairah bohot haadeese bayaan karte hai. (aur mai kahta hu ke) Quran me 2 aayate na hoti to mai ek bhi hadith bayan na karta. [fir ye aayat padhi, (tarjuma)].. "Jo log Allah ki naazil ki hui daleelo aur aayato ko chupate hai...( aakhir aayat, رحيم) tak." [Surah baqara, ayat- 159 and 160].

(Waqya ye hai ke) humare Muhajireen bhai to bazaar ki khareed o farokht me lage rahte the aur Ansaar bhai apni jaidado me mashgool rahte the lekin mai (Abu Huraira) Rasool ﷺ ke sath jee bhar kar rahta aur un majliso me hazir rahta jinme dusre haazir na hote aur wo baate mahfooz rakhta jo dusre mahfoz nahi rakh sakte the."

Sahih al Bukhari, hadith-118.

Note: Hikmat e Tabligh ke tahat kuch waqt ke liye haq baat ko pohchane par taakheer (delay) kar dena haq ko chupana nahi hai:

Hazrat Anas r.a. se riwayat hai, unhone farmaya: Ek dafa Hazrat Ma’az r.a. ne Rasool Allah ﷺ ke humraah sawaari par pichhe baithe the, Aapne farmaya : “Aye Ma’az Ibn-e-Jabal !” Unhone arz kiya : Ya Rasool Allah ! Sa’adat mandi ke saath haazir hun. Phir Aapne farmaya : “Aye Ma’az !” Unhone phir arz kiya : Ya Rasool Allah ! Mai haazir hun. Teen (3) martaba aisa hua. Phir Aapne farmaya : “Jo koi sachche dil se yeh gawaahi de ke Allah ke siwa koi Mabood-e-Haqeeqi nahi aur Muhammad (ﷺ) uske Rasool hain to Allah us par dojakh ki aag haraam kar deta hai.” Hazrat Ma’az ne arz kiya : Ya Rasool Allah ! Kya mai logon mein iski tash’heer na kar dun taake wo khush ho jaayen ? Aapne farmaya : “Aisa karega to unhe isi baat par bharosa ho jaayega.” Fir hazrat Ma’az r.a. ne apni wafaat ke qareeb (hadees chupane ke) gunaah se bachne ke liye yeh hadees logon ko bayaan ki. 

Sahih al-Bukhari, kitab al ilm, hadith- 128.

•٠•●●•٠•

Allah ham sab ko haq chupane se mahfooz rakhe. aameen.

Read More »

Websites Par Ishteharaat (Ads) Lagane Ka Bayan

Alhamdulillaah..

Bunyadi Usool yahi hai ke is Tasheeri (advertising) program me ishtiraak hasil karna jayz hai jab tak ke jin websites ka aelaan kiya jata hai in me kisi qism ka haram kaam par ta’awun shamil na ho; Kyu ke gunahon ke liye Tasheeri muhim, aur us ke liye mu’aawenat pesh karna jayaz nahi hai.

Is baare me Farman e Bari Ta’ala Hai,

وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الْإثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَابِ

Tarjuma: Neki aur Taqwa ke kaamo me ek dusre ka ta’aawun karo, gunah aur zyadati ke kaamon me ek dusre ka ta’aawun mat karo, aur Allaah se daro, beshak Allaah Ta’ala sakht aazaab dene wala hai.

[Al-Maidah:2].

Aise hi Aap ﷺ ka farman hai ke, “Jo shakhs Neki ki daawat dega, ise Neki karne wale ke barabar sawaab milega, aur is tarah dono mai se kisi ka bhi sawaab kam nahi hoga, aur jo shakhs Gumrahi ki dawat dega, ise Gumarahi par chalne wale ke barabar gunah milega, aur is se kisi ke gunah me kami bhi nahi aayegi.”

Sahih Muslim, Hadith-4831.

Agar Ishteharaat halal hai to isme koi harj nahi hoga. Is ke liye hame itna khayal zarur ho ki shari’at ke khilaf aelanat ko roka jaye aur agar ham aesa na kar sake to is amal se dur ho jaye kyu ke fir ham haraam kamon ki tarweej mein shareek ho jayenge.

Wallahu Tala’ Àalam

•٠•●●•٠•

Allaah Ta'ala se dua hai ke wo hame apne khaas fazal se rizq inayat farmayein.

Read More »

Quran Likhne Wala Koun Hai Aur Ise Jama Kis Tarah Kiya Gaya?

Alhamdulillah..

۩1. Allah paak ne Quran kareem ki hifazat apne zimme lete hue farmaya:

Beshak Hum Ne Hi Quran Ko Nazil Kiya Aur Hum Hi Is Ki Hifazat Karne Wale Hain.

[Surah al-Hijr 15:9] .

Ibn Jareer al-Tabari kahte hain ki, "Allah ka farmaan hai ke Beshak humne hi zikr ko nazil farmaya hai aur wo zikr quran hai aur hum hi is ki hifazat karne wale hain." Allah ne is me ye farmaya ke kahin is me batil ka izafa na kar diya jaye ya fir is ke ahkam o hadood aur faraiz main se kuch kami na kar di jaye

[Tafseer at Tabari, 14/8] .

Aur Sheikh Al-Sa’di apni Tafseer me kahte hain ke:

"Beshak humne hi zikr ko nazil kiya hai ya'ani Quran ko nazil kiya jis me har cheez ka zikr hai. Masa'il aur wazeh dalail wagerah aur isi tarah is me se jo naseehat hasil karna chahe us ke liye naseehat bhi hai. Aur hum hi is ki hifazat karne wale hain yaani waqt e nuzool aur nuzool ke baad bhi, to nuzool ki halat me hum ne ise har shaitan e mardood se jo ke chori chupe sun'ne wala hai se mahfooz rakha hai aur nuzool ke baad Allah ne ise apne RasoolAllah ﷺ aur un ki ummat ke seeno me mahfooz kiya, Aur Allah ne is ke alfaaz ko zayadti aur nuqsan aur is ke ma'ani ko tageer tabdal se mahfooz rakha hai toh is ke ma'ane me tahreef karne wala koi bhi tahreef karta hai,

To Allah aise ulema paida farma deta hai jo ke haq ko bayan karte hain.

To Allah ki ye sab se azeem nishani or nai'mat hai, Jo ke us ne apne momin bandon par ki hui hai, aur Quran ki ye bhi hifazat hai ke Allah ne is par amal karne walo ko in ke dushmano se mehfooz rakha aur in ke dushmano ko in par musallat nahi ho sakta.

Rasoolallah ﷺ par quran 23 baras me thoda thoda kar ke bawaqt e zarurat nazil kiya gaya.

Allah ka farmaan hai:

Aur Quran ko hum ne thoda thoda kar ke is liye utara hai ke Aap ise ba-mohlat logon ko sunae aur hum ne khud bhi ise batad'reej nazil farmaya.

[Surah al-Isra’ 17:106] .

Shiekh shuada r.A bayan karte hain ke:

Ya'ani Hum ne ye Quran faraq karne wala bana kar nazil kiya hai jo ke haq o batil aur hidayt wa gumrahi ke darmiyan farq karne wala hai.

(Yeh ke Aap ise bhi mohlat logon ko sunae) Ya'ani mohlat ke sath taa'ke wo is ke ma'ane par gour wa fikr aur tadabbur kar sake aur is ke uloom ka istehraj kare. Aur hum ne khud bhi ise batadreej nazil farmaya thoda thoda kar ke 23 baras me nazil kiya.

Tafseer al-Sa’di, p. 760. 

۩2. Arab me likhai aur kitabat bohut hi kam ki jati thi, aur Allah ne inhe isi wasf se nawazte hue farmaya:

'Allah wahi hai jis ne nakhawanda logon me in hi me se ek Rasool bheja.

[Surah al-Jumu’ah 63:2] 

To wo log Quran kareem ko apne seeno me hifz karte the aur un me se bohut hi aise the jo ke ba'az ayat or surah chamdy aur bareek patharon wagera par likh liya karte the.

۩3. Rasoolallah ﷺ ne shuru me Quran e kareem ke alawah kuch aur likhne se mana farma diya tha, aur unhe apne kalaam likhne se mouqtan rok diya tha hat'ta ke sahaba karaam ki himmate Quran kareem ke hifz aur is ki kitabat par badh jaye, aur is liye ke Rasoolallah ﷺ ki hadiths ka Allah ke kalaam Quran kareem ke sath iqhtelaf na ho jaye aur quran kareem zyadti o nuqsan se mehfooz rahe.

۩4. Rasoolallah ﷺ ne Ameen aur Fuqha sahaba karaam ki ek Jamaat ko wahi likhne ki zimmedari sounp rakhy thi aur wo sahaba apne tarajim me katib e wahi ke sath is tarah ma'aroof nahi jitne ke khulafa e Arba'a aur Abdullah bin Amr bin A'as r.a. aur Muawiya bin Abi Sufyan aur Zaid bin Saabit wagera r.a. maaroof hain.

۩5.  Quran kareem 7 lughat o lehjaat me utara gaya jaisa ke Umar bin khattab r.a. ki hadees Rasoolallah ﷺ se sabit hai.

This was narrated by al-Bukhaari (2287) and Muslim (818).

Aur ye lughat aur lehjaat fasahat me ma'aroof hain.

۩6. Khalifa awwal Abu bakr Siddiq r.a. ke daur tak Quran kareem sahaba karaam ke seeno aur chamdi wagaira par baqi aur mahfooz raha, is ke baad murtadeen ke sath ladaiyo me bohut se Hafiz Sahaba karaam shaheed hone lage to Abu Bakr r.a. ko dar paida hua ke kahin Quran kareem Sahaba Karaam ke seeno me hi na rah kar zaaya ho jaye, toh unho ne kabaar Sahaba karaam se mashwara kiya ke mukammal Quran kareem ko ek kitab me jama kyun na kar liya jaye ta'aki wo zaaya hone se mahfooz rahe,

To ye kaam unho ne hafiz me se Zaid bin saabit r.a. ke zimma lagaya. Is ka zikr Imam Bukhari r.a. ne kuch yunh kiya hai:

Zaid bin saabit r.a. bayan karte hain ke Abu Bakr r.a. ne Jung e Yamama ke baad meri taraf paigham bheja (main jab aya to) Umer r.a. ko un ke paas dekha to Abu Bakr r.a. kahne lage ke Umar r.a. mere paas aa kar kahne lage ke jung e Yamama me Quraa' karam ka Qatl (shahadaten) boht badh gaye hai, aur mujhe ye dar hai ke kahi dusre mulkon me bhi Quraa' karaam ki shahadaten na badh jaye jis bina par bohut sa Quran un ke seeno me us ke sath hi dafan ho jayega, aur meri raye to ye hai ke Aap Quran jama karne ka hukm jari kar de.

To maine Umer bin khattab r.a. se kaha ke tum wo kaam kaise karoge jo kaam RasoolAllah ﷺ ne nahi kiya?

To Umar r.a. ne jawab diya Allah ki qasam ye khair aur bhalai hai, to Umar r.a. baar baar mere sath ispar baat karte rahe hat'ta ke Allah ne is bare me sharah sadr kar diya aur ab meri raye bhi wahi hai jo umar r.a. ki hai.

Zaid bin Saabit r.a. kahte hain ke Abu bakar r.a. kahne lage ke tum ek noujawan aur aqalmand shaqs ho hum Aap par koi kisi qism ki tohmat bhi nahi lagate aur phir tum Rasoolallah ﷺ ke katib e wahi bhi rahe ho, to tum Quran ki talash kar ke jama karo.

Zaid r.a. bayan karte hain ke Allah pak ki qasam agar wo mujhe ek jaga se dusri jaga koi pahaad muntaqil karny ka makalf karte to mujh par wo itna bhari na hota jitna ke Quran kareem jama karny ka kaam bhaari aur mushkil tha. Mai kahne laga tum wo kaam kaise karoge jo kaam Nabi ﷺ ne nahi kia? Wo kahte hai ke Allah ki qasm ye khair aur bhalai hai, toh Abu Bakr r.a. baar baar mujh se kahte rahe hatta ke Allah pak ne mera bhi sharah sadar kar dia jis tarah Abu Bakr aur Umer r.a. ka sharah sadar hua tha, toh main Quran kareem ko logo ke seene aur chaal or bareekh pathrun se jama karna shuru kar dia hatta ke Surah tauba ki akhri Ayat Abu Khuzaymah al-Ansaari r.a. ke ilawa kisi aur ke pas na pai (tumhary pas aisa Rasool tashreef laye hai jo tum me se hi hai, jise tmhari nuqsan ki baat nihayat garaan guzarti hai).

To ye mushaf Abu Bakar r.a. ki wafaat tak un ke pas rahi fir un ke baad taa-hayat Umar r.a. ke pas aur un ke bad Hafsa bint Umar r.a. ke pas rahi.

Sahih al bukhari, kitab fazail al quran (66), hadees- 4986.

Sahabi Rasool Allah ﷺ Zaid Bin Sabit r.a. khud bhi hafiz e Quran the, lekin is ke bawajood unho ne Quran kareem ke saboot ke liye ek khas manhaj (tarika) ikhtiyar kiya to wo us waqt tak koi ayat nahi likhte the jab tak 2 sahabi ye gawahi na de den ke unho ne ise Nabi akram ﷺ se suna hai. Toh ye mushaf khulafa ke hath me khalifa Rashid Usman Bin Affaan  r.a ke daur tak raha, aur sahaba karam mukhtalif mumalik me phail chuke or wahan wo Quran in saat lehjon me hi padhte the. Jab  unho ne nabi pak ﷺ se suna tha, toh un ke shahgird isi tarah parhte jis tarah ke us ke Sheikh aur Ustaad ne usey padhaya tha.

Jab ek shahgird apne ham asar bhai ko Quran kisi aur lehje me padhta hua dekhta wo use galat kahta aur us ka inkar karta ye mamla isi tarah chalta raha to sahaba ikraam ko ye khadsha la haq hua ke Taabaeen aur un ke bad aane walo ke darmiyan fitna na paida ho jaye is liye inhe ye khayal aaya ke logon ko sirf Quraish ke lehje par jama kar diya jaye jin par Quran kareem nazil hua hai taaki ikhtalaf ko mitaya aur us ki jad hi khatam kar di jaye. Usman r.a. se mashwara kiya to unho ne bhi is muwafiqat kar di.

Imam bukhari r.h. Yunus Bin Malik r.a se apne Sahih (4988) me bayan karte hai ki Huzaifa Bin Yamaan r.a Usman r.a. ke paas aaye jo ke Armenia aur Azerbaijan ko fatah karne ke liye ahle Iraq ke sath mil kar shamion se gazwah kar rahe the. Huzaifa Bin Yamaan r.a. ko qiraat me un ke ikhtilaf ne ghabrahat me daal diya tha. Huzaifa Bin Yamaan r.a. Usman r.a. se kahne lage Aye Ameer ul Momineen is Ummat ko kitabAllah me Yahoodiyon aur Isaaioon ki tarah ikhtilaf karne se pehle hi pakad len, to Usman r.a. ne ummul Momineen Hafsa r.a. ke paas paigham bheja ke hamein wo Musahaf do, hum us ke nuskhey tayar karne ke bad ye Mushaf apko wapas de denge.

Usman r.a. ne Zaid Bin Sabit r.a. Abdullah Bin Zubair aur Saeed Bin Asas aur Abdur Rahman Bin Haris Bin Hasham ko Mushaf ke nuskhe tayar karne ka hukum diya, aur is groh me se 3 Quraishion ko ye kaha ke agar tum aur Zaid Bin Sabit r.a. Quran ki kisi chiz me ikhtilaf karo to use Quraish ke lugat me likho kyun ke Quran in ki zuban me nazil hua hai toh unho ne aisa hi kiya. Jab nuskhe tayar ho chuke to Usman r.a. ne mushaf ummul Momineen Hafsa r.a. ko wapis kar diya aur un nuskhon me se har ek taraf ek nuskha bhej diya aur ye bhi hukum diya ke us nuskha ke ilawah har mushaf aur sahifah jala diya jaye. Ibn Shahaab Zahri kahte hain ke mujhe Kharja Bin Zaid Bin Sabit r.a. ne bataya ke Zaid Bin Sabit r.a. ne farmaya ke mujhe Mushaf Nuskh karte waqt Surah al Ahzaab ki ek ayat na mili jo ke mai ne Nabi pak ﷺ se suna karta tha jab ham ne ise talash kiya to wo hame Khazima Bin Sabit Ansari r.a. se mili to ham ne Mushaf ke Surah Ahzab me mila diya.

To isi tarah ikhtilaf ki jad kaat di gayi aur ek hi kalma bana aur Quran kareem logon ke seeno me tawatur ke sath mahfooz raha aur Qayamat tak rahega. Toh yahi wo Allah tala ki hifazat hai jo Allah pak ke us farman ka misdaaq hai:

Beshak Hum Ne Quran Ko Nazil Farmaya Aur Hum Hi Is Ki Hifazat Karne Wale Hain.

[al-Hijr 15:9]

Wallahu Tala Aalam.

•٠•●●•٠• 

Related: Surat aur Ayat ko Mukhtalif Tarteeb me Tilawat Karna

Read More »

Dua Ki Qubuliyat Ka Waqt

QUBULIYAT E DUA KE MAKHSUS ZAMAAN WA AMKAAN

Dua ki qubuliyaat ke liye mat'ad auqaat aur jagahey hai, jin me sey hum kuch yaha bayan karte hain..

۩1 : Raat Ke Akhri Hissey Mein -

Yaani sehri ke waqt dua karna, is waqt Allah ta'ala asmaan duniya tak nuzul farmate hai, ye Allah subhanahu wata'ala ka apne bando par fazl wa karam hai ke inki zaruriyaat aur takleef dur karne ke liye nuzul farmata hai, aur sada lagate hai, "Kaun hai jo mujhe pukare toh mein uski dua qubool karu. Kaun hai jo mujh sey mangey toh mein usey ata karu. Kaun hai jo mujh se apne gunaho ki bakshish mangey , toh usey baksh du"!

Sahih al Bukhari, Hadith- 1145.

۩2 : Azaan Aur Iqamat Ke Darmiyaan -

Nabi ﷺ sey sahih sabit hai k ap ne farmaya, "Azaan aur iqamat ke darmiyaan Dua radd nahi hoti.

Narrated by Abu Dawood (521) and al-Tirmidhi (212). See also Saheeh al-Jaami’, 2408.

۩3 : Barish Ke Waqt -

Sahl bin saad radiallah anha ki riwayat mein Nabi ﷺ sey manqul hai ke Ap ne farmaya, Do (2) Duae radd nahi hoti, Azaan ke waqt ki dua aur barish ke waqt ki dua.

Narrated by Abu Dawood and classed as saheeh by al-Albaani in Saheeh al-Jaami’ (3078).

۩4 : Raat Ke Kisi Hissey Me Dua -

Aap ﷺ ka farmaan hai, "Raat ke waqt ek aesi ghadi ati hai jis me koi bhi Musalmaan Dunyawi aur Akhirat ki khair mange toh isey woh chiz de di jati hai, yeh ghadi har raat ati hai."

Sahih Muslim, Hadith- 757.

۩5 : Jummah Ke Din Qubuliyat Ki Ghadi -

RasoolAllah ﷺ ne Jummah ke din ka tazkirah karte hue faramaya, Is din me ek asi ghadi hai jis me koi bhi Musalmaan Allah ta'ala se khade ho kar dua mangey Toh Allah ta'ala use woh chiz ata farmata hai. Aur Nabi ﷺ ne is ghadi ke intihai mukhtasir hone ka ishrah bhi faramaya.

Narrated by al-Bukhaari, 935; Muslim, 852.

۩6 : Zamzam peete waqt ki dua -

Jabir radiallah anha Nabi ﷺ se bayan karte hain ke Zamzam ka pani har us maksad ke liye hai jis maksad se piya jaye.

Narrated by Ahmad and classed as saheeh by al-Albaani in Saheeh al-Jaami’, 5502.

۩7 : Sajde Ki Halat Me Dua -

Nabi ﷺ ka farmaan hai, "Banda apne Rab ke qareeb tareen sajdey ki halat mein hota hai, isliye kasrat se sajde ki halat me dua karo.

Sahih Muslim, Hadith-482.

۩8 : Murge ki awaaz sunne ke waqt -

Nabi ﷺ ka farmaan hai, "Jab tum murge ki awaaz suntey ho toh Allah se fazl ilaahi manga karo, kyuki us waqt murge farishte ko dekhta hai."

Narrated by al-Bukhaari, 2304; Muslim, 2729.

۩ La Ilaha Illa Anta, Subhanaka, Inni Kuntu Mina Z-zalimin Padh Kar Dua Mangey -

Nabi ﷺ ne farmaya, "Yunus alaihi salaam ki dua machli ke pait mein yeh thi :‘Laa ilaaha illa anta, subhaanaka, inni kuntu min al-zaalimeen aur in alfaz ke zariye koi bhi Musalmaan Allah ta'ala se dua mangey toh Allah ta'ala is ki dua zarur Qubool farmata hai.

Narrated by al-Tirmidhi and classed as saheeh in Saheeh al-Jaami’, 3383.

۩ Musibat Pardne Par Inna Lillaahi Wa Inna Ilayhi Raaji’oon. Allaahumma Ujurni Fi Museebati W'ukhluf Li Khayran Minha Ke Zariye Dua Karna -

Umme Salama radiallah anha kahti hai ke maine Nabi ﷺ ko famatey hue suna (koi bhi musalmaan kisi bhi musibat k puhuchne par huqm e ilaahi k mutabik kahta hai :

Inna Lillaahi wa inna ilayhi raaji’oon. Allaahumma ujurni fi museebati w'ukhluf li khayran minha .

[Beshaq hum Allah ke liye hai, aur isi ki taraf lautenge, ya Allah mujhe meri Musibat me ajr ata farma, aur mujhe isse accha badla naseeb farma] toh Allah ta'ala isse accha badla zarur ata farmata hai.

Sahih Muslim, Hadith-918.

۩ Mayyat Ki Ruh Parwaaz Kar Jane Par Logon Ka Dua Karna -

Ek hadees me hai ke Nabi ﷺ ne Abu Salma radiallah anha ke pass aye, Aap faut ho chukey the] aur apki ankhey pathra gayi thi,aap ne unki ankhey band farmaya, ( jis waqt ruh qabz ki jati hai, nazar uska picha karti hai) ye sun kar Abu Salma radiallah anha ke ahlekhana mein sey kisi ne cheekh mari, Toh Aap ﷺ ne faramay, "Apne liye acche kalimaat hi bolo, kyuki jo bhi kaho ge farishtey is par aameen kah rahe hai.

Narrated by Muslim. 2732.

۩ Beemar Admi Ke Pass Dua Karna -

Umme Salma radiAllah anha kahti hai ke Rasoolallah ﷺ ne faramaya, "Jab tum mareez ke pass aao toh acchi baat kaho, kyuki Farishtey Tumhari un baaton par aameen kahtey hai. Umme Salma radiallah anha kahti hai ke jis waqt Abu Salma faut ho gaye toh mai RasoolAllah ﷺ ke pas ayi aur apko khabr di ke Abu Salma faut ho gaye hai toh Ap ﷺ ne farmaya tum ye kaho, "Ya Allah meri aur is ki magfirat farma, aur mujhe isse accha badle me ata farma. Umme Salma kahti hai, "Maine ye alfaz kahe, toh Allah ta'ala ne mujhe Abu Salma se behtar khawind ata kiya. Yani "Muhammad ﷺ"

Sahih Muslim, Hadith no. 918.

۩ Mazlum Ki Dua -

Ek Hadees me hai ke Nabi ﷺ ne farmaya, "Mazlum ki baddua se bacho, kyuki Allah aur mazlum ki baddua ke darmiyaan koi parda nahi hota".

Narrated by al-Bukhaari, 469; Muslim, 19.

Aap ﷺ ka ye bhi farmaan hai ke, "Mazlum ki baddua Qubool hoti hai, chahey wo fajir hi kyu na ho, us ke fajir hone ka nuqsaan usi ho hoga.

Narrated by Ahmad. See Saheeh al-Jaami’, 3382.

۩ Walid Ki Apni Aulaad Ke Haq Me Dua, Rozadaar Ki Rozey Ki Halat Me Dua Aur Musafir Ki Safar Ke Dauran Dua -

Aap ﷺ ne farmaya, Teen qism ki Duae radd nahi hoti. Walid ki apni aulaad ke haq me, rozadaar aur musafir ki dua.

Narrated by al-Bayhaqi; see Saheeh al-Jaami’, 2032; al-Saheehah, 1797.

۩ Walid Ki Apni Aulaad Ke Liye Baddua -

Sahih ahadees me hai ke, "Teen duaye qubool hoti hai. Mazlum ki dua, Musafir ki dua, Walid ki apni aulaad ke liye baddua".

Narrated by al-Tirmidhi, 1905. See Saheeh al-Adab al-Mufrad, 372. 

۩ Nek Aulaad Ki Apne Walidein Ke Liye Dua -

1. RasoolALlah ﷺ ne farmaya ki jab koi insan marta hai to uske nek aamal band kar diye jate hai siwae teen tarah ke:

1) Sadka e jariya(Allah ke raah me lagaya hua hamara maal jo logo ko fayda pohcha raha ho)
2) Jo Ilm logo ko sikhaya ho wo usse fayda utha ra ho

3) Nek aulad jo uske liye dua kare.

Reported by al-Tirmidhi, no 1376; he said this is a saheeh hasan hadeeth.

۩ Raat Ke Waqt Kisi Bhi Lamhey Ankh Kholney Par Un Masnon Alfaz Ke Baad Dua Kare -

'Ubada bin As-Samit r.a. riwayat karte hai ki RasoolAllah ﷺ ka farmaan hai, "Jo shaqsh raat ke waqt bedaar huwa, aur us ne yeh kaha -'La ilaha il-lallah Wahdahu la Sharika lahu Lahu-lmulk, waLahu-l-hamd wahuwa 'ala kullishai'in Qadir. Al hamdu lil-lahi wa subhanal-lahi wa la-ilaha il-lal-lah wa-l-lahu akbar wa la hawla Wala Quwata il-la-bil-lah.'Ya koi aur dua mangi toh iski dua qubool hogi, aur agar wuzu kar ke namaz padhi toh iski namaz bhi qubool hogi.

Sahih al-Bukhari, Hadith-1154.

•٠•●●•٠•

Allah se dua hai ki wo hamari duao ko qubul farmaye. aameen.

Read More »

Sirf Jumah Ko Roza Rakhne Ka Hukm

Sawal: Kya Aap Mujhe yeh bata sakte hain ke Kya hamare liye yeh Jayez hai ke hum sirf Jumah ka Nawafil Roza rakhen ?

Jawab

Alhamdulillah..

Saheehayn mein Abu Hurairah Radi Allah Ta'ala Anha se Hadith hai ke, wo bayaan karte hain ke Maine Nabi ﷺ ko yeh farmate hue suna, "Tum mein se koi bhi sirf Jumah ka Roza Na rakhe illa yeh ke ek isse qabl ya ek Din iske baad.

Sahih Bukhari, Hadith No. 1849

Sahih Muslim, Hadith No. 1929.

Aur Imam Muslim Rahma Allah Ta'ala ne Apni Sahih Muslim mein Abu Hurairah Radi Allah Ta'ala anha se bayan kiya hai ke wo farmate hain ke Nabi ﷺ ne farmaya, "Jumah ki raat ko baaqi raaton se Qayaam ke liye khaas Na karo aur Jumah ko baaqi dino ke Roze ke liye khaas Na karo illa yeh ke wo tumhare Rozon ke darmiyan aa jaye.

Sahih Muslim, Hadith No. (Al-Siyaam / 1930).

Aur Sahih al Bukhari mein hai ke Juwayriyah bint Haaris Radi Allah Ta'ala Anha bayaan karti hain ke Jumah ke Din Nabi ﷺ uske paas aayen to Mai Roze se thi to Nabi ﷺ ne farmaya kya tu ne kal Roza rakha tha ?

To wo kahne lagi Nahi, toh Nabi ﷺ ne farmaya achcha kya kal Roza rakhne ka irada hai ?

To wo kahne lagi Nahi, toh Nabi ﷺ ne farmaya, "Roza iftaar kardo (Roza tod do)."

Aur wo kahte hain ke Hammaad ibn al-Ja’d ne Qutaadah se suna, unhone kaha ke mujhe Abu Aaiyub ne Hadith bayaan ki ke Juwayriyah Radi Allah Ta'ala Anha ne bataya ke Nabi ﷺ ne unhe hukm diya to unhone Roza iftaar kar diya.

Sahih Bukhari, Hadith No. (Al-Siyaam / 1930).

Ibn Qudaamah Rahma Allah Ta'ala bayaan karte hain ke, "Akela Jumah ka Roza rakhna Makrooh hai illa yeh ke agar koi Roza rakhta ho to yeh uske Mawafiq aa jaaye, maslan : Ek Shakhs ek din Roza rakhta aur ek din iftaar karta hai to iska Roza wala Din Jumah ke Mawafiq aa jaaye.Aur issi tarah agar kisi ki yeh aadat ho ke wo har mahine ke Pahle ya Aakhiri Din aur ya phir Mahine ke darmiyan mein Roza rakhta ho

Mughni ibn Qadamah, Jild No. 3, Page No. 53

Aur Imaam Nawawi Rahma Allah Ta'ala ka Qaul hai ke, "Hamare Ashaab (yaani Shaafa’is) ka Qaul hai ke Akela Jumah ka Roza rakhna Makrooh hai agar tum isse pahle ya baad mein ek Roza mila liya jaaye ya iski aadat ke Rozon ke Mawafiq aa jaaye ya phir iski Nazar maani ho ke wo jis Din Shifayaab hoga Roza rakhega ya yeh ke zaid ke hamesha aane par tum agar iske mawafiq Jumah aa gaya to Makrooh Nahi.

al-Majmoo’ Sharh al-Muhadhdhab, Jild No. 6, Page No. 479.

Aur Sheikh ibn Taymiyya Rahma Allah Ta'ala ke Qaul hai : Sunnat tariqa yeh raha hai ke sirf Rajab ke aur Jumah ka Akela Roza rakhna Makrooh hai.

Fatawa Al-Kubra, Jild No. 6, Page No. 180

 Ibn ‘Uthaymeen Rahma Allah Ta'ala ka Qaul hai : Jumah ka Roza rakhna Sunnat Nahi aur iska Akela Roza rakhna Makrooh hai.

Dekhein Kitab : al-Sharh al-Mumti’, Jild No. 6, Page No. 465.

To is Nahi se yeh cheez Mustasna hai ke isse pahle ya baad mein Ek Roza rakh liya jaaye ya phir un Rozon ke darmiyan aa jaaye jo ke Aadata rakhe jaate hon, Maslan jo ke Aaiyam-e-Baiz ke Roze rakhta hai ya phir kisi ki Moeen Din Roza rakhne ki Aadat ho Maslan Yaum-e-Afrah to yeh Din Jumah ke mawafiq ho gaya aur issi tarah uske liye bhi Jayez hai jisne yeh Nazar maani ke jis Din zaid aayega Roza rakhunga to wo Jumah ke Din aaya ya yeh ke jis Din Falan Aadmi Shifayaab hoga to Roza rakhunga to yeh Jumah ka Din ho.

Dekhein Kitab : Fath al-Baari lil ibn Hajr Rahma Allah Ta'ala.

Aur issi tarah jiske Zimme Ramzan ke Rozon ki Qaza ho, to Musalman ke liye Jayez hai ke wo Jumah ke Din Roza rakhe agarche wo Akela hi Kyun Na ho.

Fatwa al-Lajnah al-Daa’imah, Jild No. 10, Page No. 347.

Aur issi tarah agar Yaum-e-Aashura ya Yaum-e-Arfah Jumah ko aa jaaye to iska Roza rakha jaayega Kyunki iski Niyat Aashura ki hai, Na ke Jumah ki.

Aur Allah Ta'ala hi Taufeeq bakhsne wala hai.

Wallaho Aalam

Read More »

Surah Fatiha Ki Tafseer

Surah Fatiha, Ayat 1-7.

Aauzu Billahi Minashaitanir Rajeem. Bismi Allahi arrahmani arraheem.

Mai Panah Maangta Hu Allah Tala Ki Shaitaan Mardood Se. Shuru Allah Ke Naam Se Jo Behad Maherbaan Nihayat Rahem Wala Hai.

1. Allah Ke Naam Se Jo Bohat Maherban Bohat Raham Kerne Wala

2. Sab Tareef Allah Taalaa Kay Liye Hai Jo Tamam Jahanon Ka Palney Wala Hai.

3. Bara Meharban, Nihayat Reham Kerney Wala.

4. Badlay Kay Din (Yani Qayamat) Ka Maalik Hai.

5. Hum Sirf Teri Hi Ibadat Kartay Hain Aur Sirf Tujh Hi Say (Gaibi Taur Par) Madad Mangte Hain.

6. Hume Seedhi Raah Dikha.

7. Unn Logon Ki Raah Jin Per Tu Ney Inaam Kiya, Naaki Unlogo Ki Raah Jin Per Ghazab Kiya Gaya.

۩ Tafseer e Ibn Abbas r.a.:

Hazrat Ibn Abbas r.a. farmate hain ke ek din Hazrat Jibrail a.s. Nabi ﷺ ke paas baithe hue the ki achanak upar se ek awaz suni to Aap ﷺ ne apna sar mubarak uthaya Hazrat Jibrail a.s. ne farmaya ke ye darwaza aasmaan ka hai jise sirf aaj ke din khola gaya hai, is se pahle kabhi nahi khola gaya.  Fir us se ek Farishta utra Hazrat Jibrail a.s. ne farmaya ke ye Farishta jo zameen ki taraf utra hai ye aaj se pahle kabhi nahi utra. Us Farishte ne salaam kiya aur kaha ke Aap ﷺ ko un do Nuron ki khush khabri hai jo Aap ﷺ ko diye gaye jo ke Aap ﷺ se pahle kisi Nabi ko nahi diye gaye, Ek Surah Al Fatiha aur Dusri Surah Al Baqra ki aakhiri Aayat Aap ﷺ in me se jo bhi hurf padhenge Aap ﷺ ko us ke mutabiq (sawab) diya jayega.

Sahih Muslim, Hadith 1760.

۩ Tafseer e Abu Huraira r.a.:

Abu Hurairah r.a. Se Riwayat Hai Ke Nabi ﷺ Ne Farmaya,

“Jis Ne Namaz Padhi Aur Isme Surah Fatiha Na Padhi To Uski Namaz Naaqis Hai (Puri Nahi) Teen Baar Farmaya,”.

Abu Huraira r.a. Se Kaha Gay Ke Agar Hum Imam Ke Peeche Ho Toh?

Ap r.a. Ne Farmaya Aahista Padha Karo Kyunki Maine Rasulallah ﷺ Se Suna Hai Ke Allah Tala Ne Farmaya Namaz Mere Aur Bande Ke Darmiyan Aadhi Taqseem Hogai Hai, Aur Mera Banda Jo Bhi Maange Ga Use Wahi Milega. Chunanche Banda Jab Alhamdulillahi Rabbil Aalamin Kahta Hai To Allah Tala Kahte Hai, "Mere Bande Ne Meri Taarif Ki". Jab Banda Ar Rahmanir Rahim Kahta Hai To Allah Kahte Hai, "Banda Ne Meri Khubi Aur Buzurgi Bayan Ki Aur Kabhi Farmata Hai Ke Banda Ne Apne Kamo Ko Mere Supurd Kar Diya".fir Jab Wo Iyya Kana Budu Waiyya Kanastain Kahta Hai To Allah Farmate Hai, "Ye Mere Aur Bande Ke Beech Hai Aur Mere Banda Ko Jo Wo Mange Milega". Jab Wo Ihdinas Siraatal Mustaqim……walazzuwaalin Kahta Hai To Allah Tala Farmata Hai, Ye Mere Bande Ke Liye Hai Aur Jo Wo Mange Ise Wahi Milega".

Sahih Muslim, Kitab Al Salaat, Baab: Wajoob Qirat Fatiha, Hadith 878.

•٠•●●•٠•

Read More »

Khutba

Arabic Text:

(click the above image to zoom the text)

Arabic transliteration in English:

Al-hamdu Lillaahi nasta’eenahu wa nastaghfiruhu, wa na’oodhu billaahi min shuroori anfusinaa wa sayi’aati a’maalinaa. Man yahdih Illaahu falaa mudilla lahu wa man yudlil falaa haadiya lahu. Wa ashhadu an laa ilaaha ill-Allaah wa ashhadu anna Muhammadan ‘abduhu wa rasooluhu, Amma ba'ad:

Fa-inna Khairal Hadeesi Kitabullahi Wa Khairal Hadyi-hadyu Muhammadin ﷺ. Wa-shar-ral Umoori Muh-dasaa-tuha Wa-kulla-muh-da-satin Bid-at Wa-kul-lu Bid-atun Zala-la- Wa-kul-lu Zala-la-tin Fin-naar.

‘Yaa ayyuha’n-naas uttaqu rabbakum alladhi khalaqakum min nafsin waahidatin wa khalaqa minhaa zawjahaa wa baththa minhumaa rijaalan katheeran wa nisaa’an wa’ttaqu-Llaah alladhi tasaa’aloona bihi wa’l-arhaama inna Allaaha kaana ‘alaykum raqeeban'

‘Yaa ayyuha’lladheena aamanu-ttaqu’Llaaha haqqa tuqaatihi wa laa tamootunna illaa wa antum muslimoon'

‘Yaa ayyahu’lladheena aamanu-ttaqu’Llaaha wa qooloo qawlan sadeedan'. Yuslih lakum aAAmalakumwayaghfir lakum thunoobakum waman yutiAAi Allahawarasoolahu faqad faza fawzan AAatheema.

                               

Roman Urdu Tranlation:

Bila Shuba Sab Ta’arifei’n Allah Ke Liey Hain, Ham Iski Ta’areef Karte Hain, Isi Se Madad Maangtehain Aur Ham Is Se Apne Gunaho’n Ki Baqhshih Chaahte Hain, Ham Apne Nafs Ki Sharato’n Se Aur Nafs Ki Buraiyo’n Se Allah Ki Panah Talab Karte Hain. Jise Allah Raah

Dikhae Ise Koi Gumrah Nahi Karsakta Aur Jise Wo Apne Dar Se Dhutkar De Iske Liey Koi Rahbar Nahi Hosakta Aur Main Gawahi Deta Hu’n Ke Ma’abood Barhaq Sirf Allah Ta’ala Hai Wo Akela Hai Iska Koi Shareek Nahi Aur Main Gawahi Deta Hu’n Ke Muhammad ﷺ (Allah Ke) Bande Aur Uske Rasool Hain, Hamd O Salat Ke Ba’ad:

Yaqeenan Tamam Bato’n Se Behtar Baat Allah Ki Baat Hai Aur Tamam Tareeqo’n Se Behtar Tareeqa Muhammad ﷺ Ka Hai Aur Tamam Kamo’n Me Badtareen Kaam Wo Hain Jo ( Deen Me) Naye Nikale Jaaei’n; Har Nayi Chiz Ek biddat Hai Aur Har Bida’at (deen Me Naya Kaam) Gumrahi Hai Aur Har Gumrahi Ka Thekana Jahannam Hai.(Sunan an-Nasa'i, hadith-1578, Classed as Sahih by Sheikh Zubair Ali Zai.)

Aey Logo! Apne Raab Se Daro Jis Ne Tumhei’n Ek Jaan Se Paida Kiya Aur (phir) Is Jaan Se Iski Biwi Ko Banaya Aur (phir) In Do’no Se Bahot Se Mard Aur Auratei’n Padia Keei’n Aur Inhei’n (zameen Par) Phailaya, Allah Se Darte Raho Jiske Naam Par Tum Ek Doosre Se Sawal Karte Ho Aur Rishto’n (ko Qata’a Karne) (t: Breaking Relations) Se Daro Beshak Allah Tumhari Nigrani Kar Raha Hai.(Surah Nisa, ayat-1)

Aey Eman Walo! Allah Se Daro Jaisa Ke Is Se Darne Ka Haq Hai Aur Tumhei’n Maut Na Aae Magar Is Haal Me Ke Tum Muslim Ho.(Surah Ale Imran, ayat-102)

Aey Eman Walo! Allah Se Daro Aur Aisi Baat Kaho Jo Mohkam (seedhi Aur Sacchi) Ho, Allah Tumhare Aamaal Ki Islah Karega Aur Tumhare Gunaho’n Ko Muaaf Farmae Ga Aur Jis Shaqs Ne Allah Aur Iske Rasool Ki Ataa‐at Ki To Isne Badi Kaamyabi Haasil Ki.(Surah al Ahzaab: Ayat-70 & 71)

Sunan Abu Dawood, an Nikaah, Hadith- 2118, Classed as Sahih by Albani;  Sunan Ibn e Majah, Hadith-1892; Musnad Imam Ahmad, 3/371 ; Sunan an-Nasa'i, hadith-1578, Classed as Sahih by Sheikh Zubair Ali Zai.

Notes: 

۩1. Ye Khutba Nikah, Juma aur aam waa’az o irshad, Dars o Tadrees ke mauqe par padha jaata hai. Ise Khutba e haajat bhi kahte hain, ise padh kar aadmi apni haajat aur zaroorat bhi bayan kar sakta hai

Sunan Daarmi: an Nikah, baab fee Qhutabin Nikah, Hadith- 2198.

۩2. Kuch ahadeeso me muqammal Khutbe ke alfaz nahi milte is liye saari hadeeso ko jama kar ke Muqammal Khutbah Tayar kiya gaya hai. Isi liye Jo upar Arabic text hai usme kuch alfaz nahi hai lekin muqammal alfaz English transliteration aur Roman Urdu Translation me daala gaya hai.

•٠•●●•٠•

Read More »

Qayamat Me Buzurgo Ki Andhadhun Pairwi Karne Walo Ka Haal

Is Tahreer ka waahid maqsad “ISLAAH” hai..

Aaj baaz bhaiyyo ko Allah ki WAHEE (Quran O Suunah) se Haq baat batai jaati hai to wo apne Firqe ke Ulema aur Durwesho ki Andha dhund pairavi karte hue bilkul Yahud O Nasarah ki tarah us Dawat ko Radd kar dete hain. Agar Log apne Firqon ke Ulma aur Durwesho ki pairavi karne ki bajaye kisi shakhs ki, wohi baat maane jo WAHI (Quran aur Sunnah) ke mutabiq ho kyu ke humari Duniya O Aakhirat me kamyaabi isi par munhassir hai..WAHI ko chhor kar, sirf halaqat hi halaqat hai.

Allah pak farmate hai, 

Aur jab in se kaha jata hai ke Allah Taalaa ne jo nazil farmaya hain us (yaani Quran) ki taraf aur Rasool ki taraf aao toh wo kahtae hain hum ko wahi kaafi hai jiss par Hum ney apney baap-dadao ko paya, kya agarcheh inn kay baap-dada na kuch samajh rakhtay ho aur na hidayat rakhte hon.

Surah 5 ayat 104.

Aur fir isi ka Anjaam Allah pak Quran me bayan karte hai,

Aur wo kahenge "Aye hamare Rab! Humne apne sardaron aur apne badon ki maani jinho ne hame rahe raast se bhatka diya. Parwardigar! Tu inhe dugna azaab de aur inpar bohat badi laanat nazil farma."

(Surah ahzaab.ayat:67-68)

.. wo kahenge ki Aey humaray Rab! Humen jinno aur insano se wo (buzurgo ko) dikha jinhon ne hume gumrah kiya (takay) hum unhe apne qadmo talay raunde ...

Surah 41, ayat 29.

Allah pak haq kah kar naseehat karte hai

Shaitan ne toh tum mein se boht sari makhlooq ko bahka diya tha. Toh Kya tumne aqal nahi istemal kiya?.

Surah 36, ayat-62.

Ab mai apni baat ek ayat se khatm karta hu..

Baaz log aisay bhi hain jo Allah ka shareek auron ko thehra kar us se aisi mohabbat rakhtay hain jaisi mohabbat Allah se honi chahaiye lekin jo eeman wale hai wo Allah ki mohabbat me boht sakht hote hain.

Surah 2, ayat 165.

•٠•●●•٠•

Related article:- Andhadhund Pairwi Ka Anjaam

Read More »

Ye Zaruri Nahi Ki Mauze Leather Ke Ho

Arabic zuban me chamde ke moze ke liye lafz istemal hota hai Khuffayn. Aur dusra lafz Jawrabayn hai. Arabic dictionary al-Qaamoos ke mutabik jo cheez lifaafe ki tarah pao’n par pahen lien wo Joraab hai.

Khuffayn par masah karna sunnat hai aur ispar hamare muashre me koi ikhtilaf nahi hai lekin ikhtilaf Joraab par hai.

Abu Bakr ibn al-‘Arabi (Ulema, born on 468 Hijri) farmate hain: "Joraab wo cheez hai jo pao’n ko dhaa’npne ke liey Oon ki bani jaati hai, jo paao ko garam rakhne ke liye pahni jati hai."

Juraab par masah karne par sahaba ka ijma bhi hai. Ek hadith hai,

Al-Mughirah ibn Shu'bah r.a. riwayat karte hai ki RasoolAllah ﷺ ne Wuzu kiya aur Jurabo aur Juto par masah farmaya.

Sunan Abu Dawud, Kitab Al-Tahara, hadith-159; Sunan Tirmidhi, Kitab Al-Tahara, hadith-99.

Lekin ye hadith Zaif hai kyuki isme Sufyan ath-Thawri Mudallis hai aur wo An se riwayat kar rahe hai. Lekin iske sath Imam Abu Dawud aur Imam Tirmidhi ne salaf ka manhaj likh diya hai aur wo hamare liye aham hai.

Is hadith ke baad Imam Abu Dawood ka Qawl hai:

Imam Abu Dawood farmate hai ki 'Ali b. Abi Talib, Ibn Mas'ud, al-Bara' b. 'Aziz, Anas b. Malik, Abu Umamah, Sahl b. Sa'd, 'Amr b. Huriath, Umar bin Khattab aur Ibn Abbas se Juraabo par masah karna sabit hai. 

Imam Tirmidhi is hadith ke baad farmate hai, 

 "Jurabo par masah karna agarche Naalain (shoes) na ho ye ahle ilm se boht logo ka qawl hai Aur is ke kayl hai Sufyan Ath-Thawri, ibn Mubarak, Imam Shafi, Imam Ahmad aur Ishaaq. Abu Muqatil As-Samarqandi ek baar Abu Haneefa ke paas unke maraz al maut(Wafat wala marz) me gaye pas unho ne paani mangaya aur unho ne wuzu kiya is haal mein ki un par Juraab the pas unho ne (un juraabo) par masah kiya. Fir kaha: Aaj maine wo kaam kiya jo pahle kabhi nahi kiya tha, maine Juraabo par masah kiya halanki wo naalain (shoes) ke alawah hai."

Isse ye bhi pata chala ki Imam Abu Hanifa ne apne aakhri waqt me apne pichle raaye se ruju kar liya. Imam Tirmidhi ne ek shart rakhi hai ki jurab moti honi chaiye (jisse khaal na dikh sake mauje pahenne ke baad).

Ibne Qadama kehte hain ke Sahaaba Ikram ka jurabo’n par masah karne ke jawaz par ijma’a hai.

Mughnee by Ibne Qadaama, Volume-1, P332, – Mas’alaa 426.

Yahyaa al-Bakka farmate hai, maine Ibn Umar se ye suna, "Jawrabayn par masah khuffayn par masah karne jaise hai".

Al-Musannaf by Ibn Abi Shaybah, 1/173. 

Ye ek aesi sunnat hai jo aksar mar chuki hai hamare muashre me, hame is sunnat ko zinda karna hoga. Allah ham sab ko taufeek de. aameen

•٠•●●•٠•

Read More »

Bimari, Bimari Ki Duae Aur Bimar Ki Iyaadat

۞ Beemar Pursi:

۩ Rasool Allah ﷺ ne farmaya ke: ‘Musalman ke musalman par 5 huqooq hain:

• (Jab mile to ise salaam kahe ya iske) salaam ka jawaab de

• Jab beemar ho to iski iyaadat kare
• Jab mar jaae to iska janaaza padhe
• Jab da’awat de to ise qubool kare
• Agar wo cheenk par Alhadulillahi kahe to jawaab mein Yar hakumullah kahe.’

Sahih al Bukhari: al Janaaez, Hadith-1240 – Sahih Muslim: as Salaam, Hadith-2162.

۩ Sayyadna Ali r.a.riwayat karte hain ke Rasool Allah ﷺ ne farmaya: ‘Jo musalman doosre musalman ki din ke awwal hisse mein (dopaher se pahle) iyaadat karta hai to 70,000 farishte iske liye shaam tak rahmat o maghfirat ki dua karte hain aur jo musalman din ke aakhri hisse mein (do pahar ke baad) iyaadat karta hai to 70,000 farishte is ke liye subah tak rahmat aur maghfirat ki dua karte hain nez iske liey bahisht mein bagh hai.’

Sunan Tirmizi: al Janaaez, Hadith-969 – Sunan Abu Dawood: al Janaaez, Hadith 3099. Ise Imam Ibn e Hibban (710) Imam Haakim (V1 P341,342) aur Haafiz Zahbi ne Saheeh kaha.

۩ Nabi e Rahmat ﷺ ne farmaya hai: ‘Musalman jab apne musalman bhai ki teemardaari ke liye jaata hai to wo waapas lautne tak jannat ke mewe chunta hai.’

Sahih Muslim: al Birri wal Silah, Hadith 2568.

۞ Beemari Se Gunah Door Hote Hain:

۩ Rasool Allah ﷺ ne farmaya: ‘Allah Ta’ala jis shaqs ke sath bhalaai ka iraada karta hai ise takleef mein mubtelaa kardeta hai.’

Sahih al Bukhari, Hadith 5645.

۩ Aap ﷺ ne farmaya: ‘Musalman ko ranj, dukh, fikr aur gham paho’nchta hai, yaha’n tak ke agar ise kaanta (bhi) lagta hai to wo takleef is ke gunaho’n ka kaffara ban jaati hai.’

Sahih al Bukhari: Hadith-5640 – Sahih Muslim, al Birr wal Silah, Hadith- 2572.

۩ Rasool Allah ﷺ ne farmaya: ‘Jab kisi musalman ko koi takleef paho’nchti hai to Allah Ta’ala is ki wajah se is ke gunaho’n ko is tarha mitaata hai jis tarha darakht ke patte jhadte hai.’

Sahih al Bukhari, Hadith-5647 – Sahih Muslim, Hadith- 2571.

۩ Nabi e Rahmat ﷺ ne farmaya: ‘Bukhaar (ho jaae to is) ko buraa na kaho kyou’nke bukhar aadmi ke gunah is tarha door karta hai jis tarha bhatti lohe ke mail ko door karti hai.’

Sahih Muslim, Hadith-2575.

۩ Nabi e Rahmat ﷺ ka irshad hai: ‘Allah Ta’ala musaafir aur mareez ko in amaal ke baraabar ajar deta hai jo wo ghar mein aur tandrusti ki haalat mein kiya karta tha.’

Sahih al Bukhari, al Jihaad wal Seer, Hadith-2996.

۞ Beemari Mein Sabr Ki Fazeelat:

۩ Nabi e Rahmat ﷺ ne farmaya ke Allah Ta’ala farmata hai: ‘Jab main kisi bande ko iski 2 mehboob cheezo’n (ankho’n) mein azmaata hu’n (ise beenai se mehroom karta hu’n) fir agar wo sabr kare to iske badle mein ise jannat du’nga.’

Sahih al Bukhari, Hadith-5653.

۩ A’ataa riwayat karte hain ke mujhe Ibne Abbas r.a. ne kaha kya main tujhe jannati aurat dikhlaou’n? Main ne kaha dikhlao to Ibne Abbas ne farmaya ke Rasool Allah ﷺ ke paas ye kaali aurat aai aur arz ki ke mujhe mirgee ka daura padta hai aur mera satar (T: Private Parts) khul jaata hai, Aap mere liye Allah se dua karie’n. Aap ﷺ ne farmaya: ‘Agar tu sabar karegi to tere liye jannat hai aur agar chaahe to dua kiye deta hu’n. Wo kahne lagi: ‘Main sabar karu’ngi, fir kaha: Mera satar khul jaata hai Allah se dua karie’n ke wo na khule. (Taake main be parda na hou’n).’ Chunaache Aap ne is ke liey dua farmaai.’

Sahih al Bukhari, Hadith-5656.

۞ Iyaadat Ki Duaei’n:

Jab mareez ki iyaadat ke liye jaei’n to Rasool Allah ﷺ ki zabaan e mubarak se nikli hui mundarja zel duaei’n is ke haq mein karei’n:

۩ Pahli Dua:

Rasool Allah ﷺ ne farmaya: ‘Jo shaqs apne musalman bhai ki teemardaari ke liye jaata hai aur iske sar ke paas baith kar saat martaba ye kalimaat padhta hai to shifayaab ho jaata hai Illa ye ke iski maut ka waqt hi aachuka ho.’

"Asalullahal A’azeema Rabbal A’arshil A’azeem Aie’n Yashfiyaka"

[Main Azeem o Bartar Allah, Arsh Azeem Ke Rab Se Sawaal Karta Hu’n Ke Tujhe Shifaa Se Nawaaze]

Sunan Abu Dawood: al Janaaez, Hadith-3106. Ise Imam Ibne Hibban, Imam Haakim V1 P346 V4 P416) aur Imam Nawawi ne Saheeh kaha.

۩ Dusri (2) Dua:

Rasool Allah 1 Araabi ki iyaadat ke liye tashreef le gae aur is se ye kalimaat kahe:

"Laa Baasa Tuhoorun In Shaa Allahu"

[Darr Nahi (gham na kar) Agar Allah Ne Chaaha To (yehi beemari tujhe gunaaho’n se) Paak Karne Waali Hai.]

Sahih al Bukhari:, Hadith-5656.

۩ Teesri (3) Dua:

Aisha Siddiqa r.a. farmati hain ke Nabi e Rahmat ﷺ mareez (ke jism) par apna daaya’n hath ferte aur ye dua padhte the:

أَذْهِبِ الْبَأْسَ رَبَّ النَّاسِ وَاشْفِ أَنْتَ الشَّافِي لَا شِفَاءَ إِلَّا شِفَاؤُكَ شِفَاءٌ لَا يُغَادِرُ سَقَمَاً

‘Azhibil Basa Rabbannasi Washfi Antash Saafi Laa Shifaa‐a Illa Shifaa oka Shifaa‐ann Laa Yugaadiru Saqamann’

[Aey Insano’n Ke Rabb! Beemari Ko Door Kar Aur Shifaa de. Tu Hi Shifaa Dene Waala Hai. Teri Shifaa Ke Siwaa Koi Shifaa Nahi Aisee Shifaa (de) Jo Kisi Beemari Ko Nahi Chodti.’]

Sahih al Bukhari: al Tibb, Hadith-5750 ; Sahih Muslim: al Salaam, Hadith-2191.

Rasool Allah ﷺ ne farmaya: ‘Jab kisi musalman ko takleef (museebat ya nuqsaan) paho’nchey to wo ye kahe:

"Inna Lillahi wa Inna Ilaihi Rajioon, Allahumma Ajurnee Fee Musibati waqhliflee Khairam Minha"

[Ham Sab Allah Ke Liye Hain Aur Isi Ki Taraf Laut Kar Jaane Waale Hain. Aey Allah Mujhe Meri Museebat Mein Ajar Aur Nemul Badal (dono’n) Ataa Farma’],

To Allah Ta’ala Is ke badle mein is se acchi cheez inaayat farma deta hai.’

Sahih Muslim: al Janaaez, Hadith-918.

۩ Cho’nti (4) Dua Ma’auzaat Ka Dam:

Ummul Momineen Aisha r.a. riwayat karti hain ke Nabi e Rahmat ﷺ beemar hote to apne aap par ma’auzaat se [Quran ki aaqhir 2 suratie’n(Surah falaq aur Surah Naas)] dam karte aur apne jism par apna hath ferte. Jab Aap bahot beemar hue to main ma’auzaat padh kar Rasool Allah par beemari ki haalat mein phu’nkti aur Aap hi ka hath Aap par pherti kyou’nke Aap ke hath mubaarak mein mere hath se ziyada barkat thee.

Sahih al Bukhari: Fazaael al Quran, Hadith 5016 – Sahih Muslim: al Salaam, Hadith 2192.

۩ Paa’nchweei’n (5) Dua:

Usmaan bin Abil A’aas se riwayat hai ke inho’n ne Nabi e Akram ﷺ se jism ke dard ki shikaayat ki. Aap ﷺ ne farmaya: Apna hath dard ki jagah par rakho phir 3 baar Bismillah kaho aur 7 dafa ye kalimat padho:

"A’auzu Billahi wa Qudratihi Min Sharri Maa Ajidu wa Ohaaziru"

[Main Allah Aur Iski Qudrat Ke Sath Panaah Maangta Hu’n Is Cheez Ki Buraai Se Jo Main Paata (Mehsoos Karta) Hu’n aur Is Se Darta Hu’n.]

(Usman farmate hain ke) Main ne ise tarha kiya to Allah Ta’ala ne meri takleef door kardi.

Sahih Muslim: al Salam, Hadith-2202.

۩ Chati (6) Dua:

Rasool Allah ﷺ Hasan aur Husain ko in alfaaz ke sath dam kiya karte the:

‘A’auzu Bikalimaatillahit Taamati Min Kulli Shaitaaniyou’n wa Haamatin wa Min Kulli A’ayouninllammatin.

[Main Tum Dono’n Ko Allah Ke Poore Kalimaat Ke Sath (iski) Panaah Mein Deta Hu’n Har Shaitan Aur Har Zehreele Jaanwar Aur Har Nazar e Bad Ki Buraai Se]

Fir farmaya: Tumhaare baat Ibraheem (A‐) (bhi) in kalimaat ke sath Ismaeel aur Ishaaq (Aa‐) ke liey (Allah ki) panaah talab kiya karte the (inhei’n dam karte the).’

Sahih al Bukhari: Kitaab Ahaadisul Ambiya Hadith-3371.

۩ Saatwie’n (7) Dua:

Abu Saeed Khudree r.a. se riwayat hai ke Jibraeel (a.s.) ne kaha: Aey Muhammad ﷺ ! kya Aap beemaar hain?

Aap ne farmaya: Haa’n to Jibraeel (a.s.) ne (ye) padh kar (Aap par dam kiya):

Bismillahi Arqeeka Min Kulli Shai‐in Yuzeeka Min Sharri Kullin Nafsin Au A’ayounin Haasidin Allahu Yashfeeka Bismillahi Arqeeka.

[Allah Ta’ala Ka Naam Lekar Main Aap Par Dam Karta Hu’n Har Is Cheez Se Jo Aap Ko Takleef De, Har Nafs Aur Har Hasad Karne Waali Aa’nkh Ke Shar Se, Allah Ta’ala Aap Ko Shifaade. Main Allah Ka Naam Lekar Aap Par Dam Karta Hu’n.]

Sahih Muslim: al Salaam, Hadith-2186.

•٠•●●•٠•

Read More »

Adam a.s. Ki Tauba Ki Dua

Allah subhana wa tala' Quran me batate hai ki adam (alaih-as salam) ko Allah ne muaf kaise kiya. Allah pak farmate hai,

فَتَلَقَّى آدَمُ مِن رَّبِّهِ كَلِمَاتٍ فَتَابَ عَلَيْهِ إِنَّهُ هُوَ التَّوَّابُ الرَّحِيمُ-

Aadam (alaih-as salam) ne apne Rab se chand qalemaat seekh li aur Allah Taalaa ne un ki tauba Qabool farmaee, be-shak wohi tauba qubool karne wala aur raham karne wala hai.

Surah Baqarah, ayat-37.

Allah subhana wa tala' Quran me us dua ka zikr bhi karte hai jis dua ke wajah se Adam a.s. ko Allah ne muaf kiya tha. Allah pak farmate hai,

قَالاَ رَبَّنَا ظَلَمْنَآ أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَـسِرِينَ-

[Adam aur Hawwa a.s. ne] kaha Aey humara Rab! Hum ney apna bara nuksan kiya aur agar tu humari maghfirat na karayga aur hum par raham na kare ga toh waqaee hum nuksan paney walon mein say hojayen gay.

To ye bilkul wazeh ho gai ki kaise Adam a.s. aur Hawwa a.s. ko muafi mili. Kuch log ka kahna hai ki Adam a.s. ne RasoolAllah ﷺ ke wasile se dua ki thi tab unhe Allah ne muaf kiya tha jab ki Quran ki is dua ke alfaz me waseele ka kahi zikr hi nahi hai. Kuch log is sil sile me Hadith bhi dete hai lekin wo hadith usool e Muhaddiseen par Mauzu hai. Us hadith ki tahkeek is artlcle me pesh ki gai hai:

۩ Aadam a.s. ka Mohammad ﷺ ko waseela banane wali hadees ka baatil hona

Allah se dua hai ki wo hame haq samajh kar us par amal karne ki taufeek ata kare. aameen.

•٠•●●•٠•

Read More »

Kya Maahe Safar Manhoos Hai ?

hi  -

Mahe safar Islaami saal aur Hijri calender ka dusra mahina hai, Jiske mutaaliq bar-e-sagheer ke khurafati tabqe ne mukhtalif qisam ki biddatein, ghalat fehmiyaan aur bad gumaniyaan muslim samaj mai phela rakhi hai, isse manhoos wa na-mubarak samajhna, aafat wa museebat ka gehwara tasawwur karna, shar wa fasaad ka ganjeena batlaana, aur nuqsaan wa zar ka mahina bawar karana, kuch naam, nihaad-musalmano ki adat ban chuki hai. Halaan ke Islaam ka bunyaadi aqeedah hai ke iss poori Qaynaat ka khaaliq wa maalik aur tamaam tasarrufaat ka mukhtaar kul sirf Allah Ta'ala hai. Tamaam nafa wa nuqsaan ka maalik sirf Allah ta'ala hai.

Baaz Log Maahe Safar Ke Bare Mein Bohot Si Ghalat Fehmiyon Ka Shikaar Hain, Ye Article Isi Baat Ko Clear Karne Ke Liye tayar Ki Jaa Rahi Hai. Maahe Safar Allah Ta’ala Ke Banaye Hue Mahino Mein Se Ek Mahina Hai. Allah Aur Rasool Allah ﷺ Ki Taraf Se Is Mahine Ki na Koi Fazilat Bayan Ki Gayi Hai Aur Na Hi Koi Aisi Baat Jiski Wajah Se Is Mahine Mein Kisi Bhi Halaal Aur Jayaz Kaam Ko Karne Se Roka Jaye. Jo Mahine Faizlat Aur Hurmat Wale Hain Un Ke Bare Mein Abu Bakr r.a. se riwayat hai ki Rasool Allah ﷺ Ne Farmaya,

"Saal Apni Usi Halat Mein Palat Gaya Hai Jisme Us Din Tha Jab Allah Ne Zameenay Aur Aasman Banaye The, Saal Barah (12) Mahinay Ka Hai Jin Mein Se Chaar Hurmat Waale Hain, Teen Ek Saath Hain; Dhillqad, Dhul-Qa'da, Dhul-Hijja aur Al-Muharram, Muzr Wala Rajjab Jamad Aur Shabaan Ke Darmiyaan Hai."

Sahih Al Bukhari, Hadees- 4662.

Do jahaano ke sardar hamare Rasool ﷺ ne saal ke barah mahino mein se 4 ke bare mein bataye khwah chaar mahine hurmat wale hain yani un chaar mahino mein ladai aur qatl nahin karna chahiye, is ke alawa kisi bhi maah ki koi aur khususiyat bayaan nahi hui hain aur na Allah ta’ala ki taraf se aur na RasoolAllah ﷺ ki taraf se. Hairangi ki baat ye hai ke Allah aur Rasool Allah ﷺ ki taraf se koi khabar na hone ke bawajood kuch mahino ko ba barkat mana jata hai aur manghadant rasmo aur ibadat ke liye khaas kiya jata hai aur kuch ke bare mein ye khayal kiya jata hai ke unme koi khushi wala kaam, karobar ka aghaaz, rishta, shaadi biyaah ya safar wagaira nahin karna chhaiye, hairangi is baat ki nahi hai ke is tarha ke khaylat kahan se aye, ye to maloom hai jiska zikr in shaa Allah abhi karna baki hai, hairangi is bat ki hai ki jo baatein kisi suboot aur sachhi dalil ke baghair kaano, dilon aur dimaagho me dale jate hain unhe fauran qubool kar liya jata hai. Lekin jo baat Allah aur Rasool Allah ﷺ ki taraf se batayi jaati hain puri tahqiq ke sath sachhi aur saabit shuda hawala jaat ke saath batai jati hai usey mante hue tarha tarha ke bahane, muntaq o falsafa, dil o aqal ki kasautiyan istemaal kar kar ke raahe farar talash karne ki bharpoor koshish ki jati hai. Jaisa ke Allama Iqbal kahte hai:

Haqiqat Khurafat Mein Kho Gayi

Ye Ummat Rawayaat Mein Kho Gayi.

 In hi khurafat mein se maahe safar ko manhoos janna hai, pahle to ye sun lijiye ke Allah ta’ala ne kisi cheez ko manhoos nahin banaya, haan ye Allah ta’ala ki hikmat aur marzi hai ke wo kisi chiz mein kisi ke liye barkat de aur kisi ke liye na de. Aaiye Allah ke Rasool ﷺ ka ek farman aapko suna du jo hmare is mauzu ke liye faisla kun hai.

Abdullah ibn Umar radi allahu anhuma se riwayat hai ke Rasool Allah ﷺ ke samne Nahusat ka zikr kiya gaya to Aap ﷺ ne farmaya, "Gar Nahusat kisi chiz mein hoti to un teen cheez mein hoti aurat, ghar aur ghoda."

Sahih Muslim, Book 26, Hadith 5529.

RasoolAllah ﷺ ka ye farmana ke "agar nahusat kisi cheez mein hoti" saaf baayan farmana hai ke koi chiz manhus nahi hoti aur ye baat bhi har koi samajhta hai ke jab koi chiz kaha jayega to usme maaddi aur ghair maaddi har chiz shamil hogi yani waqt aur us ke paimany bhi shamil honge, lehaza RasoolAllah ﷺ ke is farmaan e mubarak se ye baat bilkul waazeh hogai ke nahusat kisi cheez ka zaati juzz nahi hoti, Allah ta’ala jis chiz ko jis ke liye chahe barkat wala banaye aur jis chiz ke liye chahe be-barkati wala banaye. Ye sab Allah ki hikmat aur maslihat se hota hai na kisi chiz ki apni sifat se.

Dekh lijiye koi do shahks jo ek hi marz ka shikar ho ek hi dawa istemal karte hain ek ko shifa ho jati hai aur dusre ko usi dawa se koi aaram nahi aata balkay baaz auqaat marz badhta jata hai. Kayi log ek hi jagah me ek jesa karobar karte hain kisi ko faida hota hai kisi ko nuqsan to koi darmiyani halat me hota hai kayi log ek hi jaisi sawari istemal krte hain kisi ka safar khair o aafiyat se tamam hota hai aur kisi ka nahi. Isi tarha har ek chiz ka mamla hai yahan ye baat bhi acchi tarha se zahn-nasheen karni hai ki barkat aur izafe mein bohat farq hota hai. Kisi ke liye kisi chiz mein izafa hona ya kisi ke pas koi chiz zyada hona is baat ki dalil nahi hota ke usay barkat di gai hai umuman dekhne mein ata hai ke kafiron aur badkaaron ko musalmano aur nek logon ki nisbat maal aur daulat, aulad, hukumat aur duniyawi taqat waghaira zyada milti hai to iska ye matlab nahi hota ke unhe barkat di gayi hai balkay ye Allah ta’ala ki taraf se un par akhirat mein mazeed azaab tayyaar karne ka samaan hota hai ke lo aur khoob akhirat ka azaab kamao. Safar ke mahine ki koi fazilat na to Quraan aur Sunnat se milti hai aur na hi koi aisi baat jiski wajah se is ko be-barkat ya bura samjha jaye.

Islam ke pahle Arab ke kafir is mahine ko manhus aur ba’as e nuqsaan samjhte the aur samjhte the ke safar ek keeda ya saanp hai jo paith mein hota hai aur jis ke paith mein hota hai usko qatal kar deta hai aur dusron ke paith mein bhi muntaqil ho jata hai, yani chhoot ki bimaari ki tarha is ke jarasim bhi muntaqil hote rahte hain. Lekin RasoolAllah ﷺ ne mundraja bala in sab aur in jaise dusre aqido ko ghalat qarar farmaya,

Abu Huraira radi Allahu tala anhu se riwayat hai ki Rasool Allah ﷺ ne farmaya, "Na koi chhoot ki bimari hai, Na Hama hai, Na Nahusat hai, na safar (koi bimari ya nahusat wala mahina hai aur na koi iski kisi aur mahine ke sath tabdili hai)."

 Sahih Muslim, hadees no. 2220.

Alfaz ke kuch farq ke sath ye hadees digar sahaba se bhi rawayat ki gai hai. Arab safar ke mahine ke bare mein manhoos hone ka aqida rakhte the afsos ke isi qism ke khayalat aaj bhi Musalmano mein paaye jate hain aur wo apne kayi kaam is mahine mein nahi karte, Aapne ne dekha ke RasoolAllah ﷺ ne iss mahine ke bare mein paye jaane wale har galat aqide ko ek hurf me band kar ke mustarid farma diya. Saal ki digar mahino ki tarha is mahine ki tarikh me bhi hame kayi acche kaam milte hain jo Allah tala ki masliht se us ke bandon ne kiye maslan—hijrat k baad jihad ki ayat Allah ta’ala ne isi mahinay me nazil farmayi, aur RasoolAllah ﷺ ne apne Rab ke hukm par amal karte hue pahla ghazwa is mahinay mein kiya jise "Ghazwa Al-Abwa" bhi kaha jata hai. Aur ‘’Waddan‘’ bhi imaan walo ki walida mohtarma khadija bint khuwaylid radi allahu anha se RasoolAllah ﷺ ki shaadi mubarak bhi is mahinay mein hui. Khaibar ki fatah isi mahinay mein hui

Ye sab janne ke baad bhala kon aisa Musalman hoga jo is mahinay ko ya kisi bhi mahine ko manhoos janay?? Aur koi nek kaam krne se khud ko rokay, Allah ta’ala ham sabko hidayat de aur uspar amal karte hue hamara khatma farmaye. Allah ta’ala in mukhtasar malumat ko padhne walon ko hidayat ka sabab banaye aur meri ye koshish Qubool farmaye aur ham sab ke liye aakhirat mein asaani aur maghfirat ka sabab banaye. aameen.

•٠•●●•٠•

Read More »

Libas Ko Takhno Se Niche Latkana

۩ ALLAH TAALA KI NAZAR E RAHMATT, HAM KALAAMI AUR GUNAAHON KI SAFAAI SE MAHROOMI, AUR DARDNAAK AZAAB:

Hazrat Abu Dharr r.a. riwayat karte hai ki RasoolAllah ﷺ ne farmaya, "Teen qism ke logon se Allah Qayamat ke din na ham'qalaam hoga, na unki taraf nazar (rahmat) farmayega aur na hi unko gunaahon se paak wa saaf karega, aur unke liye dardnaak azaab hoga. Pahla, koi chiz de kar ehsaan Jatanay wala, Dusra apne Libaas ko Takhno se neeche latkane wala, Teesra, Jhooti qasam kha kar apna samaan bechne waala."

Sahih Muslim, Kitabul Eemaan, Hadith- 493.

Toh fir ek momin bande ko ye kaise gawaara hona chahiye ke woh koi aisa amal kare Jisse us se muhabbat karne waala Rabb usse ruth jaaye, usse ham kalaami band kar de, aur gunaaho se bojhal uske kandho ko azaad na kare balke rahmat ki jagah ghazab aur pyar ki jagah nafrat ki nigaah se dekha jaaye.

Abu Hurairah r.a. riwayat karte hai ki RasoolAllah ﷺ ne farmaya Takhno se niche ka izaar aag me hai.

Sahih Al Bukhari, Hadith no. 5787.

---

۩ Libas Ko Takhno Se Niche Latkane Ke Mutallik Pahli Galat Fehmi:

Aksar log samajhte hai ki Agar Dil me ghamand na ho to apna libas niche latkane me koi harj nahi hai. Lekin ye mahez ek galat fehmi hai Kyuki sirf ghamand wajah nahi hai, aur bhi wajuhaat aur hikmat hai libas to takhne se upar rakhne ki, 

۩ Pahli wajah: Libas ko Saaf rakhna

`Amr bin Maimun r.a. riwayat karte hai ki Umar r.a. ne (apne bhai ke bete se) farmaya, "Ae Mere bhai ke bete! Apne libas ko uncha rakho, Ye tumhare libas ko saaf rakhega aur tumhe tumhare Rab ke azaab se mahfuz rakhega.

Sahih al-Bukhari, Kitab Fazail Ashaab an-Nabi ﷺ, Hadith no: 3700.

۩ Dusri wajah: RasoolAllah ﷺ ki itaat karna 

Muslim Ummat me har Makatib-e Fikr, chahe wo kisi bhi masklak ya jamaat se ho, wo sab tasleem karte hai ki Takhno se upar libas rakhna sunnat hai. Saare fikr ki dalail dene ki zarurat nahi hai lekin Dawat e Islami ke Ameer Ilyas Qadri ka qawl zarur pesh karunga kyuki isi jamaat me aksar ye confusion paayi jati hai.

Ye clip check kare- Ilyas Qadri Agrees- Libas ko takhno se upar rakhna hi sunnat hai

Imam Tirmidhi ne ek Hadith riwayat ki hai:

Hazrat Ubaid bin Khalid radiAllahu anhu kahte hai, "Mai ek bar Madinah Munawwarah jaa raha tha. Maine apne piche ek shaks ko kahte hue suna, "Apni Lungi ko uchi karo kyuki ye jismani aur roohani najasato (impurities) ko dur karti hai.

Jab mai piche muda dekhne ke liye ki kaun kah raha hai, maine dekha ki wo RasoolAllah ﷺ the. Maine kaha, "Ae" RasoolAllah ﷺ, Ye sirf ek mamuli si chadar (lungi) hai (ek shaks ko isse ghamand kaise ho sakta hai, aur kya is pe dhyan dena zaruri hai)?

RasoolAllah ﷺ ne farmaya, Agar tumhe isme koi bhalai nazar nahi aati, Kya tumhe meri pairwi karna kaafi nahi?

Jab RasoolALlah ﷺ mujhse ye kah rahe the, maine dekha ki unki lungi aadhe pindli (shin) tak pohchi hui thi.

Shama'il Muhammadiyah by Imam Tirmidhi, Kitab no:18, Hadith 120.

Source to Shama'il Muhammadiyah: https://sunnah.com/shamail .

Halanki ye hadith usool e Muhaddiseen ke nazdeek zaif hai lekin ham jiske liye ye hadith pesh kar rahe hai unhe koi mushkil nahi honi chahiye kyuki wo log sahih aur zaif hadith me fark hi nahi karte hai aur unki kitabe zaif hadeeso, kisse-kahaniya se bhari padi hai. Hamare liye to Quran ki wo ek ayat hi kaafi hai jaha par Allah ‎ﷻ farmate hai,

... Aur Jo Kuch Rasool ﷺ De Unhe Lelo Aur Jis Chiz Se Wo Mana Kare Usse Ruk Jao Aur Allah ‎ﷻ Say Darte Raha Karo, Yaqeenan Allah ‎ﷻ sakht azab wala hai. 

Qur'an 59:7.

---

۩ Libas Ko Takhno Se Niche Latkane Ke Mutallik Dusri Galat Fehmi:

Hazrat Abdullah ibn Umar r.a. se riwayat hai ke Allah ke Rasool ﷺ ne farmaya, "Jisne bhi takabbur ke taur par apne kapde ko zameen me ghaseeta, Allah Qayaamat me uski taraf nahi dekhega", Hazrat Abu Bakr r.a. ne arz Kiya, "Agar main khayal na karun to mere kapde ka ek kona fisal jata hai", Toh Aap ﷺ ne farmaya, "Aye Abu Bakr Tum aisa guroor ke taur par nahi karte."

Sunan an-Nasa'i, hadith-5335, Sahih (Sheikh Zubair Ali Zai).

Kuch log is hadith ka matlab ye samajhte hai ki agar ek shaks ko Gurur nahi hai to wo apna libas takhne se niche latka sakta hai. Is hadith ka matlab bilkul bhi ye nahi hai. Is ka matlab ye hai ki jo insan jaan-bujh kar kapde takhno se niche latkata hai, khwah takabbur ka kasad ho ya nahi, is ke liye ye waeed shareed hai.

Ha! Agar koi aadmi kapda takhno se uper rakhne ki puri koshish karta hai lekin us ke bawujud gair iradah ya gair ikhtiyari taur par kapda niche latak jata hai toh woh is waeed me dakhil nahi hoga, kyuki wo maazur hai, jaisa ki Sayyadna Abu Bakr r.a. farmate hai ki jab mai puri puri muhafizat karta hu toh tahband niche nahi latakta. Kabhi zara si gaflat karu to niche latak jata hai. Hadees me يَسْتَرْخِي ka lafz bhi is baat par Dalalat karta hai ki Tahband khud bakhud niche latak jata tha, wo bhi kabhi kabhar na ki hamesha. Sayydna Abu Bakr r.a. kasratan nahi latkate the. Aap ﷺ bhi samajhte the ki ye Waeed har us insan ko shamil karta hai jo takabbur ke irade se latkata hai ya bagair takabbur ke irade irade se. Tab hi to ye sawal kiya tha ki gair iradai taur par gaflat ki wajah se mera tahband latak jata hai. Kya mai bhi usi Waeed me dakhil hu? Ap ﷺ farmaya, "Nahi".

Ha Agar Sayyadna Abu bakr r.a. ye puchte ki mai khud shalwar takhne se niche latka kar rakhta hu aur mera takabbur ka iradah nahi hota, fir agar Aap ﷺ ijazat de dete to baat sahih hoti. Jabki yaha aesi koi baat nahi hai. Aur hadees me kaha gaya hai ki Allah ki nazar me Apna libas takhne se niche latkana hi takabbur hai aur ye Takabbur ki ek kism hai:

Jaabir ibn Sulaym r.a. riwayat karte hai ki RasoolAllah ﷺ ne mujhse farmaya, “Takhne se niche libas latkane se khabardar hona, kyuki ye Ghamand hai aur Allah ghamand ko pasand nahi karta”.

Sunan Abu Dawood, Kitab No : 34, Kitab Al Libas, Hadees-4084, Sahih (Sheikh Albani).

Ek baat aur gaur e Fikr talib hai ki agar libas takhne se upar karne ka hukm sirf takabbur walo ke liye hota to RasoolAllah kabhi bhi apna kapda takhne se upar na rakhte kyuki RasoolAllah ﷺ me takabbur nahi tha. RasoolAllah ﷺ me takabbur nahi tha lekin fir bhi wo apna libas apne takhno se upar rakhte the. Aur is baat par puri ummat ka Ijma hai ki RasoolAllah ﷺ apne libas ko takhne se upar rakhte the aur ye amal sunnat hai. Isi liye hame is amal ko kasrat se karna chaiye kyuki RasoolAllah ﷺ ham sab ke liye ek behtreen misaal hai.

---

۩ Libas Kaha Tak Uthaya Jaye?

Ibn Umar r.a. kahte hai ki mai RasoolAllah ﷺ ke samne se guzra aur meri chadar latak rahi thi, toh Aap ﷺ ne farmaya ki Ae Abdullah! Apni chadar unchi karo. Maine utha liya toh Aap ﷺ ne farmaya ki aur unchi karo. Maine aur unchi ki. Fir mai (apne tahband ko) uthata raha, yaha tak ke kuch logo ne pucha ki kaha tak uthani chaiye? Ibn Umar r.a. ne kaha ki Nisf Pindli tak.

Sahih Muslim, Kitab al libas wal zinat, hadith no: 5200.

Allah se dua hai ki wo hame qayamat ke din apni rahmat me mahfuz rakhe aur hame gunaho se paak kar de. aameen.

Prepared by:- Faisal Khan

•٠•●●•٠•

Related:- Namaz Padhte Waqt Pant Ko Sametne(Fold Karne) Ka Bayan

Read More »