Bachho Par Roze ki Farziyat ka Hukm

Alhmdulillah..

Baaligh hone se pahle chhote bachhe par roza rakhna wajib nahi kyuki Rasool ﷺ ka farmaan hai:

۩ Ayesha r.a. riwayat karti hai ke Rasoolullah ﷺ ne farmaya, “Teen shakhs se qalam utha liya gaya hai, soye hue shakhs se yaha tak ke woh bedaar ho jaye, deewane (pagal) se yahan tak ke use aqal aa jaye, aur bachha se yaha tak ke woh baalig ho jaye.”

Sunan Abu Dawud, kitab ul hudud ﴾40﴿, hadees- 4398. (Sahih)

Lekin is ke bawujud bachhe ko roza rakhne ko kaha jaye taa ke woh roze ka aadi ban jaye, aur is liye bhi ke woh jo aamaal e saleha karta hai woh likhe jate hai.

Waledain ko chahiye ke woh bachhe ko us umar se hi roza rakhne ki aadat daalna shuru karwa de jis umar me woh roza rakhne ki taaqat rakhe, aur yeh umar bachhe ke jism aur banawat ke aetebaar se mukhtalif hoti hai, aur baaz ulama karaam ne is ki tahdeed karte hue das baras kaha hai.

۩ Ibn Qudamah kahte hai,

“Iska matlab us par roza lazim kiya jaye aur use roza rakhne ka hukm diya jaye aur agar roza nah rakhe to use maar kar saza di jaaye, taa keh woh roza rakhne ki mushakkat kar sake aur is ka aadi bane, jaisa ke use namaz ka bhi hukm diya jaye aur us par namaz ki adayegi lazim ki jaye, bachhe ko roza rakhne ka hukm dene walo ka maslak ikhtiyar karne walo me Ata’, al-Hasan, Ibn Sireen, al-Zuhri, Qatadah aur al-Shafa’i shaamil hai.

Aur Awzaai kahte hai:

'Jab bachha musalsal teen roze rakhne ki taaqat rakhta ho aur un ayyaam me kamzor aur dheela o sust nah ho toh us par Ramzan ke roze rakhne lazim kiye jaaye.'

Aur Ishaaq kahte hai, 'Jab bachha baara (12) baras ka ho jaye toh mai ye pasand karta hu ke use roza rakhaya jaaye taa ke woh is ka aadi ho jaye.'

Aur das baras ki umar ko motabar shumaar karna behtar hai kyuki Rasool ﷺ ne is umar me namaz ki adayegi na karne par maarne ka hukm diya hai, aur roze ko namaz ke sath hi motabar samajhna zyada behtar aur ahsan hai kyuke yeh ek dusre ke zyada kareeb hai, aur arkan e Islam me yeh dono badani ibadate ikhhatti hai, lekin yeh hai ke roza zyada mushaqqat ka ba'is hai is liye iske liye taaqat aur istetat ka motabar samjha gaya hai, kyunke ho sakta hai baaz auqaat namaz ki adayegi ki istetat rakhne wala shakhs roza rakhne ki istetat nahi rakhta.” [alfaz khatm]

Al-Mughni, 4/412.

۩ Shayk ibn Uthaymeen kahte hai,

Chhote bachhe par baligh hone tak roze rakhne lazim nahi, lekin jab woh roze ki takat rakhe toh use roza rakhne ka hukm diya jaa sakta hai agar woh roza rakh sake, taake wo is ka aadi ban sake, aur balogat (puberty) ke baad us ke liye roza rakhna aasaan ho sake. Sahaba e karaam r.a. jo ke is ummat ke behtareen log the, bachpan me hi apne bachho ko roza rakhwaya karte the

Majmoo’ Fataawa al-Shaykh Ibn ‘Uthaymeen, 19/28, 29.

•٠•●●•٠•

Read More »

Ambiya ke Jism Ko Mitti Nahi Khati

Alhamdulillah..

Sahih ahadees ki roshni me ham sab ka ye Aqidah hona chahiye ki Nabi apne qabro me akhirat ke zindagi ke sath zinda hai aur unke jism salamat hai. Iski daleel kuch is tarha se hai:

۩ Aws ibn Aws r.a. bayan karte hai ki Rasoolullah ﷺ ne farmaya,

“Jume ka din tumhare behtareen dino me se hai, lehaza is din mere upar kasrat se durood bheja karo, is liye ke tumhare durood mujh par pesh kiye jate hai.

Logo ne arz kiya, 'Allah ke Rasool! Aap qabar me bosidah (decayed) ho chuke honge toh hamare durood Aap par kaise pesh kiye jayenge?' Aap ﷺ ne farmaya, 'Allah ne haraam kar diya hai zameen ke liye ke wo Ambiya ke jism ko khaye.”

Sunan Abu Dawud, kitab al witr ﴾8﴿, hadees- 1531. Ise Imam Hakim, Imam Zahabi aur Imam Nawawi ne saheeh karaar diya hai. 

۩ Anas bin Malik r.a. se riwayat hai,

“Jab Sahaba karam ne Tustar (shahar) ko Fatah kiya toh waha Taboot me ek shaks ka jism dekha, uski naak hamare ek hath ke barabar thi. Waha ke log is taboot ke wasile se galbah wa barish talab kiya karte the. Sayyidna Abu Musa r.a. ne Ameerul Momineen Umar bin khattab r.a. ki taraf khat likha aur saara waqya sunaya, Umar r.a. ne jawab me likha ki ye Allah ta'ala ke abiyo mai se ek nabi hai, na Aag Nabi ko khati hai, na zameen, fir faramaya, Tum aur tumhare sathi koi aisi jagah dekho jiska tum dono ke alawa kisi ko ilm na ho, waha is taboot ko dafan kardo. Anas bin Malik r.a. bayan karte hai ke mai aur Abu Musa gaye aur ise (ek gumnam jaga me) dafan kar diya.”

Musannaf ibn Abi Shayba, 13/27-28, hadees- 33808. Iski sanad ko Shaykh Zubair ali zai ne sahih karaar diya hai.

۩ Yunus bin Ishaq ne Surah Shura, ayat- 52 (Ham ne Moosa ko wahee bheji ke raato raat mere bando ko lekar nikal jao, beshak tera peecha hona hai.) se chand aayaat padhi fir Hazrat Abu Moosa ashari r.a. ka ye bayan naqal kiya, Ek dafa Rasoolullah ﷺ ek dehati ke paas tashreef le gaye. Usne Aap ﷺ ki khoob mahmaan nawazi ki. Rasoolullah ﷺ ne us se farmaya, 'Tum ham se wada karo ke hamare paas aaoge. Fir ek dafa wo dehaati Rasoolullah ﷺ ke paas aaya, Rasoolullah ﷺ ne us se pucha, 'Tumhari haajat kya hai?' Us ne kaha, 'Ek oontni kajawah samet, jiska dudh mere ghar wale piye.'

Toh Rasoolullah ﷺ ne farmaya, 'Ye bhi bani israel ki budhiya ki tarah aajiz hai. 'Sahaba e karaam r.a. ne arz kiya, Ya Rasoolullah ﷺ! Bani Israel ki budhiya ka kya qissa hai?

Aap ﷺ ne farmaya, Jab Moosa a.s. ne bani Israel ke humraah rawangi ka irada farmaya toh raasta bhool gaye. Moosa a.s. ne Bani Israel se pucha, 'Aisa kyu hua?' Fir Aap ko Bani Israel ke ulema ne bataya ke jab Yusuf a.s. ki wafaat ka waqt qareeb aaya toh unhone ham se khuda ki qasam lekar ye ahad liya tha ke jab ham Misr se niklenge toh inka jism bhi apne hamraah muntaqil karke lejayenge.

Moosa a.s. ne farmaya, 'Tum me se koi kya ye janta hai ke Yusuf a.s. ki kabr kahaa hai?' Bani Israel ke ulema ne jawaban kaha, 'Is cheez ka ilm sirf bani Israel ki ek budhya ke paas hai. Moosa a.s. ne us budhya ke paas paigaam bheja ke hame Yusuf a.s. ki qabr ki nishaandehi kare. Us ne kaha, 'Pahle mujh se ek waada kare fir bataungi.'

Moosa a.s. ne pucha, 'Kya waada lena chahti ho?' Us ne kaha, 'Ye ke mai Jannat me aapke saath (pados me) rahu.' Moosa a.s. ko ye waada kuch ajeeb sa laga. Lekin ap se kaha gaya ke is se waada farma lijiye toh ap ne is se Jannat ka wada kar liya, tab wo inko apne hamraah lekar pani ki ek jheel par aayi, jiske pani ka rang bhi badal chuka tha.

Usne kaha, 'Is jheel ka paani khushk kare.' Unhone pani khusk kardiya. Jab paani khushk ho gaya to usne kaha, Yaha se khudayi shuru kar de, unhone khodna shuru kar diya toh waha se unko Yusuf a.s. ka jism e Mubarak mil gaya. Jab unhone Yusuf a.s. ko zameen se nikaal liya toh roze roshan ki tarah raasta in par wazeh hogaya.

Al Mustadrak al Hakim, hadees- 3523. Ise Imam Hakim aur Imam Zahabi ne sahih karaar diya hai. [scan]

Kuch Musalmano ka yeh aqidah hai ki ambiya e karaam ki ye zindagi dunyawi hai lekin ye aqidah durust nahi hai kyuki Quran aur sunnat se hame saaf pata chalta hai ki Ambiya karaam ki zindagi barzakhi hai aur iski kaifiyat ka ilm sirf Allah ko hai.

۩ Allah ﷻ farmate hai,

“Aur jo Allah ki raah me katl kar diye jaye unhe murda na kaho, wo zinda hai magar tumhe iski samajh nahi hai.”

Surah Baqarah ﴾2﴿, ayat-154.

Allah pak saaf is ayat me hame kahte hai ki hame marne ke baad ki zindagi ki samajh nahi hai. Allah ﷻ dusri ayat me farmate hai,

۩ Ab in sab (marne waalo) ke piche ek barzakh (barrier) haayel hai dusri zindagi ke din tak.

Surah al Mominoon ﴾23﴿, ayat-100.

Aur Allah ek ayat me hame fark samjhate hai,

۩ Aur na zinde aur murde barabar hai. Allah jise chahta hai sunwat deta (hear) hai, magar tum un logo ko nahi suna sakte ho qabro me hai.

Surah Fatir ﴾35﴿, ayat-22.

۩ Isi liye Imam ibn Hajar kahte hai,

“Beshak Aap ﷺ apni wafaat ke baad agarche zinda hai lekin ye ukhruwi (barzakhi) zindagi hai, dunyawi zindagi ke mushaba nahi hai, wa Allahu alam.”

Fath ul baari, jild-7, page 349 tahet hadees- 4042.

•٠•●●•٠•

Related:

۩ Hayatun Nabi (Barzakhi zindagi)

۩ Kya Shaheed dunya me zinda hai?

۩ Nabi ﷺ ke wafaat ke waqt ka bayan

Read More »

Sukhi Napaki Chune se Muntaqil Nahi Hoti

en   -

  Sawal  

Agar ek bachha bistar pe peshab kar de aur peshab ke sukh jane par agar mai us bistar par baithta hu, toh kya mera libas napak ho jayega?

  Jawab  

Alhamdulillah..

Sukhi napaki chune se muntaqil (pass, transmit) nahi hoti, toh libas napak nahi hoga aur na hi uska jism napak hoga. Agar ek shaks sukhe peshab par baithta hai, toh is wajah se uska libas napak nahi hota hai aur us libas ko dhone ki zarurat nahi hai.

Najaasat (napaki) sirf gile hone par muntaqil hota hai. Toh agar najasat gili hai ya gili najasat hatho ko chu jaye, fir is wajah se ye muntaqil hoti hai.

۩ Shaykh Abd-Allah ibn Abd al-Rahmaan al-Jibreen se pucha gaya,

“Kya sukha peshab libas ko napak nahi karti? wo is tarha ke agar ek bachhe ne zameen par peshab kar diya hai aur wo peshab bina dhule hi usi jagah par rah kar sukh jaye, fir koi aaye aur us sukhe peshab par baith jaye, toh kya uska libas napak ho jayega?”

Wo jawab me kahte hai:

“Sukhi najaasat ko chune se jism aur sukhe kapde par koi asar nahi padta, aur isse koi farq nahi padta ki agar koi sukhe pair sukhe washroom me jaye, kyuki najaasat sirf gile hone par muntaqil hoti hai.” [alfaz khatm]

Fataawa al-Mar’ah al-Muslimah (1/194).

Aur Allah sabse behtar janta hai.

•٠•●●•٠•

Read More »

Moosa a.s. Aur Ek Budhi Aurat ka Dilchasp Waqya

Yunus bin Ishaq ne Surah Shura, ayat- 52 (Ham ne Moosa ko wahee bheji ke raato raat mere bando ko lekar nikal jao, beshak tera peecha hona hai.) se chand aayaat padhi fir Hazrat Abu Moosa ashari r.a. ka ye bayan naqal kiya, Ek dafa Rasoolullah ﷺ ek dehati ke paas tashreef le gaye. Usne Aap ﷺ ki khoob mahmaan nawazi ki. Rasoolullah ﷺ ne us se farmaya, 'Tum ham se wada karo ke hamare paas aaoge. Fir ek dafa wo dehaati Rasoolullah ﷺ ke paas aaya, Rasoolullah ﷺ ne us se pucha, 'Tumhari haajat kya hai?' Us ne kaha, 'Ek oontni kajawah samet, jiska dudh mere ghar wale piye.'

Toh Rasoolullah ﷺ ne farmaya, 'Ye bhi bani israel ki budhiya ki tarah aajiz hai. 'Sahaba e karaam r.a. ne arz kiya, Ya Rasoolullah ﷺ! Bani Israel ki budhiya ka kya qissa hai?

Aap ﷺ ne farmaya, Jab Moosa a.s. ne bani Israel ke humraah rawangi ka irada farmaya toh raasta bhool gaye. Moosa a.s. ne Bani Israel se pucha, 'Aisa kyu hua?' Fir Aap ko Bani Israel ke ulema ne bataya ke jab Yusuf a.s. ki wafaat ka waqt qareeb aaya toh unhone ham se khuda ki qasam lekar ye ahad liya tha ke jab ham Misr se niklenge toh inka jism bhi apne hamraah muntaqil karke lejayenge.

Moosa a.s. ne farmaya, 'Tum me se koi kya ye janta hai ke Yusuf a.s. ki kabr kahaa hai?' Bani Israel ke ulema ne jawaban kaha, 'Is cheez ka ilm sirf bani Israel ki ek budhya ke paas hai. Moosa a.s. ne us budhya ke paas paigaam bheja ke hame Yusuf a.s. ki qabr ki nishaandehi kare. Us ne kaha, 'Pahle mujh se ek waada kare fir bataungi.'

Moosa a.s. ne pucha, 'Kya waada lena chahti ho?' Us ne kaha, 'Ye ke mai Jannat me aapke saath (pados me) rahu.' Moosa a.s. ko ye waada kuch ajeeb sa laga. Lekin ap se kaha gaya ke is se waada farma lijiye toh ap ne is se Jannat ka wada kar liya, tab wo inko apne hamraah lekar pani ki ek jheel par aayi, jiske pani ka rang bhi badal chuka tha.

Usne kaha, 'Is jheel ka paani khushk kare.' Unhone pani khusk kardiya. Jab paani khushk ho gaya to usne kaha, Yaha se khudayi shuru kar de, unhone khodna shuru kar diya toh waha se unko Yusuf a.s. ka jism e Mubarak mil gaya. Jab unhone Yusuf a.s. ko zameen se nikaal liya toh roze roshan ki tarah raasta in par wazeh hogaya.

Al Mustadrak al Hakim, hadees- 3523. Ise Imam Hakim aur Imam Zahabi ne sahih karaar diya hai. [scan]

•٠•●●•٠•

Read More »

Ramzan me Ghusl e Janabat ko Tulu e Fajr Tak Muakkhar Karna

en    ur  -

  Sawal  

Mujhe ek martaba sehri se qabl ehtelam ho gaya aur mai ghusl na kar saka. Kyunke mai ghusal karne se bahut zyada sharma raha tha isliye ke mere waledain ko ilm ho jayega ke mujhe ehtelaam hua hai toh is liye maine ghusl kare bagair sehri khayi,aur afsos hai ke is din maine Fajr ki namaz bhi nahi padhi, lekin baad me maine ghusl karne ke baad fajr ki namaz padh li.

Mai yeh janna chahta hu ke kya mera ye roza maqbool hai, kyunke mera khayal hai ke maine (ehtelaam se) janabat ki haalat me sehri kha kar galti ki hai toh kya mera roza maqbool hai?

  Jawab  

Alhamdulillah..

Jis ne apni biwi se raat me jama (intercourse) kiya aur subah tak janabat ki haalat me hi raha uska roza sahih hai, aur is‬ tarha use raat ya din ko sote hue janabat la-haq ho gayi toh uska bhi roza sahih hai aur is par koi harj nahi ke woh tulu fajr tak ghusl ko muakkhar kar de.

Roza toh us waqt tut ta hai jab din me tulu e fajr se lekar gurub e aftab ke dauran jama kiya jaye.

Fataawa al Lajnah al Daa’imah, 10/327.

Lekin ap ka namaz ko tulu e aftab tak taakheer karna jayz nahin hai, balke wajib toh ye hai ke namaz ki adaigi us ke waqt me hi ki jaye, lihaza aise fel se tawba wa istagfar karna ap ke zimma hai.

Allah taala se dua hai ke woh ap ko har kism ki bhalai karne ki taufeeq ata farmaye. Aameeen ya rabbul aalameen.

Wa Allahu aalam.

•٠•●●•٠•

source: islamqa.info

Read More »

Rozedaar ki Dua

   en   -

Alhamdulillah..

Allah ﷻ rozedaar ki dua radd nahi karta. Rozedaar ko do (2) muqam par dua karni chahiye:

۩ Jab wo roze ki haalat me ho

۩ Jab wo roza khole

۞ Roze ki Halat me Dua

Abu Hurairah r.a. bayan karte hai ke ham ne Rasool ﷺ ko arz kiya,

Aye Allah ke Nabi jab ham Aap ko dekhte hai toh hamare dil naram ho jate hai, aur un me riqqat paida ho jaati hai, aur ham ahle aakhirat me se ho jate hai, aur jab ham aap se juda hote hai toh hame duniya achhi lagne lagti hai, aur ham apni aurton aur bachon me mashgool ho jate hai.

Toh Rasool ﷺ ne farmaya, 'Agar tum har haal me isi haalat par raho jo tumhari haalat mere paas hoti hai toh tumahre sath farishte musafah kare, aur tumhare gharo me tumhari ziyarat kare, aur agar tum gunah nah karo toh Allah tala aisi qaum le aayega jo gunah karenge taakeh woh inhe bakhsh de.'

Toh ham ne arz kiya, Aye Allah ke Rasool hame jannat ke mutalliq bataiye ke is ki imarate kaisi hai?

Toh Rasool ﷺ ne farmaya,

'Is ki ek eent sone aur ek chandi ki hai, aur uska gaara (mortar) tez khusbhu wali kasturi ka hai, aur is me jo kankadiya bichai gai hai woh moti aur yaqoot (ruby) ki hai, aur is ki mitti zafran ki hai, jo bhi jannat me daakhil hoga woh nemato me hoga aur use koi taqleef nahi aayegi, woh hamesha rahega, aur use kabhi maut nahi aayegi, aur uska libaas kabhi purana nahi hoga, aur na hi us ki jawani khatam hogi, teen shakhs aise hai jin ki Allah taala Dua radd nahi karta, ek nek o adil imam o hukamran, aur roza daar hatta ki iftari karle, aur mazloom ki dua ko upar uthaya jata hai hatta ke us ke liye aasman ke darwaze khol diye jate hai, aur Allah azzwajal farmata hai: 'Mujhe meri izzat ki qasam, mai tumhari zarur madad karunga chahe kuch der baad hi karu.'

Musnad Ahmad, hadees- 8030. Ise Shaykh Shuaib Arnot ne saheeh karaar diya hai.

۞ Roze Kholne par Dua

RasoolAllah ﷺ ne farmaya, “Teen log hai jin ki dua radd nahi hoti, ek rozadaar ki, jab wo roza khole, (dusra) adil imam (just leader), ( teesra ) mazloom, is ki Dua Allah badal se upar tak pahunchata hai, is ke liye aasman ke darwaze khol diye jate hai, aur Rab kahta hai, Meri izzat (qudrat) ki qasam! mai teri madad zarur karunga, bhale kuch waqt ke baad hi kyu nah ho.”

Jamia Tirmizi, kitab ad dua ﴾48﴿, hadees- 3598. Ise Imam Tirmizi aur Darussalaam ne Hasan karaar diya hai.

Allah se dua hai ki wo hamare rozo ko qubul kare. aameen.

•٠•●●•٠•

Related:

۩ Roza kholne ke baad ki Dua

۩ Roze ki Niyat

Read More »