Logo ko Judge Na Karo | Sirat un Nabi

Alhamdulillah..

Hamare muashre me dekha gaya hai ki log badi jaldi dusro ko judge karne lagte hai aur bina Allah ka khauf kare logo ke bareme galat baate karne lagte hai aur badgumaniya karne lagte hai.

Aaiye dekhte hai ki Nabi ﷺ ki seerat hame is chiz ki kya taalim deti hai.

۩ Abu Hurairah r.a. riwayat karte hai ki Nabi ﷺ ke zamana me ek shakhs, jis ka naam Abdullah tha aur use gadha ke laqab se pukara jata tha, woh Rasoolullah ko hansate the aur Aap ﷺ ne inhe sharaab peene par maara tha toh inhe ek din laaya gaya aur Allah ke Rasool ne in ke liye hukm diya aur inhe maara gaya.

Haazreen me ek sahib ne kaha, 'Allah is par laanat kare! Kitni martaba isko (iske jurm ke wajah se) yaha laaya jaa chuka hai.' (Is par) Rasoolullah ﷺ ne farmaya,

'Is par laanat na karo, wallah maine is ke mutalliq se yahi jaana hai ke ye Allah aur us ke Rasool se Muhabbat karta hai.'

Sahih al-Bukhari, kitab al hudood ﴾86﴿, hadees- 6780.

SubhanAllah kya Ap ise soch sakte hai, Aj ke daur me agar ek shaks sharab pita ho, namaze bhi padhta ho, toh ham uske baareme kya sochenge? Ham kahenge, ye banda munafiq hai, fasiq hai, fajir hai, aur kuch log toh shayad kufr ka fatawa bhi laga de lekin Rasoolullah ﷺ ne kya kaha, ki nahi, ruko, aesa mat kaho, ye Allah aur uske Rasool se muhabbat karta hai. 

Ham kisi shaks ke dil me toh nahi jhaak sakta na, toh isliye hame khuda nahi banna chahiye. Ha ye thik hai ki hame dusro ko naseehat karna chahiye, lekin hame shak o shubhaat me nahi padna chahiye, hame badgumani nahi karna chahiye. Hame naseehat karna chahiye, lekin naseehat aese kare ke apke naseehat me ikhlas nazar aaye. Apke naseehat me ye nai jhalakna chahiye ke Ap khud ko bohut nek samajhte hai aur agle ko ham kuch nahi samajhte.

Badkismati se hamare mazhabi log judgemental ho gaye hai. Mera maqsad kisi ko nicha dikhana nahi hai, mai bas ye kahna chahta hu ki agar hamara deen hame jhagdalu bana raha hai, hame gusse waala bana raha hai, hame judgemental bana raha hai toh iska matlab yahi hai ki ham sahih deen ki pairwi nahi kar rahe.

Hame logo ke liye aasani paida karni chahiye, hame logo ke ayeb chupane chahiye, hame judgements paas nai karni chaiye kisi ke bareme, kisi ki niyat par shak karna hamare deen ne hame nahi sikhaya hai kyuki dil ka haal toh sirf Allah ko malum hai.

۞ Is mauzu par Seerat un Nabawi se ek aur Misaal

Hazrat Usama bin zaid r.a. se riwayat ki, Rasoolullah ﷺ ne hame ek chote lashkar me (jang ke liye) bheja, ham ne subah subah Juhaina ke Qabeela e Huraqat par hamla kiya, Mai ek aadmi par kaabu paa liya toh usne la ilaha illallah kah diya lekin mai ne use neza maar diya.

Is baat se mere dil me khatka paida hua to mai ne iska tazkirah Nabi ﷺ se kiya, is par Rasoolullah ﷺ ne farmaya,

'Kya usne la ilaha illallah kaha aur tum ne use qatl kar diya?'

Mai ne arz kiya: 'Aye Allah ke Rasool! usne aslah (weapon) ke dar se kalima padha.'

Is par Rasoolullah ﷺ ne farmaya,

"Kya Tum ne iska dil cheer kar dekha tha taake tumhe maaloom ho jata ke isne (dil se) kaha hai ya nahi"?

Fir Aap mere saamne musalsal ye baat dohraate rahe yaha tak ke mai ne tamanna ki ke (kaash) mai aaj hi Islam laaya hota (aur Islam laane ki wajah se is kalimago ke qatl ke azeem gunah se bari ho jata).

Sahih Muslim, kitab ul Eeman (1), hadees- 277.

۩ Allah ﷻ farmate hai,

'Aye Eemaan waalon! Bahut bad-gumaaniya karne se bacha karo, ke baaz bad-gumaaniya gunah hai, Aur ek-dusre ke aib na tatola karo, aur na tum maise koi kisi ki geebat kiya kare. Kya tum me koi is baat ko pasand karega ke apne murde bhai ka gosht khaye. Isse to tum nafrat karte ho, Aur Allah se darte raha karo, Bila shuba Allah khoob taubah qubool karne wala raham wala hai.'

Surah hujurat (49), ayat- 12.

۩ Anas bin Malik r.a. riwayat karte hai ki Rasoolullah ﷺ ne farmaya,

“(Deen me) Logo ke liye aasani karo aur sakhti na karo aur khush karo aur (deen se) nafrat mat dilao.”

Sahih al bukhari, kitab al adab ﴾78﴿, hadees- 6125.

Allah se dua hai ki wo hame amal ki taufeek de. aameen.

•٠•●●•٠•

Related: Islah Me Sabr Aur Akhlaq Ki Ahmiyat

Read More »

Gumrahi Se Bachne Ke Raaste

Alhamdulillah..

Allah ﷻ farmate hai,

Alif-laam-raa! Ye aali-shaan kitab ham ne Aap ki taraf utari hai ke Aap logo ko andhero se ujale ki taraf laaye, in ke parwardigaar ke hukm se, zabardast aur tareefo waale Allah ki taraf.

Surah Ibraheem ﴾14﴿, ayat-1.

۩ Malik ibn Anas r.a. riwayat karte hai ki RasoolAllah ﷺ ne farmaya, “Maine tumhare darmiyaan do (2) chize chhodi hai jo tumhe kabhi gumrah nahi karegi jab tak tum in do chizo ko pakde rahoge: Allah ki kitab aur Rasool ki sunnat.”

Muwaṭṭa Imam Malik, hadith- 1661. Ise Ibn Abdul Barr ne sahih karaar diya hai.

Hamare muashre me ye galat-fehmi ya gumrahi hai ki Ummat ko hidayat paane ke liye Allah ki kitab yaani Quran aur Rasool ki sunnat yaani sahih hadees kaafi nahi hai.

Ek tabqa ye kahta hai ki Quran aur sunnat ko jab tak kisi ustad ya ulema ke zarye nahi padha jayega tab tak hidayat nahi mil sakti.
Dusra tabqa ye kahta hai ki jab tak Quran aur sunnat ko salaf ya Muhaddiseen ke fahm se nahi samjhenge tab tak sidha rasta ya hidayat nahi mil sakega.

Ye dono baate upar ki ayat, hadees e mubarak aur hamare sahaba ke tarike ke khilaf hai. Ye baat zarur hai ki agar ap aslaaf e deen, ya imam e deen, ulema ke zarye padhenge toh apke ilm me mazeed izafa ho sakta hai aur hota hai, apke kuch mushkilat ya shak ko ye ahle ilm dur karte hai aur apke ilm me mazeed izafa hota hai, ap par kuch baate aur behtar tarah se waazeh hoti hai, aur bohut saare fayde hai. Lekin ye baat ki Quran aur sahih hadith hidayat ke liye kaafi nahi ye kahna kufr hai jaisa ki upar ki ayat aur Aap ﷺ ke hadees me kaha gaya hai.

Aaiye is mauzu par ham sahaba e karaam ka tarika dekhte hai.

۩ Salim bin Abdullah r.a. ne bayan kiya ki unhone Ahle Shaam mai se ek shaks se suna, wo Abdullah bin Umar r.a. se Hajj me Umra se fayda (Hajj e Tamattu) ke bareme puch raha tha. Toh Abdullah bin Umar r.a. ne kaha, "Ye jayz hai". Is par Shaami (sham ka rahne wala) ne kaha, " (Lekin) Apke ke walid (Umar r.a.) ne to isse roka hai?

Abdullah ibn Umar ne kaha, 'Zara tum ye batao, agar mere walid kisi chiz se roke aur RasoolAllah ﷺ ne use kiya ho toh mere walid ke hukm ki pairwi ki jayegi ya RasoolAllah ﷺ ki, toh usne kaha, "RasoolAllah ﷺ ke hukm ki", toh unhone kaha, 'Rasoolullah ﷺ ne aesa kiya hai'.

Jamia Tirmizi, Kitab al Hajj ﴾9﴿, hadith-824. Ise darussalaam ne sahih karaar diya hai.

Ye toh tha sahaba e karaam ka tarika. Agar aj ke log us zamane me hote toh shayad palat kar ye kahte ki kya Tum Umar r.a. se zyada jante ho? Tum itne bade sahaba ki galti nikalte ho? Kya Umar r.a. ko deen samajh me nahi aayi jo tumhe aagai, wagaira wagaira.

Lekin sahaba e karaam ka rawayya dekhe, ki jab Allah ke Rasool ki baat aagai toh wahi saare alfaz khatm ho gaye, aur Rasoolullah ka tarika harf e aakhir ho gaya. Allah hame sahaba e karaam jaisa eemaan ata kare. Sahaba ka rawayya ye isliye tha kyuki unhe pata tha ki Quran me hame yahi hukm diya gaya hai. Lekin aj hamara kya haal hai, ham sirf apne matlab ki ayat lete hai aur baaki chor dete hai.

۩ Allah ﷻ farmate hai

Aur (dekho) kisi momin mard ya kisi momin aurat ko ye haq nahi hai ki jab Allah aur uska Rasool kisi muamle ka faisla kar de to fir use apne us muamle me khud faisla karne ka ikhteyar hasil rahe. (yaad rakho ) Allah taala aur us ke Rasool ki jo bhi nafarmani karega woh saaf gumrahi me padega.

Quran, surah al ahzab ﴾33﴿, ayat-36.

Aur Ise liye hamare imam aur aslaaf ka tarika bhi yahi tha.

۩ Imam Malik (tabe-tabaeen) farmate hai:

“Mai sirf ek insaan hu, kabhi meri baat sahih hoti hain aur kabhi galat, toh tum meri us baat ko jo Quran aur Hadees ke mutabik ho le liya karo aur us baat ko jo is ke khilaf ho chor diya karo.”

Ibn Abdul Barr, Jaami Bayaan al-Ilm (2/32).

Allah se dua hai ki wo hame Allah ki kitab ko aur Rasool ki sunnat ko harf e aakhir manne ki taufeek ata kare. aameen.

•٠•●●•٠•

Related:

۩ Taqleed ka naya naam
۩ Taqleed aur sahaba ka tarika

۩ Taqleed aur Char Imam

Read More »

Ahraam ki Haalat Me Khwateen ke Liye Afghani Naqaab Pahanne ka Hukm

 Sawal 

Khawateen ke liye ahraam ki haalat me afghani naqaab pahanne ka kya hukm hai? Yeh naqaab mukammal taur par chehre ko dhak deta hai, is me sirf aankhon ki taraf bareek kapde ka istemaal kiya jata hai, aur ye bareek kapda mustaqil taur par laga rahta hai jise khola nahi ja sakta.

 Jawab 

Alhamdullillah.. 

Khawateen ko ahram ki haalat mein naqaab ya burqa pahanne se mana kiya gaya hai, jaise ke Imam Bukhari r.h. ne (1741) Ibn Umar r.a. se riwayat kiya ke Aap ﷺ ne farmaya,

Ahraam ki haalat me aurat naqaab mat pahne aur na hi dastaane zaib tan kare.

۩ Ibn Qudamah r.h. kahte hai:

“Ibn Munzir ne kaha, Saad, Ibn Umar, Ibn Abbas, aur Ayesha r.a. se burqa ke baare me karahat saabit hai, aur hm kisi aise ahle ilm ko nahi jaante jinhone unki mukhalfat ki ho, lekin agar qareeb se mardo ke guzarne ki wajah se chehra dhaanpne ki zarurat pade toh apne sar ki janib se apne chehe par kapda latka le, yeh baat Usman aur Ayesha r.a. se manqool hai, aur is baat ke qaayeleen me Ata, Malik, Sauri, Shafi, Ishaq, Mohammad bin al Hasan, shaamil hai, aur hame is baare me kisi ikhtilaaf ka bhi ilm nahi hai, is liye ke Ayesha r.a. kahti hai ke: 'Kaafile hamare qareeb se guzarte aur ham Rasoolullah ﷺ ke sath ahraam me the, chunanche jab woh hamare qareeb aate toh ham apni chadaro ko sar se chehre par latka lete the, aur jab woh guzar jaate toh fir se ham chehra khol dete the.' Ise Abu dawud ne riwayat kiya hai.”

Al-Mughni (3/154).

Mazkurah baala dalail ki bina par ahraam waali khawateen apne chehre ko dhakne ke liye sar se kapra latkaengi, aur naqaab ya burqa ka istemaal nahi karengi, aur na hi afghani naqaab istemaal karengi, is liye ke hame pata chala hai ke woh bhi burqa ki tarha hota hai, is liye khwateen ke liye ahraam ki haalat me use pahenna durust nahi hai.

wa Allaho aalam.

Allah se dua hai ki wo hame aur hamare waledain ko hajj karne ki taufeek ata kare. aameen.

•٠•●●•٠•

source: islamqa.info [edited without changing the meaning of the article.]

Read More »

Ahle Bait Se Muhabbat Aur Unse Bughz

۩ Ibn Abbas r.a. riwayat karte hai ki Rasoolullahﷺ ne farmaya,

“Allah se muhabbat karo kyunke woh tumhe apni nemate ata kar raha hai, aur muhabbat karo mujh se Allah ki khatir, aur mere ahle bait se meri khatir.”

Jamia Tirmizi, kitab al manaqib ﴾49﴿, hadees- 3789. Ise Imam Timizi ne hasan gareeb aur darussalaam ne hasan karaar diya hai.

۩ Zaid bin Arqam r.a. riwayat karte hai ki Rasoolullah ﷺ ne farmaya,

“Mai tumhare darmiyan wo chiz chhore ja raha hu ki agar tum ne ise pakda rakha toh mere jaan ke baad tum gumrah nahi hoge. Ye (do chiz) ek dusre se bhaari hai aur wo Allah ki kitab hai goya wo ek rassi hai jo aasmaan se zameen tak latki hui hai, aur dusre mere ahle bait hai, ye dono hargiz juda na honge yaha tak ke ye dono hauz e kausar par mere paas ayenge, toh tum dekh lo ki in dono ke silsile me tum meri kaisi jaanashini kar rahe ho.”

Jamia Tirmizi, kitab al manaqib ﴾49﴿ , hadees- 3788. Ise Imam Tirmizi ne hasan gareeb aur darussalaam ne sahih karaar diya hai.

۩ Abdullah ibn abbas r.a. bayan farmate hai ke Rasoolullah ﷺ ne irshad farmaya, “Aye bani Abdul Muttalib! Mai ne tumhare liye Allah se teen chiz mangi hai ke,

1. Tumhe sabit qadam rakhe

2. Tumhare gumraho ko hidayat de de

3. Tumhare jahilo ko aalim bana de.

Aur maine Allah se ye dua bhi mangi hai ke woh tumhe sakhi, bahadur aur raham dil bana de.

Chunanche agar koi aadmi rukun aur maqam e ibraheem ke darmiyan khada ho kar namaz padhta ho aur rozadaar ho fir wo faut ho jaye lekin wo Muhammad ﷺ ke ahle bait se bughz rakhta ho toh wo dozakhi hai.

Al Mustadrak lil Hakim, hadees- 4712. Ise Imam Hakim, Imam Zahabi, Al-Albani aur Shaykh Zubair ali zai ne sahih karaar diya hai. [scan]

۩ Umar r.a. ne bayan kiya ke Abu Bakr r.a. kaha karte the ki Nabi ﷺ ki khushnudi ko Aap ke ahle bait ke sath (muhabbat o khidmat ke zarye) talaash karo.

Sahih al Bukhari, kitab fazail ashaab an nabi  ﴾62﴿, hadees- 3751.

Allah se dua hai ki wo hame ahle bait se muhabbat rakhne ki taufeek ata kare. aameen.

•٠•●●•٠•

Related:

۩ Ahle bait kaun hai 
۩ Ali r.a. se Muhabbat aur Unse Bughz

Read More »

Kya Jism Par Godwana (Tattoo) Hajj ki Adayegi Par Rok Hai?

en  -

 Sawal 

Jism par godwane (Tattoo) ka hukm kya hai, aur jab koi godwane wala shakhs Hajj karne ka iradah kare toh kya yeh fareeza e Hajj me maane hoga?

 Jawab 

Alhmdulillah..

Jism me godwana (Tattoo) haraam hai kyunke Nabi ﷺ se saabit hai ke Aap ne jo baal wusat karta hai (adds hair extensions) aur karwata hai, aur godne (who does tattoos) aur godwane wale par laanat farmayi hai.

Godne ka nishan gaal ya hont, ya jism ke kisi aur hisse me ho sakta hai, jaha par khaal ka rang sabz ya neele ya siyah rang se tabdeel kiya jata hai. Lekin godne ka nishan kisi shaks ko Hajj karne se nahi rokta hai.

Al-Mawsoo’ah Al-Fiqhiyyah, 2/309.

•٠•●●•٠•

Read More »

Umrah Me Ahle Makkah Ka Meeqaat

en  -

 Sawal 

Ahle Mecca (Mecca me rahne waale log) Umrah ke liye ahraam kaha se baandhe? Aur agar wo garmiyo ke mausam me Hada (meeqaat se pahle hai) me rahaish pazeer ho toh Umrah ke liye ahram kaha se badhenge?

 Jawab 

Alhamdulillah..

Ahle Mecca (Mecca me rahne waale log) Umrah ke liye haram ki hudood ke bahar se ahraam badhenge jaisa ke taneem hai, Aur agar woh garmiyo me Hada me rahte ho toh woh apni jagah se hi ahraam badhenge kyunke Rasool ﷺ ka farmaan hai:

'(Aur jo us ke andar ho un ke ahraam baandhne ki jagah wahi hai jaha se woh nikle aur safar shuru kare hatta ke ahle Makkah se hi baandhe)' muttafiq alaih.

Aur saheehain me hai ke jab Ayesha r.a. Mecca me thi aur Umrah karna chahti thi toh Nabi ﷺ ne inhe hukum diya ke woh haram se ahraam baandhe (yaani haram ki hudood ke bahar se).

Allah taala hi taufeek dene wala hai.

•٠•●●•٠•

source: Standing Committee For Academic Research And Issuing Fatwas, 11/129.

Read More »

Salaf ke Faham se Deen Samajhna

Salaf as saaleh yaani nek aslaaf. Salaf me teen zamane ke logo ko shumaar kiya jata hai, Sahaba, Tabaeen aur Tabe-Tabaeen.

Salaf ke fahm se deen samajhne se murad ye hai ki ham salaf ke raaye aur unke amal se deen ko samajhte hai jab tak ke unki raaye kitab wa sunnat ke khilaf na jaye. Ye isliye kyuki wo behtareen zamane ke log the, jaisa ki Rasoolullah ﷺ ne ek hadees me farmaya hai,

۩ Abdullah r.a. riwayat karte hai ki RasoolAllah ﷺ ne farmaya, “Sabse behtareen log mere zamane ke hai (RasoolAllah aur sahaba), aur fir wo jo iske baad ayenge (tabaeen), aur fir wo jo uske baad ayenge (tabe-tabaeen).”

Sahih al Bukhari, Kitab Ar Riqaaq ﴾81﴿, hadees- 6429.

Lekin iska ye bilkul matlab nahi hai ki hamare aslaaf se galti nahi ho sakti. Deen me sirf ek hi insan hai jisse galti nahi ho sakti aur wo hai Allah ke Rasool. Unke alawa koi bhi insan nahi hai jisse deen ke masle me galti na ho sake. Isi talluq se Imam Malik ka qawl hame milta hai jo khud ek salaf hai:

۩ Imam Malik (tabe-tabaeen) farmate hai:

“Mai sirf ek insaan hu, kabhi meri baat sahih hoti hain aur kabhi galat, toh tum meri us baat ko jo Quran aur Hadees ke mutabik ho le liya karo aur us baat ko jo is ke khilaf ho chor diya karo.”

Ibn Abdul Barr, Jaami Bayaan al-Ilm (2/32).

Baaz log aese hai jo salaf ke tarike par chalne me gulu kar jaate hai aur wo baaz auqat salaf ke qawl ko Quran ki ayato aur hadees ke muqable me pesh karte hai. Ye jahalat hai aur salaf ki Taqleed hai. Ham salaf ke qawl ko bas wahi tak tasleem karte hai jab tak salaf ki raaye ya amal kisi ayat ya sahih hadees ke khilaf na jaaye.

۞ Is Mauzu par ek misaal

۩ Muslim Ibn Ibraaheem kahte hai:

Hishaam Ad-Dastawaa’ee r.h. (Tabaeen) kabhi bhi raat se lekar subah tak apna charag baahar nahi rakhte the aur ye kaha karte the, “Jab bhi andhera hota hai, mai kabr ke andherapan ke bareme sochne lagta hu.”

Al-Hilyah, 6/221.

Lekin Rasoolullah ﷺ ne sone se pahle charag bujhane ka hukm diya hai.

۩ Jabir bin Abdullah r.a. riwayat karte hai ki Rasoolullah ﷺ ne farmaya ke raat ki jab ibtida ho ya (Aap ne farmaya ) jab shaam ho toh apne bachho ko rok lo (aur ghar se bahar na nikalne do) kyunke is waqt shaitan fail jaate hai fir jab raat ki ek ghadi guzar jaaye toh inhe chor do aur darwaze band kar lo aur is waqt Allah ka naam lo kyunke shaitan band darwaze ko nahi kholta aur Allah ka naam le kar apne mashkeezo (waterskin) ka mun baandh do. Allah ka naam le kar apne bartano ko dhaak do, khwah kisi cheez ko is par rakh kar hi dhak sako aur apne chirag (sona se pahle ) bujha diya karo.

Sahih al-Bukhari, kitab al shurbat ﴾74﴿, hadees- 5623.

Toh ab ek eemaan wale ko salaf ke qawl ko chor dena chahiye aur hadees par wapis aa jana chahiye kyuki jab hadees mil jaye toh wahi hamara mazhab hai. Aur Quran me Allah ka yahi hukm hai,

۩ Aur (dekho) kisi momin mard ya kisi momin aurat ko ye haq nahi hai ki jab Allah aur uska Rasool kisi muamle ka faisla kar de to fir use apne us muamle me khud faisla karne ka ikhteyar hasil rahe. (yaad rakho ) Allah taala aur us ke Rasool ki jo bhi nafarmani karega woh saaf gumrahi me padega.

Quran, surah al ahzab ﴾33﴿, ayat-36.

•٠•●●•٠•

Related: Asal Salafiyyah Kya Hai ?

Read More »