Yazeed Ke Bareme Imam Ahmad ibn Hambal Ki Raaye

en  -

Mohanna ibn Yahya (Imam Ahmad ke shagird) ne bayaan kiya, wo kahte hai Mai ne Imam Ahmad ibn Hambal se Yazeed ibn Muawiya ke bare me daryaft kiya toh wo farmane lage: “Madeene me saara isi ka toh kiya karaya tha”

Toh Maine arz kiya: Usne kya kaam kiya (tha)?

Imam Ahmad ne farmaya: Usne (Madeenah) ko loota tha.

Mohanna (bin Yahya) kahte hai, maine fir Imam Ahmad se pucha: Kya ham Yazeed se hadees bayan kar sakte hai?

Imam Ahmad ne  farmaya: Usse koi hadees bayan nahi kar sakte aur kisi ke liye bhi ye jayz nahi hai ki usse koi ek hadees bhi bayan kare.

Mohanna (bin Yahya) kahte hai, mai ne arz kiya: Jab Madeene ka ye kissa hua toh us (Yazeed) ke saath kaun log the?

Toh Imam Ahmad ne jawab diya: Ahle Shaam us ke saath the.

Daleel: Al-radd ala Al-muta‘aṣib Al-anid Al-mani Min Zamm Yazeed [Ye (kitab) us muta‘aṣib sarkash ka radd hai jo Yazeed ko bura nahi kahta] by Ibn Jawzi, Safa no.40, Urdu Safa no.94, Sanad Hasan Li Zati (Shaykh Zubair Ali Zai).

•٠•●●•٠•

Related:

۩ Yazeed, Muhaddiseen ke nazar me [video clip]

۩ Kifayatullah Sanabili Ke 10 Jhut [Exposed by Shaykh Zubair Ali Zai, page:388 onwards; in urdu]

Read More »

'Deen Me Sharam Nahi Hai' Kahna Kaisa Hai?

en  -

Alhamdulillah..

Ye alfaz ki "Deen me Sharam (haya) nahi hai", ye galat hai. Balki Haya Deen ka hissa hai. Sahih alfaz jo kaha ja sakta hai, misaal ke taur par, wo ye hai ki "Allah sach batane me haya nahi karta hai" jaise ki Umm Salamah ki hadees me zikr hai, jinhone kaha ki Umm Sulaym RasoolAllah ﷺ ke paas tashreef laayi aur farmaya: "Aye Allah ke Rasool, Allah sach batane me haya nahi karta hai; kya aurat par ghusl hai jabke is ko ehtelaam (night fall) ho? Aap ﷺ ne farmaya: ‘Haa’n, jab paani (mani ka nishani) dekhe.’

Umm Salamah r.a. ne apna chehra dhaka aur farmaya, 'Aey Allah ke Rasool! Kya aurat ko bhi ehtelaam (night fall) hota hai? Aap ﷺ ne farmaya: ‘Haa’n (hota hai) tumhara daahina haath qhaak aaluda ho, kya bachhe ki mushabihat is ke alawa kisi aur wajah se hoti hai?’ Ise Bukhari aur Muslim ne riwayat kiya hai.

source: https://islamqa.info/en/12370

Notes:

۩1. Ummul Momineen Aisha r.a. Siddiqa riwayat karti hai ke Umme Sulaym ne Rasool Allah ﷺ se kaha: ‘Allah ke Rasool ﷺ ! Yaqeenan Allah haq se nahi sharmata (main bhi Aap se masla poochti hu’n) kya aurat par ghusl hai jabke is ko ehtelaam(night fall) ho?Aap ne farmaya: ‘Haa’n, lekin jab paani (mani ka nisha) dekhe.’Is par Umme Salma ne arz kiya: Aey Allah ke Rasool! Kya aurat ko bhi ehtelaam(night fall) hota hai?Aap ne farmaya: ‘Haa’n (hota hai) tumhara daahina haath qhaak aaluda ho, kya bachhe ki mushabihat is ke alawa kisi aur wajah se hoti hai?’
Sahih Muslim, kitab al haiz, hadeed- 715.

۩2. Hazrat Abu Huraira r.a. ne nakal farmaya Rasool ﷺ se ki Rasool ﷺ ne farmaya ki Emaan ki saath (60) se zyada shaakhe hai, aur haya (sharm) bhi Emaan ki ek shaakh hai.

Sahih al-Bukhari, kitab al eemaan, hadees- 9.

•٠•●●•٠•

Read More »

Khushi Ke Mauke Par Gaane Ka Hukm

en     ur  -

Is article me bayan karda cheeze sirf Aurat ke talluq se hai:

۞ Rubayyi bint Mu’awwiz r.a. bayan karti hai, 

“Nabi kareem ﷺ tashreef laaye aur jab mai Dulhan bana kar bithayi gayi toh Rasool ﷺ andar tashreef laaye aur mere bistar par usi tarha baithe jaise tum is waqt mere paas baithe hue ho. Fir hamare yahan ki kuch choti bachhiya Daff bajane lagi aur mere baap aur chacha jo jang e badr mein shaheed hue the, un ka marshiyah (elegiac verses) padhne lagi. Itne me un mein se ek bachhi ne padha, 'Aur hum mein ek Nabi hai jo un baato ki khabar rakhta hai jo kuch kal hone wali hain', RasoolAllah ﷺ ne farmaya ke yeh chor do, Is ke siwa jo kuch tum padh rahi thi woh padho.”

Sahih al Bukhari, Kitab an Nikaah, hadith- 5147.

۞ Ayesha r.a. riwayat karti hai ki wo ek Dulhan ko ek Ansaari mard ke paas le gayi toh Nabi ﷺ ne farmaya, 'Aye Ayesha! Kya (shady ke mauke par koi) tafreeh (entertainment) nahi thi? Kyuki Ansar ko tafreeh pasand hai.

Sahih al Bukhari, Kitab an Nikaah, hadith- 5162.

۞ Abu Ishhaaq bayan karte hain ke maine Aamir ibn Sa’d al-Bajali ko ye kahte hue suna,  “Mai aur Saabit bin Wadeeah aur Qarazah ibn Ka’b al-Ansaari ek shadi me gaye to waha gaaya ja raha tha, toh maine un dono ko iske mutalliq kaha to wo kahne lage, Shadi-biyah me gaana aur mayyat par bagair cheekh o pukaar (wailing) kiye aansu bahane ki ijazat di gayi hai.”

Sunan Baihaqi, hadees no. 14469.

۞ Muhammad ibn Haatib al-Jamahi bayan karte hain ke Rasool ﷺ ne farmaya:

“Haraam aur halaal me farq daff aur aawaaz hai”.

Jami'at Tirmidhi, kitab an Nikaah, hadees - 1088. Ibn Majah, kitab an Nikaah, hadees - 1896. Sunan Nasa’i, kitab an Nikaah, hadees - 3371. Allamah Albani ne is hadees Ko Adaab al-Zafaaf, safa - 96 me Hasan karaar diya hai. Shaykh Zubair Ali Zai ne bhi in tamam riwayat ko Hasan karar diya hai.

۩ Shaykh Saleh al Munajjid kahte hai,

“Aurat ke liye mukhtalif khushi ke mubah mauqe maslan Eid aur Shadi biyah wagaira ke mauqe par daff bajaa kar ashaar padhne jaiz hain.

Shadi biyah ke mauqe par aurton ke liye ye fael jaiz hai, aur gaane bajane wali ashya me se sirf in ke liye daff bajana jaiz hai, iske alawa dhol wagaira ya koi aur cheez bajani jaiz nahi, aur daff aur dhol me farq ye hai ke dhol aur tabala dono janib se chamde ke sath band hota hai aur daff sirf ek janib se band hoti hai, aur dusri janib se khula hota hai.”

source: https://islamqa.info/en/9290

۩ Shaykh Albani kahte hai:

“Aur is, yaani dulha ke liye jaiz hai ke wo nikah ka aelaan aur izhaar karne ke liye aurto ko sirf daff bajane aur wo kalaam padhne aur gaane ki ijazat de jisme na to Jamaal o khoobsurti ka wusf ho, aur na hi fisq o fujoor wali baat...” fir unhone iski daleel zikr ki.

Adaab al-Zafaaf, p. 93. 

۩ Shaykh Abdul Azeez bin Baaz kahte hain:

“Shadi biyah ke mauqe par dhol bajana jaiz nahi, balke sirf daff hi istemal karni chahiye.”

Fataawa Islamiyyah, 3/185.

۩ Ibn ‘Uthaymeen kahte hain:

“Dono janib se band ko dhol kaha jata hai jo jaiz nahi, kyunke ye mausiqi me shamil hota hai, aur mausiqi ke sab illat haraam hain, sirf wahi halal hai jiski halaal hone ki daleel ho jo ki shadi biyah ke mauke par daff bajana hai”.

Fataawa Islamiyyah, 3/186.

•٠•●●•٠•

Read More »

Eidi Dene Ka Kya Hukm Hai?

en  -

Sawal: Hamare muashre me Eid ke mauke par kuch paise diye jate hai jise ham Eidi kahte hai. Kya isme koi harj hai? Ya Kya ye biddat hai? Is rasm ke mutallik kya hukm hai?

Alhamdulillah..

Bunyadi usool ye hai ki har Rasm-riwaj par amal karne ki ijazat hai jab tak ke ye shariat se taqraat na ho.

۩ Shaykh al-Sa’di [d.1376 a.h.] farmate hai:

“Rasm-riwaj ka bunyadi usool ye hai ki iski ijazat hai, jab tak ke kisi shariyat [ke ahkaam] me isko mana na kiya ho [yaani shariat ke kisi ahkaam se takraaye na].”

Risaalah fi Usool al-Fiqh (7).

۩ Standing Committee ka is talluq se ye kahna hai:

“Isme koi harj nahi hai; balki ye ek achha rasm hai jo ki ek Musalman ko khush karta hai chahe wo umr-daraaz ho ya naujawan, aur ye kuch aesa hai jise Islam ne pasand kiya hai.

Aur Allah se sabhi taaqat hai. RasoolAllah Muhammad ﷺ par, unke aal par aur unke sahaba par Allah rahmat aur barkat nazil kare.” End quote.

Fataawa al-Lajnah ad-Daa’imah li’l-Buhooth al-‘Ilmiyyah wa’l-Ifta’ 26/247.

۩ Shaykh ibn Uthaymeen kahte hai,

“Eid ke din log tohfa bhi dete-lete hai yaani wo khana banate hai aur ek dusre ki dawat lete hai unke yaha aakar khane ki aur wo milte-julte hai aur khushiya manate hai. Is rasm me koi harj nahi hai kyuki ye Eid ka din hai. Jab Abu Bakr r.a. RasoolAllah ﷺ ke ghar me tashreef laaye toh unhone waha par do (2) ladkiyo ko maujud paya jo eid ke din par gaa rahi thi (singing). Unhone (Abu Bakr ne) unhe roka lekin RasoolAllah ne kaha, “Unhe rahne do”. Aur unhone ye nahi kaha kyuki wo choti bachhiya thi. Balki unhone kaha, “Unhe rahne do kyuki ye Eid ke din hai.

Isse ye ishara hai ki Islam apne rawadaari (tolerent) aur aasan rawayya ke sath logo ko ye ijazat deta hai ki wo apne khushi ka izhaar kar sake Eid ke din.”

Majmoo‘ Fataawa Ibn Uthaymeen, 16/276.

•٠•●●•٠•

Related: 

۩ Eid Ki Namaz Ke Baad Mubarakbaad Dena, Hath Milana Aur Gale Lagne Ke Ahkaam

Read More »

Shahadat e Hussain Par Rasoolullah Ko Gam Aur Aap Ke Aansu

۩ Abu Abdullah (Tabaeen) ke bete Abdullah bin Nujayy apne walid se bayan karte hai ki wo Ali bin Abu Talib ke liye (safar me) saamaan e taharat ka bandobast karte the ki wo Ali r.a. ke sath ek safar me the, Jab Ap Siffeen ko jaate hue (muqam) Neenawa ke barabar pahuche toh Ap ne buland aawaaz se kaha, “Aye Abu Abdullah! (ye Hussain r.a. ki qunyat thi) Faraat (ek jagah) ke kinare sabr karna, Aye Abu Abdullah! Faraar ke kinare sabr karna. Maine (Ali r.a.) se pucha, 'Kya (khaas) baat ho gai'?

Ali r.a. ne farmaya, “Ek din mai RasoolAllah ﷺ ke paas hazir hua, toh (dekhta hu ki) Aap ﷺ ki mubarak aankho se aasu bah rahe the, Maine (bechain) hokar pucha, 'Kya Aap ko kisi ne naaraz kiya hai? Aap ki mubarak aankho se aasu kyu bah rahe hai?'

RasoolAllah ﷺ ne irshad farmaya, “Nahi! balki abhi abhi Jibreel a.s. mere paas se uth kar gaye hai aur unhone mujhe (Allah ki taraf se) ye khabar di hai ki beshak Hussain a.s. ko Faraat ke kinaare katl kar diya jayega. Fir unhone pucha ki kya mai Ap ko us jagah ki mitti dikhau jaha Hussain r.a. girenge? Maine kaha Haa dikho, chunanche unhone mitti ki ek mutthi bhar kar mujhe di, toh is par mai apne aasu na rok saka.”

Musnad Imam Ahmad, hadith- 648. Silsila al hadees as saheeha, hadith-822. Shaykh Zubair Ali Zai ne is riwayat ko Fazail e Sahaba aur Shaykh Albani ne is riwayat ko Silsila al hadees as saheeha me sahih karar diya hai.

۩ Abdullah ibn Abbas r.a. bayaan karte hai ki Ek din maine dopaher ke waqt RasoolAllah ﷺ ko (khwab me) dekha, (is haal me) ki Aap ﷺ ke baal mubarak bikhre hue, aur Aap ﷺ par gard lagi hui hai aur Aap ﷺ ke paas ek shishi hai, jisme khoon hai. Maine arz kiya: “Aye Allah ke Rasool ﷺ ! Ye kya maajra hai?”
RasoolAllah ﷺ ne irshad farmaya: “Ye Hussain r.a. aur unke sathiyo ka khoon hai jise mai aj subah se ikhatta kar raha hu.”
Ammaar (Tabayeen) ka bayan hai: “Hamne wo khwab wala din yaad rakha, aur fir (baad me) hamne tasdeek karli ki usi (61 Hijri me 10 Muharram ul Haraam ke) din wo (Hussain r.a. maidaan e karbala) me katl kiye gaye the.”

Musnad Imam Ahmad, hadith-2165. Is hadees ko Shaykh Shuaib Arnaoot ne aur Shaykh Zubair Ali Zai ne Fazail e sahaba me sahih karar diya hai.

۩ Ammar riwayat karte hai ki Umm Salamah ne unse kaha: “Maine Jinno ko suna ki wo Syedna Hussain r.a. ke liye ro rahe hai.”

Imam Tabrani ki Al Mojam Al Kabir, hadith- 2867, Sheikh Zubair Ali Zai ne is hadith ko Fazail e Sahaba me sahih karar diya hai.

۩ Ibraheem Nakhi (Tabayeen) kahte hai, “Agar (bil-farz) mai unlogo me hota jinhone Hussain r.a. ko katl kiya tha, fir (qayamat) ke din meri magfirat bhi kar di jati, aur mai jannat me dakhil bhi ho jata, toh us waqt (jannat me) bhi RasoolAllah ﷺ ke paas guzarne se sharm karta ke kahee Ap ﷺ meri taraf dekh na le (aur mujh se puch na lein ke tum dunya me Hussain ke katilo ke haami the!)”.

Imam Tabrani ki Al Mojam Al Kabir , volume-3, page-112, hadith-2829. Is hadith ko Shaykh Zubair ali zai ne Fazail e sahaba me Hasan karar diya hai.

•٠•●●•٠•

Read More »

Yazeed | Muhaddiseen Ki Nazar Me

Read More »

Qurbani ki Dua

Alhamdulillah..

Jo shaks Qurbani ke jaanwar ko zabah karna chahta hai uske liye sunnat hai ki wo zabah karte waqt ye dua padha:

“Bismillaah, wa Allaahu akbar, Allaahumma haaza minka wa laka, haaza ‘anni.”

Aur agar wo shaks dusre ki qurbani ke jaanwar ko zabah kar raha hai to wo ye kahega

“Bismillaah, wa Allaahu akbar, Allaahumma haaza an [fulaan], Allaahumma taqabbal min [fulaan] wa aale [fulaan].”

Note: Fulaan ki jagah us shaks ka naam kahna hai jiske naam se qurbani ho rahi hai.

Ahle ilm kahte hai ki isme zaruri sirf Bismillah kahna hai aur jo baaki dua hai wo farz nahi mustahab hai. [source]

Is dua ki Daleel niche di gai hadeeso se hai.

•٠•●●•٠•

۩ Anas r.a. riwayat karte hai ki Nabi ﷺ ne seeng wale do chitkabre mendhon (rams) ki Qurbani ki. Inhe apne haath se zabah kiya. Bismillah wa Allahu akbar (Allah ke naam se, Allah sabse bada hai) padha aur apna paon us ki gardan ke upar rakh kar zabah kiya.

Sahih al Bukhari, Book of Al-Adha Festival Sacrifice (Adaahi), hadith-5565. Baab: 'Zabah Karte Waqt Takbeer Ka Kahna'.

۩ Urwah bin Zubair ne Aisha r.a se riwayat ki ke Rasool ﷺ ne ek singon (Horns) wala mendha laane ka hukum diya jo siyahi mein chalta ho, siyahi mein baithta ho our siyahi mein dekhta ho (yahi paoun, pet our ankhen siyah hoon). Fir ek mendha qurbani ke liya laya gaya to Aap ﷺ ne farmaya ke aye Aisha! churi (knife) laao. Fir farmaya Ke is ko pathhar se tez kar lo. Mai ne tez kar di. Fir Aap ﷺ ne churi li, mendhe ko pakda, is ko letaya, fir zabah karte waqt farmaya, “Bismillah, Allahumma taqabbal min Muhammad wa aale Muhammad wa min Ummati Muhammad. ('Allah ke naam se, Aye Allah ! Muhammad ﷺ ki taraf se our Muhammad ﷺ ki aal ki taraf se our Muhammad ﷺ Ki ummat ki taraf se isko qabool karye,' fir Aap ﷺ ne iski qurbani ki.)

Sahih Muslim, hadith- 5291. Baab: 'Ye Mustahab hai ki achhe jaanwar ko qurbani ke liye chuna jaye aur khud se zabah kiya jaye, kisi aur ko (zabah) karne ki zimmedari na di jaye, aur (zabah karte waqt) Bismillah aur Taqbeer kaha jaye.'

۩ Jabir bin Abdullah r.a. riwayat karte hai ki Mai Nabi ﷺ ke sath eid ul azha ke din Eidgaah gaya, Jab ap khutbah khatam kar chuke to mimbar se niche utre, aur ek mendha laya gaya to Rasool ﷺ ne is ko apne hathon se zabah kiya, aur (zabah karte waqt) ye farmaya: 'Bismillaah, wa Allaahu akbar, Haaza anni wa amman lam yuzhahi min ummati' (Allah ke naam se, Allah sabse bada hai, Ye meri taraaf se aur meri Ummat maise us shaks ki taraf se hai jisne Qurbani nahi ki hai.)

Sunan Tirmizi, The Book on Sacrifices, hadith- 1521. Baab - 'Zabah karte waqt kya kaha jaye'. Shaykh Zubair Ali Zai ne ise hasan karar diya hai.

Imam Tirmizi is hadith ko bayan karne ke baad kahte hai. 

“Ahle Ilm Sahaba aur deegar logo ka is par amal hai ke jaanwar zabah karte waqt aadmi kahe, 'Bismillahi wa Allahu Akbar'. Ibn e Mubarak ka bhi yahi qawl hai (ye) kaha jata hai”.

•٠•●●•٠•

Allah se dua hai ki wo hame Ibraheem a.s. wala eemaan ata kare. aameen.

Read More »