اقرأ باسم ربك الذي خلق

Showing posts with label Firqa-Wariyat. Show all posts
Showing posts with label Firqa-Wariyat. Show all posts

1 Sept 2021

Firqo ya Groh Me Batna Jahalat Hai | Ahadees e Nabawi

۩  Jabir r.a. riwayat karte hai,

Ham Nabi ﷺ ke sath jihaad me shareek the, Muhajireen badi tadaad me Aap ﷺ ke paas jama ho gaye. Wajah yeh hua ke Muhajireen me ek sahib badi hasi-mazak karne waale the, unhone (mazaak me) ek Ansari ke sareen (hip) par zarb lagayi (stroked an Ansari man on the hip), (Is par) Ansari bahut sakht gussa hue, unhone apni biradri walo ko madad ke liye puraka aur naubat yahan tak pahonchi ke un logo ne (yaani Ansari) ne kaha, 'Aye qabail e Ansaar ! Madad ko pohncho! Aur Muhajireen ne kaha, 'Aye muhajireen! madad ko pohncho!

Yeh sun kar Nabi ﷺ (khaime se) bahar tashreef laaye aur farmaya, Kya baat hai? Yeh Jahilyat ki pukaar kaisi hai? Aap ke soorat e haal daryaft karne par muhajir sahabi ke ansari sahabi ko maarne ka waqya bayan kiya gaya, toh Aap ﷺ ne farmaya,

'Is se ruk jaao kyuki ye buri pukaar hai.'

Sahih al Bukhari, kitab al manaqib (61), hadees 3518.

Gaur karne ki baat hai ki, na toh aye ansaar (ya aye muhajireen) kahna galat hai aur na hi ekdusre ko madad ke liye pukaarna galat hai. Lekin yaha ekdusre ke khilaf grohbandi kari jaa rahi thi yaani Musalmaan ki 1 jamaat khud ko 2 groh me baant rahi thi jisko Rasoolullah ﷺ ne jahalat se tasbeeh di.

Toh zara soche agar Aaj Rasoolullah ﷺ hamare darmiyan maujud hote toh unko kaisa mahsoos hota ki unki Ek Ummat itne groh aur firqo me bat ti jaa rahi hai. Ham zara zara si ikhtilaf par apni dhaayi eent ki masjid alag kar lete hai aur firqo me bant jaate hai. 

Agar hame zara bhi Rasoolullah ﷺ se muhabbat hai toh ham ye hadees sun kar fauran apni islaah kar lenge in shaa Allah. Rasoolullah hame ek ummat bana kar gaye the, shia, sunni, deobandi, barelwi, ahle hadees bana kar nahi gaye the. Sochne ki baat hai.

Ikhtilaf Ummat me sahaba ke daur se raha hai, ikhtilaf hona koi badi baat nahi hai. Lekin hame khud ko firqo me baant lena ye amal bura hai. Allah swt farmate hai,

۩ Unlogo ke tarah na hona jinhone Allah ke sath auro ko shareek kiya aur na hi unlogo ki tarah jinhone apne Deen ko baant diya aur firqe-firqe ho gaye,  har giroh us cheez par khush hai jo un ke pas hai (ki bas wahi log haq par hai).

Surah Room (30), ayat- 31, 32.

Allah se dua hai ki wo hame Quran aur sunnat par chalne ki taufeek ata kare. aameen.

•٠•●●•٠•

Related:

۩ Rasoolullah ﷺ kis firqe se the?

Read More »

27 Jun 2019

Kya Allah ka Diya Hua Naam Hamare Liye Kaafi Nahi?


Allah swt farmate hai,

'..ussi Allah ne tumhara naam Musalman rakha hai is Quran se pahle aur is me bhi..

Quran, 22.78.

۩ Haris al Ash'ari riwayat karte hai ki Rasoolullah ne farmaya, 'Mai tumhe paanch baato ka hukm deta hu jinka Allah taala ne mujhe hukm diya hai. Pahla hai Jamaah, dusra hai itaat karna, teesra hai sunna, chautha hai Hijrat aur panchwa hai Jihad karna Allah ke raah me.

Aur  jo shaks balisht barabar bhi Jamaah se alaidah hua us ne goya Islam ki Tauk apne gardan se utaar fenka magar us surat me ke jamaah me wapis aajaye aur puri tarah ameer ki itaat kare.

Aur jo bhi Islam ke zamane me jahiliyat ke naam se pukarna shuru kar de toh wo dozakh me dale jane wale khush wa khishak me hoga.

Ek shaks ne arz kiya: 'Ya Rasoolullah! agarche wo namaz padhe aur roza rakhe.' Aapne farmaya, “ (Ha) Agarche wo namaz padhe aur roza rakhe. Pas tum apne ap ko us naam se pukaro jis naam se Allah ne tumhe pukara hai. Usne tumhara naam MUSLIM, MOMIN AUR ABDULLAH (Allah ka banda) rakha hai.'”

Jamia Tirmizi, kitab al amshaal ﴾42﴿, hadees- 2863. Ise darussalaam ne sahih karaar diya hai.

۞ Is hadees par Salaf ka faham:

۩ Shaykh Ibn Taymiyya kahte hai,

“Minjumla un baato ke jin se ummat me tafarraqa paida hota hai aur jinhe darmiyan me lakar ummat ko tarah tarah ke azmaish wa mahnat me daala jata hai, halanke Allah aur Rasoolullah ﷺ se in ki koi daleel nahi. Ek ye bhi hai ke masalan kisi ko pucha jaye ke tum Shukayki hai ya Qarfandi?

Ye lakab e batil hai, kyuki inke sahih hone me Allah ne koi daleel nahi utari. Allah ki kitab aur Rasoolullah  ki sunnat aur salaf as saliheen ke aqwaal ma'aroofa me inka mutlaq pata nahi chalta, na koi Shukayki hai na Qarfandi.

To jab kabhi kisi Musalman se is chiz ki nisbat pucha jaye toh us par wajib hai ke wo jawab de ke mai na Shukayki hu na Qarfandi, balke mai Musalmaan hu, Allah ki kitab aur Rasoolullah ki sunnat ka muttabi hu.

[Note: Shukayki aur Qarfandi us zamane ke firqe the]

Ameer Muawiya r.a. se hame ye riwayat pahuchi hai ke inhone ek dafa ibn e Abbas r.a. se pucha ke Ap Hazrat Ali r.a. ki millat par hai ya Usman r.a. ki? Inho ne kaha ke 'Na mai Ali ki millat par hu, aur na Usmaan ki, Mai to Rasoolullah ki millat par hu'.

Salaf as saliheen me se har ek yahi kahta tha, 'Ye tamaam Naam (laqab) Gumrahi hai aur in ka anjaam dozakh hai.'

Ek Salaf farmate hai, Mai ye nahi janta ke dono nemato me se kaun si nemat badi hai, ye nemat badi hai ke Allah ne mujhe Islam ki taraf rahnumaayi ki ya ye ke Allah ne mujhe gumraahi se alag kiya. Allah ne Quran me hame Musalman, Momim aur Abdullah kah kar pukara hai. Ham hargiz nahi chahte ke Allah ke tajweez karda naamo ko chhor kar wo naam ikhtiyaar kare jo kisi khaas Qaum ne ba'tareeq ejaad kiya ho aur unhone aur un ke aabaa wa ajdaad ne khud gadh liye ho. Halanke Allah ne un ke mutalliq koi daleel nazil nahi farmayi.”

Al wasiyat al kubra, page- 75.

•٠•●●•٠•

Allah se dua hai ki wo hame Rasoolullah aur salaf as saaleh ke manhaj par chalne ki taufeek ata kare. aameen.
Read More »

12 Dec 2018

Tassub - Ek Bimari


Allah farmate hai:

Beshak Allah Ke Nazdeek Deen Islam Hi Hai Aur Ahle Kitab Ne Apne Paas Ilm Aa Jaane Ke Baad Aapas Ki Sarkashi Aur Hasad Ke Bina Par Hi Ikhtilaf Kiya Hai, Aur Allah Ki Aayato Ke Sath Jo Bhi Kufr Kare Allah Us Ka Jald Hisaab Lene Wala Hai.

Surah aal e Imran ﴾3﴿, ayat- 19.

Tassub ek aesi bimari hai ki baaz auqat bade se bade insan ko bhi pata nahi chalta hai ki wo isme mubtala ho chuka hai. Jab kisi shaks se ap ikhtilaf kare to ilmi ikhtilaf kare daleel ke sath. Iske bajaye us shaks ki niyat par hamla karna aur uski zaati zindagi ko bich me le ana ya usko zero se multiply kar dena ye ilmi jahalat hai. 

Aiye sahaba ke tarike par roshni dalte hai. Sahaba e karaam me apas me bade bade ikhtilaf hue, yaha tak ke us masle me bhi ikhtilaf hue ki agar wo masle me koi aj hamse ikhtilaf kare to use ham apne manhaj se hi nikal denge. Rasool ko Allah ka dekhna, kabr me murde sunte hai ya nahi, Rasool zinda hai ya nahi. in sab chizo me bhi ikhtilaf hua. Lekin sahaba ka amal dekhye kya unhone ikhtilaf ke waqt ye kaha ki Abu Bakr ko mat suno Umar ko mat suno, inse dur raho unse dur raho, ya fula gumrah ho gaya hai, nauzbillah. Balki unhone daleel ke roshni me ek dusre se baat ki. Hamara bhi yahi manhaj hona chahiye, par afsos ye manhaj boht kam logo ka hai aj ke zamane me. 

Allah pak farmate hai,

'Logo Ko Apne Rab Ke Raastey Ki Taraf Hikmat Aur Khubsurat Nasihat Ke Sath Bulaiye Aur Unse Behtareen Tareeqe Se Bahes (Guftagu) Karye.'

Surah Nahl, ﴾16﴿, ayat- 125. 

Hamesha yaad rakhein ki kisi ka ahtaraam apko yaha tak na le jaye ki ap uski galti ko bhi defend karne lage aur kisi shaks ki tanqeed apko yaha tak na le jaye ki ap uska wajibi ahtaraam bhi karna chor dein.

Allah farmate hai,

'Aye eeman walo! Allah ki raza ke liye Adl wa insaaf ke sath dat kar gawahi dene wala bano. Aur logo ki nafrat, tumhe is baat par na ubhare ke tum adl wa insaaf ke sath kaam na lo. Insaaf karo yahi baat taqwe ke zyada kareeb hai aur Allah se darte raho, beshak Allah tumhare aamaal ki puri khabar rakhta hai.'

Surah Maida ﴾5﴿, ayat- 8.

•٠•●●•٠•

Allah se dua hai ki wo hame tassub, hasad, bughz aur in jaisi shar wali chizo se mahfuz rakhe. aameen.
Read More »

19 Oct 2018

Asal Salafiyyah Kya Hai ?

en     hi -
Shaykh ibn Uthaymeen farmate hai,

“Salafiyat haqiqat me Manhaj e Nabawi wa Manhaj e Sahaba ki itaat ka naam hai; kyuki wahi hamare salaf hai, aur ham se aage hai, chunanche unke naqsh e qadam par chalna hi “Salafiyat” kahlata hai.

Jabki “Salafiyat” ko koi insan apna khas manhaj bana kar is manhaj ki mukhalifat karne wale Musalmano ko gumraah karar de, chahe wo haq par hi kyu na ho, aur salafiyat ko Giroh-bandi wa firqah wariyat ka zarya banana, bila shubah ye amal salafiyat ke khilaf hai, kyuki salaf saliheen sab ke sab sunnat RasoolAllah ﷺ par ittefak (harmony) wa ittehad (unity) ke sath qayam rahne ki dawat dete aye hai, wo (salaf) samajh aur tashreeh (interpretation) ke ikhtilaf ke wajah se kisi ko gumraah nahi kahte the, ha albatta aaqaid ke bareme salaf saaliheen mukhalif raaye rakhne wale ko gumrah kahte the, jabki Fiqhi aur amali masaail me salaf saaliheen narmi baratte the.

Lekin hamare Is Daur me Kuch log jinhone salafiyyah ka rasta apnaya hai unlogo ne har us shaks ko gumraah kahna shuru kar diya jo unse ikhtilaf karta hai yaha tak ke agar wo shaks sahih ho, aur kuch logo ne Hibz ka rasta apnaya hai jis tarha se dusre groh (parties) ne apnaya tha jo apne ap ko Mazhab e Islam se hone ka dawah karte hai. Ye kuch aesa hai jo na-pasandida hai aur jiski manzuri nahi di ja sakti, aur unlogo se ye kahna chaiye ki Salaf as saaleh ke tarike ko dekho, wo kya kiya karte the? Un ke tarike ko dekho aur kaise wo khule dil ke the jab ikhtilaf ki surat aati thi jisme ijtihaad jaiyz hai (aur ikhtilaf kabile qubul hai). Woh bade masail me bhi Ikhtilaf karte the, eeman aur amal ke masail me. Ap ko kuch chize milengi, jaise, RasoolAllah ﷺ ka Allah ko dekhne par inkar karna jab ki dusro ne kaha ki unhone dekha hai. Apne kuch ko ye kahte hue dekha hoga ki qayamat ke din jo chiz tauli (weighted) jayegi wo hai aamaal jab ki dusre log kahte the ki wo to aamaal ki kitab hai jo tauli jayengi. Ap unhe dekhenge ki wo Fiqh ke muamlo me bhi kafi had tak ikhtilaf karte the, jaise Nikah, wirasat ka hissa, khareed aur farokhqt, aur dusre muamlo me. Lekin is ke bawujud unhone ek dusre ko gumraah nahi kaha.

Salafiyyah ek khas Jamaat ke taur par jiski alag khushusiyat ho jisme log in logo ke siwa sabko gumraah kahe, in logo ka salafiyyah se kuch bhi lena-dena nahi hai. Jaha tak ke salafiya jiska matlab salaf ki pairwi karna eeman me, kalimaat aur aamaal me, ittihad, mutabqat aur shafkat aur muhabbat ke taraf bulana jaisa ki RasoolAllah ﷺ ne farmaya: “Momin ke Misaal ek jism me Muhabbat, rahmat aur shafkat ki tarha hai; jab koi ek hisse me takleef hoti hai toh fir baaki hissa bhi us ke sath jaagta hai aur bukhar me shamil ho jata hai- YE ASAL SALAFIYYAH HAI."” End quote. 

Liqaa’aat al-Baab al-Maftooh, 3/246.

•٠•●●•٠•

source: Islamqa
Read More »

4 Oct 2018

Islam Me Firqa-Wariyat Nahi - Dr. Farhat Hashmi

hi  -
Is article me ham Dr. Farhat Hashmi ke chand keemti naseehato ko apse share karna chahenge.

Allah pak farmate hai,

“Aye Musalmano! Tum Sab Kaho Ke Hum Allah Par Eemaan Laaye Aur Us Cheez Par Bhi Jo Hamari Taraf Utari Gayi Aur Jo Cheez Ibraheem, Ismail, Is’haaq, Yaqub (Alaihimussalaam) Aur Un Ki Aulaad Par Utari Gayi, Aur Jo Kuch Allah Ki Jaanib Se Moosa Aur Isa (Alaihima Assalam) Aur Dusre Ambiya Ko Diye Gaye, Hum Un Maise Kisi Ke Darmiyaan Farq Nahi Karte, Hum Allah Ke Farmabardaar Hai.

Agar Wo Tum Jaisa Eemaan Laaye, To Hidayat Paaye, Aur Agar Muh Mode To Wo Sarih Ikhtilaf Me Hai, Allah Un Se Ankareeb Aap Ki Kifaayath Karega, Aur Wo Khoob Sunne Aur Jaanne Wala Hai.”

Surah Baqara, Ayat-136-137.

Dr. Farhat Hashmi is ayat ki tafseer me farmati hai,

“Hamare yaha kya hai? Bas ham sirf apne ustaad ki izzat jante hai, apne alim ki, apne groh walo ki, apne imam ki, Bas! Kitni tang-nazri hai ye! Isi liye to sirf uske naam se pahchane jana chahte hai.
Agar (wo) kahe bhi ki nahi nahi aesi baat nahi. Aesi (baat) nahi to kya hai ke tum har waqt isi chakkar me pade hue ho ki apne Imam aur apne bade (ulema) ko bada sabit kar sako dusro par aur saara zor tumhara isi par ho, saare dalail tumhare isi ke liye ho ki sirf jisse tum wabasta (connected ho) uski superiority tum qayam kar sako baaki sab par. Isse to kabhi Deen me wusat nahi aa sakti, yahi to shakshiyat-parasti hai.

Jaha haq ho waha se lelo, jaha achhi baat ho utha lo. Jo achha kaam kar raha ho appreciate karo, jaha se faiz pahuche shukr-guzaar ho. Aur sab ka ehteraam karo, yahi hame sikhaya gaya  'la nufarriqu bayna ahadin minhum (Hum Un Maise Kisi Ke Darmiyaan Farq Nahi Karte)'. Haalaki Allah taala ne khud baaz ambiya ko baaz par fazeelat di hai jaisa ki Quran e paak me teesre sipaare ki ibtida me aata hai 'Tilka alrrusulu faddalna baAAdahum AAala baad (Ye Rasool, in maise ham ne baaz ko baaz par fazeelat di)', minhum man kallama Allah (baaz se Allah ne kalaam kiya hai), warafaAAa baAAdahum darajat (baaz ko darajat me bulandi di hai). Lekin hame kya tameez sikhayi gai? Tum mat comparison karo, la nufarriqu bayna ahadin minhum. Kyu? Isliye ki agar ek shaks ye kahe ke fula nabi fula nabi se badh kar hai, jaisa ki baaz auqat logo me hua bhi, toh Aap ne us chiz se rok diya sab ambiya ki izzat zaruri hai. Halanki kisi ke paas kitab aayi, kisi ke pas saheefa aya.

Dekhe Ibraheem a.s. ki kitab ka zikr nahi milta, sohfe Ibraaheem, saheefe!, yaani choti kitabe, kitab badi chiz hai saheefa usse mukhtalif cheez hai ya choti cheez hai.

Baaz anbiya se Allah talah ne kalaam kiya, lekin sab se nahi kiya. Eesa alaihisaalam ko kuch aur khasayas diye gaye. Sulaiman Alaihisaalam ki badshahat aur nubuwat ki kuch aur khususiyat thi Dawood alaihisaalam ko jismani aur maali quwwat be-panaah di gai. Har nabi ki koi na koi khususiyat hai.
Lekin hume kya kaha gaya hai? 
Hum unke darimayan farq nahi karte. Hum sab ko Nabi maante hai, sab ka ehtaraam karte hai, sabki taaleemat ko barhaq samajhte hai ki unhone haq pahuchaya bando ko.

Isi tarah uske baad kya hai, jitne bhi ulema e karaam hai, jo bhi Deen ka kaam karne wale hai, ham sab ki izzat karte hai, (chahe wo) kisi bhi school of though se ho.

Haa! Kyuki ambiya toh galati nahi karte, (wo) Masoom hote hai. Lekin aam Ulema jo hote hai, Insaan jo hote hai, un se galatiya bhi ho jaati hai. Toh Jaha wo galati kare, bas us galati ko ham nahi maante baaki jo unki achchi baat hai wo sab maante hai, sab ki izzat karte hai. 
Illah yeh ki koi shakhs Islam ke dayreh se nikal kar kufr Ki taraf chala jaye. Toh wo toh ek alag qissa ho jata hai.

Lekin jo shaks Musalman hai, Deen ki khidmat kar raha hai, agar usse koi kami kotahi  ho jati hai, apko maloom hai ki umuman kami-kotahi kaha hui? Ijtehadi maumlat me. Iztehadi kaha?
Jab Quran aur Sunnat ka waazeh hukum nahi tha, Ulema ne koshishe kar ke masaail ka hal dhundha.
Kisi ne ek hal bataya kisi ne dusra bataya. Ab kya hua? ek ki baat dusro se mukhtalif ho gayi. 

Aap dekhye ki koshish karne ke baad agar koi aalim ek masla batata hai, (aur) agar usse galati bhi ho jaati hai toh apko pata hai (ke) us galati par bhi usko ajar hai, Hadees me yeh baat aati hai. Allah tala toh usko uski galati par ajar de rahe hai. Aur ham usko muaf nahi kar rahe hai aur uske khilaf toofan uthaye hue hai aur usko negate kar rahe hai, degrade kar rahe hai.

Hame kisne haq diya hai yeh sab kuch karne ka. Hame kisne chun kar is masnad pe bithaya hai ki tum logo ke baare me fatwe do. Nahi! hamara ye kaam nahi (hai). 
Hamara kya kaam hai?
Jo bhi koi achchi baat kar raha hai wo sab achche hai. Illah ye ki agar koi baat wo durust nahi kar raha toh bas ham wo nahi lenge.

Aap dekhen, misaal ke taur par ap (bazaar se) chawal (rice) khareed ke laati hai ya Tamatar khareed kar laati hai. Ap jab usko kaat te hai toh uska ek hissa kuch kharab nikal aata hai.
(Toh kya) Ap saara Tamatar (dust) bin me fek dete hai? Karte hai aisa? Nahi!!
Kya karte hai? 
Jo Kharab hissa hota hai usko kaat kar alag rakh dete hai, baaki ko dho kar istemal karte hai. Aur aisa hi hona chahiye na? Agar koi shakhs ek choti si daag ki bina par saara  Fruit bin me utha kar fek de toh Aap kahengi iska dimag chal gaya hai.
Lekin Deen ke maumle me hum aisi hi himaakate karte hai. Agar kisi se ek galati ho gayi, kyuki wo insan hai na? Toh us bina par uski har baat buri ho gayi.
Har chiz bin me chali gayi, uska toh naam bhi na lo. Kya wo tumhara Musalman bhai nahi?

Quran us dil me sahih tarah aata hai jis Dil me wusat aati hai. Nafrate nikalti hai, tazkiya hota hai, dil chamakte hai, hasad, bugz, mael se paak hote hai, Fir Allah ki marifat aati hai, fir hikamat ilqa hoti hai, Fir Deen ki barkate hoti hai, fir Islam ka paigam dunya me aam hota hai. Aaj kyun aam nahi ho raha? Ham to apne ghar me ajanabi ho gaye (hai). Musalman mulk, Islami jamhuriyat, Pakistan me Islam ajanabi hota ja raha hai. Padhe likhe logon me, anpadh logon me, Kyu hua ye? Kabhi socha aapne? In nafarton ki wajah se hua, ke jab koi Deen ka naam leta hai, sab haath dhoke uske piche pad jaate hai. Agar waqai sincerely ham Deen ke khadim banna chahte hai toh hame apna mijaaz badalna hoga. Aur mijaaz is Quran ke mutabik.

Aur ham kisi Nabi ke taraf nahi mansub kar rahe apne apko, kisi alim ke taraf nahi!, kisi Imam ki taraf nahi! 'Lahu Muslimoon', Allah ki taraf, uske Musalman, uske farmabardaar, uske tabedaar. [Allah pak farmate hai]

“Agar Wo Tum Jaisa Eemaan Laaye, To Hidayat Paaye, Aur Agar Muh Mode To Wo Sarih Ikhtilaf Me Hai, Allah Un Se Ankareeb Aap Ki Kifaayath Karega, Aur Wo Khoob Sunne Aur Jaanne Wala Hai.”
Surah Baqara, Ayat-137.

Yaani ibtedaai taur par jab Quran nazil ho raha tha to khitaab kisko tha? Sahaba e karaam ko tha, uske baad hamse bhi hai lekin sahaba e karaam ko ek model banaya gaya ki agar baaki dunya ke log eemaan laaye, 'bi-mishli maa antum' jaisa eemaan tum laaye ho, kaisa eemaan tha unka?' kulu amanna billah se le kar end tak', nahnu lahu muslimoon. Jo is tarike ka eeman laaye, fir wo hidayat-yafta hue.

Sahaba e karaam jaisa eeman, mujhe zara ap bataiye sahaba e karaam kis groh maise the? Kya maslak tha unka? Wo Hanafi the ya Shafai the ya Maliki the? Wo kaun the?
Wo bas Musalmaan the!
Unka kaunsa sect tha? wo sunni the ya shia the?  Musalman the! Farmaya aesa hi eemaan agar baaki log laaye, (toh) ye hai hidayat.
Aur agar log munh mod jaaye, aesa eemaan na laaye, is baat se ittifaak na kare, isse agree na kare aur apne apko groho me baant ke rakhe, toh asal masla fir kya hai, maraz kya hai? Wo darasal zidd me mubtilah hai, mukhalifat ka shikaar hai, alag rahna chahte hai. Kharabi fir waha hai, tum me nahi, tum itmenan rakho ki jo kar rahe ho durust kar rahe ho, bigaad hai toh fir unme hai jo is tarike par na aaye.” End quote.


•٠•●●•٠•

Allah hame in keemti naseehato par amal karne ki taufeek ata kare. aameen.
Read More »

3 Oct 2018

Kisi Ke Akhirat Ka Faisla Karna Kaisa Hai?

en  -
Alhamdulillah..

Ek Musalman ka amal aur aqidah ye hona chahiye ki jis cheez ka faisla Allah ko karna hai wo us chiz me koi mudakhilat (interfere) na kare. Ye apne had se aage badhna hai jo boht bada gunah hai. Kisi shaks ke Jannat ya Jahannam ka faisla karna Allah ka haq hai. Isme hame mudakhilat nahi karni chahiye. Hame dusro se pahle khud ke eeman ki fikr karni chahiye aur dusra agar koi galat kaam kar raha hai to use jahalat ke alfaz se nahi balki Quran ke bataye hue tarike se islah karni chahiye. Allah pak farmate hai:

Logo Ko Apne Rab Ke Raastey Ki Taraf Hikmat Aur Khubsurat Nasihat Ke Sath Bulaiye Aur Unse Behtareen Tareeqe Se Bahes (Guftagu) Karye.

Surah Nahl, Ayat-125.

Ab mai hadees ke zarye is mauzu par roshni dalna chahta hu.

۩ Abu Hurairah r.a. riwayat karte hai ki Nabi ﷺ ne farmaya, Ek (1) shakhs bahut gunah kiya karta tha jab is ki maut ka waqt kareeb aaya to apne beton se is ne kaha ke jab mai mar jau toh mujhe jala daalna fir meri haddion ko pees kar hawa me uda dena. Allah ki qasam! agar mere Rab ne mujhe pakad liya to mujhe itna sakht aazaab dega jo pahle kisi ko bhi is ne nahi diya hoga.
Jab woh (gunahgaar shaks) mar gaya to (is ki wasiyat ke mutabiq) is ke sath aisa hi kiya gaya. Allah taala ne zameen ko hukm farmaya ke agar ek (1) zarra bhi kahi is ke jism ka tere paas hai to use jama kar ke le aa. Zameen ne is hukm par amal kiya aur woh bandah ab (apne Rab ke samnay) khada hua tha. Allah taala ne kaha, 'Tum ne aisa kyun kiya?'
Us ne arz kiya, Aye Rab! Tere khauf ki wajah se. Aakhir Allah taala ne ise muaf kar diya.

Sahih al-Bukhari,  Book of Prophets, hadith- 3481.

۩ Abu Hurairah. r. a. bayaan karte hai ki Mai ne Rasool ﷺ ko farmate hue suna:

Bani Israel me do shaks barabar ke the, in me se ek to gunah ke kaamo me laga rahta tha aur dusra ibaadat me laga rahta tha.
Ibaadat guzar dusre ko barabar gunah me laga rahta dekhta to usse kahta ki Baaz aajao! 
Ek dafa isne use gunah karte paya to usse kaha: Baaz aajao!
Usne kaha: Kasam hai mere Rab ki tum mujhe chor do (apna kaam karo).
Kya tum mera nigahbaan banakar bheje gaye ho? 
To is (ibadat guzaar) ne kaha: Allah ki kasam, Allah ta'ala tumhe nahi bakshega na hi tumhe jannat me dakhil karega. 

Fir inki roohein qabs karli gayi to wo donon Rab ul aalameen ke paas ikhatta hue, Allah ne us Ibaadat guzar se kaha: Kya Tum mujhe jaante the, ya tum us par Qaadir the, jo mere hath me hai? Aur gunahgaar se kaha: Jaao aur meri rehmat se jannat me dakhil ho jao aur dusre (ibadat guzaar) ke mutaliq kaha: Ise jahannum me le jao.

Abu Huraira r.a kahte hain: Us zaat ki qasam jiske haat me meri jaan hai, usne (ibadat-guzaar ne) aisi baat kahi jisne iski dunya aur akhirat dono barbaad kardi.

Sunan Abu Dawood, kitab al Adab, hadith- 4901. Allamah Albani ne is hadith ko sahih karaar diya hai.

۩ Hazrat Abu Hurairah r.a. ne bayaan kiya ke hum Nabi ﷺ ke saath khaibar ki ladayi ke liye nikle. Is ladayi mein hume sona, chaandi ganimat mein nahi mila tha balke dusre amwaal, kapde aur samaan mile tha. Fir Bani ad-Dubaib ke ek shakhs Rifa'a bin Zaid naami ne RasoolAllah ﷺ ko ek gulaam hadiya (tohfa) me diya, ghulam ka naam Mid'am tha. 

Fir RasoolAllah ﷺ waadi-e- al-Qura ki taraf mutawajja huye aur jab aap waadi-e- al-Qura mein pahuch gaye to Mid'am ko jab ke wo Aap ﷺ ka kijaawa durust kar raha tha, ek anjaan teer aa kar laga aur uski maut ho gayi.

Logon ne kaha ke jannat use mubarak ho, lekin Rasool ﷺ ne farmaya ke hargiz Nahi!, Us zaat ki qasam jiske haath mein meri jaan hai, wo kambal jo isne taqseem se pahle khaibar ke maal-e-ganimat mai se chura liya tha, wo is par aag ka angaara ban kar jal raha hai.

Jab logon ne yeh baat suni to ek shakhs chappal ka tasma ya do (2) tasme le kar Aap ﷺ ki khidmat mein haazir hua, (matlab jo bina ijazat liya tha wo wapis le aya). Aap ﷺ ne farmaya ke yeh aag ka tasma hai ya do (2) tasme aag ke hain.

Sahih al-Bukhari, Book of Oaths and Vows, hadith- 6707.

۞ Ek Momin Ka Akhirat Ke Bareme Rawayya

۩ Amr bin Maimun r.a. riwayat karte hai, [Umar bin Khattab r.a. Ke wafat ke waqt, jab Umar r.a. zakhmi halat me the] Ek naujawan Umar r.a. ke paas aaya aur kahne laga, Ae Ameer ul Momineen!  Allah taala ki taraf se Ap ko khushkhabri ho. Ap ne RasoolAllah ﷺ ki sohbat uthai. Ibtida mein Islam laane ka Sharf haasil kiya jo ki Ap ko maloom hai. Fir Ap khalifa banaye gaye aur Ap ne poore insaaf se hukoomat kiya, Fir Shahadat payi. 
Ye sun kar Umar r.a. ne farmaya, "(Dekho aesa mat kaho) Mere In Aamaal Ke Wajah Se Qayamat Ke Din Mere Naam e Aamaal Agar Barabar Bhi Ho Gaya To Mere Liye Ye Kafi Hoga."

Sahih al-Bukhari, Kitab Fazail Ashaab an-Nabi ﷺ, hadith- 3700.

•٠•●●•٠•

Allah se dua hai ki wo hamare gunah muaf kar dein. aameen.
Read More »

17 Aug 2018

Haq Ka Inkaar Karne Walo Ka Tarika Aur Unka Anjaam

en -
۞ Haq Ka Inkaar Karne Walo Ka Tarika:

"Mai (Rasool) Ne Jab Kabhi Unhe Teri Bakshish Ke Liye Bulaaya, Unhone Apni Ungliya Apne Kaano Me Daal Li Aur Apne Kapdo Ko Odh Liya Aur Ad Gaye Aur Bada Takabbur Kiya."

Quran, Surah Nooh, Ayat-7.

Imam ibn Kaseer is ayat ki tafseer me kahte hai:

“Unhone apne kaan band kar liye taaki wo sun na sake jiski taraf mai (Rasool) unhe bula raha tha. Sa`id bin Jubayr aur As-Suddi dono ne kaha ki wo apne sar dhaanp liya karte the taaki wo unki (Rasool ki) baat sun na sake. Aur bada takabbur kiya ka matlab ye hai ki unhone haq se muh fer liya aur (khud ko) haq ke supurd na kiya.”

Tafseer ibn Kaseer,  Surah Nooh, Ayat-7.

۞ Haq Ka Inkaar Karne Walo Ka Anjaam:

Aur wo kahenge, "Agar hum (unki baate) sun lete ya Aqal istemal kar lete, toh dozakiyo me (shareek) na hote."

Surah al-Mulk (67), ayat-10.

Imam ibn Kaseer is ayat ki tafseer me kahte hai:

“(Is ayat ka) Matlab, Agar ham apni aqal ka fayda uthate ya haq ko sunte jo Allah ne utaari hai toh fir ham Allah par kufr na karte aur uske bareme gumraah na hote. Balki hamare paas itni samajhdaari nahi thi ye samajhne ke liye jo Rasool laaye the, aur hamare pas aqal nahi thi taaki unki (Rasool ki) pairwi kar ke ham khud ko raahe raast par laa sakte.” 

Tafseer ibn kaseer, Surah al-Mulk (67), ayat-10.

•٠•●●•٠•

Allah se dua hai ki wo hame haq ki mukhalifat karne se bachaye aur haq ko sunne aur aqal se fayda uthane ki taufeek ata kare. aameen.
Related:

Read More »

11 Aug 2018

Madkhali Bhaiyo Ko Ulema Ke Taraf Se Dawat e Islah

hi  -
Assalaam alaykum.

Alhamdulillah wassalaato wasasslaaam ala RasoolAllah.

Agar ap is field me ilm rakhte hai to apko pata hoga ki badkismati se hamare salaf ke manhaj ke manne walo me bhi firqe ban rahe hai kuch saalo se. Aur is baat ka saaf taur par Shaykh Badr Ibn Alee Ibn Taamee Al-Utaybee ne apni kitab 'Have mercy upon Salafiyyah' ke page no-11 me zikr kiya hai, Ye shaykh bin Baaz ke senior student hai aur Markaz Ad-Da’wah, Taaif, Saudi Arabia ke head hai.

To Salafi jamaat maise ek jamaat hai jisko aam taur par Madkhali salafi kaha jata hai. Kuch log inlogo ko aur naam bhi dete hai, jaise ki Shaykh Asim al Hakeem in logo ko 'Neo Salafi' ke naam se zikr karna pasand karte hai.

To mai ab fark bata du taaki koi shak wa shubah na baaki rahe. Ek to hamare Salafi bhai hai jo ki aam taur par mukhlis hote hai, sahaba aur salaf ke tarike par zindagi basar karne ki koshish karte hai alhamdulillah aur hamlog ka aur inlog ka manhaj ek hi hai ki Quran aur Sunnat ko salaf ke fahm se samajhna hai.
Aur jo madkhali log hai inlogo ka rawayyat kaafi alag hai. Mai apne comments ke bajaye apko ulema e haq ke comments bataunga in shaa Allah.

Toh ye jo Madkhali Jamaat hai inlogo ne is darje ke amal kiye hai ki hamare mohtaram ustaad, Shaykh Zubair Ali Zai, Shaykh Fawzan, Shaykh ibn Uthaymeen, Shaykh Asim al hakeem, wagaira ko khud maidaan me aakar inka radd karna pada aur ye batana pada unhe ki jo ye log jis tarha ki harkat karte wo salaf ka manhaj bilkul nahi hai balki inhone salafiyat ka rasta hi chor diya hai. Aur in logo ke kartut ke wajah se hamare salafi manhaj ko nuksan pohch raha hai.

Fatwe to fatwe, hamare ulema e karaam ko in logo ke khilaf kitaabe tak likhni padi inlogo ki harkato ke wajah se. Kuch mashhoor kitabo ke ye naam hai:

۩ Salafiyat Par Rahem Kare - Shaykh Badr Ibn Alee Ibn Taamee Al-Utaybee [senior student of Shaykh ibn Baaz].
۩ Sunnat Wale log - Shaykh ‘Abdul-Muhsin bin Hamad al-‘Abbaad.
۩ Ye Manhaj e Salaf Nahi - Shaykh Muhammad Bazmool.

Apko ye teeno kitabe is link se download kar sakte hai: https://goo.gl/1PsJUA

Aur inke khilaf jo hamare ulema ke sakht fatwe hai mai apse wo bhi share karunga in shaa Allah. Lekin usse pahle apke zahen me ye sawaaal aa raha hoga ki ham un salafio ko pahchane kaise kyuki aksar wo khud ko sirf salafi hi kahte hai kyuki unko pata hai ki unka radd kiya hua hai hamare ulema e karaam ne. Toh jo in kitabo me unki nishaniya batayi gai hai mai us par roshni daal kar apko fark waazeh karunga in shaa Allah.

۩ Pahli baat: Jo salafi honge unko ap is masrufiyat me payenge ki wo logo ko Quran aur sunnat ke taraf aur Tawheed ki taraf bulane me masroof rahenge, ye log dusro par aam taur par tanqeede nahi karte. Jab ki jo Madkhali salafi honge wo log din bhar bas ahle ilm ki galtiya nikalne aur un par hamla karne me masroof rahte hai.

Shaykh Abdul Azeez bin Abdullah (grand mufti of saudi arabia) kahte hai:

"Talib E Ilm Is Tarhan Fula Fula Logo Par Hamla Karte Hue Khud Ko Masroof Nahi Karte. Lekin Woh Achi Tarha Se Islaah Aur Khair Ke Taraf Logo Ko Bulane Me Masroof Rahte Hai."


۩ Dusri baat: Jo Salafi hote hai wo ahle sunnat ke logo ki galtio se deal karna aur ahle biddat ke logo ki galti se deal karne me fark karte hai. Yaani jo shaks shirk aur biddat karta hai aur jo Tawheed parast hai jo biddat nahi karta in dono se islah karne ke rawayyo me fark karte hai. Isi liye apko ye pata hoga ki Dr. Zakir, Dr. Israr wagaira ki galtiyo par hamare ulema itna sakht tabsirah nahi karte aur aksar ulema to inki galtiyo par kuch comment hi nai karte kyuki unhe pata hai ki ye ahle ilm shirk aur biddat me mulawwis nahi hai ha ijtihadi agar koi galti ho jaye to isme koi badi baat nahi hai wo kisi se bhi ho sakti hai.
Lekin jo Madkhali honge wo in ahle ilm aur inke students ko zero se multiply kar denge jaise wo shirk aur biddat me dube hue logo ke sath karte hai, aur un par gumrah, manhajless, biddati, pata nahi kya kya kahenge.

Shaykh Bazmool farmate hai: Yeh Mahajj se Salaf maise nahi ki ahle sunnat ke logo ki galtiyo se waise hi deal kiya jaye jaise ki ahle biddat ki galatiyo se deal kiya jata hai. Beshak Adam ki har aulad se galti hoti hai, is liye logo ka manhaj dekha jayega (ki wo ahle biddat hai ya ahle sunnat) aur uski galti par usi tarah deal kiya jayega.

Kitab - Ye Salaf ka Manhaj nahi, page-3.

۩ Teesri Baat: Madkhali log, logo ki galti par unhe naseehat karne ke bajaye ye unki galti ko logo me aam kar dete hai aur ye logo ki galti par unhe samjhane ke bajaye unhe boycott karna shuru kar dete hai ki inhe mat suno, is website se aagah ho jao, inke pas baitho mat, inko padho mat, wagaira.
Jab ki jo Salafi hote hai wo in sab chizo me nahi padte hai kyuki wo jante hai ki Quran me Allah pak ne bas hame haq baat batane ki zimmedari daali hai na ki logo ko hidayat dene ki.

Shaykh Fawzan kahte hai:

“Aur jhagde ko chor de, jo talib e ilmo ke bich ho gayi hai, (ek dusre se) nafrat karna, lanat karna, logo ko ek dusre ke khilaf karna, jab tak ke wo ummat aur talib e ilmo ko apas me baant na de, (aur unka kahna ki): "In in logo se khabardaar ho jao! fula aur fula ke sath baitho mat! fula aur fula ko mat padho!" - Iski ijazat nahi hai.

Agar fula aur fula ne galti ki hai, toh ek ek karke unhe naseehat kare, jab ki isko (unke galtiyo ko) logo me faila dena aur inke khilaf logo ko aagah karna jab ke wo alim hai, ya talib e ilm hai, ya koi nek shaks hai jisne galti ki hai, iski zarurat nahi hai ki un galtiyo ko logo me failaya jaye

Jo zaruri hai wo ye ki ap imaandaari se ek dusre ko naseehat kare, jo zaruri hai wo ye ki ap ek dusre se muhabbat kare, khas taur par talib e ilm se, khas taur par ulema se, ulema ki izzat ki jaye, aur na ki unko ek dusre ki khilaf kiya jaye, aur na hi un logo se aagah kiya jaye, Ye boht si buraai ki wajah hai, jhagda aur nafrat ki wajah hai, fitnah ki wajah hai - in sab chizo ko (sahih) raste par laaya jaye.”

source : https://youtu.be/LtG6F5mEPtM

Toh ye bunyaadi teen fark the jinke zarye ap unhe pahchan sakte hai. Ab mai in Madkhali hazraat ki ek baat aur batata hu. Ye log ahle ilm ki galti nikalne aur unhe out of context quote karne me expert hote hai, chahe wo shaks kitna hi Tawheed-parast aur sahih aqeede ka kyu na ho, bas agar apne in Madkhaliyo se zara sa koi ikhtilaf kar diya to ye apko na samjhayenge na islah karenge. Ye khamoshi se pahle apki choti choti galtiya talash karenge, agar galti na mile to ye apki baato ko galat aur out of context quote kar ke unhe jama karenge, aur fir ye is chiz ko logo me ya apni websites me faila denge taaki ek aam salafi bhi confuse ho jaye ki ye banda ya ye ahle ilm to Quran aur sahih hadith se baat karta hai, shirk aur biddat ke bhi khilaf hai, fir aesa kyu hua?

Aur ye log din bhar baith kar bas yahi kiya karte hai, inka main Islam yahi hai. In logo ne Dr. Zakir Naik, Dr. Israr, Dr. Farhat Hashmi, aur yaha tak ke Shaykh Zubair ali zai ko bhi nahi baksha jo ki ek boht bade aalim aur muhaddis hai. Ab ap khud soche jab ye itne bade alim ko nahi bakshte to ye hamare aur ap jaise talib e ilm ko kaise baksh denge:

Shaykh Zubair Ali Zai kahte hai:

"England wagaira ke taqleedi Salafiyo ne kazb (jhut) wa iftira (bohtan lagana) aur tashaddud (extreme) ki raah apnate hue Ahle Hadees Ulema wa aawaam par radd shuru kar rakhen hai. Zara si baat ya ijtehadi khata par wo logon ko salafiyat se bahar nikal dete hai. Is tarah ke log purane jamane me bhi the jin ke baare me Hafiz Zahabi r.h. likhte hai:

'Ye Ashaab e Hadees nahi hai balki wo faajir wa jaahil hai. Allah unke shar ko dur kare.'

(Siyar A'lam al-Nubala, 17/460).

Unhi kazzabeen (liars) maise Abu Khadija Abdul Wahid bin Muhammad aalam meerpuri, Yasir Ahmad bin Khushi Muhammad aur Abu Yusuf Abdur Rahman haafiz, teeno kazzab wa iftara (bohtan lagane) me bohot mashoor hai."

Al Hadith Hozro, volume-11, page-42.

Inka fitna shuru me to sirf england wagaira me tha lekin kuch saalo se ye hamare sub-continent me inka fitna kaafi fail gaya hai. Ap dekh sakte hai ki shaykh zubair kitne sakht alfaz me in logo ka radd kar rahe hai. Shaykh Zubair ki dua par ham aameen kahte hai.

Aur isi tarha se Shaykh Fawzan,  Shaykh ‘Abdul-Muhsin bin Hamad al-‘Abbaad, Shaykh Asim al Hakeem jaise ulemao ne in logo ka radd kiya hai. Niche diye gaye 2 links me ap in ulema ka radd padh sakte hai:


Aur akhir me mai apne mohtaram Ustaad Shaykh ibn Uthaymeen ka fatawa pesh karna chahunga jo ki unhone Madkhaliyo ke bareme kaha hai:

“Hamare Is Daur me Kuch log jinhone salafiyyah ka rasta apnaya hai unlogo ne har us shaks ko gumraah kahna shuru kar diya jo unse ikhtilaf karta hai yaha tak ke agar wo shaks sahih ho, aur kuch logo ne Hibz ka rasta apnaya hai jis tarha se dusre groh (parties) ne apnaya tha jo apne ap ko Mazhab e Islam se hone ka dawah karte hai. Ye kuch aesa hai jo na-pasandida hai aur jiski manzuri nahi di ja sakti, aur unlogo se ye kahna chaiye ki Salaf as saaleh ke tarike ko dekho, wo kya kiya karte the? Un ke tarike ko dekho aur kaise wo khule dil ke the jab ikhtilaf ki surat aati thi jisme ijtihaad jaiyz hai (aur ikhtilaf kabile qubul hai). Woh bade masail me bhi Ikhtilaf karte the, eeman aur amal ke masail me. Ap ko kuch chize milengi, jaise, RasoolAllah ﷺ ka Allah ko dekhne par inkar karna jab ki dusro ne kaha ki unhone dekha hai. Apne kuch ko ye kahte hue dekha hoga ki qayamat ke din jo chiz tauli (weighted) jayegi wo hai aamaal jab ki dusre log kahte the ki wo to aamaal ki kitab hai jo tauli jayengi. Ap unhe dekhenge ki wo Fiqh ke muamlo me bhi kafi had tak ikhtilaf karte the, jaise Nikah, wirasat ka hissa, khareed aur farokhqt, aur dusre muamlo me. Lekin is ke bawujud unhone ek dusre ko gumraah nahi kaha.

Salafiyyah ek khas Jamaat ke taur par jiski alag khushusiyat ho jisme log un logo ke siwa sabko gumraah kahe, in logo ka salafiyyah se kuch bhi lena-dena nahi hai. Jaha tak ke salafiya jiska matlab salaf ki pairwi karna eeman me, kalimaat aur aamaal me, ittihad, mutabqat aur shafkat aur muhabbat ke taraf bulana jaisa ki RasoolAllah ﷺ ne farmaya: “Momin ke Misaal ek jism me Muhabbat, rahmat aur shafkat ki tarha hai; jab koi ek hisse me takleef hoti hai toh fir baaki hissa bhi us ke sath jaagta hai aur bukhar me shamil ho jata hai- YE ASAL SALAFIYYAH HAI."” End quote. 

Liqaa’aat al-Baab al-Maftooh, 3/246.

Aur akhir me, in sab ka maqsad kisi ki burai karna, ya kisi ko sunne se rokna nahi hai. Balki jo log confuse hote hai unki harkato se unki confusion dur karna hai. Aur mai unlogo ke tarha ye bhi nahi kahunga ki in logo ko ap sunna band karde ya inlogo ke liye galat zuban istemal kare, balki jab bhi apko aese log mile toh Ap muskura kar ache akhlaq se unhe Quran aur sunnat ki roshni me bataye ki ye jo amal karte hai ye sahaba nahi kiya karte the aur ikhtilaf ki halat me salaf ka rawayya kya hua karta tha. Aur unhe upar zikr karda fatawa dekar samjhaye ki unhone kaha par salaf ka rasta chor diya hai, kyuki wo hamare hi Musalman bhai hai jinko galti lag gayi hai.

•٠•●●•٠•
Read More »

1 Aug 2018

Jamaatul Jarh Wa Ta'deel

en -
Shaykh Fawzan se sawaal kiya gaya:

"Ek Jamaat maujud hai jo khud ko "Jarh wa Ta'deel" wale log ya "salafi" kahte hai aur unka kaam hi yahi hota hai ki wo Ustaado ki ya Daayi ki galti talash karte rahte hai aur uske baad wo unhe Biddati kahte hai aur unlogo se baaki logo ko aagah karte hai"

Shaykh Fawzan jawab dete hai:

"Jarh wa Ta'deel karna Muhaddiseen (Hadith ke Ulema) ka kaam hota hai aur ye Isnaad ke ilm maise hai. Aur jaha tak logo ke bareme bolne ka sawal hai, toh ye Jarh wa Ta'deel nahi balki 'Geebat' aur 'Nameemah' (chugli) hai.

Isliye unlogo ko Allah ﷻ se tawbah karni chahiye aur is amal ko chor dena chahiye. Unlogo ko dusro ke ayeb (flaws) dekhne se pahle khud ko paak karna chahiye."

[source]

Note: Shaykh Fawzan kahte hai 'Nameemah' ka matlab ye hai ki Logo ki baat ek dusre tak unme rishte kharab karne ki niyat se pohchaya jaye. [At-ta-thab-but Fil-Akhbaar Wahtiraam Al-Ulamaa Wabayaan Makaanatihim Fil Ummah; page: 34].

•٠•●●•٠•
Read More »

19 Jul 2018

Kya Saare Nek Ustaad Salafi Hote Hai ?

en     hi - 
۞ Aaiye ye sawal khud salafi alim Shaykh Saleh al Munajjid se puchte hai,

Shaykh Saleh al Munajjid salaf ka raasta samjhate hue kahte hai:

"... Lekin iska matlab ye nahi hai ki saare nek shaykh (ustaad) salafi hote hai ya fir saare salafi nek hai aur dusre log nek nahi hai, Nahi ! Ye muamla nahi hai.

Taqwa ka matlab wo amal karna jiska Allah aur uske Rasool ﷺ ne hukm diya hai aur us chiz se ruk jana jis chiz se Allah aur uske Rasool ne roka hai. Har shaks jo Allah aur uske Rasool ki itaat karta hai aur unki nafarmani se bachta hai wo Allah ki roshni ki pairwi kar raha hai aur wo muttaqi (pious) hai. Har shaks jo Allah ki nafarmani karta hai uski parhezgari me utni kami hai jitna wo nafarmani ya gunah karta hai.

Agar Taqwa se yahi murad hai to wo itni aasani se, khud ko salafi ya kuch aur kahne se hasil nahi hogi, ya kisi Jamaat (group) me shamil hone se. Balki ek shaks jitna zyada Taqwa ki wujuhat ko hasil karta hai - jaise Allah ke bareme (ilm) sikhna aur uske shariyat (law) ke bareme aur us par amal karna - utna zyada usko Taqwe ka hissa milega aur Islam me utna hi zyada uska darja buland hoga. 

... Jaise ki Islam aur Musalman jo karta hai isme fark karna zaruri hai, (isi tarha) Salafi manhaj aur Salafio me fark karna zaruri hai."


Shaykh ke is raaye ka khulasa (conclusion) yahi hua ki zaruri nahi ki apke Ustaad wahi ho jo apne apko salafi kahte ho balki agar koi apne apko salafi na kahe to wo bhi nek ustaad ho sakta hai kyuki amal zaruri hai naam nahi. Allah ke hukm par amal karna aur uski nafarmanio se bachna, iske zarye faisla hoga qayamat ke din na ki naamo se faisle hone hai qayamat ke din.

۞ Ek dusre alim aur Muhaddis Shaykh Zubair Ali Zai ki bhi kuch aesi hi raaye hai, aaiye dekhte hai:

Shaykh Zubair Ali Zai ek hadees ko samjhate hue kahte hai:

"Is Silsile Me Dr. Farhat Hashmi Ki Takreer "Ar Rijalu Qawwamuna Alan Nisayi" Ke Mauzu Par Bohut Mufeed Hai Jo Ki Cassette Ki Surat Me Market Me Dastiyab Hai."

Mahnama al Hadith Hazro by Shaykh Zubair Ali Zai, volume-50, page -13.
[scan: full page, specific paragrah].

Ab jaise ki apke ilm me hoga ki Dr. Farhat Hashmi apne apko Salafi kahna pasand nahi karti, wo apne apko sirf Muslim hi kahna pasand karti hai fir bhi Shaykh Zubair Ali Zai unki taareef karte hai aur unse Deen ka ilm lene ki salaah dete hai.

۞ Ek aur (salafi) Alim hai jinka naam Shaykh Asim Al Hakeem hai. Unse bhi jab ek shaks sawal puchta hai ki kya Dr. Farhat Hashmi se ilm le sakte hai toh wo kahte hai ki agar unke taqreer me badi galtiya nahi paayi jati hai to unse Deen ka ilm le sakte hai. [source]

Zara gaur kare ki Shaykh ye nahi kahte hai ki kyuki wo salafi nahi hai isliye unse Deen ka ilm hasil na kiya jaye.

Aur yahi tarika shuru se hamare ahle ilmo me raha hai. Abu Bakr, Umar, Usman, Ali, Hasan al-Basri r.h. , Ata ibn Abi Rabah r.h. , Imam Abu Haneefah, Imam Shafi, Imam Ahmad, Imam Malik, Imam Tabari, Imam Bukhari Imam Muslim, Imam Tirmidhi, Imam ibn Hajr asqalani, Imam Nawawi, Imam ibn Kaseer, ye sab bade Ustaado maise hai aur inlogo ne khud ko kabhi bhi salafi nahi kaha. Aur ye log ham sab ke, yaha tak ke khud salafi bhaiyo ke bhi ustaad hai aur ham sab inse Deen sikhte hai. Jab in logo se deen sikhne me hame ye nazar nahi aata ki ye salafi hai ya nahi fir aj ke zamane me ham kyu ye kahte hai ki agar koi salafi nahi to unse Deen ka ilm nahi le sakte. Kuch logo ko ye galat-fehmi ho sakti hai ki us zamane me firqe nahi the. Aesa nahi hai, Firqe to sahaba ke zamane se hi banna shuru ho gaya the aur Khawarij uski ek misaal hai jiska zikr Bukhari aur Muslim me hai.

•٠•●●•٠•
Read More »

17 Jul 2018

Shaykh Zubair Ali Zai, Dr. Farhat Hashmi Ko Sunne Ki Naseehat Karte Hai


Shaykh Zubair Ali Zai ek hadees ko samjhate hue Dr. Farhat Hashmi ki taareef karte hai aur unke bayan ko sunne ki naseehat karte hai.

Shaykh Zubair Ali Zai kahte hai:

"Is Silsile Me Dr. Farhat Hashmi Ki Takreer "Ar Rijalu Qawwamuna Alan Nisayi" Ke Mauzu Par Bohut Mufeed Hai Jo Ki Cassette Ki Surat Me Market Me Dastiyab Hai."

Mahnama al Hadith Hazro by Shaykh Zubair Ali Zai, volume-50, page -13.

Isse un logo ki baat ka bhi radd hota hai jo kahte hai ki bas hamare hi title wale ulema se Deen ki baate sikhni chahiye, kyuki ap sab ko malum hoga ki Shaykh Zubair Ali Zai apne apko ahle hadith kahna pasand karte the jab ki Dr. Farhat Hashmi apne apko sirf Muslim hi kahna pasand karti hai. Iska matlab yahi hua ki khair ki baate ap kahee se bhi le sakte hai jab tak wo Quran aur sahih hadith ke mutabik ho.

Yahi baat Shaykh Asim Al Hakeem [Salafi alim] bhi kahte hai

Shaykh Asim Al Hakeem se sawal kiya gaya. "Mera sawal ye hai ki kya ham Dr. Farhat Hashmi ki tafseer le sakte hai ? Maine abhi jald hi dekha hai ki Dr. Murtaza Bakhsh ek video me kahte hai ki unka aqeedah sahih nahi hai.. mai waqai me unke audios ko boht zyada sunta hu. Baraye baherbani isme meri madad kare."

Shaykh Asim Al Hakeem iske jawab me farmate hai:

"Mai nahi janta ki ye Dr. Murtaza Bakhsh kaun shaks hai lekin agar wo subut deta hai inki tafseer se aur wo (galati ke alfaz) Dr. Farhat hashmi ke zuban se hi nikli ho, jise suna jaa sake (yaani Murtaza Bakhs sirf ilzam hi na lagaye balki unki galti ko sunaye khud Dr. Farhat ki clip se) aur usme sangeen galti (serious mistake) ho, fir apko unhe nahi sunna chahiye.

Lekin, agar wo (Murtaza Baksh) unki burai karta hai bina daleel ke aur bas unki aur sabhi dusre ulema ki aur daaes ki tanqeed (criticize) karta hai jo log uske maslaq (cult) ki pairwi nahi karte jise wo naam-nihad manhaj kahta hai jaise ki kuch Neo Salafi hai, toh fir apko inhe  (Murtaza Baksh ko) nazar-andaaz karna chahiye aur inke taraf koi tawajjo nahi dena chahiye." End quote.
•٠•●●•٠•

۞ Dr. Farhat Hashmi ke lectures apko unke is App se mil sakenge:

۩ Android     ۩ iOS

۞ Is (Iqra') website ka Android App: 

Read More »

16 Jul 2018

Firqo Se Alag Ho Jao - Nabi ﷺ Ka Hukm

english  -
حَدَّثَنَا يَحْيَى بْنُ مُوسَى، حَدَّثَنَا الْوَلِيدُ، قَالَ حَدَّثَنِي ابْنُ جَابِرٍ، قَالَ حَدَّثَنِي بُسْرُ بْنُ عُبَيْدِ اللَّهِ الْحَضْرَمِيُّ، قَالَ حَدَّثَنِي أَبُو إِدْرِيسَ الْخَوْلاَنِيُّ، أَنَّهُ سَمِعَ حُذَيْفَةَ بْنَ الْيَمَانِ، يَقُولُ كَانَ النَّاسُ يَسْأَلُونَ رَسُولَ اللَّهِ صلى الله عليه وسلم عَنِ الْخَيْرِ، وَكُنْتُ أَسْأَلُهُ عَنِ الشَّرِّ مَخَافَةَ أَنْ يُدْرِكَنِي‏.‏ فَقُلْتُ يَا رَسُولَ اللَّهِ إِنَّا كُنَّا فِي جَاهِلِيَّةٍ وَشَرٍّ، فَجَاءَنَا اللَّهُ بِهَذَا الْخَيْرِ، فَهَلْ بَعْدَ هَذَا الْخَيْرِ مِنْ شَرٍّ قَالَ ‏"‏ نَعَمْ ‏"‏‏.‏ قُلْتُ وَهَلْ بَعْدَ ذَلِكَ الشَّرِّ مِنْ خَيْرٍ قَالَ ‏"‏ نَعَمْ، وَفِيهِ دَخَنٌ ‏"‏‏.‏ قُلْتُ وَمَا دَخَنُهُ قَالَ ‏"‏ قَوْمٌ يَهْدُونَ بِغَيْرِ هَدْيِي تَعْرِفُ مِنْهُمْ وَتُنْكِرُ ‏"‏‏.‏ قُلْتُ فَهَلْ بَعْدَ ذَلِكَ الْخَيْرِ مِنْ شَرٍّ قَالَ ‏"‏ نَعَمْ دُعَاةٌ إِلَى أَبْوَابِ جَهَنَّمَ، مَنْ أَجَابَهُمْ إِلَيْهَا قَذَفُوهُ فِيهَا ‏"‏‏.‏ قُلْتُ يَا رَسُولَ اللَّهِ صِفْهُمْ لَنَا فَقَالَ ‏"‏ هُمْ مِنْ جِلْدَتِنَا، وَيَتَكَلَّمُونَ بِأَلْسِنَتِنَا ‏"‏ قُلْتُ فَمَا تَأْمُرُنِي إِنْ أَدْرَكَنِي ذَلِكَ قَالَ ‏"‏ تَلْزَمُ جَمَاعَةَ الْمُسْلِمِينَ وَإِمَامَهُمْ ‏"‏‏.‏ قُلْتُ فَإِنْ لَمْ يَكُنْ لَهُمْ جَمَاعَةٌ وَلاَ إِمَامٌ قَالَ ‏"‏ فَاعْتَزِلْ تِلْكَ الْفِرَقَ كُلَّهَا، وَلَوْ أَنْ تَعَضَّ بِأَصْلِ شَجَرَةٍ حَتَّى يُدْرِكَكَ الْمَوْتُ وَأَنْتَ عَلَى ذَلِكَ ‏"‏‏.

Hudhaifa bin Al-Yaman r.a. riwayat karte hai ki Log RasoolAllah ﷺ se khair wa bhalai ke mutallik puchte the lekin mai apse burai ke bareme pucha karta tha, is dar se ki kahi mai usme mubtilah na ho jau chunanche mai ne arz kiya: Ae Allah ke Rasool! Ham jahalat aur burai me mubtilah the ke Allah tala ne hame ye bhalai aur khair ata farmaya toh kya is khair ke baad fir koi shar (burai) hai? Ap ne farmaya: Ha, Maine arz kiya Kya us shar ke baad bhi koi khair hai? Apne farmaya: Ha aur usme thodi kharabi aur mail hai . Mai ne arz kiya: Us ki mael kya hai? Apne farmaya: Aese log jo meri sunnat ke alawa dusre tarike par chalenge aur mere hidayat ke elawa kisi nayi chizo ko ghadenge, un ke baaz aamaal ko mana jayega aur baaz ko na-pasand kiya jayega. Mai ne arz kiya: To kya is khair ke baad bhi koi shar hai? Ap ne farmaya: Ha, kuch log honge jo dusro ko jahannam ke darwaze ke taraf bulayenge, aur jo bhi unlogo ki baat qubul karega use is (jahannam) me jhok diya jayega.
 Maine arz kiya: Aye Allah ke Rasool! Hamare liye unka hal bayan farmaye. Aap ﷺ ne farmaya: Acha, wo hami maise honge, hamari hi zuban bolenge. Maine Arz kiya Ae Allah ke Rasool! Agar mai wo zamana paau to ap mujhe kis baat ka hukm farmate hai?

Aap ﷺ Ne Farmaya: Musalmano Ki Jamaah Aur Unke Imaam Ko Lazim Pakde Rakho. Maine Arz Kiya: Agar Musalman Ki Jamaah Aur Un Ke Imam Na Ho Tab Mai Kya Karu? Aap ﷺ Ne Farmaya: Tab Un Tamam Firko Se Juda Ho Jao Agarche Tumhe Darakht Ke Jado Ko Danto Se Chabana Pade, Hatta Ke Us Sabit Kadam Ke Halat Me Tumhari Maut Aa Jaye.

Sahih al Bukhari, Virtues and Merits of the Prophet (pbuh) and his Companions, hadith- 3606.

•٠•●●•٠•

Allah se dua hai ki wo hame tamam firqo se dur rakhe. aameen.
Read More »

16 Feb 2018

Haq Ki Maut - Mohar e Nabawi

hi  -
Ham har Namaz me Allah se ye dua karte hai ki Ae Allah hame sidha rasta dikha, wo rasta jis par tu ne inaam farmaya hai na ki wo rasta jis par tu ne saza muqarrar kiya hai [Surah Fatiha ayat 6-7]. Har namaz me ye dua padhna khud bata raha hai ki sidhe raste par chalne ki kya ahmiyat hai hamare Deen me. Sidhe raste par chalna hi haq par chalna hai. Lekin ye bhi boht aham hai ki hamari maut haq par aye.

Pichle kuch articles me maine tafseel se bataya tha ki haq par kaise chala jaye aur Haq ka safar kaise tay kiya jaye. Ab is article me mai is baat par roshni dalna chahunga ki haq ki maut kya hoti hai aur RasoolAllah ﷺ ne hame is ke bareme kya bataya hai aur sahaba e karaam ne is par amal kaise karke dikhaya hai.

حَدَّثَنَا عَبْدُ اللَّهِ بْنُ الْحَكَمِ بْنِ أَبِي زِيَادٍ، حَدَّثَنَا سَيَّارٌ، حَدَّثَنَا جَعْفَرٌ، عَنْ ثَابِتٍ، عَنْ أَنَسٍ، ‏:‏ أَنَّ النَّبِيَّ ـ صلى الله عليه وسلم ـ دَخَلَ عَلَى شَابٍّ وَهُوَ فِي الْمَوْتِ فَقَالَ ‏:‏ ‏"‏ كَيْفَ تَجِدُكَ ‏"‏ ‏.‏ قَالَ ‏:‏ أَرْجُو اللَّهَ يَا رَسُولَ اللَّهِ وَأَخَافُ ذُنُوبِي ‏.‏ فَقَالَ رَسُولُ اللَّهِ ـ صلى الله عليه وسلم ـ ‏:‏ ‏"‏ لاَ يَجْتَمِعَانِ فِي قَلْبِ عَبْدٍ فِي مِثْلِ هَذَا الْمَوْطِنِ إِلاَّ أَعْطَاهُ اللَّهُ مَا يَرْجُو وَآمَنَهُ مِمَّا يَخَافُ ‏"‏ ‏.‏

۩ Anas r.a. riwayat karte hai ki RasoolAllah ﷺ ek jawan ladke ke pas tashreef farma hue jo Maut ki halat me tha. RasoolAllah ﷺ ne us ladke se farmaya, “Tumhe kaisa lag raha hai?”
Unhone kaha, “Ae Allah ke Rasool, Mujhe Allah par Ummeed hai lekin mai apne gunaho se darta hu”. 
RasoolAllah ﷺ ne Farmaya, “Ye do chiz (Ummeed aur Khauf) is surat e haal me ek shaks ke dil me nahi rahta lekin ye ki Allah use ata kar dega jiski wo ummeed karta hai aur use mahfooz rakhega us chiz se jisse wo Khauf me hai.”

Sunan Ibn Majah, Kitabul Zuhd, Vol. 5, Book 37, Hadith 4261. Classed as Hasan by Sheikh Zubair Ali Zai r.h.

Gaur kare ! Ye sahabi ne ye nahi kaha ki Ae Allah ke Rasool Mai Haq pe hu, firqa e Najia se hu, Mai to apki sohbat me raha, Quran me Allah ne gawahi di hai ki Allah Mujh se raazi, mai Allah se raazi, lekin Nahiii!!! Khauf aur ummeed ke bich ke maut par jo mara wo haq par mara.  SubhanAllah bade bade sahaba ne aesa nahi kaha ki mai Jannat me jaunga balki ummeed hamesha ki ke Allah Jannat de aur Jahannam se najaat de. Aur ek ham log hai jo itne gunahgar hokar bhi Jannati ya Firqa e Najia ka self made certificate lekar ghum rahe hai. Toh ye haq ki maut hai ki ham Allah se khuaf kare aur sath sath Allah se ummeed bhi rakhe.

Ab aiye dekhte hai ki is hadith par sahaba e karaam ne kaise amal kar ke dikhaya:

Umar r.a. ki wafat ke waqt ka bayan:

Amr bin Maimun r.a. riwayat karte hai, [Umar bin Khattab r.a. Ke wafat ke waqt, jab Umar r.a. zakhmi halat me the] Ek naujawan Umar r.a. ke paas aaya aur kahne laga, Ae Ameer ul Momineen!  Allah taala ki taraf se Ap ko khushkhabri ho. Ap ne RasoolAllah ﷺ ki sohbat uthai. Ibtida mein Islam laane ka Sharf haasil kiya jo ki Ap ko maloom hai. Fir Ap khalifa banaye gaye aur Ap ne poore insaaf se hukoomat kiya, Fir Shahadat payi. 
Ye sun kar Umar r.a. ne farmaya, "(Dekho aesa mat kaho) Mere In Aamaal Ke Wajah Se Qayamat Ke Din Mere Naam e Aamaal Agar Barabar Bhi Ho Gaya To Mere Liye Ye Kafi Hoga."

Sahih al-Bukhari, Kitab Fazail Ashaab an-Nabi ﷺ, Hadith no: 3700.

Rough translation from a summary of a long Hadith. (read full hadith).

SubhanAllah !!! Andaza lagaiye Ameer ul Mominee Umar ibn Khattab r.a. jiske bareme RasoolAllah ﷺ ka farman hai ki mere baad agar koi Nabi hota to wo Umar hota (at-Tirmidhi (3686)), jinke talluq se RasoolAllah ﷺ ne farmaya ki Jis gali se Umar r.a. guzarte hai us gali se shaitan bhag jata hai (Sahih Bukhari 5735). Wo shaks khud kah raha hai ki agar mere aamaal barabar bhi ho jaye to kaafi hai. 

Toh hamara bhi yahi akhlaq hona chaiye ki ham badi se badi neki karne ke baad bhi zameen par hi rahe, aasman me udne na lag jaye. Yahi tarika behtar hai aur isi tarike ki taaleem hame Rasoolallah ﷺ ne diya hai aur isi tarike par sahaba e karaam ne amal kar ke dikhaya hai. Hame bhi chaiye ki ham Allah se Darte rahe aur Usse Ummeed karte rahe lekin kabhi taqabbur ya tassub me na shamil ho ki hamare pas boht ilm hai ya hamare amal boht zyada hai. Toh jaisa ki RasoolAllah ﷺ ne khud wazahat kiya, Ek Musalman ko Allah ke khauf aur Allah se ummeed me zindagi basar karni chaiye, yahi sidha rasta hai. 

Allah hamari maut khauf aur Ummeed ke darmiyan ata kare. aameen.

•٠•●●•٠•

Related: Haq Ka Safar
Read More »