Hajj e Badal ke Ahkaam Aur Zawabat

Alhamdulillah..

Bahut se log hajj e badal me be-ahtiyati rawayye se kaam lete hai, jab ke hajj e badal ke liye khaas zawabit, sharait aur ahkamaat hai, jo ke niche diye gaye hai, Allah taala se ummeed hai ke in se faida hoga:

1۞ Hajjatul Islam (farz hajj) ki har lehaz se taaqat rakhne wale shakhs ki janib se hajj e badal nahi kiya ja sakta.

۩ Ibn Qudamah kahte hai:

“Is baat par ijma hai ke farz hajj ki taaqat rakhne waale shakhs ki taraf se koi dusra shakhs hajj nahi kar sakta, Ibn Munzir kahte hai, 'Ahle ilm ka is baat par ijma hai ke jis par Hajj farz ho aur woh uske ada karne ki taaqat bhi rakhta ho, toh uski taraf se kiye jaane wala hajj kifayat nahi karega.'” [alfaz khatm]

Al-Mughni, 3/185.

2۞ Hajj e badal aise mareez ki janib se kiya jayega jis ke shifayaab hone ki umeed na ho, ya badni taur par aajiz ho, ya mayyat ki taraf se hajj badal kiya jayega, kisi gareeb, ya siyasi aur amani taur par aajiz shakhs ki janib se hajj badal nahi kiya ja sakta.

۩ Imam Nawawi kahte hai:

“Jamhoor ulama e karaam is baat ke qayil hai ke hajj me mayyat, aur shifayaabi se mayoos aajiz ki janib se niyabat ki ja sakti hai, Qazi Iyaaz ne maliki fuqaha ki un ahadees jin me mayyat ki janib se roza rakhna aur hajj karne ka zikar milta hai, iski mukhalfat me unki janib se ek uzar pesh kiya hai ke ye riwayat muztarib (gair-sahih) hai, aur yeh uzar baatil hai, kyunke hadees me koi iztirab (harj) nahi, aur uske sahih hone ke liye Imam Muslim ka apni sahih me zikr karna hi kaafi hai.”

Sharh an-Nawawi ‘ala Muslim, 8/27.

Note: Niyabat ka matlab 'Hajj karne ke liye kisi dusre shaks ko muqarrar karna' [means, appointing proxy for performing Hajj]

Jis hadees ki janib Imam Nawawi ne ishara kiya hai ke baaz maliki ulama ne is par iztiraab ka hukm lagaya hai, woh hadees yeh hai,

۩ Abdullah bin Buraydah apne waalid se bayan karte hai ke ham RasoolAllah ﷺ ke paas baithe the ke ek khatoon ne aakar kaha, 'Maine apni walida ko ek londi sadqa me di thi, aur fir woh faut ho gai', toh Aap ﷺ ne farmaya, 'Tumhe tumhara ajar mil gaya hai, aur wirasat ki wajah se laundi tumhare paas fir wapis aagai hai.'

Us ne kaha, 'Allah ke Rasool! Meri walidah par ek mahine ke farz roze (rahne bache) the, toh kya mai yeh roze unki taraf se rakhu?

Aap ﷺ ne farmaya, 'Unki taraf se roze rakh lo.' Fir us ne kaha, 'Meri walidah ne kabhi bhi hajj nahi kiya, toh kya mai uski taraf se hajj kar sakti hu?'

Aap ﷺ ne farmaya, 'Uski taraf se hajj kar lo.

Sahih Muslim, hadees- 2697.

۩ Hafiz ibn Hajar r.h. kahte hai:

“Hajj me niyabat ke qayileen tamam ahle Ilm is baat par muttafiq hai ke kisi ki taraf se farz hajj nahi kiya ja sakta, siwaye faut shudgaan, ya faalij (paralysis) ke mareezo ke, chunancha un me woh mareez shaamil nahi ho sakte jin ke shifayaab hone ki ummeed hai, aur na hi majnoon (pagal), is liye ke use pagal-pan se thik hone ki ummeed hai, nah hi qaidi, is liye ke woh jail se bahar bhi aasakta hai, aur nah hi faqeer is liye ke woh bhi maaldaar ho sakta hai.” [alfaz khatm]

Fath ul-Baari, 4/70.

3۞ Maali taur par aajiz shakhs ki taraf se hajj badal nahi ho sakta, is liye ke gareeb aadmi par hajj farz nahi hai, jab ke hajj badal badani taur par aajiz shakhs ki taraf se kiya ja sakta hai.

۩ Daa'imah fatawa committee ke ulama se pucha gaya,

'Kya kisi ke liye jaiz hai ke woh Mecca se dur rahne wala apne kisi rishtedaar ki taraf se Umra ya Hajj kare? Aur uske paas Mecca aane ke liye wasail nahi hai, lekin badani taur par woh khud tawaaf wagaira kar sakta hai.

Toh unhone jawab diya,

“Aap ke sawal me zikr kiye hue rishtedaar par hajj us waqt tak wajib nahi jab tak woh maali taur par hajj ki taakat nahi rakhte ho, aur unki taraf se hajj ya umra karna jaiz nahi hai, is liye ke agar woh khud haram tak pahunch jaaye toh woh khud hi unki adayegi kar sakte hai, jab ke hajj o umra me niyabat mayyat ya jismani taur par aajiz shakhs ki taraf se hoti hai.” [alfaz khatm]

Fataawa al-Lajnah ad-Daa’imah, 11/52.

4۞ Koi shakhs bhi us waqt tak kisi ki taraf se hajj nahi kar sakta jab tak us ne apni taraf se hajj na kar liya ho, aur agar us ne apna hajj karne se pahle kisi ki taraf se kiya toh woh usi ki taraf se hoga, kisi dusre ki taraf se nahi hoga.

۩ Daa'imah fatwa committee ke ulama ne kaha:

'Kisi insaan ke liye yeh jaiz nahi ke woh apni taraf se hajj karne se pehle kisi ki taraf se hajj kare, iski daleel Ibn abbas se marwi hai ke Nabi ﷺ ne ek aadmi ko kahte hue suna, 'Mai Shubrumah ki taraf se haazir hu.' Aap ne farmaya, 'kya tumne apni taraf se hajj kiya hai?' Us ne kaha: 'Nahi'! Aap ne farmaya: 'Pahle apni taraf se hajj karo, fir Shubrumah ki taraf se karna.' [alfaz khatm]

Sheikh abdul alaziz ban abdul allah ban baz. .. Sheikh abdul allah ban غدیان

Fataawa al-Lajnah ad-Daa’imah, 11/50.

5۞ Ek khatoon kisi mard ki taraf se hajj kar sakti hai, jaise ke mard kisi khatoon ki taraf se hajj kar saktha hai.

۩ Daa'imah fatwa committee ke ulama ne kaha:

“Hajj me niyabat jaiz hai, bashart ke niyabat karne wale ne pahle apna hajj kar liya ho, aise hi us aurat ke liye bhi hajj zaruri hai jise ap raqam is liye de rahe hai ke woh ap ki walidah ki taraf se hajj kare, is liye ke aurat hajj me kisi dusri aurat ya mard ki taraf se niyabat kar sakti hai, Rasoolullahﷺ se is baare me dalail sabit hai,” [alfaz khatm]

Fataawa al-Lajnah ad-Daa’imah, 11/52.

6۞ Kisi ke liye ye jaiz nahi ke ek hajj, do ya zyada afraad ki taraf se kare, Haa! Umra apne liye kar le ya kisi aur ke liye aur hajj kisi teesre shakhs ke liye kar sakte hai.

۩ Daa'imah committee ke ulama kehte hai:

“Hajj me mayyat ya aise zinda ki taraf se niyabat jaiz hai jo hajj karne ki taqat nahi rakhta, aur kisi ke liye yeh jaiz nahi ke woh ek hajj kar ke do shakhso ki janib se karde, is liye ke hajj sirf ek shakhs ki taraf se ho sakta hai, lekin agar hajj ek shakhs ki taraf se ho aur umra kisi aur ki taraf se kare toh yeh jaiz hai, bashart ye ke us ne apna hajj ya umra pahle se kiya hua ho.” [alfaz khatm]

Fataawa al-Lajnah ad-Daa’imah, 11/58.

7۞ Kisi ke liye ye jaiz nahi ke hajj e badal ka maqsad maal lena ho, balke maqsad hajj aur muqaddas jagah par pahunch kar apne bhai ki taraf se hajj kar ke us par ahsaan karna ho.

۩ Shaykh Muhammad ibn Saalih al Uthaymeen kahte hai:

“Hajj me kisi ki taraf se niyabat karna sunnat e Rasool me maujud hai, is liye ke ek khatoon ne Aap ﷺ se pucha, aur kaha, 'Allah taala ki janib se apne bandon par fareeza hajj mere waalid par abhi baaki hai, aur woh sawari par baith nahi sakte toh kya mai unki taraf se hajj kar lu? Aap ne farmaya, 'Haan!'

Aur hajj me raqam ke badle me niyabat karne ke bare me yeh hai ke agar insan ka maqsad sirf raqam ka husool hai toh is ke bare me Ibn Taymiyyah kahte hain, 'Jis ne sirf is liye hajj kiya ke khane-peene ko mil jayega, toh is ke liye akhirat me kuch nahi hai aur jo is liye raqam leta hai taa ke hajj kar sake toh is me koi harj nahi, is liye niyabat karne ke liye raqam wusool karte hue niyat yeh ho ke yeh raqam uske liye hajj ke dauran madadgaar hogi, aur yeh bhi niyat kare ke jis ki taraf se hajj kar raha hai uski zarurat puri hogi, is liye ke jo hajj e badal karwa raha hai woh zarurat-mand hai, aur use khushi hoti hai jab use koi hajj e badal karne wala mil jata hai, is liye hajj badal karne wale ko hajj ki adaigi ke zariye ahsaan ki niyat karni chahiye.” [alfaz khatm]

Liqaa’aat al-Baab al-Maftooh, 89, sawal- 6.

8۞ Jab koi Musalman faut ho jaye aur hajj farz hone ki sharaet mukammal hone ke bawujood fareeza e hajj ada na kar sake, toh uski taraf se uske maal me se hajj karwana zaruri hai, chahe us ne hajj ki wasiyat ki ho ya na ki ho.

۩ Daa'imah committee ke ulema karaam kahte hai:

“Jab koi Musalman faut ho jaye aur wujoob e hajj ki sharaet mukammal hone ke bawujud fareezae hajj ada na kar sake, toh uski taraf se uske maal me se hajj karna zaruri hai, chahe usne hajj ki wasiyat ki ho ya na ki ho, chunanche agar uski taraf se koi aisa shakhs hajj kar deta hai jis ka hajj karna durust ho, aur us ne pahle apni taraf se hajj kiya hua ho toh mayyat ki taraf se uska hajj karna durust hoga, aur mayyat se farz ki adaigi ke liye kaafi hoga.” [alfaz khatm]

Fataawa al-Lajnah ad-Daa’imah, 11/100.

9۞ Kya hajj e badal karne wale ko bhi utna hi sawab milega ke woh bhi aise hi wapas aayega jaise uski maa ne aaj hi use janam diya ho?

۩ Daa'imah committee ke ulama karaam kahte hai:

“Hajj badal karne wale ke bare me ye kahna ke use apna hajj karne ke barabar sawab mileyga, ya kam ya zyada toh yeh muamla Allah s.w.t. ke supurd hai.” [alfaz khatm]

Sheikh abdul alaziz ban basaz , sheikh abdul al razaq عفیفی, sheikh abdul allah ban غدیان, sheikh abdul allah ban منیع .

Fataawa al-Lajnah ad-Daa’imah, 11/100.

۩ Unlogo ne mazeed kaha:

“Jis shakhs ne ujrat leker ya bagair ujrat liye kisi ke liye hajj kiya toh uska sawab usi ko milega jis ki taraf se hajj ya umra kiya gaya hai, aur hajj ya umra badal karne wale ke liye bhi bahut hi azeem sawab ki umeed ki ja sakti hai, jo use uske ikhlaas aur niyat ke mutabik milega, aur jo koi bhi masjid al haram tak pohunch jaye aur waha kasrat se nawafil ada kare, aur deegar ibadaat bhi sar-anjaam de uske liye ikhlaas ki bunyaad par ajar azeem ki umeed ki ja sakti hai.” [alfaz khatm]

Fataawa al-Lajn ah ad-Daa’imah, 11/77, 78.

۩ Imam ibn Hazam kahte hai:

Dawood kahte hai ke unhone kaha, 'Maine Saeed bin Musayyab ko kaha, 'Aye Abu Muhammad! Un dono me se kis ko sawab milega, hajj badal karne wale ko ya jis ki taraf se hajj kiya ja raha hai usko?' Toh Saeed n kaha, Be-shak Allah taala un dono ko dene ki wusat rakhta hai.'

Ibn Hazam (is par) kahte hai, Saeed r.h. ne sach kaha.

Al-Muhalla, 7/61.

Aamaal e Hajj se hat kar hajj badal karne wala jo koi bhi amal karega uska sawab uske karne wale ko milega, maslan, haram me namazo ki adaegi, quran majeed ki tilawat, wagaira sab ka sawab isi karne wale ko milega na ke jis ki taraf se hajj kiya ja raha hai.

۩ Shaykh Muhammad ibn Saalih al Uthaymeen kahte hai:

“Hajj se jude amal ka tamaam sawab usi ko milega jis ne use hajj me apna wakeel bana kar bheja hai, Jab ke uske alawa namazo ka izafi ajar aur nawafil tawaf aur qirat e quran ka sawab usi ko milega jo hajj kar raha hai.” [alfaz khatm]

Ad-Diya’ al-Laami‘ min al-Khutab al-Jawaami‘, 2/476.

10۞ Mustahab ye hai ke aulaad apne walidain ki taraf se Hajj kare, aur kareebi rishtedaar apne azeez ke liye, lekin agar fir bhi koi kisi ko ujrat de kar hajj ke liye bhej deta hai toh ye bhi jaiz hai.

۩ Shaykh Abd al-Azeez ibn Baaz se pucha gaya:

'Mai chhota sa tha us waqt meri walida faut ho gayi thi, toh maine ek ba-aetmaad shakhs ko unki janib se hajj karne ke liye ujrat de kar bhej diya tha, mere walid bhi faut ho chuke hai, aur maine apne kuch rishtedaro se suna hai ke unhone hajj kiya tha.

Toh kya mere liye jaiz hai ke mai kisi ko apni walida ki taraf se hajj karne ke liye bhej du, ya mujhe khud hi unki taraf se hajj karna hoga? Aise hi kya mai apne walidain ki taraf se hajj karu, aur maine suna hai ke unhone pahle hajj kiya tha?

Toh unhone jawab diya:

“Agar tum khud ja kar hajj karo aur sharai taur par mukammal manasik ko ahtemaam ke sath ada karo to ye waqai afzal hai, aur agar kisi baa-aetemad shakhs ko ap ujrat dekar unki taraf se hajj karwa dete hai toh koi harj nahi.

Afzal yahi hai ke Aap unki taraf se hajj aur Umra dono kare, aise hi ap jisko bhej rahe hai woh unki janib se hajj aur Umra kare, yeh apki taraf se apne waledain ke liye neki aur ahsaan hoga, Allah taala ap se aur ham se tamam nekiya qubool farmaye.” [alfaz khatm]

Fataawa ash-Shaykh Ibn Baaz, 16/408.

11۞ Kisi ki taraf se Hajj karne ki yeh shart nahi hai ke hajj karne wale ko uske naam ka ilm ho, balke sirf uski taraf se niyat hi kaafi hai.

۩ Daa'imah committee ke Ulama se pucha gaya:

Mere aziz o iqarab me taqreeban chaar afraad hai, chacha aur dada, un me khawateen aur mard dono shamil hai, jin me se kuch ke naamo ka mujhe nahi pata, aur me chahta hu ke unki taraf se hajj badal ke liye kuch logo ko apne zaati kharche par bhej du, toh mai kya karu?

Toh unhone jawab diya:

“Agar surat e haal aise hi hai jaise ap ne zikr ki toh jin khawateen o hazraat ke naam ap jante ho un ke bare me toh koi ashkaal nahi, aur jin mard o khawateen ke naamo ka apko ilm nahi ap unki umar, aur awsaf ko maddhe nazar rakhte hue unki taraf se niyat kar satke hai, hajj badal ke liye sirf niyat hi kaafi hai, chahe apko unke naamon ka ilm nah bhi ho.” [alfaz khatm]

Fataawa al-Lajnah ad-Daa’imah, 11/172.

12۞ Jis shakhs ne kisi ko apni taraf se hajj ke liye zimmedaar banaya toh usse aage kisi aur shakhs ko zimmedaar banane ki ijazat nahi hai illa ke zimmedaar banane wale ki razamandi haasil ho jaye.

۩ Shaykh Muhammad ibn Saalih al-‘Uthaymeen kahte hai:

“Kisi bhi niyabi hajj karne wale ke liye yeh jaiz nahi ke woh kisi aur ko wakeel banaye chahe thodi ya zyada raqam de yaha tak ke zimmedaar banane wale ki taraf se ijazat haasil kar le.” [alfaz khatm]

Ad-Diyaa’ al-Laami‘ min al-Khutab al-Jawaami, 2/478.

13۞ Kya nawafil hajj ke liye niyabat ho sakti hai?

Ulema e karaam ka is bare me ikhtilaf hai, chunanche ibn Uthaymeen ne is baat ko ikhtiyar kiya hai ke niyabat sirf aur sirf farz hajj hi me ho sakti hai.

Shaykh kahte hai:

“Agar aadmi ne farz ada kar liya hai aur uska iradah bane ke kisi ko apni taraf se nawafil hajj ya Umra karne ke liye bheje, toh is bare me ulama e karaam ka ikhtilaf hai, kuch ulama ne ise jayez qaraar diya hai aur kuch ne mana qarar diya, mere nazdeek behtar yeh hai ke yeh mana hi hai, is liye kisi ke liye ye jaiz nahi ke woh kisi ko apni taraf se nawafil hajj ya Umra karne ke liye zimmedaar banaye, is liye ibadat me asal yeh hai ke insan khud yeh ibadat kare, ye aise hi hai jaise koi apni taraf se roze rakhne ke liye zimmedaar muqarrar nahi kar sakta. Ha agar koi faut ho jaye aur us par farz roze baaki ho toh uski taraf se wali roze rakhega. Isi tarha hajj hai, aur hajj ek aisi ibadat hai jo insan khud apne badan se karta hai, yeh koi maali ibadat nahi hai jis me asal hadaf mohtaaj shakhs hota hai, aur jab ibadat badni ho ke insaan khud use ada kare toh koi bhi dusra shakhs uski taraf se ada nahi kar sakta, ma siwaye un ibadaat ke jin ke bare me sunnat me bayan kar diya gaya, jab ke nawafil hajj ke bare me koi aisi daleel maujud nahi jis me kisi ki taraf se nawafil hajj karne ki ijazat di gayi ho, yahi mauquf Imam Ahmad se manqool do riwayat me se ek hai, meri murad ke insaan kisi ko nawafil hajj ya umra me apni taraf se zimmedar nahi bana sakta chahe woh khud qadir ho ya na ho.”

Aur jab ham is qawl par qayem rahenge toh is se sahib e haisiyat aur jismani taaqat rakhne wale logo ko raghbat milegi ke woh khud apni taraf se hajj kare, isi liye kuch log kayi salo tak Mecca nahi jate sirf is baat par aetemaad karte hue ke ham to har saal apni taraf se hajj e badal karwa dete hai, toh is se har saal hajj rah jata hai ke is ne apni taraf se hajj ke liye wakeel bana diya hai. [alfaz khatm]

Fatawa Islamia, 2/192,193.

14۞ Hajj e badal ke liye qabil aetemaad, sachhe aur ameen logo ko talaash kiya jaye, jinhe manasik e hajj ka ilm bhi ho.

Daa'imah committee ke ulema e karaam kahte hai:

“Jo shakhs kisi ko apna nayeb (proxy) muqarrar karna chahta hai, use chahiye ke deendaar, ameen logo ko talaash kare aur unhi ko apna nayeb muqarrar kare, taa ke wajbaat ki adaegi ke hawale se uska dil mutmaeen rahe.”

Fataawa al-Lajnah ad-Daa’imah, 11/53.

Aur Allah sabse behtar janta hai.

•٠•●●•٠•

Read More »

Dua ke Fazail Aur Masail

Dua ka Lafzi Maana Pukarna Aur Bulana Hai.

۞1. Irshad baari taala hai,

وَ قَالَ رَبُّکُمُ ادْعُوْنِیؔ اَسْتَجِبْ لَکُمْ - اِنَّ الَّذِیْنَ یَسْتَکْبِرُوْنَ عَنْ عِبَادَتِیْ سَیَدْخُلُوْنَ جَھَنَّمَ دٰخِرِیْنَ

“Aur tumhare Rab ne kaha, 'Mujhse Dua maango mai tumhari Dua qubool karunga, beshak jo log meri ibadat (dua) se takabbur karte hai toh woh zaleel wa ruswa hokar jahannam me dakhil honge.”

Surah Momin (40), ayat- 60.

۩ Allah taala ne farmaya:

اُجِیْبُ دَعْوَۃَ الدَّاعِ اِذَا دَعَانِ فَلْیَسْتَجِیْبُوْا لِیْ

“Jab dua karne waala dua karta hai toh mai uski dua qubool karta hun, lihaza mujh se (hi) dua maango.”

Surah Baqarah (2), ayat- 186.

۩ Rasoolullah ﷺ ne farmaya:

الدعاء هي العبادة

'Dua ibadat hi hai.'

Sunan Abu Dawud, hadees- 1479, Iski sanad sahih hai. Jamia Tirmizi, kitab-ul- Dua, hadees- 3372. Imam Tirmizi ne ise hasan sahih karaar diya hai.

۩ Rasoolullah ﷺ ne farmaya,

إذا سألت فاسأل وإذا استعنت فاستعن بالله

“Jab tum sawaal karo toh Allah se sawaal karo (yaani Allah se dua maango) aur jab madad maango toh Allah se madad maango.”

Jamia Tirmizi, hadees- 2516. Ise Imam Tirmizi ne hasan sahih karar diya hai.

۩ Rasoolullah ﷺ ne farmaya,

“Tum me se har aadmi apne Rab se hi har haajat (dua) maange, hatta ke jute ka tasmah (strap) agar toot jaye toh woh bhi Allah se hi maange.”

Jamia Tirmizi, kitab ad daawaat (48), hadees- 3604. Is hadees ki sehat 'hasan' hai.

Sabit hua ki apni tamaam musibato, bimariyo, zaroorato aur hajat me sirf Allah se hi dua mangni chahiye.

_________

۞2. Rasoolullah ﷺ ne farmaya,

Jo Muslim (musalman) dua karta hai, jis me gunah ya qata rahmi nahi hoti toh use teen cheeze di jaati hai:

۩ Ya toh uski dua jaldi qubool karli jati hai.

۩ Ya uski dua ko uske liye qayamat ka zakheera bana diya jata hai.

۩ Ya usse kisi musibat ko taal diya jata hai.

Al Adab al Mufrad, hadees- 710. Is hadees ko sahih karaar diya gaya hai.

_________

۞3. Allah taala ki hamd wa sana aur Nabi ﷺ par durood padhne ke baad maangi hui dua qubool hoti hai.

Dekhiye Jamia Tirmizi, hadees- 593. Is hadees ki sehat 'hasan' sahih hai.

(mazeed ilm ke liye ye article padhe)

_________

۞4. Dua me haath uthana yaani haath utha kar dua mangna bahut si sahih ahadees se sabit hai.

Maslan dekhiye Sahih al Bukhari, hadees- 4323, 4339, 6341. Sahih Muslim, hadees- 2498.

(mazeed ilm ke liye ye article padhe)

_________

۞5. Dua me chehre par haath ferna bilkul sahih hai.

Siqah Tabayeen Imam Abu Nayeem wahab bin kaisaan r.h. ne farmaya,

Maine (Sayyeduna) ibn Umar aur ibn Zubair r.a. ko dekha, woh dono dua karte, apni dono hatheliya (apne) chehre par ferte the.

Al Adab al Mufrad, hadees- 609. Is hadees ki sehat 'hasan' hai.

Is riwayat par baaz un naas ki jarah jamhoor ki tauseek ke khilaf hone ki wajah se mardood hai.

۩ Imam Mamar ibn rashid r.h. (154 a.h.) dua me seene tak haath uthate aur fir apne chehre par ferte the.

Musannaf ibn Abdur Razzaq, hadees- 5003,Is hadees ki sehat 'sahih' hai.

۩ Imam Ishaq bin Rahawaih in ahadees (jinme chehre par haath ferne ka zikr hai) par amal karna mustahsan (achha) samjhte the.

Mukhtasar qiyam-ul lail lil Marwazi, safa- 304.

_________

۞6. Raat ke aakhri hisse me dua qubool ki jati hai hai.

Dekhiye Sahih al Bukhari, hadees- 1145. Sahih Muslim, hadees- 758.

✦ Rasoolullahﷺ ne farmaya:

۩ 'Azaan aur iqamat ke dauraan me dua radd nahi hoti, lihaza dua mango.'

Sahih ibn Khuzaimah, hadees- 427, Iski sanad 'sahih' hai.

۩ Banda jab sajde me ho toh woh apne Rab ke bahut qareeb hota hai, lihaza sajde me kasrat se dua maange.

Sahih Muslim, hadees- 482.

۩ Jumah ke din khutbe se namaz ke ikhtitaam tak ke darmiyani waqt me dua qubool hoti hai.

Sahih Muslim, hadees- 853.

۩ Jumah ke din aakhri ghadi (yaani asar ke baad magrib tak) me dua qubool hoti hai.

Sahih al Bukhari, kitab ul Juma, hadees- 935. Jamia Tirmizi, hadees- 489. Iski sanad 'sahih' hai.

•٠•●●•٠•

source: Maqalaat - Tahkeeki, islaahi aur ilmi, vol-4, page- 567 | Shaykh Zubair ali zai r.h.

note: The article has been edited without changing the meaning and the reference may vary from the original work, for better presentation.

Read More »

Bimari | Aazmaish ya Azaab?

Sabse pahle to yeh ke koi bhi khudse Ta'ayyiun (decide) nahi kar sakta hai ke ye saza hai ya Rahmat ya Azmaish.

Ek Ayat me Allah s.w.t. farmate hai,

'Tumhe koi bhi takleef ya aazmaish aati hai wo tumhare hatho ki kamai hoti hai'.

Surah Shura (42), ayat- 30.

Dusri Ayat me hai ke,

'Jo bhi musibat aati hai Allah s.w.t. ke izan se aati hai.'

Surah Taghabun (64), ayat- 11.

۩ Abu Said Khudri aur Abu Hurairah r.a. se riwayat hai ke, Rasoolullah ﷺ ne farmaya,

'Musalmaan ko ranj, dukh, fikr aur gam pahunchta hai yaha tak ki agar use kaanta bhi chubhta hai toh wo takleef uske gunhaon ka kaffara ban jati hai.'

Sahih al Bukhari, kitab al marazi (75), hadees- 5641, 5642.

✦ Sabaq

Lehaza hame Bimari aur Sehat dono surat e haal me Allah ta’ala ka shukr ada karna chahiye. Bimari Aazmaish bhi hai aur gunaaho ka kaffara bhi. Hame har haal me sabr o shukar ada karna chahiye.

In do (2) kaamo se Allah ta’ala hamare gunaah bhi mita deta hai aur aakhirat me ajar e azeem bhi ata farmata hai.

Allah ta'ala apne bando se bahut mOhabbat karta hai, aur wo apne kisi bhi bande par uski taqat se zyada bOjh nahi dalta.

۩ 'Allah kisi ko uske bardasht se badh kar us par bojh nahi daalta.'

Surah Baqarah (2), ayat- 286.

۩ Sabr karne waalo ko unki mazduri be-hisaab milegi.

Surah Az-Zumar (39), ayat- 10.

۩ Aur unke sabr ke badle unhe jannat aur reshmi libaas diye jaayenge.

Surah Insan (76), ayat- 12.

۩ Aur Allah sabr karne waalo se Muhabbat karta hai.

Surah Aal e Imran (3), ayat- 146.

Har bimari ka ilaj maujood hai, Allah taala ne koi aisi bimari nahi utaari jis ki dawa bhi naazil na ki ho.

Abu Hurairah r.a. se riwayat hai ke Nabi ﷺ ne farmaya,

'Allah taala ne koi aisi bimari nahi utaari jis ki dawa naazil na ki ho.'

Sahih al bukhari, kitab at tibb (76), hadees- 5678.

Kalonji Aur Shahed dono ke fayde ke bare me Quran wa hadees se pata chalta hai.

1. Kalonji

۩ Abu Hurairah r.a. riwayat karte hai ki maine Rasoolullah ﷺ se suna,

'Siyah daano (kalonji) me har beemari se shifa hai siwaye Maut ke.'

Sahih al bukhari, kitab at tibb (76), hadees- 5688.

2. Shahed

Shahed ki makhhi ko arabi me nahal kahte hai jiske naam se Quran me puri ek surah maujud hai. Isi baat se andazah lagaya ja sakta hai ki insani zindagi me Shahad ki kya ahmiyat hogi.

Allah rabbuul izzat Quran e muqaddas me irshad farmata hai ki,

'Aur tumhare Rab ne Shahad ki makhhi ko ilhaam kiya ki pahado me aur darakhto me aur log jo chatriya uthate hai, un me apne ghar banao. 
Fir har kism ke falo se apni khuraak hasil kar, fir un raasto par chalo jo tumhare Rab ne tumhare liye aasaan bana diya hai.

Is makkhi ke pet se woh mukhtalif rango wala mashroob nikalta hai jis me logo ke liye shifa hai. Yaqeenan in sab baato me un logo ke liye nishani hai jo sochte samajhte ho.'

Surah Nahl (16), ayat- 69.

Iske alawa kuch Duaye hai jo Ap Bimari me padh sakte hai shifa ke liye,

۩ اللَّهُمَّ أَذْهِبِ الْبَأْسَ رَبَّ النَّاسِ وَاشْفِ فَأَنْتَ الشَّافِي لاَ شِفَاءَ إِلاَّ شِفَاؤُكَ شِفَاءً لاَ يُغَادِرُ سَقَمًا-

Allahumma Azhibil ba'sa rabban naas washfi. Antash shaafee. Laa shifaa-a illaa shifaa-uka. Shifaa-al laa yughaa diru saqamaa.

Aye logo ke Rab! Bimari ko door karde, aur shifa de, Tu hi shifa dene wala hai, aisi shifa ke bimari bilkul na rahe.

Jamia Tirmizi, kitab ad dawaat (48), hadees- 3565. Ise darussalaam ne sahih karaar diya hai

۩ Syedna Usman Bin Abu al Aas Saqafi r.a. kahte hai,

Mai jis din se Musalman hua tha usi din se mere jism ke 1 hisse me dard hota tha. Mai ne is ki shikayat Allah ke Rasool ﷺ se ki to Aap ﷺ ne farmaya,

"Jism me jis jagah dard hai wahaa apna hath rakhho aur teen (3) baar Bismillah kaho fir 7 martaba ye Dua padho:

أَعُوذُ بِاللَّهِ وَقُدْرَتِهِ مِنْ شَرِّ مَا أَجِدُ وَأُحَاذِرُ

'Auzu Billahi Wa Qudratihi Min Sharri Ma Ajidu Wa Uhaziru'

'Mai Allah ki zaat aur us ki qudrat ke sath panah chahta hu is takleef se jo mujhe lahaq hai aur har us takleef se jis se mai bahut darta aur mohtaat rahta hun.'

Sahih Muslim, kitab al salaam (39), hadees- 5737.

Iske alaawa Aap Subah Sham ke Azkaar ki pabandi kijiye. Allah s.w.t. par bharosa rakhye aur Astaghfaar karte rahye.

In shaa Allah Allah s.w.t. jald hi shifa ata karega.

Ham Allah s.w.t. se Dua karte hai ke Allah hame har Bimari se mahfuz rakhe aur sunnato par amal karne ki taufeeq ata farmaye.

JazakAllah khair

Prepared by: A. Sayed

•٠•●●•٠•

Related: Bimari aur Waba (Mahamaari) Se Bachao ki Duae Aur Azkaar

Read More »

Bimari aur Waba (Mahamaari) Se Bachao ki Duae Aur Azkaar

hi   ur   en

Alhamdulillah..

Sunnat me aisi bahot si ahadees hai jo Musalmaan ko masnoon aise azkaar aur duao par pabandi ki targeeb dilati hain jo insaan ko takleef, nuqsaan aur har qism ki munfi sargarmi se mahfooz rakh sakti hai. In duao ke umoom me mukhtalif qism ki tamam bimariya aur wabayi amraaz shamil hai, in me se chand ahadees niche hai:

۩ Usman bin Affan r.a. kahte hai ke  "Mai ne Rasoolullah ﷺ ko farmate hue suna,

Jo shaks bhi kahe -

بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ-

Bismillahillazi la yazurru ma‘a ismihi shay’un fi’l-ard wa la fi’l-sama wa huwa al-samee ul aleem.

'Allah ke naam se mai panah haasil karta hu jiske naam se koi bhi cheez asmaan ya zameen me takleef nahi pahuchati aur wo sunne wala aur jaanne wala hai.'

Jisne ye dua subah ke waqt teen baar padhi toh sham tak ise koi bhi achanak aafat nahi pahuchegi.

Sunan Abu Dawood, hadees- 5088. Jamia Tirmizi, hadees- 3388. Ise Imam Tirmizi ne sahih aur darussalaam ne hasan karaar diya hai. 

۩ Abu Huraira r.a. kahte hai ke ek shaks Nabi ﷺ ke paas aaya aur usne kaha, ' Allah ke Rasool! Mujhe raat ko bichhu kaatne ki wajah se bahot zyada takleef hui.' Toh Aap ﷺ ne farmaaya:

Agar tum sham ke waqt ye keh dete ke 

أَعُوذُ بِكَلِمَاتِ اللَّهِ التَّامَّاتِ مِنْ شَرِّ مَا خَلَقَ

A’oozu bi kalimaat Allah at-taammaaati min sharri ma khalaq

Mai Allah ke kamil kalimaat ki panaah me aata hu iski tamaam tar makhluqaat ke shar se.

Toh tumhe wo nuksaan na pahunchata.

Sahih Muslim, hadees- 6880.

۩ Abdullah bin Khubaib r.a. kahte hai, ham ek shadeed andheri aur barish waali raat me Rasoolullah ﷺ ko talaash karne ke liye nikle ke Aap hame namaz padha de toh ham ne Aap ko talaash kar liya, Aap ﷺ ne milte hi kaha,

(Kya tum ne namaz padh li hai?) Toh mai ne koi jawab nahi diya, is par Aap ﷺ ne farmaya, (kaho) mai ne fir bhi kuch nahi kaha, toh Aap ﷺ ne teesri baar farmaya: (kaho), Mai ne arz kiya, 'Allah ke Rasool mai kya kahu?' Toh Aap ﷺ ne farmaya, Tum subah aur sham ke waqt 'Qul huwallahu Ahad' (Surah Ikhaas) aur iske sath suratul falaq aur surat an naas teen teen baar padha karo, ye tumhe har cheez se kafi ho jayegi.

Is hadees ku tirmizi (3575) aur Abu Dawood (5082) ne riwayat kiya hai.

۩ Allama ibn baaz r.h. kahte hai,

'Tamam makhluqaat ke har kism ke shar se tahaffuz aur aafiyat paane ke sath sath pur aman rahne ke liye insaan Allah taala ke kaamil kalimaat ki panaah subah aur shaam teen teen baar Allah taala se maange aur kahe:

أَعُوذُ بِكَلِمَاتِ اللَّهِ التَّامَّاتِ مِنْ شَرِّ مَا خَلَقَ 

A‘auzu bi kalimaat Allaah at-taammaati min sharri ma khalaq

Tarjuma: Mai Allah ke kamil kalimaat ki panah me aata hu iske tamaam tar makhluqaat ke shar se.

Isliye ke aesi riwayaat sabit hai jinme in alfaaz ko aafiyat ka sabab karaar diya gaya hai. Isi tarah subah aur sham ye alfaaz bhi padhe: 

بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ

Bismillah illazi la yazurru ma‘a ismihi shay’un fi’l-ard wa la fi’l-sama’ wa huwa al-samee‘ ul-‘aleem

Tarjuma: Allah ke naam se mai panah hasil karta hu jiske naam se koi bhi cheez aasmaan ya zameen me taklif nahi pahunchati aur wo sunne wala aur jaanne wala hai] isliye ke Rasoolullah ﷺ ne batlaya hai ke jo shaks bhi subah ke waqt teen baar in alfaaz ko padhe to isko sham tak koi bhi cheez nuqsaan nahi pahunchati, aur jo shaks shaam ke waqt padhle toh subah tak ise koi cheez nuqsaan nahi pahunchati.

Toh Quran aur Sunnat se sabit ye tamam Azkaar har kism ki burai, shar aur takleef se tahaffuz ka ba'is hai. Isliye har momin mard aur aurat ko in azkaar ki muqarrarah auqaat me pabandi karni chahiye, nez inhe padhte hue Allah taala par mukammal atemaad ho aur qalbi taur par mutmayeen bhi ho ke Allah taala hi har cheez ko qayam rakhe hue hai, wahi har cheez ke baare me ilm rakhta hai, aur har cheez par qadir bhi hai, iske siwa koi mabood e barhaq nahi aur na hi iske siwa koi Parwardigaar hai, isi ke hath me nafa wa nuksaan ka kamil ikhteyaar hai, aur wahi har cheez ka malik hai.

Fataawa ash-Shaykh Ibn Baaz (3/454, 455).

۩ Isi tarah Abdullah ibn e Umar r.a. se marwi hai ke Rasoolullah ﷺ subah ya shaam ke waqt in kalimaat ki pabandi kiya karte hai. 

اَللَّهُمَّ إِنِّي أَسْأَلُكَ الْعَافِيَةَ فِي الدُّنْيَا وَالآخِرَةِ، اَللَّهُمَّ إِنِّي أَسْأَلُكَ الْعَفْوَ وَالْعَافِيَةَ فِي دِينِي وَدُنْيَايَ وَأَهْلِي وَمَالِي، اَللَّهُمَّ اسْتُرْ عَوْرَاتِي وَآمِنْ رَوْعَاتِي، اَللَّهُمَّ احْفَظْنِي مِنْ بَيْنِ يَدَيَّ وَمِنْ خَلْفِي وَعَنْ يَمِينِي وَعَنْ شِمَالِي وَمِنْ فَوْقِي وَأَعُوذُ بِعَظَمَتِكَ أَنْ أُغْتَالَ مِنْ تَحْتِي-

Allahumma inni as’aluka al-‘aafiyata fi’d-dunya wa’l-aakhirah. Allahumma inni as’aluka al-‘afwa wa’l-‘aafiyata fi deeni wa dunyaaya wa ahli wa maali. Allahumma astur ‘awraati wa aamin raw‘aati. Allahumm ihfazni min bayni yadayya wa min khalfi wa ‘an yameeni wa ‘an shimaali, wa min fawqi, wa a‘auzu bi ‘azamatika an ughtaala min tahti.

Tarjuma: Ya Allah! Mai tujh se duniya aur aakhirat me har tarah ki aafiyat talab karta hu. Ya  Allah! Mai tujh se apne deen, duniya aur apne pariwaar (family) aur apne maal me tujh se aafiyat (hifazat) ka sawaal karta hu.

Ya Allah mere ayeb chupade. Aur mujhe mere khadshaat wa khatraat se aman ata farma. Ya Allah! mere aage, mere peeche, mere daaye, mere baaye aur mere upar se meri hifazat farma. Aur mai teri azmat ke zarye se is baat se panaah chahta hu ke mai apne neeche ki taraf se halaak kar diya jaau.

Sunan Abu Dawood, hadees- 5074. Sunan ibn e Maajah, hadees- 3871. Ise darussalaam ne sahih karaar diya hai.

۩ Abdullaah bin Umar r.a. se marwi hai ke Rasoolullah ﷺ ki dua me umuman ye alfaaz shamil hote the ke:

اَللَّهُمَّ إِنِّي أَعُوذُ بِكَ مِنْ زَوَالِ نِعْمَتِكَ ، وَتَحَوُّلِ عَافِيَتِكَ ، وَفُجَاءَةِ نِقْمَتِكَ ، وَجَمِيعِ سَخَطِكَ

Allahumma inni a‘oozu bika min zawaali ni‘amatika wa tahawwul ‘aafiyatika wa fujaa’ati niqmatika wa jamee‘i sakhatika.

Tarjuma: Ya Allah! Mai tujh se teri nemato ke zawal, teri janib se aafiyat ke khatme, teri achanak pakad aur teri har tarah ki naarazi se teri panah chahta hu.

Sahih Muslim, hadees- 6944.

۩ Sayyidina Anas bin Malik r.a. kahte hai ke Rasoolullah ﷺ farmaya karte the:

اَللَّهُمَّ إِنِّي أَعُوذُ بِكَ مِنْ الْبَرَصِ وَالْجُنُونِ وَالْجُذَامِ وَمِنْ سَيِّئْ الْأَسْقَامِ

Allahumma inni aauzu bika min al-barasi wa’l-junooni wa’l-judhaami wa min sayyi’ il-asqaam

Tarjuma: Aye Allah! Mai Bars, pagal pan, kodh aur buri beemaariyo se teri panah chahta hu.

Musnad Imam Ahmed, hadees- 12592. Sunan Abu Dawood, hadees- 1554.

۩ Is hadees ki sharah me Allama Teebi r.h. kahte hai,

'Rasoolullah ﷺ ne mutlaq taur par beemariyo se panah nahi maangi, iski wajah ye ho sakti hai ke kuch beemaariyo ki takleef kam hoti hai lekin is beemari par sabr ki badaulat milne waala ajar bahot zyada hota hai, aur wo bimariya daaemi (chronic) nahi hoti balke aarzi hoti hain, jaise ke bukhar, sar dard aur aankh dard wagaira, isliye Aap ﷺ ne daaemi beemaariyo se panah maangi hai, kyunke insaan daaemi beemaariyo se khud bhi tang aajata hai, aur dost ahbaab bhi mutanaffir se ho jate hai, log baat cheet aur ilaaj ke liye bhi nahi aate aur insaan khud apne ap se bezar hojata hai.'

Allamah Taibi ki Guftagu Azeemabaadi r.h. ne Abu Dawood ki sharah me zikr ki hai. (source- islamqa)

Wa Allahu alam.

•٠•●●•٠•

Read More »

Ghar Me Ba Jamaat Saff Banane ka Tareeqa

Pic

۩ Ibn e Umar r.a. se riwayat hai ke Rasoolullah ﷺ ne farmaya,

‘Akele shaks ki namaz se, jamat ke sath namaz padhna 27 darje (sawaab) rakhta hai.’

Sahih al Bukhari, kitab al Azaan﴾10﴿, hadees- 645.

۞ Baap Aur Beta ki Jama'at

Baap Imamat karega, Beta uska muqtadi hoga aur Baap ke Dayen (right) tarf khada hoga.

۞ Baap Aur Mardo ki Jama'at

Baap Imamat karega toh mard hazraat pichli (2nd) waali saf me Muqtadi honge.

۞ Shauhar aur Biwi ki Jama'at

Shauhar Imam ki jagah hoga aur Biwi bilkul Imam ke piche (2nd) saf me khadi hogi.

۞ Shauhar, biwi aur ek Mard ki Jama'at

Shauhar Imamat karega, ek Mard us ke Daayi (Right) taraf hoga. Aur Biwi Imam ke Bilkul piche (2nd) saf me khadi hogi.

۞ Shauhar, Biwi Aur zyada Mardo Ki Jama'at

Shauhar Imamat karega, Mard piche (2nd) waali saf me honge, aur Biwi aakhir (3rd) wali saf me hogi.

۞ Shauhar, Biwi aur Sab Aulad

Shauhar Imamat karega, ladke piche (2nd) saf me honge, biwi or baaki ladkiya akhir (3rd) wali saf me hongi.

•٠•●●•٠•

Download Image of this article

Read More »

Quarantine Reminder

Assalaam alaykum..

Is waqt me apne aur apne family ke alawa Apne aas paas logo ka bhi khyal rakhe.  Ap ke as paas kuch aese log bhi ho sakte hai jinhe lockdown ke wajah se pareshani ka saamna karna pad raha hoga.

Unki jitni help ho sake kare. Ab ye waqt hai ki ap sabit kare ki sirf naam se hi nai balki amal se bhi Ap Musalman hai.

Logo ki zarurate jaise bhi ho, financial, health care, wagaira. Puri koshish kare ki Ap unke kaam aa sake.

۩ Adi bin Hatim r.a. riwayat karte hai ki RasoolAllah ﷺ ne farmaya,

“Apne ap ko jahannam ke aag se bachao wo kyu na aadhi khajur hi dekar ho aur agar wo bhi nai ho sakta to achhi baat karke.”

Sahih al Bukhari, kitabul zakaat ﴾24﴿, hadith-1417.

۩ Abu Zarr r.a. riwayat karte hai ki Rasool ﷺ ne farmaya ki kisi bhi neki ko kam aham ka na samjho chahe yahi ho ki tum apne bhai ko muskurate hue chehre se milo. 

Sahih Muslim, kitab al birr was silati wal aadaab ﴾45﴿, hadith- 6690.

۩ Huzaifa r.a. se riwayat hai ki RasoolAllah ﷺ ne farmaya,

“Gujishta ummaton ke kisi shaksh ki rooh ke paas farishte aaaye aur pucha ki tune kuch achhey kaam bhi kiye hain? Rooh ne jawab diya ki main apne naukaro se kaha karta tha ki wo maaldaar logo ko (jo unke karzdaar hai) mohlat de diya kare aur un par sakhti na kare aur mohtaajon (ka karz) muaf kar diya karein.

Fir farishton ne bhi us se darguzar ki aur sakhti nahi ki.”

Sahih al Bukhari, kitab al buyu ﴾34﴿, hadith- 2077.

۩ Abu Hurairah r.a. riwayat karte hai ki RasoolAllah ﷺ ne farmaya:

“Ek fahashah aurat sirf is wajah se baksh di gayi ke wo ek kutte ke qareeb se guzar rahi thi, jo ek quwe ke qareeb khada pyasa bhanp raha tha. Aisa malum hota tha ke wo pyas ke shiddat se abhi mar jayega. Us aurat ne apna mojah nikala aur usme apna dupatta bandh kar pani nikala aur us kutte ko pila diya, to iski bakshish us (neki) ke wajah se ho gayi.”

Sahih Bukhari, kitab bada al khalq ﴾59﴿, hadith- 3321.

۩ Abu Hurairah r.a. riwayat karte hai ki RasoolAllah ﷺ ne farmaya,

“Ek shaks raaste ke upar padi hui darakht ki ek shaakh ke paas se guzra toh usne kaha, 'Allah ki kasam mai is shaakh ko musalmano ke raaste se hata dunga taakeh ye un ko nuksan na de toh us shaks ko Jannat me dakhil kar diya gaya.”

Sahih Muslim, kitab al birr was silati wal aadaab ﴾45﴿, hadees- 6670.

Jazakum Allahu khaira

Faisal Khan,

Head Admin, Team Iqra'

Read More »

Jiski Takhleeq Uski Marzi

Mard aur Aurat Islam me Allah s.w.t. ki nazar me barabar hai. Jitni Izzat aur Huquq Islam ne Aurto ko diye hai utne kisi aur mazhab ne nahi diye. Balke Islam ne hi Aurto ka darja buland kiya, unhe izzat di aur unse achha suluk karne ka hukum diya.

Jab 1400 saal pahle Aurto ko wo tamaam huqooq deen ne de rakhe hai toh fir ye kis se huquq mang rahi hai aur kyu?

Ham to hairaan hai ke Aurte hatho me play cards uthaye maidan me utar aayi hai aur behuda naare laga rahi hai aur isko aam kar rahi hai.

'Mera Jism Meri Marzi' ka matlab fahashi hai. koi mazhab koi muashra Fahashi ki ijazat nahi deta. Meri bahno ham Alhamdulillah Musalman hai. Ham ne kalma padha hai aur ham ek ba-parda muashre ki numaindagi karte hai.

Aap kya chahti hai? Aazadi?? Khud ko Aam karna chahti hai? Raasto par nikal kar beparda ho kar cheekhne chillane aur huqooq ke naam par be-pardagi ko aam karna kya ye sab Muslman bahno ko zayeb deta hai?

۞ Allah s.w.t. farmate hai,

۩ ❝Aye Aurto! Apne gharo me raho aur zamaan e jahiliyat ki tarah apne aapko dikhati na firo. Namaz qayam karo aur zakaat ada karo. Allah aur uske Rasool ﷺ ke hukmo ki pabandi karo.”

Surah Ahzab (33), ayat- 33.

۩ ❝Aye Nabi ﷺ ! Apni Biwiyo aur Betiyo aur Musalman Aurto se farma do ke apni chaadaron ka ek hissa apne muh par daale rakhe.”

Surah Ahzab (33), ayat- 59.

Beshak 'Aurat' Allah ki ek behtareen takhleeq hai isme koi shak nahi. Islam khwateen ko bahut zyada izzat deta hai. Hamara Deen hame ye batata hai ke Maa ke kadmo ke niche jannat hai, isi tarha biwi se husn suluk ka hukum deta hai,

۩ Mu'awiyah bin Jahimah As-Sulami r.a. riwayat karte hai ki Jahimah Rasoolullah ke paas aaye aur farmaya,

Aye Allah ke Rasool! Mai Jihad karne ka irada rakhta hu aur aap ke paas aap se mashwara lene ke liye aaya hu.

Aap ﷺ ne pucha, 'Kya tumhari Maa maujud hai'?

Unhone kaha, 'Ji Ha'

Aap ﷺ ne farmaya, Unhi ke khidmat me lage raho, kyuki Jannat unke dono qadmo ke niche hai.

Sunan Nisai, kitab ul jihad (25), hadees- 3106. Ise darussalaam ne sahih karaar diya hai.

۩ Abu Hurairah r.a. riwayat karte hai ki Rasoolullah ﷺ ne farmaya,

'Sabse kamil momin wo hai jiske akhlaq sabse acche ho aur tum maise sabse behtar wo hai jo apni biwiyo ke liye behtar ho.'

Jamia Tirmizi, kitab ar razaa' (12), hadees- 1162. Ise Imam ne ise hasan sahih karaar diya hai.

۩ Abdullah bin Amr r.a. riwayat karte hai ki Rasoolullah ﷺ ne farmaya, “Dunya ek aarzi (temporary) khushi hai, aur is dunya ki sabse behtareen khushi Ek Nek Biwi hai.”

Sahih Muslim, The Book of Suckling, hadith-3643. Sunan Ibn Maajah, hadith-1855 [Sahih by Zubair Ali Zai].

Aurto ne toh Islam ki Azeem Jango me bhi apna kirdar nibhaya hai. Sahabiyat Jango me Nurse ka kirdar nibhati thi, jango me zakhmi hue logo ko paani pilana, unki marham patti karna,unke liye khana banana, jaanwaro ka khyal rakhna wagaira.

Bibi Fatimah r.a. ne to Jang e Uhad aur Jang e Badr me apna kirdar bakhoob hi nibhaya. Aap taareekh utha kar dekh le aurton ki bahaduri ke kaarnaame, magar kisi ne bhi is tarha ke naare nahi lagaye ke 'Mera Jism Meri Marzi'.

Ham ye tasleem karte hai ke bahot saare Musalman Deen ki doori ki wajah se huqooq ada karne me kotahiya karte hai, unhe nazar-andaaz karte hai. Magar iska ye matlab nahi hai ke Aap raasto par utar aaye huqooq talbi ke liye.

Haq hasil karna hai toh ek mohazzab tarika hai chahe mard ho ya aurat. Agar kisi aurat mard ke khilaf baat karni hai toh zaroor kare ye uska bunyaadi haq hai, lekin uske bhi kuch usool hai.

Ye nahi ke rasto par banners leker bepardagi ke hudood ko paar kiya jaaye.

Mard ke khilaf baat karna, play cards nikalna, zamana e jahiliyat ki tarha udham machana, apne haq ke liye cheekhna chillana, naare baazi karna wagaira.

Kya ye sab Hawwa ki betiyo ko zayeb deta hai?

Agar Apko mard ke khilaf baat karni hi hai toh pahle apne walid ke bare me baat kare. Apne bhai ke khilaf baat kare, apne shauhar ke khilaf baat kare, apne bete ke khilaf baat kare, apne daamaad ke khilaf baat kare fir kahe ke mard bure hai.

Koi baap, koi bhai, koi beta, koi shauhar ye ijazat nahi dega ke unki ghar ki aurate is tarha ke fuzul banners leker road par utre aur be-pardagi ka hissa bane.

Allah s.w.t. ne unhe Aapka sarparast banaya hai,

۩ Mard auraton par qawwam (protectors and maintainers) hai.

Surah Nisa, ayat- 34.

Ye jo bahas chhidi hai 'Mard' aur 'Aurat' ye ek la-hasil fuzul bahes hai.

Allah s.w.t. ne dunya me saare mard nahi banaye, ya sari aurte nahi banayi balke Allah s.w.t. ne Mard aur Aurat dono ko banaya hai taake ye duniya ka nizam chal sake. Dono ek dusre ke bagair adhure hai.

Meri Masoom bahno Aap Aazad hai, Apne Rab ki qayam karda hudud me. Apne aapko aam aurat mat banao. Allah ne Aapko ek khas mukam ata kiya hai.

Ye jo naare Aap laga rahi hai, 'Mera jism meri marzi' ye khilaf e sharah naara hai. Har Aurat ka Jism usi ka hai jo ke Allah ne use diya hai.

Magar ye nahi ke is jism ko jaise chaahe istemal kare, bad-akhlaqiyo me, bepardagi failaane me. Hamara Deen is baat ki Ijazat nahi deta woh toh Aapko Parde me rahne ka hukm deta hai, gharo me thahre rahne ka hukum deta hai.

Meri Bahno sharam-haya ke janaze nikaal kar Aap kis raaste par ja rahi hai, zara soche?

Meri bahno jin logo ki baate sun kar Aap Fahashi par utar aayi hai, ye yaad rakhiye jab Aap mar jayengi toh ek bhi N.G.O. Aapko bachane nahi ayega, fir qabar me aapko apne amal ke mutabik saamna karna padega.

Fir maidan e hashar me alag sharmsaar honge Aap khadi hongi sar jhukaye aur fir Jahannam ka aazab alag. Allah Raham kare.

Chand Khwateen hai jo puri duniya ki aurto ki numainda bani hui hai, inhe kisi ne vote dekar apna numainda nahi banaya balke ye social media hai jisne inhe itni tarakki di hai ke ye be-pardagi ke raasto par nikal kar aam kar rahi hai.

Meri guzarish hai khaas taur par un bahno se jo college, university wagaira jaati hai ke hargiz jazbati na ho. Hame is duniya ko chhod kar jaana hai.

Hamesha Aap in logo ke bich is dunya me nahi rahengi jinki guftugu se aapko apni khatao ka ahsaas na ho, afsos mahsus na ho, magar Apko Allah ki taraf laut kar jaana hai. Allah ko jawab dena hoga, har is behayi ka jise Aap faila kar apne aapko aazad khyaali samjh rahi hai.

Achhe laqab laga kar Aap Burayi ko faila nahi sakti. Mardo ka ek alag dayera e kaar hai aur Aurto ka alag.

Jiski Aap takhleeq hai usi ki marzi rahegi, Aap Islam ki Shahzadiya hai. Allah s.w.t. ne Apko ek mukam diya hai Izzat ka, ise Aap is duniya walo se mat maange. Haya ko apna kar is ummat ka naam roshan kare.

Quran me toh puri ek muqammal surat hi khwateen par hai, Surah Nisa, jisme unke kirdaar, unki zimmedari aur unke hukuk ka zikr hai.

Haya ek aham kirdaar ada karta hai Rab aur uske bando ke bich. Hamare deen ne haya ko kirdaar ka ek aham hissa bataya hai.

Warna ..  Warna ..

“Jab sharam hi na rahe toh jo fir jo jee chaahe wo karo.”

Sahih al bukhari, kitab al adab (78), hadees- 6120.

Allah s.w.t. hamari kotahiyo ko muaf kare, hame burayio se door rakhe aur ummat ko fitno se mahfooz rakhe.

Ameen Ya Rabbul Aalameen

Aur Allah sabse behtar janta hai ❤

•٠•●●•٠•

Prepared by: A. Sayed

Read More »

Kalonji ke Tibbi Fawaid

۩ Abu Hurairah r.a. riwayat karte hai ki maine Rasoolullah ﷺ se suna,

'Siyah daano (kalonji) me har beemari se shifa hai siwaye Maut ke.'

Sahih al Bukhari, kitab at tibb (76), hadees- 5688.

۩ Khalid ban Saad ne kaha ke ham bahar gaye hue the aur hamare sath Ghalib ibn Abjar bhi the. Woh raaste me beemaar pad gaye fir jab ham Madina wapas aaye us waqt bhi woh beemaar hi the.

Ibn Abi Ateeq un ki ayadat ke liye tashreef laaye aur ham se kaha ke inhe yeh kaale daane (kalonji) istemaal karao, is ke paanch ya saat daane le kar pees lo aur fir zaitoon ke tel me mila kar (naak ke) is taraf aur us taraf use qatra qatra kar ke daalo kyunki Ayesha r.a. ne mujh se bayaan kiya ke unhone Nabi ﷺ se suna, Aap ﷺ ne farmaya ke ye kalonji har beemari ki dawa hai siwaye 'Saam' ke.

Mai ne arz kya Saam kya hai? Unhone farmaya ke 'Maut' hai.

Sahih al bukhari, kitab at tibb (76), hadees- 5688.

۩ Hafiz ibn Hajar r.h. kahte hai,

'Ye Daane (Kalonji) har beemari se shifa hai iska matlab ye hai ki isko sirf kisi ke sath milaye bagair hi nahi balki kisi chiz ke sath mila kar aur bina milaye, dono tarike se istemal kiya jaa sakta hai. Aur isko khaya ja sakta hai, piya ja sakta hai, sungha ja sakta hai, marham ke tarha (lagaya ja sakta hai) aur dusre tariko se bhi iska istemal kiya jaa sakta hai.'

Fath ul baari, 10/144.

Aye Allah jo beemaar ho unko shifa ata kar, beshak tu hi shifa dene waala hai. aameen.

•٠•●●•٠•

Related:

● Aaseb/jadu Ki Haqiqat Aur Ilaaj

● Shaitaani Waswase Aur Unka Ilaaj

Read More »

Ayatal Kursi

    pdf

اللَّهُ لاَ إِلَهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَهُ مَا فِي السَّمَاوَاتِ وَمَا فِي الأَرْضِ مَنْ ذَا الَّذِي يَشْفَعُ عِنْدَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِنْ عِلْمِهِ إِلاَّ بِمَا شَاءَ وَسِعَ كُرْسِيُّهُ السَّمَاو ;َاتِ وَالأَرْضَ وَلاَ يَئُودُهُ حِفْظُهُمَا وَهُوَ الْعَلِيُّ الْعَظِيمُ- [pic]

[Allahu laaa ilaaha illaa huwal haiyul qai-yoom; laa taakhuzuhoo sinatun wa laa nawm; lahoo maa fissamaawaati wa maa fil ard; man zallazee yashfa'u indahooo illaa be iznih; ya'lamu maa baina aideehim wa maa khalfahum; wa laa yuheetoona beshai 'immin 'ilmihee illa be maa shaaaa; wasi'a kursiyyuhus samaa waati wal arda wa la ya'ooduho hifzuhumaa; wa huwal aliyyul 'azeem]

Allah hi mabood bar-haq hai jis ke siwa koi mabood nahi jo zinda aur sab ka paalne wala hai, jise na oongh aaye na neend, usi ka hai jo kuch aasmaano aur zameen me hai, kaun hai jo uske paas us ki ijaazat ke bagair sifarish kar sake, wo janta hai jo un ke saamne hai aur jo un ke piche hai, aur wo us ke Ilm maise kisi cheez ko jaan nahi sakte magar jitna wo chaahe, uski hukumat chaai hui hai aasmaano aur zameen par, aur Allah us ki hifaazat se na thakta nahi, wo to bahut buland aur bahut bada hai.

अल्लाह ही माअबूदे बरहक़ है जिसके सिवा कोई माअबुद नहीं जो ज़िन्दा और सबका पालने वाला है, जिसे ना ऊंघ आये ना नींद , उसी का है जो कुछ आसमानों और ज़मीन में है, कौन है जो उसके पास उसकी इजाज़त के बग़ैर सिफारिश कर सके, वह जानता है जो उनके सामने है और जो उनके पीछे है, और वह उसके इल्म में किसी चीज़ को जान नहीं सकते मगर जितना वह चाहे़, उसकी हुकुमत छाई हुई है आसमानों और ज़मीन पर, और अल्लाह उसकी हिफाज़त से ना थकता नहीं , वह तो बहुत बुलन्द और बहुत बड़ा है।

Surah baqarah (2), ayat- 255.

•٠•●●•٠•

Read More »

Allah Se Darne Waala Kaun | Ibn Rajab

۩ Hafiz ibn Rajab r.h. kahte hai,

“Haqeeqat me Allah se darne wala wo nahi jo roye aur ankho se aansu jaari kar le balki haqeeqat me Allah se darne wala wo hai jo haraam kaamo ko jis ki wo khwahis rakhta hai aur us par qadir bhi hai fir bhi Allah ke khauf ki wajah se use chor de.”

Rasail ibn Rajab, 1/163.

•٠•●●•٠•

Read More »

Haiz ke Ek Roz Baad Matyaale (brown) Rang ka Paani Kharij Hona

ur -

Haiz se Paaki ki do (2) alamate hai, un me se ek koi bhi ho toh (haiz se) paaki shuru ho jayegi.

۩ Pahli alamat

Safaid mada (discharge) kharij hona, yeh safaid shafaaf pani hai, aur aurte use pahchanti ho.

۩ Dusri alamat

Khoon aana bilkul band ho jaaye, is tarha ke agar raham me rooi (cotton) rakhi jaaye to woh bilkul saaf nikle aur is par khoon ya peela (yellow) rang bilkul na dikhe.

Baaz auqaat haaiza aurat ko ek ya do roz ya is se bhi zyada din khoon aata hai, fir ek ya ek din se zyada paak hoti hai, aur fir dobarah use khoon aa jata hai.

۞ Matyaale rang ka pani (brownish discharge) aur mada (discharge) kharij hona

Agar toh ye yakeeni paaki ke baad kharij ho toh use haiz shumaar nahi kiya jaayega, aur agar paaki se pahle aaye to yeh haiz ka hissa hai.

۞ Is bina par ham kahte hai ke,

1. Pahle din ke baad khoon rukne se agar toh bilkul khoon aana band ho jaaye toh aap ko ghusl kar ke namaz-roza ki adaegi karni hogi kyuki aap paak-saaf ho chuki hai.

Lekin agar bilkul band aur khushk nahi hua toh haiz baaki hai, aur is ke baad aane waala mityaale rang ka mada (discharge) haiz shumaar hoga.

2. Aur agar chaar din ke baad khoon aana band ho gaya aur aap ne safaid pani dekh liya ya fir bilkul khushk aur khoon aana band ho gaya toh fir aap ka ghusl kar ke namaz roza ki adaegi karna sahih hai.

Aur agar raat ko dobara khoon aana shuru ho gaya to yeh haiz hai, aur is din ki namaz aur roza par is ka koi asar nahi padega, is liye namaz bhi sahih hai aur roza bhi sahih hai.

source: islamqa.info

•٠•●●•٠•

Related

۩ Haiz ke Masail

۩ Kya Haiz me pahne gaye kapde naapak hote hai?

۩ Haiz ki Halat me Quran padhna aur zikr karna

Read More »

Har Namaz Me Kabr ke Aazaab Se Panaah Maangni Chahiye

۩ Masruq riwayat karte hai,

Ayesha r.a. farmati hai ki ek Yahudi aurat unke paas aayi aur unhone qabr ke aazaab ka zikr chhed diya aur kaha ke Allah Ap ko qabr ke aazaab se mahfuz rakhe, is par Ayesha r.a. ne Rasoolullah ﷺ se  qabr ke aazaab ke baare me daryaft kiya.

Aap ﷺ ne uska jawab ye diya,

'Haa aazaab e qabr haq hai.' 

Ayesha r.a. ne bayaan kiya ke fir maine kabhi aisa nahi dekha ke Aap ﷺ ne koi namaz padhi ho aur us me aazaab e qabr se Allah ki panaah na maangi ho.

Sahih al bukhari, kitab al janaiz (23), hadees- 1372.

۞ Namaz me Qabr ke Aazaab Se Panaah Maangne ka Nabawi Tarika

Allahumma inni a’auzu bika min a’azabi jahannama wa min a’azabil qabri wa min fitnatil mahyaa wal mamaati wa min sharri fitnatil maseehid dajjal’.

Aye Allah! Mai jahannam aur qabr ke aazaab se, maut o hayaat ke fitna aur maseeh dajjal ke shar se teri panah mangta hu.

Sahih Muslim, kitab al salat, hadees- 1324.

Note: Ye Dua Tashahhud me Allahumma innee ke baad padhni hai, yaani sabse aakhir me.

•٠•●●•٠•

Related: Muqammal Namaz tarjume ke sath

Read More »

Coronavirus Se Hifazat ki Dua

(click on the image for full image)

Read More »

Wirasat Me Beti ka Hissa

ur   en   hi

Alhamdulillah..

Beti chahe wo maa ya apne waalid ki waris ho, uske hisse ki kayi ek halatein hain jinhe niche bayan kiya gaya hai,

۩1. Jab ladki akeli ho, yaani iski koi bahen ya bhai [yaani marne wali ki aage ki peedi (generation)] na ho to ladki ko wirasat ka aadha milega, Allah taala ka farmaan hai,

'Aur agar ladki akeli ho toh uske liye aadha hai.'

Surah Nisa (4), ayat- 11.

۩2. Jab ek se zyada ladkiya ho toh (yani do ya do se zyada) aur faut-shuda shakhs ka koi beta na ho toh betiyo ko Do-Tihayi (2/3) mileyga, Allah taala ka farmaan hai,

'Agar aurte do se zyada hai toh unke liye do-tihayi hai us maal se jo mayyat chhor gaya hai.'

Surah Nisa (4), ayat- 11.

۩3. Aur jab ladki ke sath faut-shuda shakhs ka beta bhi waris ho (ek ya ek se zyada) toh har waris ka muqarrar hissa ada kar ke (note-1) baaki maal in dono (ladke-ladki ) ko milega, aur ladki ka hissa iske bhai se aadha hoga (mard ko do aurto ke barabar ke hisaab se) chahe do ya do se zyada bahen-bhai ho toh ladke ko do ladkiyo ke barabar hissa milega, Allah taala ka farmaan hai,

'Allah taala tumhe tumhari aulaad ke mutalliq wasiyat karta hai, ladke ke liye do (2) ladkiyo ke barabar hai.'

Surah Nisa (4), ayat- 11.

Aur ye hisse Allah taala ki janib se taqseem kardah hai lihaza kisi shakhs ke liye bhi is me kuch tabdeeli karni jayaz nahi, aur na hi kisi ke liye jaiz hai ke woh kisi waris ko wirasat se mahroom kare aur na kisi ke liye yeh jaiz hai je woh kisi aise shakhs ko wirasat me dakhil kare jo uske waris nahi, aur na koi kisi waris ke muqarrar karda hissa se kami kar sakta hai aur na hi is ke sharai hisse me zyadati kar sakta hai.

Allah taala hamare nabi Muhammad ﷺ par apni rahmate nazil farmaye.

Wa Allahu aalam.

source: Islamqa

•٠•●●•٠•

Note 1: Yaani jo maal batwaare se pahle dena hai, misaal ke taur par agar mayyat kisi ka karz baaki ho toh sabse pahle wo karz ada kiya jayega aur fir batwaara kiya jayega ladka-ladki me.

Read More »

Haqeeqat Parast vs Shakshiyat Parast

Insan do qism ke hote hai,

۩1. Shakshiyat Parast

۩2. Haqeeqat Parast

Shakshiyat Parast wo hai jo baato ko shakshiyat ke aetbaar se dekhte hai. Jis baat se uske mahboob shakshiyat ki ta'eed nikle, us ko wo thik samajhte hai, aur jis baat se uske mahboob shakshiyat ka radd ho raha ho toh wo uske inkari ban jaate hai.

Haqeeqat parast wo hai jo baato ko hakeekat ke aetebaar se dekhte hai. Jo baat dalail se sabit ho us ko maan lete hai, aur jo bat dalail se durust sabit na ho us ko radd kar dete hai,

Yahi dusri qism ke log hai jo khuda ko paate hai. Jo aakhri aa'laa hakeekat hai. Pahli qism ke log saari zindagi, saari umar shakshiyat ke qawl (farmaan) me band rahte hai, aur isi me mar jaate hai. Jab bhi unko sach baat batayi jaati hai wo jawab dete hai ki hamare buzurg, ulema, muhaddis kaise galat ho sakte hai? Yaani wo is haqiqat se anjaan hai ki insaan hone ke naate in sab se galti ho sakti hai.

Wo is lazzat e ma'arifat se mahroom rahte hai jo haqeeqi Rab ko paa kar kisi banda e parwar ko hasil hoti hai.

•٠•●●•٠•

Related:

۩ Haq ka inkaar karne walo ka tarika aur unka anjaam

۩ Haq baat ki tashdeek shaitan ke taraf se bhi

Read More »

Baaz Masaajid Me Namazo ka Sawaab

۩ Abu Saeed Khudri r.a. se riwayat hai ke Rasoolullah ﷺ ne farmaya,

‘Teen (3) Masaajid: Masjid e Haram, Masjid e Aqsa aur Masjid e Nabawi ke alawa kisi dusri jagah (khaas sawaab) ke liye safar ikhtiyar na karo.’

Sahih al bukhari, kitab fazail as salaat fi masjid makkah wa al madeena (20), hadees- 1189.

۩ Jabir r.a. riwayat karte hai ki Rasoolullah ﷺ ne farmaya,

'Meri masjid (Masjid e Nabawi) me ek namaz padni dusri masjido me hazaar namaz padhne se afzal hai siwaye Masjid al haram ke, aur masjid al haram me ek namaz padhni dusri masjido ki ek lakh namaz se afzal hai.

Sunan ibn e majah, kitab iqamatis salaat (5), hadees- 1406. Ise darussalaam ne sahih karaar diya hai.

۩ Abu Hurairah r.a. riwayat karte hai ki Rasoolullah ﷺ ne farmaya,

'Masjid e Nabawi me Ek (1) namaz dusri masaajid ki hazaar (1000) namazo se behtar hai, siwaye khana e Kaaba ke.'

Sahih al Bukhari, kitab fazail as salaat fi masjid makkah wa al madeena (20), hadees- 1190.

۩ Sahl bin Hunaif r.a. se riwayat hai Rasoolullah ﷺ  ne farmaya,

‘Jis shaqs ne ghar mein wuzu kiya fir masjid e Quba gaya aur waha namaz padhi usko Umrah ke baraabar ajar milega.’

Sunan ibn e majah, kitab iqamatis salaat (5), hadees- 1412. Ise darussalaam ne hasan karaar diya hai.

۩ Abdullah ibn Umar r.a. se riwayat hai ke Nabi e akram ﷺ Har hafta ko masjid e Quba me paidal ya sawaar ho kar jaate aur do (2) rakat namaz padhte.

Sahih al bukhari, kitab fazail as salaat fi masjid makkah wa al madeena (20), hadees- 1194.

•٠•●●•٠•

Related: Masjid e Nabawi ki ziyarat ke waqt ki jane wali galtiya

Read More »

Jism Se Rooh Nikalne ke Baad ka Waaqya

Bara bin aazib r.a. bayan karte hai ke ham Nabi ﷺ ke sath ek ansari sahabi ke janaza me gaye, ham kabr ke paas pahuche toh abhi kabri khodi ja rahi thi. Rasoolullah ﷺ baith gaye aur ham unke ird-gird is tarha baith gaye goya ke hamare sar par parinde ho (yaani nihayat pur sukoon aur khamoshi se baithe the) aur Nabi ﷺ ke haath me chadi thi jis se wo zameen khuraid rahe the. To unhone apna sar uthaya aur farmaane lage, 'Azaab e qabr se Allah taala ki panaah talab karo. Yeh baat Nabi ﷺ ne do ya teen martaba dohrayi fir farmane lage,

'Jab momin banda is duniya se aakhirat ki taraf ja raha hota hai toh aasmaan se safed chehro waale farishte us ke paas aate hai goya ke un ke chehre suraj ho, un ke paas jannat ka kafan aur khushbu hoti hai hatta ke woh is ke saamne jaha tak nigaah pahoche baith jate hai. Fir Malak ul maut aakar us ke sir ke qareeb baithta hai aur kahta hai aye achhi jaan apne Rab ki maghfirat aur razamandi ki taraf chalo'.

Nabi ﷺ ne farmaya ke woh rooh is tarah nikalti hai jis tarah ke mashkizeh (cup) ke muh se pani ka qatra bahta hai, toh farishte use hatho haath lete aur palak jhapakte hi apne hatho me liye hue jannati kafan aur khushbu me lapait lete hai aur is se zameen me paayi jaane wali sab se achi qisam ki kastoori ki khushboo nikalti hai, toh woh use lekar upar chadte hai to woh jis farishte ke paas se bhi guzarte hai woh kahta hai yeh achhi rooh kis ki hai?

To woh kahte hai ke yeh fulaa bin fulaa hai, dunya me use jis, sab se achhe naam se bulaya jata tha, hatta ke woh use aasmani duniya tak jaakar use khulwaate hai toh khol diya jata hai, toh use har aasmaan wale dusre aasman tak pohanchate hai hatta ke saatwe aasman tak jaate hai toh Allah taala farmate hai,

'Mere bande ki kitaab Illiyoon (sabse unchi jannat) me likh do aur use zameen ki taraf lauta do, bilashuba mai ne inhe isi me paida kiya aur  isi me lautaunga aur fir isi me se nikalunga.'

Nabi ﷺ farmate hai ke uski rooh jism me lautayi jati hai toh uske paas do (2) farishte aa kar use baithate aur use kahte hai ke Tera Rab Kaun Hai?

Toh woh kahta hai, Mera Rab Allah Hai,

woh usse kahte hai Tera Deen kya hai?

woh jawab deta hai mera Deen Islam hai,

woh usse sawal karte hai, 'Is shakhs ke baare me tumhara kya khayaal hai jo tum me maboos kiya gaya tha?'

woh jawab dega, Woh Allah ke Rasool hai,

woh usse sawal karte hai, Tumhare ilm me ye jawaab kaise aaya?

woh jawab deta hai, 'Mai ne Allah ki kitab ko padha toh is par eemaan laaya aur iski tashdeek ki.'

Toh aasmaan me aawaz lagayi jaati hai ke mere bande ne sach kaha, is ke liye Jannat ka bistar lagao aur Jannati libaas pahnaao aur Jannat ka darwaaza khol do.

Nabi ﷺ ne farmaya, Us (kabr) me jannat ki hawaye aur khusbhoo aati hai aur jaha tak nigah pahonchta hai waha tak is ki kabr wasee (chawdi) ho jayegi aur farmaya, ke us ke paas khubsurat khubsurat shakal aur khubsurat libaas aur achhi khushboo me ek shakhs aakar kahta hai,

Khush ho jao yahi woh din hai jis ka tumhare saath waada kiya jata tha, toh woh usse kahega ki tum kaun ho, tumhare chehre se zahir ho raha hai ke tum khair (acchaai) laane wale ho, woh jawab dega, Mai tere aamaal e saleha (nek aamaal) hu, woh shakhs kahega, Aye Rab qayamat qayam karde taake mai apne ghar waalo aur maal ko firse dekh lu.

Nabi ﷺ ne farmaya,

Bilashuba jab kafir is duniya se akhirat ki taraf ja raha hota hai to aasman se us ke paas kaale chehre waale khurdara taat (sackcloth) liye farishte aate hai aur us ke paas jaha tak nigah jaati baith jaate hai fir malakul maut aakar us ke sar ke paas baith jata hai aur kahta hai ke aye khabees rooh apne Rab ke gusse aur gazab ki taraf nikal.

Nabi ﷺ ne farmaya, Toh wo rooh pure jism me fail jati hai toh use  jism se is tarah khincha jata hai jis tarah ke bheegi hui rooyi se salakh (skewer) khenchi jati hai, to woh use pakad kar palak jhapakte hi us khurdare taat me rakh dete hai aur is se zameen par paaye  jaane wale gande tareen murdaar ki tarah badbu aati hai toh woh use leker upar chadte hai. Woh farishto me se jis ke paas se bhi guzarte hai woh kahta ke yeh kis ki gandi rooh hai toh woh kahte hai yeh fulaan bin fulaan, us naam ke sath jo zameen me badtareen naam use diya jata tha hatta ke woh aasmani duniya tak pahunchte aur use khulwaate hai lekin nahi khola jata fir Nabi ﷺ ne Allah taala ka ye farmaan padha,

۩ 'Un ke liye aasman ke darwaze nahi khole jayenge aur woh us waqt tak Jannat me bhi nahi daakhil ho sakte hatta ke sui ke naake (hole) me oont daakhil ho jaaye.'

[Surah Araaf (7), ayat- 40]

Toh Allah taala farmayenge ke is ki kitaab sab se nichli zameen me sijjeen ke andar likh do toh iski rooh ko upar se hi fenk diya jayega. Fir Nabi ﷺ ne yeh aayat padhi,

۩ 'Aur jo bhi Allah taala ke sath shirk karta hai woh is tarah hai ke jaise aasman se gire toh use parinde uchak le jaye ya fir use hawa kisi dur daraaz muqam par fenk de.'

[Surah Hajj (22), ayat- 31]

Toh is ki rooh jism me lautayi jati hai aur do farishte us ke paas aakar baithte hai aur kahte hai,

Tera Rab kaun hai?
Woh jawab me kahta hai, 'Haaye mujhe toh koi ilm nahi',
Woh use kahte hai, 'Tera Deen kya hai?'
Woh jawab deta hai, 'Haaye mujhe toh kuch ilm nahi.'
Woh use kahte hai, 'Is shakhs ke baare me tum kya kahte ho jo tumhare andar maboos kiya gaya'
Woh jawab deta hai, 'Haaye mujhe toh us ka ilm nahi.'

Toh aasmaan se yeh aawaz lagayi jati hai ke,

Is ke liye aag ka bistar lagado aur aag ki taraf ka darwaaza khol do toh is se iski garmi aur dhuwa aur badbu aati hai aur qabr us par is qadar tang ho jati hai ke is ki pasliya ek dusre me chali jati hai, aur us ke paas ek badsurat shakal, gande aur badbu-daar kapdo me ek shakhs aata hai aur kahta hai,

Tujhe teri na-pasandeedgi ki khushkhabri hai, yahi woh din hai jis ka tere sath waada kiya jata tha, woh is se sawal karega tum kaun ho? Tumhara toh chehra hi aisa hai jo shar hi shar laata hai, woh jawab me kahta hai ke mai tere bure aamaal hu, toh woh kahega aye Rab qayamat qayam na kar. 

Musnad Imam Ahmad, hadees- 17803. Is hadees ko Saheeh al Jaami, hadees- 1676 me sahih karaar diya gaya hai.

•٠•●●•٠•

Allah se dua hai ki wo hamari rooh ko nek rooh me shumaar kare aur apne rahmat me hame jagah ata kare. aameen.

Read More »

Namaz ki Taraf Sukoon Se Aana

۩ Abu Qataada r.a.  ne kaha ke Ham Rasoolullah ﷺ ke sath namaz padh rahe the, Aap ne logo ki khit-pit suni. 

Namaz ke baad Aap ne pucha: ‘Tum kya kar rahe the?’

Unho ne arz ki ham namaz ki tarf jaldi aa rahe the.

Aap ne farmaya: ‘Aisa na karo, Jab tum namaz ko aao toh aaraam se aao, jo namaz tumhe mil jaaye use padhlo aur jo chhut jaaye usko baad me pura karlo.’

Sahih Muslim, kitab al masajid (5), hadees- 1363.

۩ Abu Hurairah r.a, ne kaha Aap ﷺ  ne farmaya,

‘Jab farz namaz ki takbeer kahi jaaye toh daudte hue na aao balke sukoon se aao, jo mile padho aur jo rah jaaye use baad me pura kar lo kyu ke jab tum namaz ka iraada karte ho toh namaz hi me hote ho.’

Sahih Muslim, kitab al masajid (5), hadees- 1359.

•٠•●●•٠•

Related: Jamaat Me Chhuti Hui Namaz Ko Kaise Muqammal Kiya Jaye ?

Read More »

Aurat Bhi Mohtalim Hoti Hai

۩ Umm Salama r.a. riwayat karti hai ke Umme Sulaim r.a. ne Rasoolullah ﷺ se kaha,

‘Allah ke Rasool! Yaqeenan Allah haq se nahi sharmata (mai bhi Aap se masla puchti hu) kya aurat par ghusl hai jab ke us ko ahtalaam ho?'

Aap ﷺ ne farmaya, ‘Haa, lekin jab paani (mani ka nishan) dekho.’

Sahih al bukhari, kitab ul ghusl (5), hadees- 282.

Maaloom hua ke aurat ya mard neend se uth kar agar mani ke nishaan dekhe toh (ye ahtelaam ki alaamat hai lehaza) us par ghusl karna farz ho jaata hai aur agar ahtelaam ki kaifiyat yaad ho lekin nishan na paaya jaaye toh ghusl farz nahi hoga, aisi surat me shak karne ki zarurat nahi hai.

•٠•●●•٠•

Read More »