Qisto (installments) Par Samaan Lene Ke Ahkaam

Alhamdulillah..

Qisto me saamaan lene ka matlab ye hai ki ap saamaan ko pahle hi hasil kar le aur uski qeemat baad me ek hi baar me ya thoda thoda kar ke ada kare.

Qisto me len-den un masail me se hai jin ka is daur me hukm malum karne ka ahtimaam karna zaruri hai. Is liye ke dusri jung e azeem (2nd world war) ke baad qisto me muamla karna bahut aam hota ja raha hai.

Aaiye dekhte hai hamare Deen ne hame is bareme kya rahnumayi ki hai:

۩ Ayesha r.a. bayan karti hai ke Nabi ﷺ ne ek Yahudi se udhaar galla (food) khareeda aur us ke paas apni lohe ki dhaal girwi rakh di.

Sahih al Bukhari, kitab al buyu ﴾34﴿, hadees- 2068.

Yeh hadees qisto par udhaar saamaan khareedne aur bechne ki dalalat karti hai.

Agarche qist me khareed farokht ki daleel milti hai lekin is chiz me ulema e karaam me ikhtilaf hai ki kya qisto me saamaan ki qeemat se zyada paise dena ya lena jayz hai ya nahi yaani agar koi chiz 100 rupye ki hai toh qist me lene ke wajah se wo samaan ki qeemat 110 ho jaye, jo ki aam taur par hamare muashre me hota hai.

Bahut kam ulema is chiz ko haraam samajhte hai aur wo kahte hai ki yeh sood hai. Unka  ye kahna isliye hai kyuki is me qeemat zyada hai aur ye zyada qeemat, muddat (time-period) ke wajah se hai toh yahi sood kahlata hai .

Aur Jamhur (aksar) ulama e karaam jin me aimma arba (char imam) bhi shamil hai wo iske jawaaz (jayez hone) ke qayel hai.

۩ Hanafi mazhab me hai ke:

'Muddat ke aewaz qeemat badhana jayz hai.'

Badaa'i al-Sanaa'i, 5/187.

۩ Maliki mazhab:

'Zyada waqt ke liye qeemat me se kuch miqdaar badha kar rakhi ja sakta hai.'

Bidaayat al-Mujtahid, 2/108.

۩ Shafi mazhab:

'5 Nakad (cash), 6 taakheer ki adayegi ke barabar hai.'

al-Wajeez by al-Ghazaali, 1/85.

۩ Hambali mazhab:

'Deri keemat me kuch shamil kar deti hai.'

Fataawa Ibn Taymiyah, 29/499.

In ahle ilm ke dalail ye hai:

Allah ﷻ farmate hai,

۩ 'Allah ne tijarat ko halal kiya.'

Surah Baqarah ﴾2﴿, ayat-275.

Is ayat ka aam matlab me har tarah ki tijarat aati hai jisme taakhir adayegi ke tahat qeemat ko badhana bhi shamil hai.

۩ Aye logo jo eeman laye ho, aapas me ek dusre ke maal batil tareeqo se na khao, len-den hona chahiye aapas ki razamandi se.

Surah Nisa ﴾4﴿, ayat-29.

Is ayat ka aam matlab bhi isi taraf nishandehi karta hai ki ek dusre se tijarat karna jayz hai agar apas ki razamandi ho. Yaani agar khareedne wala shaks zyada keemat dene ko tayar hai taakhir ki adayegi ki wajah se toh len-den jayz hai.

۩ Jabir bin Abdullah r.a. riwayat karte hai ke maine Nabi ﷺ ko safar me ek oont (camel) becha tha. Jab ham Madinah pahunche toh Aap ﷺ ne farmaya ke masjid me ja kar do rakat namaz padh lo, fir Aap ne (oont ki keemat ko sone se) wazan kiya aur mujhe asal qeemat se zyada keemat ada ki.

Jabir r.a. mazeed kahte hai, 'Is me se kuch thoda sa mere paas tab se mahfooz tha. lekin shaam wale ( Yazeed ke lashkar) yaum e Harra ke mauqe par mujh se cheen kar le gaye.

Sahih al Bukhari, book of gifts ﴾51﴿, hadees- 2604.

۩ Shaykh ibn Baaz se muddat ke aewaz me qeemat zyada karne ke hukm ke mutalliq sawal kiya gaya toh unka ye jawab tha:

“Is muamla me koi harj nahi, is liye ke saamaan ke liye nakad ada karna aur taakhir me ada karne me farq hai, aur aj tak musalman is tarha ke muamlat karte aa rahe hai, is ke jayz hone par unki janib se yeh Ijma ki tarah hi hai, aur baaz ulema ne is par ajeeb raaye rakhi aur muddat ke aewaz qeemat zyada karne ko mana qaraar diya hai aur un ka gumaan hai ke yeh sood hai, is qawl ki koi bunyad nahi banti, aur na hi ye sood hai, is liye ke tijarat karne wale ne jab udhaar samaan farokht kiya toh woh muddat ki wajah qeemat zyada karke nafa haasil karne par muttafik hua aur kharidar bhi mohlat aur muddat ki bina par qeemat zyada dene par muttafik hua kyuki woh naqad qeemat ada karne ki istetaat nahi rakhta, toh is tarha dono fareeq is muamle se nafa haasil karte hai.

Nabi ﷺ se bhi is ka sabut milta hai jo is ke jayz hone par dalalat karta hai woh yeh ke Nabi ﷺ ne Abdullah bin Amr bin aas r.a. ko lashkar tayyar karne ka hukm diya, toh woh udhaar me ek oont ke badle do oont khareedte the [Sunan Abu Dawud, 3357], fir yeh muamla Allah subhana wa tala is farman me bhi dakhil hota hai:

'Aye eemaan walo! Jab tum aapas mein miyaad muqarrar tak ke liye karz ka len-den karo toh use likh liya karo (al-baqarah, 28).

Aur yeh muamla bhi jaiz qarzo me se hai aur is ayat mein dakhil hai aur yeh bay’ al-salam (forward buying ) ke tarah hi hai.” [khtam.]

Fataawa Islamiyyah, 2/331.

Mazeed ilm ke liye Dr. Rafeeq Yoonus al-Masri ki Bay’ al-Tasqeet ko padhe.

•٠•●●•٠•

Read More »

Jannat Itni Sasti Nahi Hai

Allah ﷻ farmate hai,

Ya fir kya tum yeh gumaan kiye baithe ho ke Jannat me yunhi chale jaoge halanke ab tak tum par wo haalaat nahi aaye jo tum se pichle logo par aaye the.

Unpar sakhtiya guzri, museebate aayi, hila maare gaye, hatta ke waqt ka Rasool aur uske saathi ahle eeman cheekh utthey ke Allah ki madad kab aayegi, us waqt unhe tasalli di gayi ke haa Allah ki madad qareeb hai.

Surah Baqarah ﴾2﴿, ayat-214.

Hamare muashre me ek galat fehmi hai ki kyuki ham RasoolAllah ﷺ ke ummati hai, toh hame har haal me baksh diya jayega. Aesa nahi hai jaise hamne gumaan kar liya hai. Aaiye is mauzu ko Islam ke teesre khalifa ki seerat ki roshni me jante hai, Usman e gani r.a. ki seerat ki roshni me.

۩ Hani' (Usman r.a. ke aazaad karda gulam) kahte hai,

“Usman r.a. jab kisi kabristan par thaherte toh itna rote ke Ap ki daadhi bheeg jati, un se kisi ne kaha ke jab Ap ke saamne Jannat o Jahannum ka zikr kiya jata hai toh nahi rote hai aur kabr ko dekh kar is qadar ro rahe hai?

Toh (Usman r.a. ne) kaha ke RasoolAllah ﷺ ne irshad farmaya hai, 'Aakhirat ki manzil me se kabr pahli manzil hai, so agar kisi ne kabr ke aazaab se nijaat paayi toh us ke baad ke marahil aasan honge aur agar jise azaab e qabr se nijaat nah mil saki toh is ke baad ke manazil (muqaam) sakht tar honge'.”

Usmaan r.a. ne mazeed kaha ke RasoolAllah ﷺ ne irshad farmaya, “Ghabrahat aur sakhti ke aitebaar se kabr ki tarha kisi aur manzar ko nahi dekha'.”

Jamia Tirmizi, kitab al Zuhd ﴾36﴿, hadees- 2308. Imam Tirmizi ise Hasan gareeb karaar dete hai.

Toh ye aalam hai Usman r.a. ke Takwe ka jab ki yahi wo sahabi hai jinhe teen baar RasoolAllah ﷺ se Jannat ki basharat mili hai (Bukhari, 2778; Sunan Nasai, 3638, hasan).

SubhanAllah! teen baar Jannat ki basharat milne ke bawujud bhi ek shaks kabr ke aazaab se itna dar raha hai. Aur ham logo ko toh ek baar bhi Jannat ki basharat nahi mili hai, fir bhi hamlogo ne kitni baar Allah ke khauf se apni dadhi tar ki hai ya apne aankh me aasu bhare hai.

Balki hamare muashre me isse ulti surat zarur paayi jati hai ki ham khud ko Jannati firqe me shumar karne lage hai, yaani hamara gumaan ye hai ki ham us groh me se hai jo Jannat me jayegi. Allahu akbar kitna bada daawa hai ye, ek taraf sahabi e Rasool hai jinko teen baar jannat ki bashrat mili hai aur fir bhi wo Allah ke khauf se ro rahe hai aur ek ajkal ke log hai jo bina basharat ke hi apne apko Jannati karaar dete hai. Ye iske alawa kuch nahi ki shaitan ne aese logo ko dhoke me daal rakha hai. Allama Iqbal kahte hai,

“Yeh Shahadat Gahe Ulfat Me Qadam Rakhna Hai..  

Log Aasaan Samjhte Hai Musalman Hona!”

Ham dua karte hai ki Allah hamare gunaho ko darguzar kare aur hame apni rahmat ke saaye me jagah ata kare.

•٠•●●•٠•

Read More »

Ashra Mubashra

Alhamdulillah..

Wo 10 (das) log jinhe RasoolAllah ﷺ ne Jannat ki basharat di thi wo Aap ke ashaab maise hai. Iska zikr ek saheeh hadees me hai jise Abdur Rahman bin Awf r.a. ne riwayat kiya hai:

۩ Abdur Rahman bin Awf r.a. riwayat karte hai ki RasoolAllah ﷺ ne farmaya,

“Abu Bakr jannati hai, Umar jannati hai, Usman jannati hai, Ali jannati hai, Talha jannati hai, Zubair jannati hai, Abdur Rahman bin Awf jannati hai, Sa'd bin abi Waqqas jannati hai, Sa'eed jannati hai, and Abu Ubaidah bin Al-Jarrah jannati hai.”

Jamia Tirmizi, kitab al Manaqib ﴾49﴿, hadees- 3747. Ise Darussalaam ne sahih karaar diya hai.

Dusre ashaab e Rasool bhi hai jinhe Jannat ki basharat mili hai, jaise Khadeejah bint Khuwaylid, Abdullaah ibn Salaam, Ukaashah ibn Muhsan, wagaira. Lekin upar ke 10 sahaba ko Ashra Mubashra isliye kaha jata hai kyuki in tamaam sahaba ko ek hi hadees me Jannat ki basharat mili hai. Aur Allah sabse behtar janta hai.

•٠•●●•٠•

Read More »

Tahajjud Padhne Ke Liye Sona Zaruri (shart) Nahi

hi   

Sawaal: Kya Tahajjud padhne ke liye sona zaruri hai, yaani kya sona shart hai?

Alhamdulillah..

Hamare muashre me ye galat-fahmi hai ki tahajjud ki namaz padhne ke liye sona zaruri hai. Kitab ya Sunnat me aesi koi baat hame nahi milti hai. Albatta tahajjud ki namaz ko raat ke aakhri hisse me padhna afzal zarur hai kyuki us waqt farishte is namaz ka mushahidah karte hai. Lekin jisko dar hai ki wo raat ke aakhri hisse me na uth sakega toh use sone se pahle hi ye namaz padh lena chahiye.

۩ Jabir r.a. riwayat karte hai ki RasoolAllah ﷺ ne farmaya, “Jise dar ho ke wo raat ke aakhiri hisse me nahi uth sakega, wo raat ke shuru me witr padh le. 

Aur jise ummeed ho ki wo raat ke aakhir me uth jayega, wo raat ke aakhri me witr padhe kyuke raat ke aakhri hisse ki namaz ka mushahidah kiya jata hai (is witnessed) aur yeh afzal hai.”

Sahih Muslim, kitab salat ul musafireen ﴾6﴿, hadees- 1766.

Note: Witr aur Tahajjud ek hi namaz ke do naam hai, (daleel ke liye ye article padhe). Toh is article me agar witr ka zikr hoga toh isse muraad tahajjud namaz ko bhi liya jayega.

۞ Aaiye dekhte hai ki is hadees par sahaba e karaam ne kis tarha amal kar ke dikhaya:

۩ Jabir bin Abdullah r.a. ne kaha, “RasoolaAllah ﷺ ne Abu Bakr r.a. se pucha, 'Tum witr kab padhte ho?' Unhone kaha, 'Shuru raat me, isha ke baad'.

Aap ﷺ pucha, 'Tum aye Umar'!

Unhone kaha, 'Raat ke aakhri hisse me',

Tab Nabi ﷺ ne farmaya, 'Aye Abu Bakr! tum ne mazbut kada (handhold) pakda hai (yaani ahtiyaat ka raasta apnaya hai). Aur aye Umar! tumne taaqat zabt karli hai (yaani tumne us kaam ko pakda hai jisme taaqat ki zarurat hai).'”

Sunan ibn Majah, kitab iqamatis salaat wa sunnati feeha ﴾5﴿, hadees- 1202.

۩ Abu Hurairah r.a. riwayat karte hai, “Mujhe mere azeez dost (Nabi kareem ﷺ) ne teen cheezo ki wasiyat ki hai aur mai in chizo ko maut se pahle nahi chorunga, har maheene me teen din roze, chasht ki namaz aur witr padh kar sona.”

Sahih al Bukhari, kitab al Tahajjud ﴾19﴿, hadees- 1178. Hasan (Darussalaam).

۩ Imam Nawawi farmate hai,

“Aur yahi sahih hai, aur baaqi mutlaq ahadees ko is sahih aur sareeh afzaliyat par mahmool (is hadees par amal) kiya jayega, un me ye hadees bhi hai, 'mere azeez dost ne mujhe wasiyat ki ke mai witr ada kar ke soya karu'. Yeh hadees us shakhs ke haq me hai  jise (sone ke baad) jaagne ka yakeen nahi hai.” [khatm].

Sharah Sahih Muslim, 3/277.

Hamare sahaba e karaam ne bhi koi ek raasta nahi chuna, jo rasta jinhe behtar laga unhone wo apnaya. Ye khud ek daleel hai ki deen me sakhti nahi hai, balki deen aasaan hai.

•٠•●●•٠•

Allah hame tahajjud padhne ki taufeek ata kre. aameen.

Hame Whats App par join karein: +9779868212118

Read More »

Nabi ﷺ ka Akhlaq | Khadija r.a. ki Zubani

Allah s.w.t. farmate hai,

“Aur beshak, Aap (ﷺ) akhlaq ke buland darje par fa'iz hai.”

Surah Qalam (68), ayat- 4.

۝ Hazrat Ayesha r.a. ne bataya Aap ﷺ par wahee ki ibtedaai daur acche sachhe paakiza khawabo se shuru hua, Aap khawab me jo kuch dekhte woh subha ki roshni ki tarah sahih aur sachha sabit hota. Fir min janib qudrat Aap tanhaai pasand ho gaye aur Aap ne Gaar e Hira me Tanhaai ikhtiyar farmate aur kayi kayi din aur raat wahaa musalsal Ibadat aur yaad e Elahi zikr o fikr mai mashgul rahte, jab tak ghar aane ko dil na chahta, Aap apne saath safar ka khana liye hue waha rahte, Khana khatam hone par hi ahliya Khadija r.a. anha ke paas tashreef laate aur kuch khana saath lekar fir waha jaate.

Yahi tariqa jari raha yaha tak ki Aap par Haq nazil ho gaya aur Aap Gaar e Hira hi me the ki achank Hazrat Jibreel a.s. Aap ke paas haazir hue aur kahne lage ki Aye Muhammad! Padho!

Aap farmate hai ki maine kahaa ki mai padhna nahi jaanta. Aap farmate hai ki farishte ne mujhe pakad kar itne zor se dabaya ki meri taqat jawab de gai. Fir mujhe chhod kar kaha ki Padho!. Maine fir wahi jawab diya ki mai padha hua nahi hu. Us Farishte ne mujhe nihayat hi zor se pakda ki mujhe sakht takleef mahsus hui, Fir usne kahaa ki padho! Maine kaha ki mai padha hua nahi hu. Farishte ne teesri baar mujh ko pakda aur teesri martaba fir mujh ko dabaya fir mujhe chhod diya aur kahne laga ki

‘Padho Apne Rab Ke Naam Se Jis Ne Paida Kiya Aur Insan Ko Khoon Ki Lothde Se, Padho Aur Aap Ka Rab Bahut Hi Maherban Hai.’

Pas yahi aayate Aap Jibril a.s. se sun kar is haal mai Gaar se wapis hue ke Aap ka dil us anokhe waqye se zor se dhadak raha tha. Aap Khadija ke yaha tashrif laye aur farmaya ki mujhe kambal udha do, mujhe kambal udhaa do. Logo ne Aap ko kambal udhaa diya jab Aap ka dar jaata raha to Aap ne apni biwi Khadija r.a. ko tafseel ke saath ye waqya sunaya aur farmane lage ki mujh ko ab apni jaan ka khauf ho gaya hai.

Aapki biwi Khadija r.a. ne Aap se kaha ki Aap ka khayal sahih nahi hai, Khuda ki qasam Aap ko Allah kabhi ruswa nahi karega.

Aap rishtedaro se sila-rahmi karte hai, Bekaso ka bojh uthate hai, Mufliso (gareebo) ki madad karte hai, Aap dil khol kar mahmaan nawazi karte hai aur mushkil ke waqt me Aap zaruratmando ka saath dete hai.

Sahih al bukhari, kitab al wahee (1), hadees- 3.

•٠•●●•٠•

Muqammal Kitab al Wahee Padhe (roman urdu me)

Read More »

Kya Nabi Ne Allah Ko Dekha Hai | Ayesha ؓ

Masruq (tabayeen) bayaan karte hai ki Mai Ayesha ؓ ki khidmat me tek lagaye hue baitha tha ke Ayesha r.a. ne farmaya, “Abu Ayesha! (yeh masrooq ki kuniyat thi) teen cheeze hai jis ne un me se koi baat kahi, us ne Allah taala par bahut bada bohtan baandha.” Mai ne pucha: 'Woh baate kaun si hai?'

Unhone farmaya, 'Jis ne ye gumaan kiya ke Muhammad ﷺ ne apne Rab ko dekha hai toh us ne Allah taala par bahut bada bohtaan bandha.'

Unhone (Tabayeen ne) kaha, 'Mai tek lagaye hue tha toh (yeh baat sunte hi) seedha ho kar baith gaya aur kaha: 'Ummul momineen! Mujhe (baat karne ka) mauqa dijiye aur jaldi na kijiye, Kya Allah taala ne ye nahi kaha, 'Beshak unhone use roshan kinare par dekha' (Al-Qur'an, Surat at-Takwir, 81:23), ( isi tarha ) 'aur Aap ﷺ ne use ek baar utarte hue dekha (Surat Najm 53:13).'

Ayesha r.a. ne farmaya, 'Mai is ummat me sab se pahli hu jis ne iske baare me RasoolAllah ﷺ se sawal kiya toh Aap ﷺ ne farmaya, 'Woh yaqeenan Jibrail a.s. hai, mai inhe is shakal me, jis me paida kiye gaye, do dafa ke ilawa kabhi nahi dekha, ek dafa maine inhe aasman se utarte dekha, un ke wujud ki badayi ne aasman o zameen ke darmiyaan ki wusat (jagah) ko bhar diya tha'.

Fir ummul momineen ne farmaya, 'Kya tum ne Allah taala ka farmaan nahi suna, 'Aankhe uska idraak (comprehend) nahi kar sakti aur woh aankhon ka idraak karta hai aur woh baarikhi se har cheez ki khabar rakhne wala hai' (Surat al-An`am 6:103).

Aur kya tum ne yeh nahi suna ke Allah taala farmata hai, 'Aur kisi bashar me taakat nahi ke Allah taala us se kalaam farmaye magar wahee ke zarye se ya parde ke piche se ya woh kisi paigham laane wala (farishte) ko bheje toh woh us ke hukm se jo chahe wahi kare, bilashuba woh bohat buland aur hikmat wala hai' (Surat ash-Shura, 42:51).

(Ummul momineen ne) farmaya, 'Jo shakhs ye samjhta hai ke RasoolAllah ﷺ ne Allah taala ki kitab maise kuch chupa liya to usne Allah taala par bahut bada bohtan baandha kyunki Allah taala farmata hai, 'Aye Rasool ﷺ! Pahuncha dijiye jo kuch Aap ke Rab ki taraf se Aap par nazil kiya gaya aur agar (bil farz) Aap ne aisa na kiya toh Aap ne uska paigaam na pohchaya (fariza e risalat ada na kiya)'  (Surat al-Ma'idah, 5:67).

(aur) Unhone farmaya, 'Aur jo shakhs ye kahe ke Aap ﷺ is baat (ilm e gaib) ki khabar de dete hai ke kal kya hoga toh us ne Allah taala par bahut bada jhut baandha, kyunke Allah taala farmata hai, '(Aye Nabi!) farma dijiye! koi ek bhi jo aasmaano aur zameen me hai, gaib nahi janta, siwaye Allah ke' (Surat an-Naml, 27:65).

Sahih Muslim, kitab al eemaan ﴾1﴿, hadith- 439.

•٠•●●•٠•

Related: Kya RasoolAllah ﷺ ne Allah ko dekha hai?

Read More »