Ek Aasan Azkaar ka Gair-Mamuli Sawaab

Ek baar RasoolAllah ﷺ Umm Hani bint abi talib r.a. (Ali r.a. ki badi bahen) ke paas tashreef laaye toh inhone RasoolAllah se arz kiya,

'Aye Allah ke Rasool, mai budhi ho chuki hu, mujhe aesa wazifa bata de ki mai baith kar padh lu aur mujhe bahut zyada sawab mil jaye'.

Is par Aap ﷺ ne farmaya, 'Tum din bhar me 100 martaba 'SubhanAllah' padh liya karo, ye is tarha hoga ki goya tumne 100 gulaam Allah ki raah me aazaad kar diye.

100 martaba 'Alhamdulillah' padh liya karo, goya tumne 100 ghode Allah ki raah me Jihad ke liye rawana kar diye.

100 martaba 'Allahu akbar' padh liya karo, goya tumne 100 oont (camel) Allah ki raah me qurban kar diye.

100 martaba 'La ilaha illallah' padh liya karo, goya ke tumne zameen aur aasman ke darmiyan muqammal kar diya (yaani zameen aur aasman sawab se bhar diya).'

Sunan Nasai al Kubra, hadees- 10680. (Sahih) (mafhum e hadees)

•٠•●●•٠•

Allah se dua hai ki wo hame amal ki taufeek ata kare.

Read More »

Tasbihat e Fatimah

Ali r.a. se riwayat hai k Fatima r.a. ko chakki peesne se jo zahmat bardasht karni padi is ki wajah se un ke hatho me chaale pad jate the. RasoolAllah ﷺ ke paas jang ke kuch qaidi the. Wo (Fatima) Aap ke paas aayi, lekin Aap ko (ghar me) nah paaya. Ayesha r.a. se mili aur inhe (apni takleef ke bare me) bataya. Jab Nabi ﷺ tashreef laaye toh Aisha r.a. ne aap ko un (fatima r.a.) ke apne paas aane ke bare me bataya toh RasoolAllah ﷺ hamare yaha tashreef laaye. Us waqt hum apne –apne bistaro me ja chuke the, ham khade hone lage toh Nabi sale ﷺ ne farmaya, 'Dono apni apni jagah par raho.'

Aap ham dono ke darmiyan (wali jagah par) baith gaye hatta ke maine aap ke qadam mubarak ki thandak apne seene par mahsoos ki, fir Aap ﷺ ne farmaya, 'kya tum dono ne jo mujh se manga hai mai tumhe is se behtar baat na sikhau? Jab tum dono apne –apne bistaro me jao toh chautis (34) baar 'Allaho akbar' kaho, tentees (33) baar 'Subhan Allah' kaho aur tentees (33) baar 'Alhamdulillah' kaho, yeh (amal) tum dono ke liye ek khadim (mil jaane) se behtar hai.

Sahih Muslim, kitab al zikr wad dua wal tawba wa astagfar ﴾48﴿, hadees- 6915.

•٠•●●•٠•

Related: Namaz ke baad ke azkaar

Read More »

Surat aur Ayat ko Mukhtalif Tarteeb me Tilawat Karna

Alhamdulillah..

Quran majeed me baad wale ko pahle padh liya jaye toh ise Tankees ka naam diya jata hai. Is ke kayi aqsaam hai:

● Tankees al-Huroof (huruf ko ulta padhna)

● Tankees al-Kalimaat (alfaz ko ulta padhna)

● Tankees al-Aayat (ayat ko ulta padhna)

● Tankees al-Suwar (surat ko ulta padhna)

۞ Tankees al-Huroof (huruf ko ulta padhna)

Ek kalima me baad waale huroof ko pahle padh lena, maslan 'rab' ko 'bar' padhna!

Toh is ki hurmat me koi shak nahi aur is ke karne se namaz baatil ho jati hai, is liye ke kalma ko is tareeqe se jis par Allah taala ne kalaam kiya hai nikaal diya gaya hai aur fir is me gaaliban maaene (matlab) me bhi bahut zyada ikhtilaf paida ho jata hai.

Al-Sharh al-Mumti by Ibn Uthaymeen, 3/110.

۞ Tankees al-Kalimaat (alfaz ko ulta padhna)

Iska matlab ke baad wale kalime ko muqaddam kar ke padha jaaye maslan 'qul hu Allaho ahad' ko 'ahad allaho qul' padha jaaye.

Toh yeh bhi bila shak wa shubah haraam hai kyuki ye Quran ko us lehaj se badal deta hai jis lihaj se Allah ne kalaam kiya hai.

(Al-Sharh al-Mumti, 3/110).

۞ Tankees al-Aayat (ayat ko ulta padhna)

Iska matlab ki baad wali aayat ko pahle se muqaddam kar ke parhna, maslan 'min sharril was waasil khannas' ko 'elah  hin-naas se pahle padhna.

Shaykh ibn Uthaymeen ka qawl hai :

Raajhe qawl yahi hai ke ayat ki tankees bhi haraam hai, is liye ke ayat ki tarteeb tawqeefi (jo wahee par mabni ho, na ki ijtihaad par)  hai, aur tawqeefi  ka maaene yeh hai ke yeh tarteeb Nabi ﷺ ke hukum se di gai hai.

(al-Sharh al-Mumti, 3/110)

۞ Tankees al-Suwar (surat ko ulta padhna)

Iska matlab ke baad wali surat ko pahle se muqaddam karke padha jaaye, maslan surah Imran ko surah baqarah se pahle parh li jaaye.

۩ Is ka hukum :

Ahle ilm me se kuch ka kahna hai ke surato ki tarteeb tawqeefi  nahi hai is liye is me koi harj nahi .

Aur kuch ahle ilm ka kahna hai ke surato ki tarteeb tawqeefi hai, ya fir is ki tarteeb me sahaba ka ijma hujjat hai. Is liye ye jaiz nahi.

Sahih raaye:

Sahih raaye yahi hai ke tarteeb tawqeefi nahi balke yeh baaz sahaba karaam ka ijtihad tha, aur yeh ke sahaba karaam ke darmiyan is tarteeb me koi ijma nahi tha, jab ke Abdullah bin Masood r.a. ka mushaf is tarteeb ke khilaaf tha.

Sunnat se iski daleel ye hai:

۩ Huzaifa r.a. bayan karte hai ke Maine ek raat Nabi ﷺ ke sath namaz padhi toh unhone namaz surah baqarah ke sath shuru ki maine khayal kiya ke Aap sao (100) ayat par ruku karenge lekin Aap padhte gaye, maine socha ke Aap use ek rakat me khatam karenge lekin Aap padhte gaye, maine socha ke Aap ab ruku karenge, lekin Aap ne use khatam karne ke baad surah Nisa shuru kar di, (aur) use khatam karne ke baad surah aal e Imran padhi aur use bhi khatam kiya.

Sahih Muslim, kitab salaat al musafireen wa qasar ﴾6﴿, hadees- 1814.

To yeh hadees daleel hai ke Nabi ﷺ ne Surah Nisa ko surah aal e Imran se pahle padha .

۩ Imam Nawawi kahte hai,

'Qaazi Ayyaaz r.h. ka qawl hai ke is hadees me us shakhs ke liye daleel hai jo yeh kahta hai ke mushaf likhne me surato ki tarteeb Musalmano ka ijtihad hai, aur yeh tarteeb Nabi ﷺ ki tarteeb nahi thi balke unhone apne baad use apni ummat ke supurd kar diya.

Yahi Jamhoor Ulema aur Imam Malik r.h. ka qawl hai, Aur Qazi Abu Bakr al Baaqillaani ne bhi yahi qawl ikhtiyar kiya hai, Ibn al-Baaqillaani kahte hai, “Agarche dono raaye mumkin hai lekin yahi qawl behtar hai.

Hamara qawl yeh hai ke na to kitabat me surato ki tarteeb wajib hai aur na hi namaz aur dars aur na hi padhne padhane aur talqeen me, is liye ke is ki tarteeb me Nabi ﷺ se koi khabar nahi milti, aur na hi koi aisi tareef jo ke is ki mukhalifat ko haraam hi karti hai, isi liye mushaf e Usmaan r.a. se pahle mushaf ki tarteeb me ikhtilaaf paya jata tha.

Nabi ﷺ ne apne baad ke ummat ke liye har jagah par ye jawaz chora hai ke namaz aur dars wa tadrees me tarteeb zaruri nahi.

Ahle ilm me se jo yeh kahte hai ke yeh tarteeb Nabi ﷺ se tawqeefi hai jo ke unhone is ko muqarrar kiya tha jaisa ke mushaf e Usman me hai, aur jo dusre mushaf ki tarteeb me ikhtilaaf tha woh is liye tha ke inhe yeh aakhri aur tawqeefi tarteeb pahunchi nahi thi.

Aur Nabi ﷺ ka surah Nisa ko aal e Imran se pahle padhne ki taaweel ki jayegi ke tarteeb aur tawqeef se pahle ki baat hai aur ye dono surate mushaf e Ubayy bin ka'b me isi tarteeb se thi.

Pahli rakat me padhi gai surat se pahle wali surat ko dusri rakat me padhne ke jawaz me koi ikhtilaf nahi, masla sirf yeh hai ke namaz aur namaz se bahar aisa karna makrooh hai.

[Wo mazeed kahte hai,]

'Aur baaz ne ise mubah (jayz) qaraar diya hai.

Quran kareem ko ulta padhne me salaf ne jo manahi ki hai iski taaweel ye hai ke surat ke aakhir se shuru karke surat ki ibtida ki taraf padha jaaye.

Bila shak har surat me ayat ki jo tarteeb aaj mushaf me paayi jati hai woh Allah taala ki taraf se tawqeefi hai, aur Ummat ne isi tarha Nabi ﷺ se ise naqal kiya hai.”'

[Qaazi Ayyaz r.h. ka kalaam khatm hua] Wa Allahu taala aalam.

Sharh Sahih Muslim, 6/61,62.

۩ Shaykh Sindhi kahte hai.

'Raawi ka ye kahna ke (Nabi ﷺ ne aal e Imran shuru kar di) is baat ki daleel hai ke qirat me surato ki tarteeb lazim nahi.'

Sharh al-Nisaai, 3/226.

۞ Anas ibn Malik  r.a. bayan karte hai ke ek Ansari shakhs masjid e Qubaa me imamat karwate the, toh woh jab bhi namaz me koi surat padhte toh usse pahle Qul huwa Allaahu ahad padh kar koi aur surat padhte, aur woh har rakat me isi tarha karte toh unke namaziyo ne unse baat ki ke ap har rakat isi surat ke sath shuru karte aur fir dusri surat padhte hai, Aap ya toh Qul huwa Allaahu ahad padha kare ya phir use chore kar aur koi surat padhe toh inhone jawab diya ke mai ye nahi chor sakta, agar ap chahte hai toh mai imamat karwata hu, aur agar napasand karte ho toh imamat chore deta hu, unke haan woh sab se afzal the aur namazio ko inki imamat achhi lagti thi aur woh yeh napasand karte the ke inke alawa koi aur imamat karwaye.

Jab Nabi ﷺ un ke paash tashreef laaye toh unhone yeh muamla unke saamne pesh kiya, toh Nabi ﷺ farmane lage, 'Aye fula jo kuch tumhe tumhare namazi kahte hai us par amal karne se kaun si cheez rokti hai? Aur tumhe is par kis ne ubhara hai ke tum ye kaam har rakat me karte ho?'

Toh inhone jawab me arz kiya, 'Mai is surat se muhabbat karta hu', Nabi ﷺ farmane lage ke is surat ke sath tumhari muhabbat tumhe jannat me le jayegi.

Sahih al Bukhari, kitab al azaan ﴾10﴿, baab al-jam bayna suratayn fil-rakah ke tahet, muallaq riwayat. Jamia Tirmizi, kitab fazail al Quran ﴾45﴿, hadees- 2901. Sahih (Darussalaam).

Toh is hadees me daleel yeh hai ke woh sahabi har rakat me har surat me Qul huwa Allaahu ahad padhte the jo ke aakhir me hai, is ke baad is se pahle wali koi bhi surat padhte aur Nabi ﷺ ne isko mana nahi farmaya.

۞ Umar bin khattab r.a. ka Amal

۩ Imam Bukhari bayan karte hai:

وَقَرَأَ الأَحْنَفُ بِالْكَهْفِ فِي الأُولَى، وَفِي الثَّانِيَةِ بِيُوسُفَ أَوْ يُونُسَ، وَذَكَرَ أَنَّهُ صَلَّى مَعَ عُمَرَ رَضِيَ اللَّهُ عَنْهُ الصُّبْحَ بِهِمَا-

Ahnaaf ne pahli rakat me surah al kahf aur dusri me surah Yusuf ya Yunus padhi aur farmane lage ke maine Umar r.a. ke sath subah ki namaz padhi thi, unhone aesa hi kiya tha.

Sahih al Bukhari, kitab al azaan ﴾10﴿, baab al-jam bayna suratayn fil-rakah ke tahet, muallaq riwayat.

Wallah taala aalam.

•٠•●●•٠•

Related: Quran Likhne Wala Kaun Hai Aur Ise Jama Kis Tarah Kiya Gaya?

Read More »

Rasoolullah ﷺ ki Teen Duae

Abdullah bin Khabbab bin Al-Aratt apne walid se riwayat karte hai,

RasoolAllah ﷺ ne ek lambi namaz padhi. Unhone kaha, 'Aye Allah ke Rasool Aap ne (aj) is tarha namaz padhi hai jo is se pahle maine kabhi Aap ko ada karte nahi dekha,' Aap ne farmaya:

'Ji ha! Ye Ummeed aur khauf ki namaz thi. Isme maine Allah se teen chize mangi. Usne meri do duae qubul ki gai aur ek dua munhasar kar di gai.

Maine usse manga ki meri ummat kahet (drought) se tabah na ho, usne mujhe ye ata kiya.

Maine usse manga ki meri ummat par, gairo maise, dushmano ko galba hasil na ho, usne mujhe ye ata kiya.

Aur maine usse ye manga ki in me kuch logo ko apas me ek ko dusre se nuksan na sahna pade toh Allah ne meri ye dua munhasar kar di.'

Jamia Tirmizi, kitab al fitan ﴾33﴿, hadees- 2175. Ibne Hibban, hadees- 1830. Imam Tirmizi ne ise hasan sahih gareeb karaar diya hai. Aur Darusslaam ne ise sahih karaar diya hai.

•٠•●●•٠•

Allahumma salle ala Muhammad wa aala aale Muhammad.

Read More »

Quran ki Surat se Muhabbat

Anas ibn Malik  r.a. bayan karte hai ke ek Ansari shakhs masjid e Qubaa me imamat karwate the toh woh jab bhi namaz me koi surat padhte toh usse pahle Qul huwa Allaahu ahad padh kar koi aur surat padhte, aur woh har rakat me isi tarha karte toh unke namaziyo ne unse baat ki ke ap har rakat isi surat ke sath shuru karte aur fir dusri surat padhte hai, Aap ya toh Qul huwa Allaahu ahad padha kare ya phir use chore kar aur koi surat padhe toh inhone jawab diya ke mai ye nahi chor sakta, agar ap chahte hai toh mai imamat karwata hu, aur agar napasand karte ho toh imamat chore deta hu, unke haan woh sab se afzal the aur namazio ko inki imamat achhi lagti thi aur woh yeh napasand karte the ke inke alawa koi aur imamat karwaye.

Jab Nabi ﷺ un ke paash tashreef laaye toh unhone yeh maamla unke saamne pesh kiya, toh Nabi ﷺ farmane lage, 'Aye fula jo kuch tumhe tumhare namazi kahte hai us par amal karne se kaun si cheez rokti hai? Aur tumhe is par kis ne ubhara hai ke tum ye kaam har rakat me karte ho?'

Toh inhone jawab me arz kiya, 'Mai is surat se muhabbat karta hu', Nabi ﷺ farmane lage ke is surat ke sath tumhari muhabbat tumhe jannat me le jayegi.

Sahih al Bukhari, kitab al azaan ﴾10﴿, baab al-jam bayna suratayn fil-rakah ke tahet, muallaq riwayat. Jamia Tirmizi, kitab fazail al Quran ﴾45﴿, hadees- 2901. Sahih (Darussalaam).

•٠•●●•٠•

Read More »

Jaanwar Paalne Ka Hukm

Alhamdulillah..

Hamara Deen jaanwar ko paalne ka hukm deta hai, isme koi harj nahi hai, ba-shart ki jaanwar ke zarurat ke mutabik usko khana aur pani diya jaye.

۩ Anas r.a. kahte hai,

“Nabi ﷺ husn e akhlaq me sab logo se badh kar the, mera ek bhai tha jiska naam Abu Umair tha, mera khayal hai ke uska dudh chhut chuka tha. Aap ﷺ jab tashreef laate toh usse kahte, Aye Abu Umair, Al-Nughair ne kya (kiya)?' Ye ek Bulbul thi jisse wo khela karta tha.”

Sahih al Bukhari, kitab al adab ﴾78﴿, hadees- 6203.

Hafiz ibn Hajar kahte hai,

“Ye (hadees) is chiz ki nishandehi karti hai ki bachho ko parindo (birds) se khelne ki ijazat hai, aur jayz chizo par paise kharch karne ki ijazat hai jisse bachhe lutf utha sake, aur parindo ko pinjdo me rakhne ki ijazat hai aur parindo ke par kaatne ki bhi, kyuki Abu Umair ke paride ke muamle me koi ek surat pesh aayi hogi, aur jo bhi muamla ho, dusra ek hi hukm me ayega.” [alfaz khatm]

Fath al-Baari (10/584).

۞ Lekin sath hi sath in baato ka bhi dhyan rakha jaye:

۩ Jaanwaro me kutta nahi hona chahiye, kyuki RasoolAllah ﷺ ne farmaya hai, “Farishte us ghar me dakhil nahi hote jisme kutte ho”. [Sahih al Bukhari, hadees- 3225]

۩ Parindo ko khareedne me israaf na ho, aksar dekha gaya hai ki log bas competition me parindo ko kafi zyada keemat par khareed lete hai. Allah ﷻ farmate hai,

'Fizool kharch (karne wale) log shaitan ke bhai hai, aur shaitan apne Rabb ka na-shukra hai. [Surah Isra, ayat-27].

۩ Jaanwaro ya parindo ke sath narmi se pesh aaya jaye aur unko unki zarurat ke mutabik khana aur pani diya jaye,

Ibn Umar r.a. riwayat karte hai ki RasoolAllah ﷺ ne farmaya,

“Ek aurat ek billi ke sabab dozakh me gayi, usne billi ko baand kar rakha, na toh use khana diya aur na hi use khula chhora ki woh keede-maqaude kha kar apni jaan bacha leti.”

Sahih al Bukhari, kitab badi al khalq ﴾59﴿, hadees- 3318.

Isi tarha

Abu Hurairah r.a. ne bayan kiya ke Nabi ﷺ ne bayan farmaya,

“Ek kutta ek kuwe (well) ke charo taraf chakkar kaat raha tha jaise pyaas ki shiddat se uski jaan nikal jaane wali ho ke bani israail ki ek zaniyah (prostitute) aurat ne use dekh liya. Us aurat ne apna moza utaar kar kutte ko pani pilaya aur us (aurat) ki magfirat isi amal ki wajah se ho gai.”

Sahih al Bukhari, kitab ahadees an nabi ﴾60﴿,hadees- 3467.

•٠•●●•٠•

Allah se dua hai ki wo hame amal ki taufeek ata kare. aameen.

Read More »

Kaffara ada Karne ke Liye Bachho Ko Khana Khilana

Sawaal

Kasam todne ka kaffara (kafaarat al-yameen) ada karte waqt, kya bachhe, gareeb me shamil honge? Kya kaffara ka khana khilane ke liye kisi khas kism ka khana khilana zaruri hai, ya wo koi bhi khana ho sakta hai?

Jawab:-

Alhamdulillah.

Pahli baat:

Agar wo shaks gareeb hai jiski deeni zimmedari hai bachho ka khyal rakhna, aur bachho ke paas khud ke kharch pure karne ke liye koi daulat nahi hai, tab kaffara ada karne ke liye ye (bachhe) gareeb logo me shumaar kiye ja sakte hai jinko khana khilana hai.

Dusri baat:

Kaffara ke liye jo khana shumaar kiya jayega wo munasib (moderate quality) hona chahiye ki jo shaks kaffara ada kar raha hai wo aam taur par khata ho aur apni family ko khilata ho, jaise khajur, gehu, makai, chawal, wagaira.

Aur Allah ke taraf se hi taaqat hai. Allah apne Rasool, unke aal aur unke sahaba par apni rahmat aur barkat nazil kare. [alfaz khatm]

Fataawa al-Lajnah ad-Daa’imah, 9/219.

•٠•●●•٠•

Read More »

Jannat Itni Sasti Nahi Hai

Allah ﷻ farmate hai,

Ya fir kya tum yeh gumaan kiye baithe ho ke Jannat me yunhi chale jaoge halanke ab tak tum par wo haalaat nahi aaye jo tum se pichle logo par aaye the.

Unpar sakhtiya guzri, museebate aayi, hila maare gaye, hatta ke waqt ka Rasool aur uske saathi ahle eeman cheekh utthey ke Allah ki madad kab aayegi, us waqt unhe tasalli di gayi ke haa Allah ki madad qareeb hai.

Surah Baqarah ﴾2﴿, ayat-214.

Hamare muashre me ek galat fehmi hai ki kyuki ham RasoolAllah ﷺ ke ummati hai, toh hame har haal me baksh diya jayega. Aesa nahi hai jaise hamne gumaan kar liya hai. Aaiye is mauzu ko Islam ke teesre khalifa ki seerat ki roshni me jante hai, Usman e gani r.a. ki seerat ki roshni me.

۩ Hani' (Usman r.a. ke aazaad karda gulam) kahte hai,

“Usman r.a. jab kisi kabristan par thaherte toh itna rote ke Ap ki daadhi bheeg jati, un se kisi ne kaha ke jab Ap ke saamne Jannat o Jahannum ka zikr kiya jata hai toh nahi rote hai aur kabr ko dekh kar is qadar ro rahe hai?

Toh (Usman r.a. ne) kaha ke RasoolAllah ﷺ ne irshad farmaya hai, 'Aakhirat ki manzil me se kabr pahli manzil hai, so agar kisi ne kabr ke aazaab se nijaat paayi toh us ke baad ke marahil aasan honge aur agar jise azaab e qabr se nijaat nah mil saki toh is ke baad ke manazil (muqaam) sakht tar honge'.”

Usmaan r.a. ne mazeed kaha ke RasoolAllah ﷺ ne irshad farmaya, “Ghabrahat aur sakhti ke aitebaar se kabr ki tarha kisi aur manzar ko nahi dekha'.”

Jamia Tirmizi, kitab al Zuhd ﴾36﴿, hadees- 2308. Imam Tirmizi ise Hasan gareeb karaar dete hai.

Toh ye aalam hai Usman r.a. ke Takwe ka jab ki yahi wo sahabi hai jinhe teen baar RasoolAllah ﷺ se Jannat ki basharat mili hai (Bukhari, 2778; Sunan Nasai, 3638, hasan).

SubhanAllah! teen baar Jannat ki basharat milne ke bawujud bhi ek shaks kabr ke aazaab se itna dar raha hai. Aur ham logo ko toh ek baar bhi Jannat ki basharat nahi mili hai, fir bhi hamlogo ne kitni baar Allah ke khauf se apni dadhi tar ki hai ya apne aankh me aasu bhare hai.

Balki hamare muashre me isse ulti surat zarur paayi jati hai ki ham khud ko Jannati firqe me shumar karne lage hai, yaani hamara gumaan ye hai ki ham us groh me se hai jo Jannat me jayegi. Allahu akbar kitna bada daawa hai ye, ek taraf sahabi e Rasool hai jinko teen baar jannat ki bashrat mili hai aur fir bhi wo Allah ke khauf se ro rahe hai aur ek ajkal ke log hai jo bina basharat ke hi apne apko Jannati karaar dete hai. Ye iske alawa kuch nahi ki shaitan ne aese logo ko dhoke me daal rakha hai. Allama Iqbal kahte hai,

“Yeh Shahadat Gahe Ulfat Me Qadam Rakhna Hai..  

Log Aasaan Samjhte Hai Musalman Hona!”

Ham dua karte hai ki Allah hamare gunaho ko darguzar kare aur hame apni rahmat ke saaye me jagah ata kare.

•٠•●●•٠•

Read More »

Ek Khushbu Bechne wala Aur Ek Lohaar

en  -

Abu Musa r.a. riwayat karte hai ki RasoolAllah ﷺ ne farmaya, 

'Nek saathi (companion) aur bure saathi ki misaal Mushk (khushbu) bechne wale aur Lohaar jaisi hai. Mushk bechne wale ke paas se tum do achhaiyo me se ek na ek zarur pa loge, ya toh mushk hi khareed loge warna kam az kam is ki khusbhoo toh zarur hi pa sakoge.

Lekin lohaar ki bhatti ya tumahre badan aur kapre ko jhalsa degi warna badbu toh isse tum zarur pa loge.'

Sahih al Bukhari, kitab al buyu ﴾34﴿, hadith- 2101.

•٠•●●•٠•

Read More »

Amal Ka Faisla Khaatme Par Hai

Allah ﷻ farmate hai,

Eeman laane walo ko Allah ek qawl-e-sabit ki buniyad par duniya aur aakhirat, dono mein sabaat (steadfast) ata karta hai, aur zaalimo ko Allah bhatka deta hai.

Surah Ibrahim ﴾14﴿, ayat-27.

۩ Sahl bin Sad r.a. riwayat karte hai, Ek shakhs jo Musalmano ki taraf se badi bahaduri se (jang me) lad raha tha aur us ghazwe me Nabi kareem ﷺ bhi maujud the. Nabi ﷺ ne dekha aur farmaya ke jo kisi jahanami shakhs ko dekhna chahta hai woh is shakhs ko dekh le, chunanche woh shakhs jab isi tarha ladne me masruf tha aur mushrikeen ko apni bahaduri ki wajah se sakht tar takaleef me mubtala kar raha tha to ek musalman us ke peeche peeche chala, aakhir woh shakhs zakhmi ho gaya aur jaldi se mar jana chaha, is liye is ne apni talwaar ki dhaar apne seene par laga li aur talwar is ke kandho (shoulders) ko paar karti hui nikal gayi.

Is ke baad picha karne wala shakhs Nabi ﷺ ki khidmat me daudta hua haazir hua aur arz kiya, 'Mai gawahi deta hu ke Aap Allah ke Rasool hain. Nabi ﷺ ne farmaya ke baat kya hai? Unhone kaha ke Aap ne fulan shakhs ke baare me farmaya tha ke jo kisi jahannami ko dekhna chahta hai woh is shakhs ko dekh le halanki woh shakhs Musalmano ki taraf se badi bahaduri se lad raha tha. Mai samjha ke woh is haalat mein nahi marega. Lekin jab woh zakhmi ho gaya to jaldi se mar jaane ki khwahish mein is ne khudkushi kar li.

Nabi ﷺ ne farmaya ke bandah Dozakhiyo sa kaam karta rahta hai halanki woh jannati hota hai (isi tarhan dusra bandah) Jannatiyo ke kaam karta rahta hai halanke woh dozakhi hota hai, bilashuba amalo ka faisla (aetebar) khaatme par hai.

Sahih al Bukhari, kitab al Qadr ﴾82﴿, hadith- 6607.

۩ Anas r.a. se marwi hai ke Nabi ﷺ ne farmaya, “Kisi shakhs par us waqt tak taajjub na kiya karo, jab tak ye na dekh lo ke us ka khaatma kis amal par ho raha hai? Kyunke baaz auqaat ek shakhs saari zindagi ya ek taweel arsa tak apne nek aamaal par guzaar deta hai ke agar isi haal me faut ho jaye to jannat me dakhil ho jaye lekin fir us me tabdeeli paida hoti hai aur woh gunaho mein mubtala ho jata hai, isi tarha ek aadmi ek taweel arse tak aise gunaho me mubtala rahta hai ke agar isi haal me mar jaye toh jahannam me daakhil ho, lekin fir us me tabdeeli paida ho jati hai aur woh nek aamaal me masruf ho jata hai. Aur Allah taala jab kisi bande ke sath khair ka iradah farmata hai toh use us ki maut se pahle istemal farmata hai.”

Sahaba r.a. ne pucha ke kaise istemaal farmate hai? Nabi ﷺ ne farmaya, 'Use marne se pahle saaleh amal ki taufeek ata farma dete hai. Fir is ki rooh qabz karte hai.'”

Musnad Imam Ahmad, jild-5, hadith- 1208. Is hadees ko Shaykh Shuaib Arnot ne saheeh karaar diya hai.

۩ Ibn Rajab kahte hai,

“Jo alfaz logo ko zahir hote hai is baat ki nishandehi karti hai ki logo ko jo chiz chupi hoti hai wo isse alag ho sakti hai jo logo ko zahir hoti hai, aur ye ki ek bura khaatma isliye hota hai kyuki ek shaks ke andar ek chupa masala (problem) hota hai jisse log aagah nahi hote hai, chahe ye bure aamaal ho aur iske tarah, taaki chupi hui khubi usko maut pe ek bure khaatme tak le ja sakti hai.

Isi tarha, ek shaks jahannamiyo ke tarha amal karta hai, lekin andar hi andar uske pas kuch achhi khubi hai, aur wo uske zindagi ke aakhir me galib ho jati hai, aur usko ek achhe khaatme ke taraf le jaati hai.

Abd al-‘Azeez ibn Abi Rawaad ne kaha tha, 'Ek aadmi marne ki halat me tha aur use Laa ilaaha ill-Allaah kahne ko kaha jaa raha tha, lekin aakhri alfaz jo usne kaha wo ye tha ki 'Jo ap kah rahe hai wo is par yakeen nahi rakhta (khud ko batate hue)', aur fir uski maut waise hi ho gai!'

Unhone kaha: Maine us shaks ke bareme pucha, aur paya ki wo sharaab ka aadi (addicted) tha!

Abd al Azeez kaha karte the: Gunaho se aagah raho kyuki ye gunahe hi hai jo use bure khaatme tak le gaye.

Aam taur par, logo ka khaatma kaise hoga ye uska anjaam hota hai jo pahle guzar chuka hai, aur ye pahle hi kitab me likha hai, lihaza salaf bure khaatme se boht zyada darte the, aur un maise kuch apne pichle gunah ko yaad kar ke pareshan ho jate the.

Ye kaha jata tha ki nek logo ka dil is fikr me hota hai ki unki zindagi kaise khatam hogi, aur wo hamesha socha karte hai ki hamara khaatma kaise hoga?

Jo Allah se nazdeek hai unke dil pichle gunaho par fikarmand hote hai, aur kahte hai: Hamare khaatme par hamare gunaho ka kya asar padega? Sahl al-Tastari kahte hai: Jisne Allah ke taraf apna safar shuru kar diya hai wo darta hai ki wo kahi gunah na kar baithe aur jo Allah se nazdeek hote hai wo darte hai ki kahi wo unka khaatma kufr par na ho.

Lihaza sahaba aur nek salaf jo unke baad aaye wo darte the ki kahi wo munafiq na ho jaye, aur unka dar aur fikr kaafi zyada tha.  Toh ek eemaan wala, khud ke liye, kam darje ki munafiqat se (bhi) darta hai, aur fikrmand hota hai ki kahi ye unki zindagi ke khaatme par galib na aajaye, aur use bade darje ke munafiqat ke taraf le jaaye, jaise ki ye upar bayan hua hai ki chupa masala (problem) ek bure khaatme ke taraf le ja sakta hai.” end quote.

Jaami al Uloom wa’l-Hukam (1/57-58).

Is mauzu se mutallik ek sahabi e Rasool ka waqya:

۩ Ibn Shamasa Mahri r.h. (Tabayeen) se riwayat hai, unhone kaha, “Ham Amr b. al-As r.a. ke paas hazir hue, woh wafat paane ki halat me the, wo kafi der tak rote rahe aur apna chehra deewar ki taraf fer liya. Unka beta kahne laga: Abba jaan! Kya RasoolAllah ne ap ko fulan cheez ki basharat nahi di thi? Kya fulan baat ki basharat na di thi?

Unhone hamari taraf rukh kiya aur kaha, ham (sahaba, basharat se bhi badh kar) sabse afzal amal لا إله إلا الله محمد رسول الله ki gawahi dene ko khayal karte the.

Mai (apni zindagi me) teen marhalo se guzra hu. (Pahla yeh ke) Maine apne ap ko is haalat me paaya ke RasoolAllah ﷺ ke sath mujhse zyada bughz kisi ko na tha aur na is ki nisbat koi aur baat zyada pasand thi ke mai Aap par qabu paa kar Aap ko qatal kar du.
Agar mai is haalat me mar jata to yaqeenan dozakhi hota.

(Dusre marhala me) Jab Allah taala ne mere dil me Islam ki muhabbat paida kar di to mai Nabi ﷺ ki khidmat me haazir hua aur arz kiya, apna daaya haath badhaye taakeh mai Aap ki bait karu, Aap ne daaya hath badhaya toh maine apna haath (peeche) khech liya. Aap ﷺ ne farmaya, Aye Amr! tumhe kya hua hai? Mai ne arz kiya, Mai ek shart rakhna chahta hu. Unhone (Rasool ﷺ) farmaya, 'Kya shart rakhna chahte ho?' Maine arz kiya, 'Yeh (shart) ke mujhe maafi mil jaye.' Aap ﷺ ne farmaya: Amr! Kya tumhe malum nahi ke Islam un tamam gunaho ko mita deta hai jo isse pahle ke the aur Hijrat un tamam gunaaho ko mita deti hai jo is (hijrat) se pahle kiye gaye the aur Hajj un sab gunaaho ko mita deta hai jo is se pahle ke the.
Us waqt mujhe RasoolAllah ﷺ se zyada mahbub koi na tha aur na Aap ﷺ se badh kar meri nazar me kisi ki azmat thi, mai Aap ki azmat ki bina par aankh bhar kar Aap ko dekh bhi nah sakta tha aur agar mujh se Aap ﷺ ka huliya pucha jaye to mai bata na sakunga kyunke mai Aap ko aankhh bhar kar dekhta hi na tha aur agar mai us haalat me mar jata toh mujhe ummeed hai ke mai jannati hota.

Fir (teesra marhala yeh aaya) ham kuch chizo ke liye zimmedar the, mai nahi jaanta ki mai un me kaisa raha hu (yaani sahih ya galat).

(Aye mere bete) Jab mai mar jaau to koi noha karne wali mere sath na jaye, na hi aag sath ho aur jab tum mujhe dafan kar chuko to mujh par aahista aahista matti daalna, fir meri qabr ke gird itni der (dua karte hue) thaherna, jitni der me oont (camel) zibah kar ke is ka gosht taqseem kiya ja sakta hai taake mai tumhare wajah se (apni nayi manzil ke sath) manoos ho jau aur dekh lu ke mein apne Rab ke farishto ko kya jawab deta hu.

Sahih Muslim, kitab al eemaan ﴾1﴿, hadith- 321.

•٠•●●•٠•

Allah hame us haal me maut de jab Aap hamse raazi ho. aameen

Read More »

Surah Baqara Ki Aakhri Do (2) Ayat Aur Iski Fazilat

hi   -

Allah ﷻ farmate hai,

۞ Rasool eemaan laaye us cheez par jo unki taraf Allah ki jaanib se utri aur momin bhi eemaan laaye, ye sab Allah aur us ke farishto par aur us ki kitabo par aur us ke Rasoolo par eemaan laaye, us ke Rasoolo maise kisi me hum farq nahi karte, unhone kah diya ke hum ne suna aur itaat ki, hum teri bakshish talab karte hai, aye hamare Rab! Aur hame teri hi taraf lautna hai.

Allah kisi shaks par uski quwat se zyada bojh nahi dalta, jo neki wo kare wo us ke liye aur jo burayi wo kare wo us par hai, aye hamare Rab! Agar hum bhul gaye ho ya khata ki ho, to hame na pakadna, aye hamare rab! Ham par wo bojh na daal jo ham se pahle logo par daala tha, aye hamare Rab! Hum par wo bojh na daal jis ki hame taakat na ho aur ham se darguzar farma! Aur hame baksh de aur hum par raham kar! Tu hi hamara Maalik hai, hame kafiro ki qaum par ghalba ata farma.

Surah Baqara, ayat- 284-285. [arabic text padhe]

۩ Abdullah bin Umar r.a. riwayat karte hai ki RasoolAllah ﷺ ko (Meraj wali raat) teen chize di gayi thi, unhe paanch namaze di gai thi, Surah Baqara ki Ikhtitami (akhri) ayate di gai thi, aur unki ummat ke unlogo ko sangeen gunaho ki maafi di gai thi jo Allah ke sath kisi ko shareek nahi karte.

Sahih Muslim, kitab al eemaan ﴾1﴿, hadith- 173.

۩ RasoolAllah ﷺ ne farmaya, “Jisne surah baqara ki do (2) aakhri ayat raat me padh li wo use (har aafat se bachane ke liye) kafi ho jayegi.”

Sahih al Bukhari, kitab fazail al Quran ﴾66﴿, hadith- 5009.

۩ Ibn Qayyim kahte hai,

“Wo (ayate) usko kisi bhi burai ke khilaf kaafi kar degi jo use nuksan pohcha sakti hai.”

Al-Waabil al-Sayyib (132).

•٠•●●•٠•

Read More »

Islam Me Rasm-riwaj (Culture) Ka Muqam

hi  -

Alhamdulillah..

Bunyadi usool ye hai ki Islam me kisi bhi tarha ke rasm riwaj ki ijazat hai aur tab tak ijazat hai jab tak wo shairat ke kisi ahkaam se takraaye na.

۩ Anas r.a. riwayat karte hai ke jab Nabi ﷺ ne Room ke hukumaran ko khat likhne ka iradah kiya to Aap ﷺ se kaha gaya ke woh log koi khat us waqt tak qubool nahi karte jab tak us par mohar na ho, chunancha Nabi ﷺ ne ek chandi ki anguthi banwayi. Is anguthi par 'Mohammad-RasoolAllah' khudra hua (stamped) tha.

Sahih al Bukhari, kitab al Jihad ﴾56﴿, hadith- 2938.

۩ حَدَّثَنَا قُتَيْبَةُ حَدَّثَنَا أَبُو عَوَانَةَ، عَنْ أَبِي بِشْرٍ، عَنْ نَافِعٍ، عَنِ ابْنِ عُمَرَ، أَنَّ النَّبِيَّ صلى الله عليه وسلم اتَّخَذَ خَاتَمًا مِنْ فِضَّةٍ، فَكَانَ يَخْتِمُ بِهِ وَلا يَلْبَسُهُ

۩ Ibn Umar r.a. farmate hai ki RasoolAllah ﷺ ke paas ek chandi ki anguthi thi, wo isse khutut (letters) wagaira par muhar lagate the lekin ise pahente nahi the.

Imam Tirmizi ki Shamail Muhammadiyah, baab- RasoolAllah ﷺ ki mubarak anguthi, hadith- 83.

Bukhari ki is hadith se hamare ahle ilm ye natija nikalte hai ki kisi bhi rasm-riwaj ki pairwi karne ki ijazat hai kyuki RasoolAllah ﷺ ne dusre mulk ke mohar lagane wale rasm ko be-jhijhak apnaya tha. Aur kisi rasm-riwaj ki ijazat tab tak hi hai jab tak wo rasm shariat ke kisi ahkaam se na takraaye.

۩ Shaykh al-Sa’di [d.1376 a.h.] farmate hai:

“Rasm-riwaj ka bunyadi usool ye hai ki iski ijazat hai, jab tak ke kisi shariyat [ke ahkaam] me isko mana na kiya ho [yaani shariat ke kisi ahkaam se takraaye na].”

Risaalah fi Usool al-Fiqh (7).

۩ Shaykh ibn Uthaymeen se pucha gaya gaya, "Namaz eid ke baad musafah karne, gale milne aur mubarakbaad dene ka kya hukm hai?"

Toh Shaykh ka jawab tha:

"In chizo me koi harj nahi hai, kyuki log use bataur Ibadat aur Allah taala ka qurb samajh kar nahi karte hai, balki log ye bataur riwaaj (custom) aur izzat o ikraam aur ehtram karte hai, aur jab tak shariyat me kisi rasm-riwaj ki mumaniyat (manaahi) na aaye to bunyadi usool ye hai ki us chiz ki ijazat hoti hai."

Majmoo’ Fataawa Ibn ‘Uthaymeen, 16/208-210.

۞ Rasm e Shady/Nikah Ka Hukm:

Agar shady ki rasm-riwaj ki baat kare toh har ilake ki shady apne rasm-riwaj ke aetbar se kari jati hai. Islam ne isme koi pabandi nahi rakhi hai, aur isme bhi wahi usool ko dhyan me rakh kar rasm ki pairwi karne ki ijazat hai ki jis rasm ki pairwi ho rahi ho, wo shariyat se takraati na ho, jaise gair-mahram ka apas me milna julna ya haraam mausiqi (music) ka istemal karna wagaira. Misaal ke taur par mehdi ki rasm jo hamare muashre me hoti hai, isme koi harj nahi hai jab tak mehdi ke rasm ke dauran koi sharait ke khilaf kaam na ho, aur isi tarha dusre rasm ka bhi yahi hukm hai.

•٠•●●•٠•

Related: 

۩ Culture aur biddat me fark
۩ Shady ke mauke par gaane ka hukm

Read More »

Us Shaks Ki Tawba Jisne 99 Aur 1 Katl Kiye

   en     ur     hi -

Abu Sa'id al-Khudri r.a. riwayat karte hai ke Nabi ﷺ ne farmaya: “Tum se pahle logo me se ek (1) shakhs tha, Us ne ninanwe (99) qatal kiye, fir is ne zameen par basne walon mai se sab se bade aalimo ke baare mein pucha (ke woh kaun hai). Use ek (1) Rahib (monk) ka pata bataya gaya. Woh us ke paas aaya aur pucha ke maine ninanwe (99) qatal kiye hain, kya uske liye Tawba (ki koi gunzaish) hai? Us (rahib) ne kaha, 'Nahi'. Toh us ne use bhi qatal kar diya aur is (ke qatal) se sao (100) qatal pure kar liye.

Us ne fir ahle zameen me se sab se bade aalim ke baare me daryaft kiya. Use ek aalim ka pata bataya gaya. Toh is ne (ja kar usse) kaha, 'Mai ne sau (100) qatal kiye hain, kya is ke liye tauba (ka imkaan) hai? Us (aalim) ne kaha: 'Haan', tumhare aur tawba ke darmiyan kaun aa sakta hai? Tum fulaa fulaa sar-zameen par chale jao, wahan (aise) log hain jo Allah taala ki ibadat karte hain, tum bhi un ke sath Allah ki ibadat mein mashgool ho jao aur apni sar-zameen par wapis na aao, yeh buri (baton se bhari hui) sar-zameen hai.

Woh chal pada, yahan tak ke jab aadha rasta taye kar liya to use maut aa gai. Is shaks ke baare mein rahmat ke farishtay aur aazaab ke farishte jhagadne lage. Rahmat ke farishto ne kaha, Yeh shakhs tawba karte hua apne dil ko Allah ki taraf mutwajjah (mod) kar ke aaya tha aur aazaab ke firshton ne kaha, is ne kabhi neki ka koi kaam nahi kiya. Toh ek farishta aadmi ke roop me un ke paas aaya, un (farishto) ne use apne darmiyan (faisla karne wala) muqarrar kar liya. Us (farishte) ne kaha, Dono zameeno ke darmiyan faasla naap lo, woh dono me se jis zameen ke zyada qareeb ho toh woh usi (zameen ke logon) maise hoga. Unhone faasle ko naapa toh use us zameen ke qareeb tar paaya jis ki taraf woh ja raha tha, chunanche rahmat ke firshton ne use apne hatho me le liya.”

Hasan (basri) ne kaha: (Is hadees me) hame bataya gaya ke jab use maut ne aa liya tha to isne apne seene se reng kar khud ko (gunaaho bhari zameen se) dur kar liya tha.

Sahih Muslim, Kitab al Tawba ﴾50﴿, hadith- 7008.

•٠•●●•٠•

Aye Allah ham apne gunaho se tawba karte hai, hame muaf farma dein. aameen.

Read More »

Choti Nekiyo Ko Kam Aham Ka Na Samjho

en  -

Allah ﷻ farmate hai:

۩ Ham ne har insan ki buraee bhalaee ko uske gale laga diya hai aur baroz e qayamat ham us ke samne us ka naam-e-aemaal nikalenge jisse woh apne upper khula hua paa le ga.

(Aur unse kaha jayega) Lo! Khud hi apni kitab padh lo. Aaj toh tum apna khud hisab lene ko kafi hai.

Surah Isra ﴾17﴿: Ayat No 13-14.

۩ Aur kitab e aamaal rakh di jayegi, pas Aap mujrimon ko dekhenge ke woh is se darne wale honge jo is me hoga aur kahenge ke Haye! hamari kambakhti! Yeh kitab kaisi hai jisne chhota-bada kuch bhi nahi choda magar usko shumar kar rakha hai aur jo bhi unhone kiya tha woh sab is ko samne payenge aur apka Rab kisi ek par (bhi) zulm nahi karta.

Surah Kahf ﴾18﴿ Ayat No 49.

۞ Adi bin Hatim r.a. riwayat karte hai ki RasoolAllah ﷺ ne farmaya,

“Apne ap ko jahannam ke aag se bachao wo kyu na aadhi khajur hi dekar ho aur agar wo bhi nai ho sakta to achhi baat karke.”

Sahih al Bukhari, kitabul zakaat ﴾24﴿, hadith-1417.

۞ Abu Zarr r.a. riwayat karte hai ki Rasool ﷺ ne farmaya ki kisi bhi neki ko kam aham ka na samjho chahe yahi ho ki tum apne bhai ko muskurate hue chehre se milo. 

Sahih Muslim, kitab al birr was silati wal aadaab ﴾45﴿, hadith- 6690.

۞ Huzaifa r.a. se riwayat hai ki RasoolAllah ﷺ ne farmaya,

“Gujishta ummaton ke kisi shaksh ki rooh ke paas farishte aaaye aur pucha ki tune kuch achhey kaam bhi kiye hain? Rooh ne jawab diya ki main apne naukaro se kaha karta tha ki wo maaldaar logo ko (jo unke karzdaar hai) mohlat de diya kare aur un par sakhti na kare aur mohtaajon (ka karz) muaf kar diya karein.

Fir farishton ne bhi us se darguzar ki aur sakhti nahi ki.”

Sahih al Bukhari, kitab al buyu ﴾34﴿, hadith- 2077.

۞ Abu Hurairah r.a. riwayat karte hai ki RasoolAllah ﷺ ne farmaya:

“Ek fahashah aurat sirf is wajah se baksh di gayi ke wo ek kutte ke qareeb se guzar rahi thi, jo ek quwe ke qareeb khada pyasa bhanp raha tha. Aisa malum hota tha ke wo pyas ke shiddat se abhi mar jayega. Us aurat ne apna mojah nikala aur usme apna dupatta bandh kar pani nikala aur us kutte ko pila diya, to iski bakshish us (neki) ke wajah se ho gayi.”

Sahih Bukhari, kitab bada al khalq ﴾59﴿, hadith- 3321.

۞ Abu Hurairah r.a. riwayat karte hai ki RasoolAllah ﷺ ne farmaya,

“Ek shaks raaste ke upar padi hui darakht ki ek shaakh ke paas se guzra toh usne kaha, 'Allah ki kasam mai is shaakh ko musalmano ke raaste se hata dunga taakeh ye un ko nuksan na de toh us shaks ko Jannat me dakhil kar diya gaya.”

Sahih Muslim, kitab al birr was silati wal aadaab ﴾45﴿, hadees- 6670.

۩ Ibn Abd al-Barr r.h. kahte hai:

ﻭَﻟَﺎ ﻳَﻨْﺒَﻐِﻲ ﻟِﻠْﻌَﺎﻗِﻞِ ﺍﻟْﻤُﺆْﻣِﻦِ ﺃَﻥْ ﻳَﺤْﺘَﻘِﺮَ ﺷَﻴْﺌًﺎ ﻣِﻦْ ﺃَﻋْﻤَﺎﻝِ ﺍﻟْﺒِﺮِّ ﻓَﺮُﺑَّﻤَﺎ ﻏُﻔِﺮَ ﻟَﻪُ ﺑِﺄَﻗَﻠِّﻬَﺎ-

“Ek aqalmand momin wo hai jo kisi bhi amal ko chota (ya kam aham ka) na samjhe. Kabhi kadaar, ek chote amal ke wajah se uski magfirat kar di jati hai.”

At Tamheed 22/12.

•٠•●●•٠•

Read More »

Islam Me Insaaf Hai

  hi     en  -

Allah ﷻ farmate hai,

“.. Jab koi baat kaho toh insaf se kaam lo, chahe muamla apne qareebi rishtedaar hi ka ho.”

Suran Anaam, ayat-152.

Dusri jagah Allah ﷻ farmate hai,

“Aye eeman walo! Adal-o-insaf par mazbuti se jam jane wale aur khushnoodi-e-maula ke liye sachhi gawahi dene wale ban jao goh woh khud tumhare apne khilaf ho ya apne maa-baap ke ya rishtedaar ke. Wo shaks chahe ameer ho ya gareeb ho, dono ke sath Allah ko zyada talluq hai. Is liye tum khwahish-e-nafs ki pairwi mat karo ki haq se hat jao, aur agar tum baatein banaoge ya muh fer loge toh jo kuch tum kar rahe ho Allah usse ba-khabar hai.”

Surah Nisa, ayat-135.

Allah ﷻ ek aur jagah farmate hai,

“Aye eeman walo! Allah ki raza ke liye Adl wa insaaf ke sath dat kar gawahi dene wala bano. Aur logo ki nafrat, tumhe is baat par na ubhare ke tum adl wa insaaf ke sath kaam na lo. Insaaf karo yahi baat taqwe ke zyada kareeb hai aur Allah se darte raho, beshak Allah tumhare aamaal ki puri khabar rakhta hai.”

Surah Maida, ayat-8.

Ayesha r.a. riwayat karti hai ke Makhzumi khatoon jinhone (gazwah fatah ke mauka par) chori kar li thi, is ke mua'amle ne quraish ko fikr me daal diya. unho ne aapas me mashwara kiya ke is mua'amle par Aa Hazrat ﷺ se guftagu kaun kare! Aakhir yeh taye hua ke Usama bin Zaid r.a. Aap ﷺ ko bahut azeez hai. Un ke siwa aur koi is ki himmat nahi kar sakta. Chunanche Usama r.a ne Aa Hazrat ﷺ se is bare me kuch kaha to Aap ﷺ ne farmaya, “Aye Usama! Kya tum Allah ki hudood maise ek had ke bare me mujh se sifarish karte ho?”
Fir Aap ﷺ khade hue aur khutba diya (jis me) Aap ne farmaya: “Pichli bohut si ummate is liye halaak ho gayi ke jab un ka koi aala aadmi chori karta toh use chhod dete aur agar koi gareeb chori karta toh us par Allah ki saza daal dete aur Allah ki qasam! Agar Muhammad ki beti Fatima (RasoolAllah ki beti) bhi chori kare to mai is ka bhi haath kaat dalu.”

Sahih al Bukhari, book of Prophets (60), hadith - 3475.

•٠•●●•٠•

Read More »

Gumrah Ulema

en  -

Jaha par Quran aur sahih hadees me Ulema e haq ki taareefe ayi hai, wahi par Quran aur sahih hadees me gumrah ulema se RasoolAllah ﷺ ne aagah bhi kiya hai:

۩ Abu Zarr r.a. ne kaha, Mai ek din RasoolAllah ﷺ ke sath tha aur maine unse ye baat suni, “Mai apni Ummat ke liye Dajjal se zyada ek chiz se darta hu”.

(Raawi kahte hai) Mai ye sun kar dar gaya toh maine pucha: 'Aye Allah ke Rasool ﷺ wo kaun si cheez hai'?

RasoolAllah ﷺ ne is par farmaya, “Gumrah Ulema”.

Musnad Imam Ahmad, hadith - 21334 aur 21335. Shaykh Shuayb Arna'ut ne ise Musnad Imam Ahmad ki tahkeek me Sahih li gayrihi karaar diya hai.

۩ Saubaan r.a. riwayat karte hai ki RasoolAllah ﷺ ne farmaya, “Mai apni Ummat ke liye sirf Gumrah Aimmah se darta hu.”

Raawi kahte hai ki RasoolAllah ﷺ ne kaha, 'Meri Ummat se ek Jamaat hamesha haq par rahegi aur unko chorne wale unka kuch nuksan nahi pohcha sakenge jab tak ke Allah ka hukm na aajaye.'

Sunan Tirmizi, Kitab al Fitan (33), hadith - 2229. Ise Shaykh Zubair ali zai ne sahih karar diya hai.

•٠•●●•٠•

Allah se dua hai ki wo hame gumrah ulema se mahfuz rakhe. aameen.

Read More »

Namaaz e Janaza Padhne Ka Step by Step Tariqa

Pdf   -

۩1. Wuzu karein. [1]

۩2. Shara'at e Namaz puri karein. [2]

۩3. Qibla rukh khade ho jayein. [3] 

۩4. Takbeer (Allahu Akbar) kahein. [4]

۩5. Takbeer ke sath rafa yadain karein. [5]

۩6. Apna daayan hath apni bayein ziraa' par rakhein. [6]

۩7. Daayan hath bayein hath par, seene par rakhein. [7]

۩8. Ye Padhe [8]

أعوذ بالله السميع العليم من الشيطان الرجيم من همزه ونفخه ونفثه

A’oodhu Billaah il-samee’ il-‘aleem min al-Shaytaan ir-rajeem min hamzihi wa nafkhihi wa nafsihi.

۩9. Ye Padhe: [9]

بِسْمِ اللهِ الرَّحْمٰنِ الرَّحِيْمِ

Bismillah Hir Rahman Nir Raheem.

Upar zikr karda amal ke Dalail: [click]

•٠•●●•٠•

۩10. Surah e Fatiha padhein. [1]

۩11. Aameen kahein. [2]

۩12. Bismillah Hir Rahman Nir Raheem padhe. [3]

۩13. Ek surat padhe. [4]

۩14. Fir Takbeer kahe aur rafayadain karein. [5]

۩15. Nabi ﷺ par Durud padhe. [6] maslan:

اللهمَّ صلِّ على محمَّد وعلى آل محمَّد، كما صليتَ على إبراهيم وعلى آل إبراهيم؛ إنَّك حميدٌ مجيد. اللهمَّ بارِك على محمَّد وعلى آل محمَّد، كما باركتَ على إبراهيم وعلى آل إبراهيم؛ إنَّك حميدٌ مجيد-

Allaahumma salli ‘ala Muhammad wa ‘ala aali Muhammad kama salayta ‘ala Ibraaheem wa ‘ala aali Ibraaheem, innaka hameedun majeed. Allaahumma baarik ‘ala Muhammad wa ‘ala aali Muhammad kama baarakta ‘ala Ibraaheem wa ‘ala aali Ibraaheem, innaka hameedun majeed. [7]

۩16. Takbeer kahe [8] aur rafayadain karein [9]

Upar zikr karda amal ke Dalail: [click]

•٠•●●•٠•

۩17. Mayyat ke liye khalis taur par dua karein. [1]

Chand masnoon duaein ye hai:

[next page]

۩18. Mayyat par koi dua e muaqqat (khas taur par muqarrar shuda) nahi hai. [4]

Lehaza jo bhi sabit shuda dua karlein jaiz hai.

Sayyadana Abdullah bin Salaam r.a. ke qaul aur Tabayeen ke aqwaal se malum hota hai ke mayyat par kayi duayein jama ki ja sakti hain.

۩19. Fir takbeer kahein. [5]

۩20. Fir dayi (right) taraf salaam fer de. [6]

Upar zikr karda amal ke Dalail: [click]

-Taken from an article of Shaykh Zubair Ali Zai [download (urdu, pdf)]

•٠•●●•٠•

Related:

۩ Download this article in pdf (roman)
۩ Namaz e janaza padhne ka tafseeli tareeka

Read More »

Sahaba e Karaam - Ek Chaand Ke Tamaam Sitare

Allah ‎ﷻ farmate hai

وَ السّٰبِقُوۡنَ الۡاَوَّلُوۡنَ مِنَ الۡمُہٰجِرِیۡنَ وَ الۡاَنۡصَارِ وَ الَّذِیۡنَ اتَّبَعُوۡہُمۡ بِاِحۡسَانٍ ۙ رَّضِیَ اللّٰہُ عَنۡہُمۡ وَ رَضُوۡا عَنۡہُ وَ اَعَدَّ لَہُمۡ جَنّٰتٍ تَجۡرِیۡ تَحۡتَہَا الۡاَنۡہٰرُ خٰلِدِیۡنَ فِیۡہَاۤ اَبَدًا ؕ ذٰلِکَ الۡفَوۡزُ الۡعَظِیۡمُ

Aur jo Muhajireen aur Ansaar sabiq aur muqaddam hai aur jitne log ikhlaas ke sath unke pairo hai Allah un sab se raazi hua aur woh sab usse raazi hue aur Allah ne un ke liye aise baagh mohayya kar rakhe hai jin ke neeche nahren jaari hongi jin mein hamesha rahenge, yeh badi qamyabi hai.

Surah Tawba, ayat-100.

Sahaba e karaam wo jamaat hai jinki shakshiyat ko dekh kar ek insan ke dil o dimag dang rah jate hai. Aaiye unki majlis me chalte hai aur unke dang kar dene waale waqyat par gaur karte hai.

۞ Abu Sa’eed al Khudri r.a. riwayat karte hai, "Muwaiya r.a. (ek baar) masjid me aye aur (waha baithe logo se) kaha. Ap log kis wajah se yaha baithe hai? Sahaba e karaam ne farmaya: Ham is liye yaha baithe hai taaki ham Allah ko yaad kar sake. 

Muawiya r.a. ne kaha, "Kya Wallah ap log sirf isi liye baithe hai?"

Unlogo ne kaha, "Wallah ham log sirf isi liye baithe hai.

Muawiya r.a. ne kaha, "Maine ap par kisi tohmat ki wajah se qasam nahi di aur RasoolAllaah ﷺ ke samne meri haisiyat ka koi shakhs aisa nahi jo hadees bayan karne mein mujhse kam ho, (iske ba-wujood apne yaqeeni ilm ki bina par mein tumhare samne yeh hadees bayan kar raha hu ke).

Asal me RasoolAllaah ﷺ bhi ek bar nikal kar apne saathiyo ke ek halqe ke qareeb tashreef laye aur farmaya: "Tum kis garz se baitthe ho?" Unhone kaha: Ham baithe hue Allaah ka zikr kar rahe hain aur is baat par us ki hamd kar rahe hain ke usne Islam ki taraf hamari rahnumayi ki, iske zariye se hum par ehsaan kiya. Aap ﷺ me farmaya: "Kya tum Allah ko gawah bana kar kahte ho ke tum sirf isi garz se baitthe ho?" Unhune kaha: Allaah ki qasam! Hum iske siwa aur kisi garz se nahi baithe. Aap ﷺ  ne farmaya : "Maine kisi tohmat ki wajah se tumhe qasam nahi di, balki mere paas Jibraeel a.s. aaye aur mujhe bataya ke Allaah ta'ala tumhare zariye se farishton ke saamne fakhar ka izhar kar raha hai."

Sahih Muslim, book of pertaining to the remembrance of Allah, supplication, repentance and seeking forgiveness, hadith-6857.

Is hadith se ham logo ko ye sikhna chaiye ki Rasool ﷺ ke sahaba choti si choti sunnat ko bhi yaad rakhte the aur dusro ko sikhaya karte the jis tarha Muawiya r.a. ne kiya.

۞ Ye waqya hai sulah hudaibiya ke mauke ka. Is mauke par urwa r.a. Musalmaan nahi hue the, wo baad me musalman hue the. Urwa r.a. Kafiro ki taraf se agent ban kar aye the Aap ﷺ ke pas unse mu'aida karne ke liye. Fir jo manzar unhone RasoolAllah aur sahaba ke darmiyan dekha wo ye tha,

Urwa bin Masood r.a. us manzar me:

“Urwa r.a. ghoor ghoor kar RasoolAllah ke ashaab r.a. ki naqal aur harkat dekhte rahe. Fir raawi ne bayan kiya ke qasam Allah ki agar kabhi RasoolAllah ﷺ ne balgam bhi thooka toh RasoolAllah ke ashaab ne apne haathon par use le liya aur ise apne chehre aur badan par mal liya, kisi kaam ka agar RasoolAllah ne hukum diya toh uski bajaawari me ek dusre par log sabqat le jane ki koshish karte. Rasoolallah wuzu karne lage toh aisa maloom hua ke Rasoolallah ke wazu ke paani par ladai ho jaayegi (yaani har shakhs us paani ko lene ki koshish karta tha). Jab Rasoolallah guftagu karne lagte the toh sab par khamoshi chaa jati. Rasoolallah ki taazeem ka yeh haal tha ke Rasoolallah ke sathi nazar bhar kar Rasoolallah ko dhekh bhi nahi sakte the."

Fir jab Urwa r.a. Jab apne sathiyon se jaa kar mile toh un se kaha,

Aye logon! Qasam Allah ki, mai (bade-bade) baadshahon ke darbaar me bhi wafad le kar gaya hu Kaisar o Kasra aur Najashi sab ke darbaar me, lekin Allah ki kasam mai ne kabhi nahi dhekha ke kisi baadshah ke sathi uski is darja taazeem karte hon jitni Rasoolallah ke ashaab Rasoolallah ki karte hai, Allah ki qasam agar Rasoolallah balgam bhi thook diya toh unke ashaab ne use apne hathoon me le liya aur use apne chehra aur badan par mal liya, Rasoolallah ne unhein agar koi hukum diya toh har shaks ne use baja laane ki koshish ki, Rasoolallah ne agar wuzu kiya toh aisa malum hota ke Rasoolallah ke bache hue wazu ke paani par ladai ho jayegi ki kaun us pani ko hasil karle. Rasoolallah ne jab guftagu shuru ki toh har taraf khamoshi chaa jati. In ke dilon me Rasoolallah ki taazeem ka yeh aalam tha ke RasoolAllah ko unki izzat ke wajah se nazar bhar kar bhi nahi dekh sakte the.”

Sahih al-Bukhari, book of conditions, book no. 54, hadith-2731, 2732.

•٠•●●•٠•

Allah se dua hai ki wo tamaam sahaba e karaam se raazi ho jaye aur hame unke naqsheqadam par chalne ki taufeek ata kare. aameen.

Read More »

Ali r.a. Se Muhabbat Aur Unse Bughz

Sahih ahadees ki roshni me hame Ali r.a. ki kaafi fazeelat milti hai, hatta ke unse muhabbat ko eemaan ki nishani batayi gai hai.

۩ Ali r.a. riwayat karte hai ki RasoolAllah ﷺ ne farmaya, “Us zaat ki kasam jisne daana faada (aur fasal ugaai) aur makhluqaat paida ki, Nabi ﷺ ne mujhe ye ahad diya tha ki sirf momin shaks hi mujhse muhabbat karega aur munafiq shaks hi mujhse bughz rakhega.”

Sahih Muslim, kitab al eemaan, hadees- 240.

۩ Zaid bin Arqam r.a. riwayat karte hai ki RasoolAllah ﷺ ne farmaya, “Jiska maula (dili mahboob) mai hu uska maula Ali hai”.

Note: Maula ka matlab Dili mahboob hota hai (aam taur par).

Sunan Tirmizi, chapters on virtues, hadees- 3713. Ise Shaykh Zubair ali zai ne sahih karar diya hai.

۩ Saad bin Abi Waqas r.a. riwayat karte hai ki RasoolAllah ﷺ ne  gazwa e tabuk ke mauke par Ali r.a. se farmaya, “Kya tum isse raazi nahi ho ki tumhari mere sath wahi nisbat hai jo Musa ko Haroon ke sath thi siwaye iske ke mere baad koi Nabi nahi hai.”

Sahih al Bukhari, book of Companions of the Prophet, hadees- 3706. Sahih Muslim, book of Merits of the Companion, hadees- 6217.

۩ Zaid bin Arqam r.a. kahte hai, “Pahla shaks jisne Islam qubul kiya tha wo Ali hai”.

Sunan Tirmizi, chapters on virtues, hadees- 3735. Ise Shaykh Zubair ali zai ne sahih karar diya hai.

Note: Is hadees me mazeed alfaaz bhi hai jo kahte hai ki ek Tabayeen kahte hai ki Abu Bakr r.a. sabse pahle Islam laaye. Toh isme ikhtilaf ho gaya, aur Muhaddiseen ka usool ye hai ki jab sahaba aur tabayeen ka ikhtilaf ho jaye to sahaba ki baat ko tarjeeh di jayegi jis tarha jab Rasool aur sahaba ki koi baat ka ikhtilaf ho jaye to rasool ki baat ko tarjeeh di jayegi. Aur aage ki hadees is chiz ko aur wazeh kar deti hai ki shuru me Islam laane waala kaun tha.

۩ Qais bin Abi Hazim (Tabayeen) bayan karte hain ke mai Madine me tha, ek dafa ka zikr hai ke mai bazar ja raha tha, mai muqaam Ahzar al ziyat par pahuncha, mai ne dekha ek shaks sawari par sawaar tha, kafi saare log iske ird gird jama the, wo shaks Ali r.a. ko gaaliyaan de raha tha. Isi aashna me Saad bin abi Waqas r.a. waha tashreef laye aur wo bhi wahi khade ho gaye. Logon se pucha: "Kya hua?"

Logon ne bataya ke ek aadmi Ali bin abi talib r.a. ko gaaliyaan de raha hai.

Saad r.a aage badhe, logo ne unhe raasta de diya. Saad us aadmi ke qareeb aagaye aur farmaya: "Arey tum Ali bin Abi Talib r.a. ko gaaliyaan kyu de rahe ho?
Kya wo sab se pahle Musalmaan nahi hue the?
Kya wo Rasoolullah ﷺ ke peeche namaz padhne wale sab se pahle shaks nahi the?
Kya wo sab se zyada dunya se be-raghbat nahi the?
Kya wo sab se zyada Ilm rakhne wale nahi the?

Is ke alawa bhi Saad r.a. ne Ali r.a. ke bahut se fazail ginwaye. Hatta ke ye bhi kaha: Kya wo Rasoolullah ﷺ ke damaad nahi the? Kya wo gazwaat me huzoor ﷺ ke alambardaar nahi the?

Iske baad Saad r.a. ne qibla rukh hokar, hath buland karke ye dua maangi: "Aye Allah, ye shaks tere ek wali ko gali de raha hai, ya Allah, ye majma khatam hone se pahle tu apni kudrat ka karishma dikha de (aur log tere wali ku gaali dene ka anjaam apni aankhon se dekh le).

Qais r.a. kahte hai: Khuda ki qasam! Hum abhi waha se hate bhi nahi the, ke uski sawari bidak gayi, is sawaari ne us aadmi ko sir ke bal patharon me gira diya jiski wajah se iski khopdi khul gayi aur iska bheja bahar aagaya aur wo wahi par ibratnaak maut mar gaya.

Al Mustadrak al Hakim, hadees- 6121. Is hadees ke bareme Imam Hakim kahte hai ki ye Bukhari aur Muslim ki shart par sahih hai. Yahi hukm Imam Zahabi ka bhi hai.

۩ Abu Sayeed khudri r.a. ne farmaya, “Ham Ansaar ke munafikeen ko Ali r.a. se bughz ki wajah se pahchante the.”

Imam Ahmad ibn Hambal ki kitab- 'Fazail e Sahaba', hadees- 979. Ise Shaykh Wasiullah bin Muhammad Abbas ne sahih karaar diya hai. [scan]

•٠•●●•٠•

Allah se dua hai ki wo hame siraat e mustakeem ata kare. aameen.

Read More »