Suraj Wa Chand Grahan Ki Namaz Ka Tarika

Rasool Allah ﷺ ne farmaya: ‘Chand aur Suraj ka graham asaar e qudrat hain. Kisi ke marne, jeene (ya kisi aur wajah) se namudaar nahi hote. Balke Allah (apne) bando’n ko ibrat dilaane ke liey zahir fermata hai. Agar ’tum aise asaar dekho to jald az jald dua, isteghfar aur yaad ilaahi ki taraf rujoo karo’.

(Bukahri: al Kasoof 1059 – Muslim: al Kasoof 912)

Ahle Jaahiliyat ka aqeeda tha ke suraj ya chand isi waqt graham hote hain jab koi ahem shaqsiyat paida ho ya wafaat paaye ya duniya mein koi ahem waqya numaa ho. Nabi e Akram ﷺ ne isi baatil aqeede ki nafee farmai. Yaani suraj ya chand ke graham hone ka ta’aluq kaenaat ke waaqyaat se nahi balke barah raast Allah Ta’ala ki mashiyat aur qudrat se hai aur wo Allah

jo tumhare saamne inhei’n be noor kar sakta hai wo qiyaamat ke qareeb bhi inhei’n be noor karke lapet dene par qaadir hai, lehaza is se darte raho.

Abdullah bin Umroo r.a. se riwayat hai ke jab suraj graham ho to Ap ﷺ ne 1 shaqs ko ye elaan karne ka hukam farmaya:

‘As Salaatil Jaamia’ah’ Namaaz Jamaa Karne Waali Hai. (Tumhei’n bulaarahi hai).

(Bukahri: al Kasoof 1045 – Muslim: 910)

۞ Suraj Grahan Ki Namaz Ka Tareeqa:

Abdullah bin Abbas r.a. se riwayat hai ke Nabi e Rahmat ﷺ ke zamaane mein suraj grahan hua. Aap ne baa-jamaat 2 rakat namaz padhi. Aap ne Surah Baqra tilaawat karne ki miqdaar ke qareeb lamba qiyaam kiya phir lamba ruku kiya. Phir sar utha kar lamba qiyaam kiya jo ki pahle qiyam se chota tha. Phir dusra lamba ruku kiya jo ki pahle ruku se kam lamba tha.

Phir (qauma karke) 2 sajde kiye.

Phir khade hokar lamba qiyam kiya, phir 2 ruku kiye phir 2 sajde karke aur tashahud padh kar salaam phera, phir khutba diya, jis mein Allah ki tareef aur sana bayan ki aur farmaya: ‘Suraj aur chand Allah ki nishaniyo’n mein se 2 nishaniya’n hain. Kisi ke marne ya paida hone se inko graham nahi lagta. Jab tum graham dekho to Allah ka zikar karo. (Dauran e Namaz) main ne jannat dekhi,

agar main is mein se 1 angoor ka khosha le leta to tum rehti duniya tak is mein se khaate rehte aur main ne dozaqh (bhi) dekhi.

Is se badh kar haulnaak manzar main ne (kabhi) nahi dekha. (aur) main ne jahannam mein ziyada ta’adaad aurato’n ki dekhi. Arz ki gai Ya Rasool Allah kya wajah hai (auratei’n ziyada jahannam mein kyou’n hain) Aap ne farmaya: Wo kufr karti hain. Arz Ki gai kya Allah ka kufr karti hain?

Aap ne farmaya: ‘Wo khawind ki naashukri karti hain, agar tu 1 muddat tak inke sath acchai karta rahe phir inki marzi ke khilaf koi kaam kare to kahti hain ke maine tujh se kabhi bhalaai nahi dekhi.’

(Bukahri: al Kasoof 1052 – Muslim: al Kasoof 907)

Is se maloom hua ke kisi mohsin ki ehsaan faraamoshi gunah e kabeera hai. Jab kisi bande ki ehsan faraamoshi kabeera gunah hai to jo khaliq ki ehsaan faraamoshi karta hai iska gunah kis qadr khatarnaak hoga? Allah ham sab ko hidaayat de. aameen.

Suraj aur chand gehnaae jaane par Aap ghabra uthte aur namaz padhte, Asma r.a. bayan karti hain ke Aap ke zamaane mein (1 dafa) suraj graham hua to Aap ghabra gae aur ghabrahat mein ahle khana mein se kisi ek kurta le liya. Baad mein chadar mubaarak Aap ko paho’nchai gai. Asma bhi masjid mein gaie’n aur aurato’n ki saf mein khadi ho gaei’n. Aap ne itna taweel qiyaam kiya ke inki niyyat baithne ki ho gai lekin inho’n ne idhar udhar apne se kamzor aurato’n ko khade dekha to wo bhi khadi rahei’n.

(Muslim: 906)

Aap ka ghabraana Allah ke dar ki wajah se tha. Jab Aap Allah ke pyaare Nabi hokar bhi ghabraa uthte the to afsos hai ham ummatiyo’n par jo baarha gunaho’n ke bawajood aise mawaaqe par Allah ki taraf rujoo nahi karte.

Jabir r.a. kahte hain Nabi e Akram ke zamaane mein 1 saqht garmi ke din suraj graham hua, Aap ﷺ ne Sahaba Ikram ko sath le kar namaz padhi. Aap ne itna taweel qiyaam kiya ke log girne lage.

(Muslim: 904)

Asma r.a. khti hain ke Aap ﷺ ne itna lamba qiyaam kiya ke mujhe (Aurato’n ki saf mein khade khade) ghash agayaa. Main ne baraabar mein apni mushk se paani le kar sar par daala.

(Bukhari: al Juma 922 – Muslim: 905)

Qaraeen ikraam, ghaur farmaaya aap ne? ke Nabi e Rahmat kis qadr inhemaak aur ehtemaam se suraj graham ki namaz padhte the, lekin ham ne kabhi is namaz ki taraf tawajjoh nahi ki. Rasool Allah ﷺ ke peeche auratei’n bhi suraj graham ki namaz padhti thei’n. Hamei’n bhi chaahiey ke ham masjid mein suraj graham ki namaz ba jamaat ka ehtemaam karei’n aur hamari auratie’n bhi zaroor masaajid mein jaakar namaz mein shaamil ho’n.

Allah hame taufeek inayat kare ki is namaz ko ham fir se ba-ehtimam padhe jis tarah RasoolAllah ﷺ, sahaba aur sahabiyat ehtimam karti thi. aameen.

•٠•●●•٠•

Related: Suraj Aur Chand Grahan ki Namaz Padhne ka Step by Step Tariqa

Read More »

Masjid E Nabawi Ki Ziyarat Ke Waqt Ki Jane Wali Galtiya

۩ Pahli Galti: Rasool ﷺ ko pukarna aur unse madad magna ya un se taaun talab karna, jis tarha ki baaz ye kahte hain ya rasulAllah! Mere marz ko shifa nawaz dey, ya rasulAllah! Mera qarz ada kar de, Ay mere waseele, ay meri zarurt ke darwaze khol dey, ya is tarha ke dusre shirqiya alfaz o kalimat jo aisi khalis Tauheed ke munafi hain jo bando par Allah tala ka haq hain.

۩ Dusri Galti: Namaz ki halat ki tarha kabr ke samne khade hona wo is tarha ke daya haath apne baye haath par rakh kar sine ya usse niche bandhna, Ye faeil haraam hain, kyuki ye halat dil o ibadat ki halat hain aur ibadat Allah tala ke alawa kisi ki jaiz nahi.

۩ Tesri Galti: Kabr ke nazdik jhukna ya sajda karna ya iske alawa koi aur kaam karna jo Allah tala ke alawa kisi aur ke liye karna jaiz nahi. Anas razi allahu tala anha bayan karte hain ke rasul ﷺ ne farmaya, "Kisi bashar ke liye jaiz nahi ki wo kisi bashar ko sajda kare.

Munsad Ahamd (158\ 3), Albani sahih al-targib ( 1936-1937),  Arwa al Galil (1998) main isy sahih karar diya hain.

۩ Chauthi Galti : Kabr ke nazdik Allah tala ko pukar kar ye aetkad rakhna ke kabr ke nazdik dua kabul hoti hain aesa faeil bhi haraam hain isliye ki ye shirk ke asbab main se hain , aur agar kabro ke pass ya Nabi ﷺ ki kabr ke nazdik dua Afzal ya bhetar aur sahih aur Allah tala ko zada mahboob hoti, ye manna. Agar ye amal sunnah ya behtar ya jayz hota toh Nabi ﷺ bhi hume iski targib dete isliye ki Nabi ne jannat ke karib karne wali kisi bhi chiz ko nahi chora balki us per apni ummat ko targib di hain , lihaza jab Nabi ne ye kaam nahi kiya toh isse ye ilm hua ki ye faeil haraam aur mamnu hain.  Mohammad ﷺ ne farmaya: ”Maine tumhare paas kuch nahin chhora jo tumhe Allah ke aur kareeb le aye siwaaye jo maine tumhe hukm kiya hai.”

[Reported by at-Tabaraani, authentic, refer to Asl Sifatis-Salaati n-Nabee, vol. 3, p. 942][Musnad Ahmad, Silsilah Sahiha 1803, Sahih by Albani].

Abu Yali aur Hafiz Ziya ne al mukhtarat main Ali bin Husain razi allhu anha se bayan kiya hain ki unhone ek shaksh ko dekha ke wo Nabi ﷺ ki kabr ke karib ek takche ke paas ata aur us main dakhil hokar dua karta toh unhone usey mana kar diya aur kahne lage Kya main tumhe wo hadis na bayan karu jo maine apne walid se aur unhone mere Dada se suni. Wo Rasool ﷺ se bayan karte hai ki Rasool e akram ﷺ ne farmaya ki tum meri kabr ko mela(fair) na banao aur na hi apne gharo ko kabr banao, aur tum jaha bhi ho mujh par durud padha karo kyuki tumhara salam mujh tak pahunchaya jata hain.

Abu Dawood (2042), Sheikh Albani rahmatullahi alaihe ne ise Sahih Abu Daud  (1796 ) me isey sahih karar diya hain.

۩ Panchwi Galti : Jo sakhsh Madina nahi ja sakta wo kisi dusre ke haath Nabi ﷺ ko salam bhej deta hain aur kuch zaireen ye salam pahuchate bhi hain, ye fail man-gadant hain. Salam bhejne wale aur pahuchane wale is kaam se ruk jao. Aap dono ko Nabi ﷺ ka ye farman kafi hona chahiye.

RasoolAllah ﷺ ne farmaya,"Mujh par Durud bheja karo kyuki tum jaha kahi bhi ho mujh tak tumhara salam pahuchaya jata hain aur Nabiﷺ ne farmaya: "Yakinan zamin main Allah tala ke fariste ghum rahe hai jo meri ummat ka salam mujh tak phuchate hain.

Munsad ahmad, 441|1, Sunan Nasai hadis number (1282). Allama Albani rehmatullah ne sahih jaame (2170) me isse sahi karar diya hain.

۩ Chati Galti : Nabi ﷺ ki kabr ko kasrat aur takrar se ziyarat karna, jese ki har farz namaz ke baad ya phir rozana kisi muaiyan namaz ke baad kabr ki ziyarat karna, is main Nabi ﷺ ki mukhalfat hoti hain kyuki Abu Huraira r.a. se riwayat hai ki RasoolAllah ﷺ ka farman hai ki meri kabr ko tyohar ki jagah(a place of festivity) na banao.

Sunan Abu Dawood, Kitab Al-Manasik Wal-Hajj, hadith- 2037.

Ibne hajr baitmi rahmatullah alaihe ne Mishkat ki sharah main kaha hain ki hadis main mazkura " eid", iyad main se ism hain , kaha jata hain : " adata wa adata wa tauda sarlah adat " yani us ki adat ban gyi , aur hadis ke mane ye ke meri qabr ko takrar aur barbar ane wali jagha na banao ki waha kasrat se aao isilye Nabi ﷺ ne farmaya ki Mujh per durud padha karo kyuki tum jaha bhi ho tumhara salam mujh tak pahuch jata hain. Lihaza is me bhi aesa karne se kifayat hain." - Ibne Hajar rahimaullah ki kalam khatam hua.

Aur Ibne Rushd ki kitab "al Jamiya al bayan" main hain ke Imam Malik rahimullah se kisi ajnabi ke bare main pucha gya jo rozana Nabi ﷺ ki kabr par hazri deta tha toh wo kahne lage, "Iska hukum nahi diya gaya aur unhone ye hadis ka zikr kiya jisme RasoolAllah ﷺ ne farmaya ki  Aye Allah meri kabr ko aesa mat banana jis ki ibadat ki jane lage.

[Muwatta Imaam Malik 9:88]

Albani rahimullah ne ise Tahzeer al sajid min atkhad ul kabur masajid " safa (24-26) me sahih karar diya hain. Ibne Rasad kahte hain : "Lihaza kabr par kasrat se jana aur salam kahna, aur rozana kabr par ana makru hain taaki kabr bhi masjid ki tarah hi na ban jaye jaha rozana namaz ki adaygi ke liye log jate hai aur Nabi ﷺ ne is se mana karte hue farmaya hain, "Ay allah meri kabr ko aesa But(idol) na banana jiski ibadat ki jaye. Ibne Rasad rahimullah ki kalam khatam hui.

Dekhye albayan wal tahsil laabin Rasad ( 444/18-445).

Kazi Ayaz rahimullah se madina ke un logo ke bare main sawal kiya gaya jo rozana ek ya do baar Nabi ﷺ ki kabr par khade hokar salam pesh karte hain aur kuch der Dua karte hain toh unhone jawab diya: "Mujhe aesi koi baat kisi bhi ahle fiqh ki janib se nahi mili, aur is ummat ke akhri hisse ki islah usi tarha mumkin hain jaise pahle logo ki hui thi. Aur ummat me ibtidai logo main se kisi ke bary main ye nahi milta ki wo aesa kaam kiya karte thy.

Dekhye- "al-shafa batarif haququl-mustafai, 2\676".

۩ Satwi Galti:-  Masjid ki kisi bhi janib se kabr ki janib mutawajje hona, aur jab bhi masjid main dakhil ho ya namaz se farig ho toh kabr ki janib rukh kar lena aur apne haat bilkul sidhe kar lena aur salam padhte hue apne sar ko jhuka lena ye muntashar biddat hain aur mukhalfat main se hain.

Allah ke bando Allah tala ka takwa ikhtiyar karte hue Allah se daro aur un sab biddat aur mukhalfat se bach jao, aur khwahisat aur andhi takleed se ijtenab karo aur apne mamlat main hadat aur dalail pe qayam raho Allah subhano tala ka farman hain, "Afaman kana ala bainati min rabbihi kaman lahu sua alamihi wa attabiu aeh wahum", Kya wo sakhsh jo apne parwar digar ki taraf se dalail par ho us sakhsh jesa ho sakta hain, jis shaksh ke liye uska bura kaam mazin kar diya gya ho aur wo apni nafasati khwahisat ka pairokar ho?

Surah Muhammad ﷺ. Ayat-14.

Hum Allah taala se dua go hai ki wo hume hidayat yafta aur hidayat dene walo aur sayadul mursalin ki sunnat par chalne wala banaye. aameen.

•٠•●●•٠•

Read More »

Sirf Allah Se Hi Madad Kyu ?

Abu Zarr r.a. se riwayat hai ki unhone Rasoollullah ﷺ se suna ki Allah Subhanahu ne farmaya:

"Aye Mere bando maine zulm ko apne upar haram kiya hai aur tum par bhi haram kiya... to ek doosre per zulm na kiya karo"

"Aye mere bando tum sab gumraah ho siwa uske jise maine hidayat di.. Tum mujhse hidayat maango mai tumhe hidayat dunga"

"Aye mere bando tum sab bhooke ho siwa uske jisey mai ne khana khilaya...Tum mujhse khana maango. Mai tumhe khana dunga.."

"Aye mere bando tum sab nange ho siwa uske jisey maine libas pehnaya..Tum mujhse libas maango. Mai tumhe libas dunga"

"Aye Mere bando tum raat din gunaah karte ho aur main sab gunaahon ko maaf krta hoon...to bakhshish maango mujhse main bakhshunga tumko"

"Aye mere bando tum mera kuch nuksaan nahi kar saktey aur na mujhko faayda pahuncha saktey ho.

Ai mere bando agar tumhare agle aur pichle aur aadmee aur jinnat sab aisey ho jaaye jaisey tum mein ka bada parhezgar to meri sultanat mein kuch afzayeesh (Addition) na hogi aur tum mein agle aur peechle aur admee aur jinnat sab milkar aise ho jaye jaise zameen ka bada badkaar shaksh to meri Saltanat mein se kuch kami na hoga"

"Aye mere bando agar tumhare agle, pichle aur aadmee aur Jinnat sab ek maidan mein khade ho phir mujhse maangna shuru kare aur main har ek ko jitna maange de du tab bhi mere paas jo kuch hai wo kam na hoga magar itna jaise dariya mein suyee daal kar nikal lo."

"Aye mere bando ye tumhare hi aamal hain jinko tumhare liye shumar karta rahta hun phir tumko in aamal ka pura badla dunga... to jo shaksh behtar badla paye use chahiye ki Allah Subhanahu ka shukr kare ki uski kamayee bekar na gayee aur jo bura badla paye to apney hi aapko bura samjhe."

Hazrat Said r.a. ne kaha ki Abu Idris jab ye hadith bayan karte to apne ghutno ke bal gir padte the.

Sahih Muslim, Vol-6, hadith- 6572.

Read More »

Imam Mahdi

Imam Mahdi a.s. nekokaar maise honge jo RasoolAllah ﷺ ke aal maise honge  jo aakhri waqt me zahir honge jiske zarye Allah insani muamlat ko sidha karenge aur dunya ko achai aur insaf se bhar denge.

Imam Mahdi ka naam "Muhammad ibn ‘Abd-Allaah al-Mahdi, ya Ahmad ibn ‘Abd-Allaah al-Mahdi hoga jo Nabi ﷺ ke ahle bayt me se sayyada Fatima r.a. ke bete sayyadna Hasan bin Ali r.a. ki aulad me se honge.

Hazrat Abdulla bin Masood r.t.a. bayan karte hain ke RasulAllah ﷺ ne farmaya, "Ager dunya ka ek roz bhi baki hoga to Allah taala us din ko taweel kardega hatta ke is me ek aise shakhs ko maboos farmayega jo mujh se hoga ya Aap ﷺ ne farmaya ke jo mere Ahle bayt se hoga. Us ka naam mere naam aur us ke walid ka naam mere walid ke naam ke mutabik hoga".

(Jamia Tirmizi Hadith- 2230).

۞ IMAM MAHDI a.s. KI SIFAT :

Hazrat Abu Saeed Khudri r.t.a. bayan karte hain ke RasulAllah ﷺ ne farmaya, "Mahdi mujhse hoga yani meri nasal se hoga. Fir Aap ﷺ ne un ki jismani sifat bayan ki aur farmaya,

"Wo chaudi peshani aur lambi naak wala hoga. Wo zameen ko adl o insaf se isi tarah bhardega jaise wo zulm o zor se bhari huwi thi. Us ki hukumat 7 baras tak rahegi".

Sunan Abu Dawud, Hadith- 4285.

Abu Sa’eed al-Khudri r.a. riwayat karte hai ki RasoolAllah ﷺ ne farmaya, "Wo(Imam Mehdi) ham maise honge jiske piche ‘Eesaa ibn Maryam namaz padhenge".

(Reported by Abi Na’eem in Akhbaar al-Mahdi. Al-Albaani said it is saheeh; see al-Jaami’ al-Sagheer, 5/219, hadeeth 5796).

۞ IMAM MAHDI a.s. KA ZAHOOR KA WAQT:

Quran aur sunnah se exactly ye nahi pata chalta hai ki Mahdi a.s. ka zahoor kab hoga lekin wo aakhri waqt me ayenge. Unka nuzool Qayamat ki choti nishanio maise aakhri nishani hogi. Mahdi a.s. ka Zuhoor jo Dajjal se pahle aur ‘Eesa ibn Maryam ke nuzul hone se pahle honge. Ye in hadith se pata chalta hai. 

Jabir r.a. riwayat karte hai ki RasoolAllah ﷺ ne farmaya Eesaa ibn Maryam nazil honge aur inke Imam, Mahdi farmaenge, "Aaiye aur hamari namaz ki Imamat karye", lekin wo farmayenge, "Nahi", Ap logo maise koi Imamat kare, ye Allah ke taraf se is ummah ke liye izzat hai.

Narrated by Muslim, 225.

‘Abdullaah ibn Mas’ood r.a. riwayat karte hai ki RasoolAllah ﷺ ne farmaya, " Dunya us waqt tak khatm nahi hogi jab tak mere ahle bait maise ek shaks jo mere naam ka hoga Arab ka Hukmaran na ban jaye.

Musnad Ahmad, 5/199, hadeeth 3573.

Kuch log Imam Mahdi ko jhutlane ke liye ek hadith pesh karte hai jisme RasoolAllah ﷺ ne farmaya hai," ‘Eesa ibn Maryam se alag koi Mahdi nahi hai." (matlab Eesa a.s. ke alawa aur koi nahi ayega is ummat me)

Lekin Is hadith ko Sheikh Albani ne Daif karar diya hai. Dalail ke liye dekhye:- al-Silsilah al-Da’eefah, 1/175, by al-Albaani .

Agar apko Mehdi a.s. ke bareme Full Detail se janna hai to in authentic kitabo ko refer kare:

1. Al-Mahdi Haqeeqah wa laa Khuraafah by Shaykh Muhammad ibn Ismaa’eel.

2. Al-Mahdi al-Muntazar by Dr. ‘Abd al-‘Aleem al-bastawi.

3. Ashraat al-Saa’ah by Yoosuf al-Waabil.

Read More »

Kya Nek Shareek e Hayat Ko Talash Karne Ki Koi Dua Hai ?

Kya Achi Biwi Ya Ache Khwaind Ke Husul Ke Liye Koi Khas Dua Hai? Kya koi ayat ya aisy dua hai jise hum mustaqbil me achi biwi ya khawind ki talash ke liye padhe? Aur wo koun koun si ashiya hai jin par ek shaks ko tawajjah markooz karni chahiye ke jis se ye ilm ho sake ke ye ladka/kadki ya wo ladka/ya ladki munasib pasand sabit hoga ya hogy aur kya kisi shaqs ko iska jawab mil sakta hai ke quran majeed ko apne mansoobo ke liye rehnumai ka zariya banaye?

Alhamdulillah, 

Hamare ilm ke mutabiq is muamle ke liye Nabi ﷺ se sabit shuda aur mukaddas dua ka wujood nahi hai lekin aap Allah se khud hi dua kare ke Allah aapko nek biwi muhya farmae, jab ke Nabi ﷺ ne hum sab ko dua e isteqara sikhai hai, jiska matlab hai ke hum Allah se iltemas kare ke hamre Deeni wa duniyawi tamaam umoor ke liye deen aur duniya ke lehaz se behtar cheez hamare liye pasand farmae, aur ye dua Jabir bin Abdullah (r.a)se marwi hai ke Aap ﷺ Tama'am muamilaat ke liye isteqara aise sikhaya karte, jaise Aap hame Quran ki koi surat sikha rahe ho.

Aap ﷺ ne farmaya ki tum me se koi bhi kisi kaam ka irada kare to farz raka'at ke alawa do raka'at nafil ada kare aur phir kahe;

اللَّهُمَّ إِنِّي أَسْتَخِيرُكَ بِعِلْمِكَ، وَأَسْتَقْدِرُكَ بِقُدْرَتِكَ، وَأَسْأَلُكَ مِنْ فَضْلِكَ العَظِيمِ؛ فَإِنَّكَ تَقْدِرُ وَلاَ أَقْدِرُ، وَتَعْلَمُ وَلاَ أَعْلَمُ، وَأَنْتَ عَلاَّمُ الغُيُوبِ، اللَّهُمَّ إِنْ كُنْتَ تَعْلَمُ أَنَّ هَذَا الأمْرَ [یہاں اپنے کام کا نام لے]خَيْرٌ لِي فِي دِينِي وَمَعَاشِي وَعَاقِبَةِ أَمْرِي فَاقْدُرْهُ لِي وَيَسِّرْهُ لِي ثمَّ بَارِكْ لِي فِيهِ، وَإِنْ كُنْتَ تَعْلَمُ أَنَّ هَذَا الْأَمْرَ [یہاں اپنے کام کا نام لے] شَرٌّ لِي فِي دِينِي وَمَعَاشِي وَعَاقِبَةِ أَمْرِي فَاصْرِفْهُ عَنِّي وَاصْرِفْنِي عَنْهُ وَاقْدُرْ لِيَ الْخَيْرَ حَيْثُ كَانَ، ثُمَّ أَرْضِنِي بِهِ-

Tarjuma:

Aey Allah! Tehqeeq main (is kaam mein) tujh se tere ilm ki madad se khair maangta hu’n aur (husool e khair ke liey) tujh se tere qudrat ke zarie qudrat maangta hu’n aur main tujh se tera fazal azeem maangta hu’n, beshak tu (har cheez par) qaadir hai aur main (kisi cheez par) qaadir nahi. Tu (har kaam ke anjam ko) jaanta hai aur main (kuch) nahi jaanta aur tu tamaam ghaibo’n ka jaanne wala hai. Aey Allah! Agar tu jaanta hai ke ye kaam (jiska main iraada rakhta hu’n) mere liey mere deen, mere zindagi aur mere anjaam kaar ke lehaaz se behtar hai to ise mere liey muqaddar kar aur asaan kar phir is mein mere liey barkat paida farma aur agar tere ilm mein ye kaam mere liey mere deen, meri zindagi aur mere anjaam kaar ke lehaaz se bura hai to is (kaam) ko mujh se aur mujhe is se pher de aur mere liey bhalaai muhiyya kar jaha’n (kahee’n bhi) ho. Phir mujhe iske sath raazi karde.

Nabi e Rahmat ne farmaya ke phir apni haajat bayan karo.’

Sahih al Bukhari: al Tahajjud, hadith- 1162.

Tarfain me se har ek ki tawajjah ke liye Deen Daari aur aqhlaaq se badh kar koi cheez nahi hai. Chunanche ladke ke mutalliq Nabi ﷺ ne ladki ke wali  sahebaan ko nasihat farmayi ke "Jab tumhare paas aisa ladka (rishte ke liye aaye) jiske  aqlaaq aur deendari ko tum pasand karte ho to uski shadi kardo aur agar aisa nahi karoge,to zameen me fitna aur fasad hoga"

Jamia Tirmizi, 1084. Ibn e majah, 1967.

Aur ladki ke mutalliq Nabi ﷺ ne nasihat karte hue farmaya: (Muashre me aam taur par) Aurat se shadi 4 chizo ki wajah se ki jaaty hai; Maaldari, Hasbe nasb, Khubsurty aur Deendari. chunanche tum Deendar ko talash karlo tumhare hath khak alood kardegy".

Sahih al Bukhari, 4802 aur Sahih Muslim, 1466.

Hafiz Ibn e Hajar (r.h.) kahte hai:

"Is hadees ka matlab hai ke saheb e murawwat, aur deendaar shaks ko yahi zeeb deta hai ke iska mutma'a nazar har cheez ke bare me deendari hi ho, khususan aise muamilat me jo insan ke sath lambe arse tak rahe, chunanche Nabi ﷺ ne shadi ke khwahismand afraad ki  Deendar ladki talash karne ka hukum diya, kyunki deendary hi asal hazf hai"intahi".

Fathul bari"(135/9).

Sawal ke dusre hisse me mazkoor Quran ke zariye rehnumai hasil karne ke baare me yehai ke agar is se aap ki muraad faal nikalna murad ho,

to ye harqam kaam hai aur Quran ke faal nikalne ke qhud saqta(khud banaya hua) tariqo me se ye bhi hai ke Quran majeed ko kahi se bhi khola jaye, to agar nazar rehmat ya sawab wali ayat par padty hai to iska matlab hai ke banda jo bhi kaam karna chahta hai wo acha aur durust kaam hai aur agar muamla bar'aks ho to iska matlab bhi bar'aks hoga. Deen me iski koi buniyaad nahi hai, ye be-buniya tareeqa hai. Aur agar Quraan paak se rehnumai lene se aapki muraad ye ho ke itteba e Quran ki jaye aur iske ehkamaat par amal kia jaye to haqeeqat me yahi wo sa'adat mandi hai jis se badh kar koi  sa'adat mandi nahi.  Aur wo hai kitaab wa sunnat ki pairwi aur Allah ke yaha qiyamat ke din najaat.

•٠•●●•٠•

Read More »

Kya Gair-Muslims ko Qurbani ka gosht de sakte hai?

Gair-Muslims ko Qurbani ke gosht dene me koi burai nahi hai, khas kar jab wo apka rishtedar ya padosi ya koi gareeb ho siwae unko jo musalmano se jang karte ho. Ye baat is ayat se pata chalti hai:

۩ 'Jin logon ne tum se Deen kay bare me ladayi nahi lari aur tumhe jila watan nahi kiya unn kay sath salook-o-ehsan karney aur munsifana bhalay bartao karney say Allah Taalaa tumhe nahi rokta balke Allah Taalaa to insaf karne walo se mohabbat karta hai.'

Surah Mumtahinah ﴾60﴿, ayat- 8.

Unlogo ko Qurbani ka gosht dena unke saath insaf karna aur unse silahrahmi ke pashemanzar me aata hai jiski Allah ne hame ijazat di hai.

۩ Mujaahid riwayat karte hai ki ek bheda (sheep) Abdullah ibn Amr ke liye qurban kiya tha unke pariwar ke ek shaks ne, aur jab wo(Abdullah ibn Amr) aye, unhone farmaya: Kya tumne in maise kuch hamare Yahudi padosi ko diya, Kya tumne in maise kuch hamare Yahudi padosi ko diya? Kyuki maine RasoolAllah ﷺ se ye farmate hue suna hai ki, "Jibreel musalsal mujhe padosio se silahrahmi karne ki nasihat karte rahe yaha tak ki mujhe laga ki kahi wo padosio ko waaris na bana de."

Jamia Tirmizi, hadees-1943. Ise Darussalaam ne sahih karaar diya hai.

۩ Shaykh ibn Baaz farmate hai,

'Kafiro ke sawal se jo ham se jang nahi kar rahe hai jaise wo jise Musalamano ne hifazat ka jimma liya hai ya wo jo Musalmano ke hukumat me rahte hai, unhe Qurbani ka gosht aur dusre tarha ke sadqe de sakte hai.'

Majmoo Faaawa Ibn Baaz (18/48).

Read More »

Hajj E Akbar Ke Mutallik Galat Fahmi

hi  -

Aksar logo me ye baat payi jati hai ke agar hajj jumah ke din ajae to uska ajar wa sawab badh jaata hai Aur is hajj ko hajj e akbar kaha jata hai.

Ye ek aisy baat hai jiski hame koi daleel na to Allah ki kitab me milty hai aur na hi Rasool ﷺ ki taalimaat me, Aur na hi sahaba r.z. anhum ajmayeen ke haan, Aur na hi ek lambe arse tak unke saath guzarne walo ke haan. 

Allah ne Hajj ka zikr kisi bade ya chote ya'ni hajj e akbar ya hajj e asgar ki tafreeq(farq) ke baghair hi farmaya hai. Ya'ni isko hajj e akbar hy farmaya hai Jaisa ke

وَ أَذَانٌ مِّنَ اللّهِ وَرَسُولِهِ إِلَى النَّاسِ يَومَ الحَجِّ الأَكبَرِ

ALLAH AUR USKE RASOOL KI TARAF SE TAMAAM LOGO ki TARAF HAJJ E AKBAR KI TARAF AILAAN HAI.

(Surah tauba.9./ayat 3).

Sahih al Bukhari, Muslim, Tirmizi aur Abu da'ood ki hadees ke mutabiq Hajj e akbar ka din 10 zil hajjah ko kaha jaata hai.

Aur isliye kaha jata hai ke is din hajj ke sab se zyada aur ehem manasik adaa kiye jaate hai. Abu da'ood ki hadees:

Hazrat Ibn e Umar r.z. bayan karte hai ke:

RasoolAllah ﷺ ne jis saal hajj kiya us hajj me Aap yaumun'nahar(qurbani) wale din khade hue

Aur farmaya: "Ye kounsa din hai"?

Sahaba ne arz kia: Qurbani ka din.

Rasool ﷺ ne farmaya, “Ye Hajj e Akbar ka din hai.”

(Abu dawud, kitab ul manasik, hadith-1947).

Aur Rasool ﷺ ne ye bataya ke qurbani karne ke dino me se pehla din Ya'ni Eid ul Azha wala din HAJJ E AKBAR hai. Jaisa ke Abdullah bin Umar r.z. se riwayat hai ke Jis saal Rasool ﷺ ne hajj adaa farmaya to us hajj me,qurbani wale din(10zil hajj) jumraat (shaitaano ko pathar marne ke muqamat) ke darmiyan khade hokar Rasool ﷺ ne irshad farmaya:

ہذا یَومُ الحَجِّ الأَکبَرِ

Ye aaj ka din hi Hajj e Akbar wala din hai. Aur Nabi ﷺ ne farmana shuru kardiya

اللَّہُمَّ اشہَد

"Aye allah gawah rehna". Aur logo ko al wada kiya toh logo ne kaha ye hajj ul wida hai (Yani ruqsati wala akhri hajj hai).

(Sahih al Bukhari, hadith-1655,kitab ul hajj/baab.131)

Ho sakta hai ke koi ye khayal kare ke Is ayaat aur hadees me ye kahi nahi ke us din jumah na tha, To iska jawab ye hai ke

Agar us din jumah hota, Ya jumah ke din ko hajj e akbar samjha jana maqsood hota To iske baare me sahaba r.z. aur taba'en ki taraf se hame zarur koi sahih sabit shudah khabar milty. Jab ke aisa nahi hai, Aur jo khabar waha se milty hai wo is mandarje bil hadees ke mutabiq hai. Jaisa Abu Huraira r.z. se riwayat hai ke

بَعَثَنِي أبو بَكرٍ رضي الله عنه فِيمَن يُؤَذِّنُ يوم النَّحرِ بِمِنًى لَا يَحُجُّ بَعدَ العَامِ مُشرِكٌ ولا يَطُوفُ بِالبَيتِ عُريَانٌ وَيَومُ الحَجِّ الأَكبَرِ يَومُ النَّحرِ وَإِنَّمَا قِيلَ الأَكبَرُ من أَجلِ قَولِ الناس الحَجُّ الأَصغَر-

Abu Bakar siddeeq r.z. ne mujhe yaumun'nahar (Yani 10zil hajj qurbani karne wale din) In logo ke sath bheja jo mina me ye ailaan kare ke Is saal ke baad koi mushrik hajj na karega Aur na hi koi nanga ho kar kabe ka tawaaf karega. Aur hajj e akbar yahi yaumun'nahar (Yani qurbani karne wala din)hai. Aur isko akbar isliye kaha gaya hai ke log hajj e asgar kaha karte the

Sahih al Bukhari, hadees- 3002, Sahih Muslim 1347, Kitab bul hajj/baab78)

Us zamane me awaam Umrah ko hajj e asgar kaha karte the. Is liye bhi umrah se mumtaz karne ke liye Hajj ko hajj e akbar kaha gaya hai, Jaisa ke Imaam Timizi r.h. is hadees ke tahat is baat ka izhar karte hai. Awaam me jo baat mashoor hai ke jo hajj jumah wale din aaye wo Hajj e Akbar hai. Ye logo ki failai hui baat hai, Quran wa hadees aur sahaba se kahi sabit nahi. Is liye isse bachna chahiye. 

Iske alawa kutubut tafseer aur hadees me sahaba r.z. anhum Tabaeen, tabe tabaeen Ke bhut se aqwaal mayassir hai Jo yehi sabit karte hai ke Yaumun'nahar yani qurbani wale din, eid ke din ko hi hajj e akbar kaha jata tha, Samjha jata tha. Iske alawa koi aur din hajj e akbar na tha. Aur jo kuch us waqt Deen na tha wo baad me kisi surat Deen nahi ho sakta Kyunke us waqt Allah ne Deen mukammil farma diya tha. Jis me kisi bhi tabdeeli ki koi bhi gunjaish nahi.

Allah hame Deen ki sahih samajh ata kare. aameen.

Read More »