Namaz Ki Niyat Dil Se Na Ke Zuban Se

Aap ﷺ farmate hain:

Aamal ka daromadar Niyat par hai. [Sahih al Bukhari. hadees- 1]

Namaz me Niyyat karna zaruri hai isliye ke Namazi ko malum rahe ke wo kOnsi Namaz padh raha hai. Namaz e Zohar ya Asar aur kOnsi rakat farz ya Sunnah.

Lekin Aksar lOg Niyyat ke Alfaz zaban se ada karte hain jaise “Iss Imam ke pichhe me Namaz padh raha hun,itni rakat sunnat ya farz,falan Namaz ki.Munh mera kaabe tarf wagera.”

ye tariqa durust nahi hai kiyuke “Niyyat karna Dil ke Irade ke naam hai.[Kitab ul Fiqah.ali ul mazahib ul arbah:209/1 w sharah w qayah wagera]

Isi ke sath aksar Ulma ne zaban ke sath Niyyat karne ko Bidat shumar kiya hai,kiyuke Nabi(S.A.W) aur Sahaba Ikram se iska kOi subut nahi hai.

Allama Ibne Tahmiya(RahimUllah) farmate hain: “Zaban se Niyyat karna Deen aur aqal dono ke khilaf hai, Deen ke khilaf isliye ke ye Bidat hai aur aqal ke khilaf isliye ke iski missal aise hi hai jaise kOi khana tanawul karna chahta ho to kahe: “Main Niyyat karta hun apne hath ko iss bartan me rakhne ki,isme se luqma lunga phir isko munh me rakhunga,phir isko chabaunga,akhir isko nigal lunga take main ser hosakun.”

kOi aqalmand iss qism ki harkat nahi karega kiyuke jab aadmi ko ilm hai ke wO kya kar rha hai to usne uss baat ki Niyyat bhi zarur ki hogi.

Aur charo Imamo ka iss baat per ittefaq hai ke zaban se Niyyat krna mashru nahi.”[fatawa Ibne Tahmiya 232/1] Imam Ibne Qaim(RahimUllah) farmate hain: “Nabi(S.A.W) jab Namaz ke liye khade hOte to ALLAHU AKBAR kahte aur isse pahle kuch na kahte aur na inn marwajah alfaz ke sath Namaz ki Niyyat karte the.

Kisi ne iske muttaliq ba sanad kOi chiz naqal nahi ki,hatta ke kisi zaeef wa Mursal riwayat me bhi inme se ek lafz bhi marwi nahi hai,balke Sahabi se bhi ye alfaz sabit nahi aur nahi Taba’een aur charO Imamo me se kisi ne zaban ke sath Niyyat karne ko Mustahsin qarar diya hai. [Zaad ul ma’ad ul Ibne Qaim:201]

Allama Muhammad Nasir Uddin Albani(RahimUllah) farmate hain: “Nabi(S.A.W) apni Namaz ko Takbeer Tahrima se shuru karte the.” [see: Sahi Muslim-1110] Iss Hadees me iss baat ki tarf ishara hai ke Aap(S.A.W) “Niyyat karta hun waste Namaz ke wagera” alfaz se Namaz shuru nahi karte the,lehaza ye bil ittefaq Bidat hai,Baaz ne Hasnah aur Saiyyah ka farq bayan kiya hai.

Lekin hum kahte hain ke Ibadat ke mamle me har Bidat Gumrahi hai.kiyukeNabi(S.A.W) ka irshad hai ke: “( كل بدعة ضلالة وكل ضلالة في النار ) “-kullu bid'atin dalalatun wa-kullu dalalatin fi'l-nari-“ iss baat ka taqaza karta hai.” [Safat ul Salat ul Nabi(S.A.W),page-76]

Iss Hadees ke mayeni ye hain ke “Har Bidat Gumrahi hai aur Gumrahi Dozakh me lejane wali hai.” [Sanan Nisai]Niyyat chuki Dil se talluq rakhti hai,isliye zaruri hai ki ham apne tamaan(jayez) kamon me(sabse) pahle niyyat kar liya karen kyonki jaisi niyat hogi waisa hi phal milega.In shaa ALLAHH

ALLAH SW Hume shirk wa Bidat se mahfuz farmaye aur Sunnato per sahi tariqe se Amal karne ki toufiq ata farmaye.Ameen

Prepared By: A.Sayed

Read More »

Islam Me Khwateen Ke Huqooq

Ye jo Magribi nara aazadi e niswa ka hai haqiqat me aurat ke izzat ko lut ta hai, aurto ke aabru ko lut ta hai, aurto ko zaleel karta hai. Ye magribi tahzeeb jo kahti hai ki khwateen ko ham uncha mukam de re hai par haqiqat me unhe eek tawaif banata hai, unhe bazaar ki zeenat banata hai art aur culture ke rangeen parde ke piche. Islam ne alhamdulilah khwateen ko 1400 saal pahle hukuk diye. Jab Quran nazil hua us daur ko kahte the ayyamul jahilya (days of ignorance) us waqt alhamdulilah Islam ne khwateen ko apne hukuk diye. Islam me khwateen ke hukuk ke liye musalman muashre ko nai dekhna chaiye na hi muslims ko dekhna chaiye, hame dekhna chaiye Quran aur Sunnah ko.

Islam me Mard aur Aurat ka darja barabar hai lekin hubahu yaksaa nahi hai. Kyuki Allah pak ne aurat aur mard ko biologically, psychologically aur physically alag banaya hai. Ham Islam me khwateen ke hukuk ka zikr karte hai jo ki maine 5 hisso me bata hai

1. Islam me khwateen ke Roohani Hukuk

2. Islam me khwateen ke Mu-ashi hukuk

3. Islam me khwateen ke Muashrati hukuk

4. Islam me khwateen ke Talimi Hukuk

5. Islam me khwateen ke Qanooni Hukuk

1. ISLAM ME KHWATEEN KE ROOHANI HUKUK:

Aksar gair muslim ko galat famy hai ki Islam me Jannat sirf mardo ke liye hai, Khwateen jannat me ja hi nahi sakti,  unki ye galat famy hai..Unki ye galat famy ko dur karne ke liye Quran ki ek ayat hi kafi hai. Allah pak surah nisa ayat 124 me farmate hai:

وَمَن يَعْمَلْ مِنَ الصَّالِحَاتِ مِن ذَكَرٍ أَوْ أُنثَىٰ وَهُوَ مُؤْمِنٌ فَأُولَٰئِكَ يَدْخُلُونَ الْجَنَّةَ وَلَا يُظْلَمُونَ نَقِيرًا-

Jo eman wala ho mard ho ya aurat aur woh nek aamaal keray yaqeenan aisay log jannat mein jayen gay aur khujoor ki guthli kay shigaf kay barabar bhi unn ka haq na maara jaye ga. 

Allah pak is paigam ko firse dohrate hai Surah Nahl 16 ayat no 97 me

مَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً ۖ وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ-

Jo shaks nek amal keray mard ho ya aurat lekin ba-eman ho to hum ussay yaqeenan nihayat behtar zindagi ata farmyenge. Aur unn kay nek aemaal ka behtareen badla bhi unhen zaroor zaroor den gay.

Allah pak surah Nisa ayat 1 me farmate hai

يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا-

Aey logo apney perwerdigar say daro jiss ney tumhen aik jaan say peda kiya aur us jaan se uske jaisa joda banaya hai.

In ayato ka matkab yahi nikalta hai ki admi aur aurat roohani taur pe yaksa hai.

2. ISLAM ME KHWATEEN KE MU-ASHI HUKUK :

Islam ne khwateen ke muashri hukuk kam se kam magrib se 1300 saal pahle diye. Islam me balig aurat ko ye haq hota hai ki wo apni zaaezaat beche ya kharide bina kisi se puch ke. Islam me aurat naukri kar sakti hai wo jo shariat uski ijazat deti hai. Quran me koi ayat ya koi bhi sahih hadith nahi hai jo aurat ko halah naukri karne se rokti hai. Lekin usko hijab ikhtiyar karke naukri karna chaiye. Lekin Islam me khwateen maa-ashri taur par bare-zimma hai. Unke upar koi financial obligation nahi hai. Islam me ma’ashi zimmedari mard ki hai. Aurat ke Nikah se pahle uske walid aur uske bhai ki zimmedari hai aur Aurat ke nikah ke baad uske shohar ki aur uske bête ki zimmedari hai ke wo sara ma’ashi kharcha jo aurat ka hai wo mard uthae chahe wo khane ke liye ho chahe pahenne ke liye ho ye chahe wo rahne ke liye ho. Aurat ko zindagi basar karne ke liye kaam Karne ki koi zarurat nahi hai lekin agar wo chahti hai ki kaam karu aur haath batau to wo kar sakti hai lekin koi bhi usse zabarzasti nahi kar sakta. Islam me aurat ke ma’ashi hukuk boht hai alhamdulilah. Jab shady hoti hai to shady ke waqt alhamdulilah aurat ko mahr diya jata hai. Allah pak surah nisa ayat 4 me farmate hai:

                                     "Aur aurton ko unn kay mehar razi khushi se de do"

Nikah me bina mahr ke nikah ho hi nahi sakta. Afsos ki baat hai ki hamare kuch muashre me ulta hai ki aurat dahej deti hai mard ko. Islam me aurat se dahej directly ya indirectly mangna haram hai. Even indication bhi dena haram hai.

3. ISLAM ME KHWATEEN KE MU'ASHRATI HUKUK:

۞ BETI KE HUKUK:

Allah pak farmate hai surah al Takweer 81  ayat 8-9 me

                                   وَإِذَا الْمَوْءُودَةُ سُئِلَتْ

                                           بِأَيِّ ذَنبٍ قُتِلَتْ

                       "Aur jab zinda gari hui larki say sawal kiya jaey ga.

                        "Ke kis gunha ki waja say wo qatal ki gai."

Is ayah se ye saaf pata chalta hai ki ladkiyo ka katl karna Islam me haram hai. Na hi sirf ladkiyo ka katl karna haram hai balki dono ladko aur ladkiyo ka katl karna haram hai. Allah pak farmate hai surah 6 ayat 151 me

"apni aulad ko gurbat ke kauf se qatal mat karo. Hum tum ko aur unn ko rizk denge"

Islam me na hi sirf bacho ka katl karna zurm hai khususan ladkiyo ka lekih jab apko pata chalta hai ki ladki paida hui aur ap afsos karte hai, Islam me iski bhi mumaniyat hai. Allah pak farmate hai surah nahl 16 ayat 58-59 me:

وَإِذَا بُشِّرَ أَحَدُهُم بِالْأُنثَىٰ ظَلَّ وَجْهُهُ مُسْوَدًّا وَهُوَ كَظِيمٌيَتَوَارَىٰ مِنَ الْقَوْمِ مِن سُوءِ مَا بُشِّرَ بِهِ ۚ أَيُمْسِكُهُ عَلَىٰ هُونٍ أَمْ يَدُسُّهُ فِي التُّرَابِ ۗ أَلَا سَاءَ مَا يَحْكُمُونَ-

"Inn mein say jab kissi ko larki honey ki khabar di jaye to uss ka chehra siyah hojata hai aur dil hi dil mein ghutney lagta hai.Iss buri khabar say logon say chupa chupa phirta hai. Sochta hai kay kiya iss zillat ko sath liye huye hi rahey ya issay mitti mein daba dey. Aah! Kya hi buray faislay kertay hain" ?

Toh Afsos karna ke ek ladki Aap ke ghar me paida hui, ye bhi islam me jurm hai. Aur Allah ke Rasool farmate hai Musnad Ahmad vol. 1 Hadith 2104 me

“ Agar koi bhi shaks apne do betio ko ache tarike se parwarish karta hai jab tak wo baligh ho jati hai toh akhirat ke din me wo shaks mere itne kareeb rahega aur RaoolAllah ne apne do ungli ko eksath karke joda”.

Aur ek hadith hai jo Ibn Majah ki hai:

“Koi bhi shaks agar do ladkiyo ki parwarish karta hai aur unke sath husn e suluk karta hai to wo jannat me jayega”.

Sunan Ibn Majah, Kitabul Adab, vol. 5 ch. 3 hadith 3670.

۞ BIWI KE HUKUK

Allah pak farmate hai

 " وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ "-

Aur uss ki nishaniyon mein say hai kay tumhari hi jins say biwiyan peda ki takay tum inn say aaram pao uss ney tumharay darmiyan mohabbat aur humdardi qaeem kerdi yaqeenan ghor-o-fiker kerney walon kay liye iss mein boht si nishaniyan hain.Quran surah 30 ayat 21.

  " يَا أَيُّهَا الَّذِينَ آمَنُوا لَا يَحِلُّ لَكُمْ أَن تَرِثُوا النِّسَاءَ كَرْهًا ۖ  "-

 Ae Eman walo! Tumhen halal nahi kay zabardasti aurton ko ikhtiyar karo.

Surah Nisa, ayat 19.

Matlab nikah ke liye shohar aur biwi dono ki ijazat zaruri hai

Ek hadith me..

Ek aurat jis ka naam tha khansa bint Khidam Al-Ansariya tha wo RasoolAllah ﷺ ke paas aati hai aur kahti hai mere walid ne mere marzi ke khilaf meri shady ek admi se ki jise mai pasand nahi karti aur Allah ke Rasool ne nikah e fask kiya(he nullified the marriage).

Sahih al bukhari, kitabun nikah, hadith 69.

Isi liye Islam me shady ke liye mard aur aurat dono ki Razaamandi zaruri hai. Aur islam ne aurat ko “housewife” (ghar ki biwi) nahi balke “Homemaker” (Ghar ki zeenat) kahte hai kyuki wo ghar ko banati hai, wo ghar ki zeenat hai.

Aur Allah pak farmate hai

Agar ap apni biwi se pyar nahi karte fir bhi unke sath husn e suluk karo.

Surah al Nisa ayat 19.

RasoolAllah ﷺ farmate hai ki tum maise sab se behtareen wo hai jinke akhlaq sab se behtar hai aur unmaise sab se behtareen wo hai jo apni biwi ke sath sab se ache hai.

[Narrated in Musnad Ahmad, #7354, and Al-Tirmizi, #1162]

۞ MAA KE HUKUK

Allah pak farmate hai surah Isra (17) me ayat 23-24 me

۩ Aur tumhare Rab ka farman hai ki uski ibadat me kisi ko shareek na karna aur jab tumhare maa baap me se ek ya dono budhi umr par pahoch jaye toh unhe uff tak na kahna aur na hi unse jhirag ke baat karna lekin unse husne suluk ke saath pesh aana aur ye dua karna ki Aye hamare Rab hamare maa baap par raham kar jis tarah inhone rahmat o shafqat ke sath mujhe bachpan me paala tha.

Surah Isra ﴾17﴿, ayat- 23-24.

aur Allah pak farmate hai surah no 6 ayat 151 me 

"Ham ne insano pe farz kiya hai ki wo apne walidain se husn e suluk  kare"

aur ye paigam dohraya gaya hai Surah Lukman (31) ayat 14 me aur surah Al Ahqahf (46) ayat 15 me.

Aur Allah ke Rasool ﷺ farmate hai,

"JANNAT MAA KE KADMO KE NICHE HAI"

Sunan Nasai, Kitaab-ul-Jihaa d, Ch.6 Hadith 3106.

Ek riwayat me aur aata hai..

Hazrat Abu Huraira ((ra)) se riwayat hai ke 1 aadmi Rasool allah ((saw)) ki khidmat me haazir hua aur arz kiya:

“Ya Rasool allah ((saw)) mere husne suluk ka sab se zyada haq daar koan hai?“

Aap ((saw)) ne irshad farmaya:

“Teri Maa“

Is ne dobara arz kiya :

“phir kaun?"

Aap ((saw)) ne irshad farmaya:

“Teri Maa"

Is ne tisri baar arz kiya:

“phir kaun?"

Aap ((saw)) ne irshad farmaya :

“Teri Maa“

Isne chawthi baar pucha :

“phir kaun?"

Aap ((saw)) ne farmaya :

“Tera Baap".

(Sahih Bukhari # kitabul adab, hadith 2)

4. ISLAM ME KHWATEEN KE TALIMI HUKUK:

Sabse pahli wahee aur sabse pahli hidayat jo Allah pak insano ko Quran me dete hai wo ye nahi ki Ap namaz padho ya Roza rakho ya hajj ke liye jaao. Sabse pahli hidayat jo Allah  pak Quran me dete hai wo hai Iqra', 'Padho' jo aata hai surah Iqra'(96) ayat 1 me. Aur ye sirf mard ke liye nahi ye mard aur aurat dono ke liye hai.

Aur Allah ke Rasool farmate hai Sunan ibn Majah, vol-1, hadith-224 me

" Talabul ilm faridatun ala kulli muslim" .

" ILM hasil karna har ek musalma (mard aur aurat) par farz hai ".

Aur Allah ke Rasool aksar ye kahte the ki apne bacho ko ilm do khususan apne betiyo ko. Aur Allah ke Rasool ye bhi kahte the ki shohar ka farz hai ki wo apne biwi ko ilm de, agar khud nahi de sakta to kamaskam itna intzam karna chaiye ki uski biwi tak ilm pohche.

Sahih al bukhari, kitabul Ilm, hadith 101 me zikr hai ki Kuch khwateen Allah ke Rasool ke pas aati hai aur kahti hai ki hame bhi khitab kijiye kyuki Allah ke Rasool ka sara waqt mard le liya karte the. Aur us din Allah ke Rasool ne wada kiya ki wo aurto se bhi khitab karenge.

5. ISLAM ME KHWATEEN KE KANUNI HUKUK:

Kanuni aetbaar se mard aur aurat barabar hai. Allah pak farmate hai Surah al baqara ayah 178 me

Aey eman walon! Tum per maqtoolon ka qisass lena farz kiya gaya hai aazad aazad kay badlay ghulam ghulam kay badlay aurat aurat kay badlay.

Islam me jo saza mard ko milti hai wohi saza aurat ko milti hai. Aur dono ke liye saza yaksa hai. Allah pak farmate hai surah al Maidah 5 ayat no 38 me 

“Chori kerney walay aurat aur mard kay haath kaat diya kero. Yeh badla hai uss ka jo enhon ney kiya azab Allah ki taraf say aur Allah Taalaa qooat aur hikmat wala hai.”

Allah pak farmate hai

" Zina kaar aurat ya mard mein say har ek ko sao koray lagao "

Surah Noor 24 ayat 2.

Islam me aurat ko shahdat(gawahi) dene ka bhi haq hai jab ki boht se mazahib me unko ye haq nahi milta.

Aur Islam pak daman aurat ki hifazat sakhti se karta hai aur wo bhi practical tarike me. Allah pak farmate hai surah nor ayah 4 me

" Jo log pak daman aurton per zina ki tohmat lagayen phir char gawah na paish ker saken to unhen assi(80)  koray lagao aur kabhi bhi unn ki gawahee qabool na kero. Yeh fasiq log hain. "

Toh alhamdulilah Islam ne Khwateen ko boht sare hukuk diye hai na hi sirf lafzi balke amalan taur par bhi..Allah pak mard aur khwateen ko khitab karte hue faarmate hai:

Woh tumhara libas hain aur tum unn ke libas ho [2:187]

•٠•●●•٠•

Related: Islam Me Biwiyon Ke Huqooq

Read More »

Khane Par Fatiha Padhne Ki Sharai Haisiyat

Allah pak Quran me farmate hai

..Aur hamne yeh kitab nazil farmaee hai jiss mein her cheez ka shafi biyan hai aur hidayat aur rehmat aur khuskhabri hai musalmanon kay liye.(al Israa :89)

 Rasoollallah ﷺ ne farmaya

” Sabse behtareen Kalam Allah ki kitab hai aur sabse behtareen tareeqa Muhammad Sallallahu Alaihi Wasallam ke tareeqa hai …”

Sahih Bukhari: Volume 9, Book 92, Number 382.

Muslim ummah ke ek groh me ek riwaj paya jata hai ki wo kisi khas mauke par ya har jume-raat ko khane ke upar surah fatiha padhte hai aur fir uska sawab faut shuda logo ko baksh dete hai. Is amal ka zikr na toh kitab e hidayat me hai aur na hi sunnate Rasool me. Lihaza ye biddat me shumar hota hai.

Ayesha r.a. riwayat karti hai ki Mohammad s.a.w. ne farmaya ki Jisne hamare is deen me kuch aisi baat shamil ki jo usme se nai hai to wo mardud hai.

Sahih al Bukhari, had-2697

Sahih Muslim, had-1718.

Mohammad ﷺ ne farmaya ki Meri sunnat aur khulfa rashidin ki sunnat ko daanto se mazbuti se pakde rahna aur har nayi chiz jo deen me nikali jaye usse bachna kyuki har nai chiz ek gumrahi hai.

[Musnad Ahmad (4/126) and at-Tirmidhee (2676)].

Abdullah Ibn UMar(RA) farMate hain:  TAMAAM Biddatein GUMRAAHI hain, agarche “Ba-Zaahir woh, logon ko ACHCHI lagein”. 

SUNAN KUBRA BAIHAQI (HADITH-138).

RasoolAllah  ﷺ ne hame biddat se bachne ki sakht nasihat farmai hai. So hame Allah se darna chaiye deen me nayi chize ijaad karne se aur biddat ko chor kar sunnat ko apnana chaiye.

Hamare bhai apne is amal ko support karne ke liye ek riwayat pesh karte hai. Jo ye hai:

Jabir bin `Abdullah bayan karte hai, Ham Ghazwa e Khandak ke mauke par khandak khod rahe the toh ek boht sakht chattan nikal aya, sahaba karaam r.a. Nabi ﷺ ki khidmat me Hazir hue aur Arz kiya: Khandak me ye ek chattan nikal ayi hai, Aap ﷺ ne farmaya "(Acha) Mai Utarta hu." Fir Ap khade hue, us waqt Ap ke pet par Patthar bandha hua tha, teen din guzar chuke the aur hamne koi chiz chakh kar bhi nahi dekhi thi, Nabi ﷺ ne Kudal pakad kar mari to wo (chattan) aesi ret ki manind ho gai jo aasani se girti hai, mai apni ahliya ke pas aya to pucha kya tumhare pas kuch (khane ko) hai? Kyuke maine Nabi ﷺ ko sakht bhuk ke aalam me dekha hai, Unhone ek thaili nikali usme ek Saa' Jau the aur hamare pas Bakri ka ek bachha tha, maine ise zibah kiya, Jau pise hatta ke hamne gosht ko handiya me rakha, fir mai Nabi ﷺ ke pas aya aur Sargoshi ke andaz me arz kiya, Allah ke Rasool! Hamne apna bakri ka baccha zibah kiya hai aur ek Saa' Jau ka aanta gunda hai, lehaza Aap Tashrif laye aur kuch sathiyo ko bhi sath le chale, lekin Nabi ﷺ ne zor se Awaz di Khandak Walo! Jabir ne ziyafat ka ehtemam kiya hai, Aao Jaldi karo. Rasool ﷺ ne farmaya Mere aane tak apni Handiya chulhe se na hi utarna aur na roti pakana shuru karna. Aap ﷺ Tashreef laye to maine apke samne aanta nikala, Aapne isme Lu'aab milaya aur barkat ki dua ki fir farmaya Roti pakane wali ko bulao wo tumhare sath roti pakaye aur Handiya se salan nikalte raho, lekin ise chulhe se niche na utaro. Wo ek Hazar ki tadad me the, Mai Allah ki kasam uthata hu ke in sab ne kha liya hatta ke wo bach gaya, aur wo wapas chale gaye jab ke hamari Handiya pahle ki tarha bhari hui thi aur Aante ki Rotiya pahle ki tarha pakai ja rahi thi.

Sahih al-Bukhari, hadith-4102.

Kya daleel di hai batil ne jab Nabi ﷺ ne roti[khane] me barkat ke liye duwa kari tu 1000 sahaba[ra] pet bhar kar khaye! Lekin unke yaha khane me barkat ke liye duwa ki jata hai tu 3 admiyo ka khana 1 hi admi kha jata hai. Ye unke liye sochne wali baat hai!!!

Jab Nabi ﷺ ne roti me barkat ke liye duwa ki toh Ap ﷺ ne kaunsi surat padhi yeh kisi sahaba r.a. ko malum nahi tha. Lagta hai unko ko ilm gaib hai kyu ke Nabi ﷺ ne bataya hi nahi ke unhone kaunsi surat ya ayat ya dua padhi hai Roti me barkat ke liye. Aur ye bhi baat qabile Gaur hai ki RasoolAllah ﷺ ne dua se pahle apna Lua'ab (thuk) dala usme. Ab agar isi hadith par amal karna hai to Mukammal hadith par amal kare aur Khane par Fatiha padhne se pahle usme Lua'ab (thuk) dala jaye aur fir sab ko parosa jaye. Fir dekha jaye wo barkat wala khana kaun khata hai. Dusre ko chhore wo khud nahi Khayenge jisne apna Lua'ab dala hoga usme. Is baat pe gaur karna chaiye unko.

Dusri baat, unki di hui ahadith se ye saaf pata chalta hai ki ye RasoolAllah ﷺ ka mojzah(miracle) tha aur agar kisi muslim me zara si bhi aql hogi to usko ye pata hoga ki mozza aur sunnat alag alag chize hai. Ummatio ko mojzah ka nai balki sunnah ka paband hona chaiye. Ab sahih hadiths me ek aur riwayat hai ki RasoolAllah ﷺ ne chand ko ungli ke ishare se do tukde kiye to kya ummat e Muhammadi ﷺ ko bhi roz ya jume-raat ko ya hafte me ek baar ya kisi khas mauke pe chand ko ungli ke ishare se do tukde karne ki koshish karni chaiye???? Ye bilkul hi aql ke khilaf hai aur sath-sath islami shariah ke khilaf bhi hai.

Jo chiz deen hai hame RasoolAllah ﷺ ne bata diya hai. Agar khane ke upar surah fatiha padhne me bhi koi sawab ya fayda hota to RasoolAllah ﷺ hame zarur bata kar jate. Unhone nauzbillah ummat se koi baat chupai nahi hai.

Mohammad ﷺ ne farmaya: ”Maine tumhare paas kuch nahin chhora jo tumhe Allah ke aur kareeb le aye siwaaye jo maine tumhe hukm kiya hai.”

[Reported by at-Tabaraani, authentic, refer to Asl Sifatis-Salaati n-Nabee, vol. 3, p. 942 . [Musnad Ahmad, Silsilah Sahiha 1803, Sahih by Albani]

Read More »

Imaamat Ke Chand Masaael

1. Ummul Momineen Aaisha رضي الله عنه se riwayat hai: ‘Rasool Allah ﷺ ne apne hujre me (Ramzan ul Mubaarak mein) raat ki namaz padhi aur hujre ki deewar choti thee logo’n ne dekh liye aur inho’n ne hujre se baahar Aap ki iqtedaa mein namaz adaa ki.’

(Bukhari: al Azaan 729)

Maloom hua ke Imam aur muqtadiyo’n ke darmiyan agar deewar ajaae to koi harj nahi, baaz masaajid mein juma ke din bheed hone ki binaa par masji se baahar sadak par namaz adaa ki jaati hai agar muqtadi takbeer ki awaaz sun rahe hain to aisa karne mein koi harj nahi.

2. Abdullah bin Abbas رضي الله عنه kehte hain ke main raat ki namaz mein Nabi e Rahmat ke baaei’n taraf khada hua. Aap ne peeche se mera sar pakda aur mujhe apni daei’n taraf kardiya.

(Bukhari: al Azan 726 – Muslim: Salatul Musafireen 763)

Is se maloom hua ke nawaafil ki jamat mein takbeer (aqaamat) nahi hai aur agar akele aadmi ne namaz shuru ki phir doosra aakar iske sath aamila to pehla namazi Imaamat ki niyat karke namaz jaari rakhe. Wallah A’alam.

Jaabir kehte hain ke main namaz mein Nabi e Akram ke peeche khada hogaya to Aap ne mera kaan pakad kar mujhe apni daie’n jaanib karliya.

(Muslim: Salatul Musafireen 766)

3. Rasool Allah ﷺ jab namaz adaa karne ke liey nikalte to Sayyadna Bilal رضي الله عنه Aap ko dekh kar takbeer kehte aur Aap ke (Hujre se) nikalne ke baad log saf bandi karte the.

(Muslim: al Masaajid 606)

4. Rasool Allah ﷺ ki beemari ke ayyam mein Abu Bakar ne imaamat karaai. Ek din Aap ne takleef mein taqhfeef paai to do Sahaabi ka sahaara lete hue masjid mein daaqil hue Siddiq e Akbar jamat karaa rahe the. Jab Abu Bakar ne Aap ki aamad mehsoos ki to peeche hatna chaaha, Aap ne ishaara kiya ke peeche na hato. Aap Abu Bakar ki baie’n taraf baith gae aur baith kar namaz adaa ki aur Abu Bakar khade the. Abu Bakar Siddiq Rasool Allah ﷺ ki iqtedaa karte aur log Abu Bakar ki iqteda karte. Ye Zohar ki namaz thee.

(Bukhari: al Azan 687 – Muslim: Isteqhlaf al Imam 418)

5. Jang e Tabook mein 1 din Rasool Akram rafa e haajat ke liey gae to wuzu kiya jab paho’nche to dekha ke Abdur Rahman bin Auf namaz padha rahe the. Inke peeche Rasool e Akram ne 1 rakat padhi. Abdur Rahman bin Auf ne dono’n rakatei’n padhne ke baad salam pher kar dekha to Rasool Allah ﷺ namaz poori karne ki khatir doosri rakat ke liey khade hogae the. Salam ke baad farmaya tum logo’n ne accha kiya, tum log waqt muqarrara par namaz padha karo.

(Muslim: al Salah 274)

Maloom hua ke afzal (T: Best in the group) muqtadee ban sakta hai.

6. Muaz Rasool Allah ﷺ ke sath namaz padhte phir apni qaum ke paas aate aur inhei’n namaz padhate.

(Bukhari: al Azan 700 – Muslim: al Salah 465)

Ye namaz Muaz ke liey nafil aur muqtadiyo’n ke liey farz ban jaati thee, is se maloom hua ake namaz mein imam aur muqtadee ki niyyat ka maqhloot (T: different) hona jaaez hai.

7. Do (2) Aadmiyo’n Ki Jamaat:

Abu Saeed kahte hai ke 1 aadmi masjid mein aaya. Aap namaz padha chuke the. Nabi e Rahmat ne poocha: ‘Is par kaun sadqa karega, ek shaqs kahada hua aur is ne aane wale ke sath baajamaat namaz padhi.’

(Abu Dawood: al Salah 574) Imam Tirmizee aur Imam Haakim aur Imam Zahabi ne ise Saheeh kaha.

Maloom hua ke Masjid mein pehli jamat khatam hone ke baad doosri jamat qaem karna jaaez hai aur jamat ke liey 2 aadmi kaafi hain isi tarha agar koi ramzan mein is waqt masjid mein aae jab taraaweeh ki namaz shuru ho chuki ho aur is ne Isha ki namaz na padhi ho wo Isha ki niyyat se jamat mein shaamil ho jaae aur imam ke salam pherne ke baad baaqi rakatei’n poori karle take is tarha ise jamat ka sawaab mil jaae.

•٠•●●•٠•

Read More »

Safon Ke Ahkaam

Quran e Hakeem me hai: Wa Aaqeemus Salaah – Aur Namaz Qaaem Karo.

(Al Baqarah: 43)

Rasool Allah ﷺ ne farmaya: ‘Apni safo’n ko baraabar karo, bila shuba safo’n ka baraabar karna namaz ke qaaem karne mein dakhil hai.’

(Bukhari: 723 – Muslim: al Salah 433)

Rasool Allah ﷺ ne farmaya: ‘Safo’n ko seedha karo kyou’nke saf ko seedha karna namaz ke husn mein se hai.’

(Bukhari: al Azan 722 – Muslim: al Salah 435)

Noman bin Basheer رضي الله عنه riwayat karte hain ke Rasool Allah ﷺ hamari safo’n ko (aisa) baraabar karte goya inke sath teero’n ko baraabar karte ho’n. Yaha’n tak ke ham ne Nabi e Rahmat se safo’n ka seedha karna samajah liya. 1 din Aap (jamat ke liey) khade hue aur takbeer kehne ko the ke ek shaqs ko dekha iska seena saff se baahar nikla hua tha. Pas farmaya: Apni safo’n ko baraabar aur seedha karo warna Allah Ta’ala tum mein ikhtelaf daal dega.

(Bukahri: al Azan 717 – Muslim: 436)

Mazkoora hadees ki roo se safo’n ka seedha karna nihayat zaroori hai. Iqaamat ho chukne ke baad jab safei’n seedhi durust aur baraabar ho jaei’n to phir imam ko takbeer oola kehni chahiye.

Sayyadna Anas رضي الله عنه riwayat karte hain ke Rasool Allah ﷺ ne farmaya: ‘Apni safo’n mein khoob mil kar khade ho aur safo’n ke darmiyan nazdeeki karo, (yaani 2 safo’n ke darmiyan faasla na chhoro) aur gardanei’n baraabar rakho. (Yaani sab baraabar jagah par khade ho ke gardanei’n baraabar hu’n). Qasam hai is zaat ki jis ke hath mein meri jaan hai tehqheeq mein shaitan dekhta hu’n jo safo’n ke shagaafo’n mein daqhil hota hai goya ke wo bakri ka siyaah baccha hai.’

(Abu Dawood: al Salah 667) Ise Imam Ibne Hibban (387) aur Imam Ibne Khuzaima (1545) ne Saheeh kaha.

Noman bin Basheer رضي الله عنه se riwayat hai ke Rasool Allah ﷺ ne logo’n ki taraf mu’n karke farmaya: ‘Logo! Apni safei’n seedhi karo. Logo’n! apni safei’n durust karo. Logo’n! apni safei’n durust karo. Suno! Allah ki qasam agar tum ne safei’n seedhi na keei’n to Allah Ta’ala tumhare dilo’n mein ikhtelaf aur phoot daal dega. Phir to ye haalat hogai ke har shaqs apne saathi ke taqhne se taqhna, ghutne se ghutna aur kandhe se kandha chipka deta tha.’

(Abu Dawood: al Salah 662) Imam Ibne Hibban (392) ne ise Saheeh kaha.

Anas رضي الله عنه se riwayat hai ke Rasool Allah ﷺ ne farmaya: ‘Safo’n ko seedha karo aur aapas mein nazdeek, nazdeek khade ho tehqeeq main tumhei’n pas e pusht bhi dekhta hu’n (ye Aap ka muajjeza tha). Anas رضي الله عنه kehte hain ke ham mein se har shaqs (safo’n mein) apna kandha doosre ke kandhe se aur apna qadam doosre ke qadam se mila deta tha.’

(Bukhari: al Azan 725 – Muslim: 434)

Baraa bin Aazib رضي الله عنه se riwayat hai ke Rasool Allah ﷺ saf ke andar aate, hamaare seeno’n aur kandho’n ko baraabar karte aur farmate the. Aage peeche mat ho. (warna) tumhare dil bhi mukhtalif ho jae’nge. Aur farmate the: ‘Tehqheeq Allah Ta’ala pehli saf walo’n par apni rahmat bhejta hai aur farishte inke liey (rahmat ki) dua karte hain.’

(Abu Dawood: 664 – Mustadrak Haakim V1 P571) Imam Ibne Hibban, Imam Ibne Khuzaima aur Imam Nawavi ne ise Saheeh kaha.

Noman bin Basheer رضي الله عنه se riwayat hai ke jab ham namaz ke liey khade hote to Rasool Allah ﷺ hamari safo’n ko baraabar karte the, jab safei’n baraabar ho jatei’n to (phir) Aap Allahu Akbar keh kar namaz shuru karte.

(Abu Dawood: 665)

Abdullah bin Umar رضي الله عنه se riwayat hai ke Rasool Allah ﷺ ne farmaya: ‘Safo’n ko qaem karo, kandhe baraabar karo, (safo’n ke andar) in jagaho’n ko pur karo jo khaali reh jaaei’n, apne bhaiyo’n ke hatho’n mein narm ho jaao, safo’n ke andar shaitan ke liey jagah na chodo aur jo shaqs saf milaaega Allah bhi ise (apni rahmat se) milaaega aur jo saf ko kaatega Allah bhi apni rahmat se isko kaat dega.’

(Abu Dawood: 666) Ise Imam Haakim V1 P213, Imam Ibne Khuzaima (#549), Imam Zahabi aur Imam Nawavi ne Saheeh kaha.

Apne bhaiyo’n ke hatho me naram hojaane ka ye matlab hai ke agar saf durust karne ke liey koi tumko aage ya peeche kare to badi narmi aur muhabbat se aage ya peeche ho jaao. Agar saf se koi nikal kar chala jae to iski jagah lekar saf ko milaao, Allah tum par rahmat karega. Saf ke andar (jaan bujh kar) ek doosre se door door khade hona saf ko kaatna hai. Aise logo’n ko Allah apni rahmat se door karge. Muqtadi ko imam ki taraf milna chaahiey agar doosra saathi nahi milta to wohi gunahgaar hoga dono’n taraf milne ki koshish mein tangei’n bahot ziyada kholna durust nahi, sirf imam ki taraf milna chaahe.

۞ Safo’n Ki Tarteeb:

Abu Huraira رضي الله عنه se riwayat hai Rasool Allah ﷺ ne farmaya: ‘Agar logo’n ko namaz ke liey jaldi aane ka sawaab malum ho jaae to woe k doosre se aage badhei’n agar inhei’n Ishaa aur subha(Fajr) ki namaz (baa jamaat) ka sawaab malum ho jaae to wo ghutno’n ke bal rengte(crawl) hue bhi (masjid mein) aaei’n aur agar inhei’n pehli saf ka sawaab maloom ho jaae to wo iske liey qura (T: Draw) dalei’n (ka kaun pehli saf mein khada ho).’

(Bukhari: al Azan 721 – Muslim: 437)

Anas رضي الله عنه se riwayat hai ke Rasool Allah ﷺ ne farmaya: ‘Pehle awwal saf ko poora karo. Phir isko jo pehli ke nazdeek hai, agar koi kami ho to aaqhri saf mein honi chahiye.’

(Abu Dawood: al Salah 671) Ise Imam Ibne Khuzaima (#1546) aur Imam Ibne Hibban (#390) ne Saheeh kaha.

Abu Huraira رضي الله عنه se riwayat hai ke Rasool Allah ﷺ ne farmaya: ‘Mardo’n ki safo’n mein (sawaab ke lehaz se) sab se behtar, Awwal saf hai, aur sub se buri saf Aaqhri saf hai aur aurato’n ki safo’n mein se sab se buri saf Pehli saf hai aur sab se behtar Aaqhri saf hai.’

(Muslim: al Salah 440)

Imam Nawawi (raheemaullah) farmate hain: ‘Ye tab hai jab khawateen bhi mardo’n ke sath namaz mein haazr ho’n, kyou’nke agar mard aaqhri saf mein khade ho’n aur inke mutsal baad khawateen khadi ho’n to inka khayal ek doosre ki taraf jaa sakta hai.

Lekin agar mard pahlu safo’n mein hu’n aur khawateen aaqhri safo’n mein ho’n jabke darmiyan mein bacche ho’n to phir aisa imkaan nahi rahega.’

Abu Saeed Khudri رضي الله عنه se riwayat hai ke Rasool Allah ﷺ ne farmaya: Jab log (pehli saf se) peeche hat‐te rahei’nge to Allah Ta’ala bhi inko (apni rahmat mein) peeche daaldega.

(Muslim: 438)

۞ Saf Ke Peeche Akele Namaz Padhna:

Saf ke peeche akele khade hokar namaz nahi padhni chaahiey. Rasool Allah ﷺ ne 1 shaqs ko saf ke peeche akele namaz padhte hue dekha to Aap ne isko namaz lautane ka hukam diya.

(Abu Dawood: al Salah 682) Ise Imam Ibne Hibban V5 P 575 & 576, Imam Ahmad, Imam Ishaq aur Imam Ibne Hazam ne ise Saheeh kaha.

Agar saf mein jagah hai to peeche akele aadmi ki namaz nahi hoti aur agar saf mein jagah nahi hai to ye izterari kaifiyat hogi aisi soorat mein akele hi khade ho jana chaahiey namaz ho jaaegi kyou’nke agli saf mein se kisi muqtadi ko peeche kheenchna kisi saheeh hadees se saabit nahi.

Imam Maalik, Imam Ahmad, Imam Auzaai, Imam Ishaaq aur Imam Abu Dawood (rahimahullah alaihim) farmate hain ke saf se aadmi na kheencha jaae.

Allama Abdul Azeez bin Abdullah bin Baaz (raheemaullah) farmate hain: Agar koi shaqs is waqt paho’nche jab imam namaz ki haalat mein ho aur saf mein ise kahei’n koi jagah na mile to wo intezaar kare yaha’n tak ke koi doosra shaqs aajaae chaahe wo 7 saal ya is se ziyada umar ka baccha hi kyou’n na ho phir iske sath saf banaale warna imam ke daei’n jaanib khada ho jaae.

۞ Saf Bandi Ke Maraatib:

Abu Masood Ansari رضي الله عنه se riwayat hai ke Rasool Allah ﷺ namaz mein apne hath hamare kandho’n par rakhte aur farmate baraabar ho jaao aur iqhtelaaf na karo warna tumhare dil muqhtalif ho jaaei’nge. (aur) Wo log jo baaligh aur (deeni etebaar se) aqalmand hain saf mein mere qareeb rahei’n, phir jo inse qareeb hain, phir jo inse qareeb hain.

(Muslim: al Salah 432)

Anas bin Maalik رضي الله عنه ne kaha ke hamare ghar mein Rasool Allah ﷺ ne nafil namaz ki jamat karai, main aur ek bacche ne ekkhatte Rasool Allah ﷺ ke peeche saf banaai aur meri maa’n Umme Saleem hamare peeche akeli hi saf mein khadi ho gai.

(Bukhari: al Azan 727 – Muslim: al Masaajid 658)

Anas رضي الله عنه kehte hain ke Rasool Akram ﷺ hamare ghar tashreef laae ghar mein, main meri waaleda aur meri khaala thei’n. Aap ne hamei’n nafil bajamaat padhai. Aap ne mujhe apni daei’n taraf khada kiya aur aurato’n ko hamare peeche.

(Muslim: al Masaajid 440)

•٠•●●•٠•

Read More »

Sutrah Ka Bayan Aur Namazi Ke Aage Se Guzarne Ka Gunah

۞ Sutrah Ka Bayan:

Yaha sutrah se murad wo cheez hai jise namazi apne aage khada karke namaz padhta hai taake uske aage se guzarne wala sutrah ke aage se guzar jaye aur gunahgaar na ho. Ye sutrah Laathi, Barchi, Lakdi, Deewar, Sutoon aur Daraqt se hota hai aur Imam ka sutrah sab muqtadio ke liye kafi hota hai.

۩ Talha bin Obaidullah r.a. se riwayat hai ke Rasool Allah ﷺ ne farmaya: ‘Jab koi shaks apne saamne palaan ki pichli lakdi ke baraabar (koi cheez) rakh le to namaz jari rakhe aur jo koi sutre ke peeche se guzre iski parwah na kare.’

Sahih Muslim, al Salah, hadees- 499.

۩ Ata r.h. farmate hai ke palaan ke pichle hisse ki lakdi 1 haath ya isse kuch zyada (lambi) hoti hai.

Sunan Abu Dawood, al Salah, hadees- 686. Ise Imam Ibn e Khuzaima (807) ne Saheeh kaha.

Malum hua ke kam az kam ek haat lambi lakdi ya koi aur cheez sutrah ban sakti hai.

۩ Abu Juhaifa r.a. se riwayat hai ke Rasool Allah ﷺ ne Batha (ek muqam) me logo ko namaz padhai. Nabi e Rahmat ke saamne ek barchi (dandi) gaad di gayi thi. Aap ne 2 rakat zohar ki namaz padhai aur 2 rakat Asar ki. Us waqt barchee ki dusri taraf aurate aur gadhe chale ja rahe the.

Sahih al Bukhari: al Salah 495; Sahih Muslim, al Salah, hadees-  503.

__________________________________________________

۞ Namaz Ke Aage Se Guzarne Ka Gunah:

۩ Rasool Allah ﷺ ne farmaya: ‘Agar namazi ke saamne se guzarne wale ko guzarne ki saza maloom hojae to ise ek qadam aage badhne ki bajae 40 tak waheei’n khade rahna pasand ho.

Abu an Nasr r.a. ne kaha ke mujhe yaad nahi raha ke Basar bin Saeed ne 40 din kahe ya 40 maheene ya 40 saal.’

Sahih al Bukhari, al Salah, hadees-  510; Sahih Muslim, al Salah, hadees- 507.

۩ Rasool Allah ﷺ ne farmaya: ‘Tum namaz adaa karte waqt aage sutrah khada karo aur agar koi shaqs sutrah ke andar (ya’ani namazi aur sutrah ke darmiyan) se guzarna chahe to uski mazahemat karo aur isko aage se na guzrane do. Agar wo na mane to is se ladai karo. Beshak wo shaitan hai.’

Sahih al Bukhari, hadees- al Salah 50; Sahih Muslim, hadees- 505.

Ek riwayat me hai ke do baar toh usko haat se roka jaye aur agar fir bhi wo na ruke toh us se haatha paai se bhi gurez na kiya jaaye (kyuke) wo shaitan hai.

Ibn e Khuzaima, hadees- 818. Aur unhone Saheeh kaha.

۩ Nabi e Rahmat sutrah aur apne darmiyan me se kisi cheez ko guzarne na dete the. Ek baar aap namaz ada farma rahe the ke eek bakri daudti hui aai wo aapke aage se guzarna chaahti thee. Aap ne apne batan e Mubarak (T: stomach) deewar ke sath laga diya to bakri ko sutrah ke peeche se guzarna pada.

Ibn e Khuzaima, hadees-  827. Imam Hakim aur Imam Zahabi ne Saheeh kaha.

۩ Rasool Allah ﷺ ki ja-namaz aur deewar ke darmiyan ek bakri ke guzarne ka faasla hota tha.

Sahih al Bukhari, al Salah, hadees- 496; Sahih Muslim, hadees- 508.

۩ Rasool Allah ﷺ ne farmaya: ‘Agar namazi ke aage ounth ke palaan ki pichli lakdi jitna lamba sutrah na ho aur baaligh aurat, gadha ya siyah kutta aage se guzar jaae to namaz tuth jaati hai. Aur siyah kutta shaitan hai.’

Sahih Muslim, al Salah,  hadees- 510.

۩ Ayesha Siddiqa r.a. se riwayat hai ke wo Rasool Allah ﷺ ke aage soti thi. Mere pair Aap ke samne hote the. Jab Aap sajda karte to mai apne pair samet leti aur jis waqt aap khade hote to pair faila deti. Un dino gharo me charag nahi hote the.

(Sahih al Bukhari, al Salah, hadees- 513; Sahih Muslim, al Salah, hadees- 512.

Maloom hua ke guzarna tu mana hai. Lekin agar aage koi leta hoto koi harj nahi.

•٠•●●•٠•

Read More »

Azaan Ka Jawab Aaur Us Ke Baad Ki Duae

Azaan Ka Jawab:

Umar Farooq رضي الله عنه riwayat karte hain ke Rasool Allah ﷺ ne farmaya:

‘Jab muezzin kahe Allahu Akbar pas tum bhi kaho Allahu Akbar,

Phir jab muezzin kahe Ash‐hadu alla ilaaha illallah to tum bhi kaho Ash‐hadu alla ilaaha illallah,

Phir jab muezzin kahe Ash‐hadu anna Muhammadur Rasool Allah tum bhi kaho Ash‐hadu anna Muhammadur Rasool Allah,

Phir jab muezzin kahe Haiyya A’alas Salaah to tum kaho Laa Haula Wala Qhuwwata Illa Billah,

Phir jab muazzin kahe Haiyya A’alal Falaah to tum kaho Laa Haula Wala Qhuwwata Illa Billah,

Phir jab muazzin kahe Allahu Akbar pas tum bhi kaho Allahu Akbar,

Phir jab muazzin kahe Laa Ilaaha illallah to tum kaho Laa Ilaaha illallah

Jo shaqs apne sadq dil se muazzin ke kalimat ka jawab dega to (jawab ki barkat se) bahisht (T: Jannat) mein daaqhil hojaaega.’

Sahih Muslim, kitab al Salah, hadees- 385.

---

۞ Azan ke baad ki duae:

۩ Abdullah bin Umru bin A’aas رضي الله عنه riwayat karte hain ke Rasool Allah ﷺ ne farmaya: ‘Jab tum muazzin (ki awaz) suno to tum muazzin ko jawab do aur jab azan khatam ho jaae to phir mujh par darood bhejo pas jo mujh par ek baar darood bhejta hai Allah is par 10 baar rahmat bhejta hai.’ 

(Sahih Muslim, kitab al Salah, hadees- 384.

Pas sab musalman mardo’n aur aurato’n ko chahiey ke jab muazzin azan khatam kare to 1 baar darood shareef padhe:

اللَّهُمَّ صَلِّ عَلَى مُحَمَّدٍ، وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ، اللَّهُمَّ بَارِكْ عَلَى مُحَمَّدٍ، وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيمَ، وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ-

Allahumma Sau‐lli A’ala Muhammadin waA’ala Aaali Muhammadin Kama Sau‐llaita A’alaa Ibrahima waA’ala Aaali Ibrahiman Innaka Hameedum Majeed.

Allahumma Baarik A’ala Muhammadin waA’ala Aaali Muhammadin Kama Baarakta A’alaa Ibrahima waA’ala Aaali Ibrahiman Innaka Hameedum Majeed.

Aye Allah Rahmat bhej Muhammad aur aale Muhammad par jaise rahmat bheji Tune Ibrahim aur aale Ibrahim par

beshat Tu ta’areef kiya gaya, buzrugi wala hai.

Ya Ilaahi barkat bhej Muhammad aur aale Muhammad par jaise barkat bheji Tune Ibrahim aur aale Ibraheem par beshak Tu ta’areef ke layak, buzrugi wala hai.

(Bukahri: Ahadees al Ambiya 3370 – Muslim 406)

۞ Jabir riwayat رضي الله عنه karte hain ke Rasool Allah ﷺ ne farmaya: ‘Jo shaqs (azan ka jawab de aur phir) azan khatam hone par ye dua padhe iske liyd qayamat ke din meri shafa’at waajib hojati hai.

اللَّهُمَّ رَبَّ هَذِهِ الدَّعْوَةِ التَّامَّةِ، وَالصَّلَاةِ الْقَائِمَةِ، آتِ مُحَمَّداً الْوَسِيلَةَ وَالْفَضِيلَةَ، وَابْعَثْهُ مَقَاماً مَحْمُوداً الَّذِي وَعَدْتَهُ-

Allahumma Rabba Haazihid Da’awatit Taammati wa Saulaatil Qaaimah Aaati Muhammadal Waseela wal Fadheela Waba’asu Maqaamam Mahmoodallazi wa A(d)tta. (T: here ‘D’ is silent)

Is poori pukar (azan) ke aur (qiyamat tak) qaem rehne wali namaz ke Rab! Muhammad ko waseela aur buzrugi ataa farma aur inhei’n maqaam e mehmood mein paho’ncha jiska tune inse wa’ada kiya hai.

(Bukhari: al Azan 614)

Waseela Ki Tashreeh: Waseela ke muta’alliq khud RasoolAllah ﷺ farmate hain: ‘Tehqeeq waseela bahisht mein ek darja hai jo sirf ek bande ke laaeq hai aur main ummeed rakhta hu’n ke wo banda main hi hu’n. Pas jis ne (azan ki dua padhkar) Allah se mere liey waseela maanga iske liey (meri) shafa’at waajib hogai.’

Sahih Muslim, kitab al Salah, hadees- 384.

Nabi e Rahmat ke irshad se maloom hua ke waseela bahisht mein ek buland o baala darje ka naam hai.

Dua e Azan mein Izaafa:

Masnoon duae azan mein baaz logo’n ne chand alfaz badha rakhe hain aur wo alfaz marwajja kutub e namaz mein bhi maujood hain. Duae mason ke jumla (wal Fadheela) ke baad wad Darajatar Rafea’ah ki ziyadati karte hain aura age wa A(d)tta ke qhalis doodh mein (warzuqhna Shafa’ah Yaumal Qiyaama) ka paani mila rakha hai aur phir akheer mein masnoon dua ke andar Ya Arhamur Rahimeen ke amezish (T: has been mixed) hai.

Afsos! Kya Nabi ki farmooda dua mien ye kami rehgai thee jo baad ke logo’n ne apne izaafe se poori ki hai?

Musalmano’n ko Rasool Allah ﷺ ke farman paak mein kami ya beshi karne ke tasawwur se kaa’np uthna chahiye.

Nabi e Akram ne raat o baa wuzu hokar sone se pehle padhne ke liey ek dua bataai. Baraa bin A’azib ne padh kar sunai to (Bi Nabiyyika) ki jagah (Bi Rasoolika) ya’ani Nabi ki jagah Rasool kaha, to Nabi e Rahmat ne farmaya ke mere batae hue lafz Nabi ko Rasool se mat badlo balke (Bi Nabiyyika) hi kaho.

(Bukhari: al Wuzu 247 – Muslim: al Zikr wa Ad‐Dua 2710)

Isse maloom hua ke masnoon duaei’n aur wird Tauqheefi (Allah ki taraf se) hain aur inki haisiyat ibaadat ki hai lehaza in mein kami beshi jaaez nahi, lehaza (kisi qareena ya daleel ke baghair) mutakallim ke seeghe to jama’a ke seeghe se badalna durust nahi hai iski bajaae behtar ye hai ke mutakallim ka seegha hi bola jaae albatta niyyat mein ye rakha jae ke main yehi dua falaa’n falaa’n ke haq mein bhi kar raha hu’n. Nez masnoon duao’n aur auraad ke hote hue qhud saaqhta Arbi duao’n, wazeefo’n aur daroodo’n ka iltezam karna durust nahi hai aur agar inke kuch alfaz Shirk, Kufr ya Bidat par mushtamil ho’n to is surat mein inka padhna katai taur par Haraam hojata hai, lekin afsos ke jaahil log rozana A’alas Subha (T: early morning) paabandi ke sath

Darood e Taaj, Darood e Lekhi aur Darood e Hazaari waghair ki ‘tilaawat’ karte hain. Allah ham sab ko hidayat de. Aameen.

۞ Sa’ad bin Abi Waqqas r.a. riwayat karte hain ke Rasool Allah ﷺ ne farmaya: ‘Jo shaqs muazzin (ki azan) sunkar ye dua padhe to iske gunah baqsh deiy jae’nge.

Dua ye hai:

Ashadu alla ilaaha illal lahu wahdahu laa shareeka lahu wa anna Muhammadan A’abduhu wa Rasooluhu, Razeetu billahi rabbaou’n wa biMuhammadin Rasoola wa bil Islaami deena.’

Main gawaahi deta hu’n ke Allah ke siwa koi (saccha) ma’abood nahi woe k hai iska koi shareek nahi aur tehqheeq Muhammad iske bande aur Rasool hain. Main Allah ke Rab hone aur Muhammad ke Rasool hone aur Islam ke Deen hone par raazi hu.

Sahih Muslim, kitab al Salah, hadees- 386.

Read More »