Kaafi Saal Se Haiz ke Chhode Hue Rozo ki Qaza ke Ahkaam

ur   -

Mustaqil fatwa committee se ye sawal kiya gaya:

'Ek saathh (60) saal ki aurat kayi saal tak haiz ke ahkaam se la-ilm thi, aur aam logo se sun rakha tha ke rozo ki qaza nahi, is gumaan ki bina par unhone rozo ki qaza nahi ki. Is ka hukm kya hai?'

Committee ka jawab tha,

'Unhe Allah taala ki janib ruju karte hue tawba wa istighfaar karni chahiye ke inhone ahle ilm se yeh masla nahi pucha, is ke sath sath in par un ayyaam ki qaza bhi hai jo inhone haiz ki wajah se roze nahi rakhhe.

Unke mutabik jitne roze chhute hai un ayyaam ki qaza me roze rakhhe aur agar un me istetaat ho toh har din ke badle me ek miskeen ko khana bhi de de jo ki aadha 'Saa' gandum (gehu) ya khujur ya chawal wagaira, jo us ke mulk me khaya jata ho, lekin agar wo khana dene ki istetaat nahi rakhti toh unhe iski zarurat nahi hai aur sirf rozo ki qaza hi kaafi ho jayegi.'

Fatawa al-Lajnah al-Daimah, 10/151.

•٠•●●•٠•

Related

۩ Rozadaar ka gurub e aaftab se pahle haiz ka shuru hona

۩ Haiz ke Masael

۩ Halat e haiz me Quran padhne aur zikr karne ke ahkaam

۩ Kya haiz me pahne gaye kapde napak hoe hai?

Read More »

Quran ka Saat (7) Qiraat Me Nuzul

 en  -

Alhamdulillah..

۞ Pahli baat

Shuru me Quran majeed sirf ek hi harf (lahje) me nazil hua tha lekin Nabi ﷺ Jibraeel a.s. se zyada ka mutaalba karte rahe hatta ke unhone Nabi ko saat lahjo me jo ke kaafi wa shaafi hai Quran majeed padhaya aur is ki daleel yeh hai ke,

۩ Ibn Abbas r.a. bayan karte hai ke Nabi ﷺ ne farmaya,

'Jibreel a.s. ne mujhe Quran majeed ek lahja me padhaya toh maine un se zyada ka mutaalba kiya toh unhone zyada kar diya toh mai mutaalba karta raha aur woh zyada karte rahe hatta ke saat lahjo me ja kar khatam hua.'

Sahih al Bukhari, kitab fazail al Quran (66), hadees- 4991.

۞ Dusri baat:

Ahruf ka matlab kya hai?

Is ke matlab me sab se acha aur behtar qawl yeh hai ke qirat ke saat tareeqe jo lafzi taur par mukhtalif hai aur matlab me muttfiq aur agar un ke matlab me ikhtilaaf bhi ho toh woh ikhtilaaf tanawu aur taghayyur hai na ke ikhtilaaf ta'ariz aur tazaad.

[is article ka english version padhe]

۞ Teesri baat:

Baaz ulama ka kahna hai ke Ahruf ka matlab Arab ki lughat hai, lekin yeh matlab Umar bin khattab r.a. ki hadees ki buniyaad par sahih nahi, woh kahte hai ke,

'Mai ne Hishaam ibn hakeem r.a. ko surah al Furqaan apni qirat ke alawa kisi aur qiraat me padhte hue paaya aur Rasool ﷺ ne ye surat mujhe padhai thi, mai qareeb tha ke is par jaldbaazi karta lekin maine unhe waqt diya hatta ke unhone woh surah khatam karli, fir maine unhe unki chadar se pakda aur Nabi ke paas laaya aur kahne laga, Aye Allah ke Rasool maine inhe surah Furqaan is tarha padhte hue paaya jo ke Aap ne mujhe padhai thi ye uske khilaaf hai.

Toh Rasool ﷺ farmaane lage, Padho! Toh unhone usi tarha use padhi jis tarha maine unhe suna tha toh Nabi ﷺ farmaane lage, 'Isi tarha nazil hua hai, fir mujhe kahne lage ke tum padho toh maine bhi padhi aur Aap farmaane lage ke isi tarha nazil hua hai, Yaqeenan Quran majeed saat harfo (lahjo) me nazil kiya gaya hai. Toh tum jo bhi us me mayassar ho padho.

Sahih al bukhari, kitab al khusumaat (44), hadees- 2419.

Aur yeh malum hai ke Hishaam r.a. Quraish me se Asadi hai aur Umar r.a. Quraish me Aqawi ke sath talluk rakhte hai, aur dono hi Quraishi hai. Aur Quraish ki toh ek hi zubaan (lugat) hai, Toh agar huroof ka ikhtilaaf lughaat me ikhtilaaf hota to yeh dono Quraishi sahabi aapas me ikhtilaaf na karte.

Aur is mas'ala me ulama e karaam ne chalees (40) ke qareeb aqwaal naqal kiye hai, aur un me se raajeh qawl shayad wohi hai jo ke hamne zikr kiya hai. wa Allahu aalam.

۞ Chauthi baat

Hadees e Umar r.a. se yeh waazeh hota hai ke huroof mutaddid alfaaz me nazil hue hai is liye ke Umar r.a. ka inkaar huroof me tha nah ke matlab me, aur fir ye huroof me ikhtilaaf, ikhtilaaf Tazaad nahi balke ikhtilaaf tanawu hai jaisa ke Ibn Masood r.a. ka qawl hai ke,

'Ye isi tarha hai ke jis tarha aap yeh kahe ke- halumma, aqbil or ta’aal (ye teeno ka matlab ek hi hai jisse murad 'Yaha Aao' hai).

۞ Paanchwi baat

Ab rahi 'Qiraat al Saba' (saat qirat) ki tahdeed to yeh tahdeed Quran wa sunnat me se nahi ki gai balke Ibn Mujaahid r.h. ka apna ijtihad hai, toh log ye gumaan karne lage hai ke saat huroof se Qiraat e Saba hi murad hai is liye ke yeh tadaad me ek jaise hi hai.

Yeh adad ya toh ittafaqi taur par aur ya fir un se qasdan hai taa ke yeh tadaad Ahruf e saba se mutabqat ikhtiyaar kar le, aur baaz logo ka jo yeh gumaan hai ke Ahruf e Saba se murad yahi qirat e Saba hai toh yeh un ki galti hai, aur ahle ilm se yeh baat maroof nahi.

Balke qiraat Sabah, ahruf sabah me se ek harf hai aur yahi woh harf hai jis par Usman r.a. ne Musalmanoon ko jama kiya tha.

۞ Chati baat

Usman r.a. ne jab mushaf nuskh kiya toh use ek hi harf par tayyar kiya lekin unhone is par nuqte aur aarab (zer, zabar wagaira) na lagayi taake is rasam me wusat rahe aur dusre lahjaat (huroof) ka bhi ahtamaal rahe toh jo is me raha is ki qirat ban gai aur jo na tha us ko nuskh kar diya gaya, aur yeh kaam is liye hua ke qiraat me log ikhtilaaf karne lage toh Usmaan r.a. ne inhe ek nuskhe par jama kar diya taa ke ikhtilaaf khatam ho jaaye.

۞ Saatvi baat

Saat Qirat ke Qaari ye hai:

1. Naafi al-Madani

2. Ibn Katheer al-Makki

3. Aasim al-Kufi

4. Hamzah al-Zayaat al-Kufi

5. Al-Kisaa’i al-Kufi

6. Abu Amr ibn al- Ala al-Basri

7. Abdullah ibn Aamir al-Shaami.

In sab me se qirat ki sanad ke aetebaar se sabse mazbut Naafi aur Aasim hai. Aur in me se sabse faseeh Abu Amr aur al Kisaa’i hai.

Wallah taala aalam.

source: islamqa.info

Note: The article has been edited without changing the meaning from the primary source.

•٠•●●•٠•

Related

۩ Quran ko likhne waala kaun tha aur ise kis taraf jama kiya gaya

Read More »

Rozedaar ka Eye drops Istemal Karna

Alhamdulillah..

Aankho ke katrah (eye drops) ke mutaliq ulema me ikhtilaaf hai ke is se roza tut ta hai ya nahi.

Shaykh ibn Uthaymeen aur Shaykh ibn Taymiyyah ki raaye ye hai ki is se roza nahi tut ta hai.

۩ Shaykh ibn Uthaymeen r.h. kahte hai,

'Shaykh ibn Taymiyyah ne ye mazhab ikhtiyar kiya hai ke surma roza ko khatam nahi karta agarche woh halak me bhi chala jaaye aur un ka kahna hai ke ise na toh khane aur peene ka naam diya jata hai aur nah hi ye un dono ke mayine (meaning) me aata hai aur fir is se nah hi woh cheez haasil hoti hai jo khane peene se haasil hoti ho. Aur Nabi ﷺ se koi bhi sareeh aur wazeh hadees nahi milti jo ke is par dalaalat karti ho ke surma roza todne waali cheez me daakhil hai.

Toh is masla me sahih baat yahi hai ke roza nahi toot-ta. Ibadat us waqt tak sahih wa salaamat hai jab tak ke hamare liye fasid karne wali koi cheez saabit na ho jaaye.

Aur jis maslak ki taraf Shaykh gaye hai woh hi sahih hai agarche insaan is ka zayeka apne halak me mahsoos hi kyu na kare.

Toh is bina par jis raaye ko shaykh al islam ne ikhtiyar kiya hai ki agar rozadaar apni aankh me katre daale (eye drops) aur is ka zayeka apne halak me mahsoos kare, toh is se us ka roza nahi tootega.'

Al-Sharh al-Mumti, 6/382.

•٠•●●•٠•

Allah se dua hai ki wo hame sahih deen ki samajh ata kare. aameen.

Read More »

Jadu Tona | Jinnaat Taweezaat | Amraaz o Haadsaat ka Sahih Sunnat Wazaif se Ilaj

1۞ Ayatal kursi padhne waala shaks Shaitan aur Jinnaat se mahfooz ho jata hai aur Allah uski hifazat ke liye ek muhafiz muqarrar farma deta hai.

 1 martaba subah aur shaam 

Sahih al bukhari, 2311. Sunan kubra lil nisai, 8017. Mustadrak al hakim, 2064.

2۞ Surah Ikhlas (Qul hu Allaho ahad) aur Muazzatain ki tilawat har shae se kaafi ho jati hai. Ye teen surate shaitan, jinnaat aur jadu ke khilaf Allah ki panaah me aane ka zarya hai.

۩ قُلْ هُوَ اللَّهُ أَحَدٌ - اللَّهُ الصَّمَدُ - لَمْ يَلِدْ وَلَمْ يُولَدْ - وَلَمْ يَكُن لَّهُ كُفُوًا أَحَدٌ-

۩ قُلْ أَعُوذُ بِرَبِّ الْفَلَقِ - مِن شَرِّ مَا خَلَقَ - وَمِن شَرِّ غَاسِقٍ إِذَا وَقَبَ - وَمِن شَرِّ النَّفَّاثَاتِ فِي الْعُقَدِ - وَمِن شَرِّ حَاسِدٍ إِذَا حَسَدَ-

۩ قُلْ أَعُوذُ بِرَبِّ النَّاسِ - مَلِكِ النَّاسِ - إِلَـٰهِ النَّاسِ - مِن شَرِّ الْوَسْوَاسِ الْخَنَّاسِ - الَّذِي يُوَسْوِسُ فِي صُدُورِ النَّاسِ - مِنَ الْجِنَّةِ وَالنَّاسِ-

 3 martaba subah aur shaam 

Jamia Timizi, 3575 (hasan). Sunan Abu dawud, 5082 (hasan).

3۞ In kalimaat ka sawaab chaar (4) gulaam aazad karne ke barabar hai aur Allah tamaam din aur raat me har khatarnaak cheez aur shaitan se bachao farma deta hai.

 10 martaba subah aur shaam 

Sahih Muslim- 6844. Sunan Abu Dawud- 5077 (Sahih).

4۞ Ye Dua padhne waale ko koi shaye nuksaan nahi pahucha sakti hai aur na koi naaghani aafat ya museebat hi use pahuchegi.

 3 martaba subah aur shaam 

Jamia Tirmizi, 3388 (hasan). Sunan Abu Dawud, 5088 (Sahih). Sunan ibn Majah, 3869 (Sahih).

5۞ Ye dua padhne waale ko zahreele jaanwar (bichhu, saanp, keeda, wagaira) ka dank nuksaan nahi pahucha sakega.

 1 martaba subah aur shaam 

Sahih Muslim,  6880.

••

Prepared by: A. Sayed

Remember us in your prayers.

•٠•●●•٠•

Related

۩ Subah sham ke Azkaar

۩ Jinn-Jadu ka ilaj

Read More »

Quran ki Sabse Choti Surat | Al Kausar

بِسمِ اللَّهِ الرَّحمٰنِ الرَّحيمِ

 إِنَّا أَعْطَيْنٰكَ الْكَوْثَرَ- فَصَلِّ لِرَبِّكَ وَانْحَرْ- إِنَّ شَانِئَكَ هُوَ الْأَبْتَرُ-

۩ Innaa aa’taina kal kausar. Fa salli li rabbika wanhar. Inna shani-aka huwal abtar.

۩ Yaqeenan hamne Aap ko Kausar ata ki. Pas Aap apne Rab ke liye namaz padhe aur Qurbani kare. Beshak Aap ka dushman hi be-nasl aur be-naam o nishan hoga.

•٠•●●•٠•

Hame Whats App par join karein: +9779868212118

Read More »

Namaz me Imamat ki Sharait

hi    

Alhamdulillah..

Imamat ki Shart Rasoolullah ne ye bataye hai:

۩ Abu Mas’ood al Ansaari r.a. riwayat karte hai ki Rasoolullah ﷺ ne farmaya,

'Logo ki Imamat woh karaye jise Allah ki kitab (Quran majeed) ka sabse zyada Ilm ho aur agar woh sab is me barabar ho toh fir sunnat ka sab se zyada janne waala shakhs imamat karwaye, agar wo sunnat (ke ilm) me bhi barabar ho toh wo jis ne un sab ki nisbat pahle hijrat ki ho, agar wo hijrat me barabar ho toh wo jo Islam qubul karne me sabqat rakhta ho (yaani jo pahle musalman hua ho).'

Sahih muslim, kitab al masaajid (5), hadees- 1532.

Is hadees se sabit hua ki Imamat ke liye sabse badi chiz Quran ka ilm hai. Aur is ilm se murad ye nahi hai ki Quran ko kitna zyada khubsurti se padha jaa raha hai balki isse muraad Quran ka sabse zyada yaad hona hai. Is ki daleel hame is hadees se milti hai:

۩ Amr bin Salama r.a. riwayat karte hai,

'Jab Mecca fatah ho gaya toh har qaum ne Islam laane me pahal ki aur mere waalid ne bhi meri qaum ke islam me jaldi ki. Fir jab (Madinah) se wapas aaye toh kaha ke mai Allah ki qasam ek sachhe Nabi ke paas se aa raha hu. Unhone farmaya hai ke fula namaz is tarha fula waqt padha karo aur jab namaz ka waqt ho jaaye to tum me se koi ek shakhs azaan de aur imamat woh kare jise Quran sab se zyada yaad ho.

Logo ne andaza kiya ke kise quran sab se zyada yaad hai toh koi shakhs un ke qabeele me mujh se zyada Quran yaad karne waala inhe nahi mila. Kyunke mai aane jaane waale sawaaro se sun kar Quran majeed yaad kar liya karta tha. Is liye mujhe logo ne imam banaya. Halaanki us waqt meri umar chay (6) ya saat (7) saal ki thi aur mere paas ek hi chaadar thi.

Jab mai (use lapait kar) sajda karta toh upar ho jati (aur peeche ki jagah) khul jati. Is qabeela ki ek aurat ne kaha tum apne qaari ka jism ke peeche ka hissa toh pahle chupa do. Aakhir unhone kapda khareeda aur mere liye ek kameez banayi, mai jitna khush us kameez se hua utna kisi aur cheez se nahi hua tha.'

Sahih al bukhari, kitab al maghaazi (64), hadees- 4302.

Ek baat ka aur khayaal rakhe ki Imamat karne waale ko dusri zaruri cheeze bhi aate ho jaise, Quran ka alfaz achhe se padhna aata ho aur use namaz padhne aur iske sharait ka ilm ho, yaani kaun si duae kab padhna hai, namaz me galti ho jaaye ya wuzu tut jaye toh kya karna hai, wagairah.

۩ Ibn Qudamah r.h. kahte hai,

'Agar un dono me se ek shakhs namaz ke ahkam ka zyada ilm rakhe, aur dusra shakhs namaz ke alawa baaki dusre muamlaat me zyada ilm rakhta ho toh namaz ke ahkaam jaan ne waale ko muqaddam kiya jayegaa.'

Al-Mughni, 2/19.

Hamare muashre me logo ne dadhi ko imamat ki shart rakh di hai, aur ye sahih nahi hai kyuki iski taleem Allah aur uske Rasool ne hame nahi di hai.

•٠•●●•٠•

۩ Imamat ke chand masail

۩ Ghar Me Ba Jamaat Saff Banane ka Tareeqa

۩ Jamaat Se Namaz Padhna

Read More »

Family Planning | Operation Karwana | Nas-bandi | Abortion | Pills

Assalamualaikum w RahmatUllahi w brakatuhu..

Islam logo ko Shadi biyah aur Aulad paida karne ki targheeb deta hai taake Ummat e Muslimah ki taadaad me izafa ho, Aur Nabi ﷺ  ko Qayamat ke din diger tamam aqwam ke saamne fakhr ho.

۞ Bachhe na ho isliye Operation karwa lena

Nikah me Shariah ka ek maqsad ye hai ke bachhe paida karein aur nasal e insani ko mustaqil banaye.

Lehaza aisa koi bhi kaam jaiz nahi hai jo mustaqil taur par aulad paida karne se bachaye, siwaye zarurt ke muamlat me.

۩ Kis Surton me Operation ki Ijazat hai

Agar Doctors ke mutabik zyada bachhe paida karne se aurat ko nuqsan pahonchega, Ya uski bimari me izafa ho jayega, Ya ye andesha hai ke pregnancy ya delivery aurat ki maut ka sabab banegi toh fir shauhar ki razamandi (permission) ke sath hamal (pregnancy) rokna jaiz hai.

Shaykh Ibn e Baaz r.h. se ek aisi aurat ke bare me pucha gaya jisne das (10) bachho ko janam diya tha aur kisi aur hamal (pregnancy) ki wajah se use nuqsan pahunchega to wo aurat shauhar ki ijazat se operation karwa sakti hai aur apne nalko (tubes) ko bandhwa sakti hai.

Dekhye temporary taur par hamal (pregnancy) rokna aur mukhtalif wasail (sources) ka istemal karna zarurat aur sharait ke lehaz se haram nahi hai.

Dekhye Mazhab e Islam bahut hikmat waala mazhab hai. Aur jo bhi hame hukum diya jata hai aur jis baat se roka jata hai usme hamara hi fayeda hota hai.

Wo log jo nasbandi karwa lete hai unka ye amal jaiz nahi hai balke haram hai, Kyuke isme insan ka bachha paida karne ki salahiyat aur quwwat ko khatam kar diya jata hai.

Aksar aisa bhi hota hai ke Maa baap nasbandi karwa baithe hai aur jo unke bachhe the unka inteqal ho jata hai toh is tarha toh wo hamesha ke liye aulad se mahrum ho jate hai.

Aur kabhi aisa bhi hota hai ke aurat ne nasbandi karwali aur uske shauhar ka inteqal ho gaya ya use Talaq ho gayi aur us Aurat ne dusri shadi ki aur dusra shauhar apni aulaad ka khwahishmand ho,

Ya ye bhi ho skta hai ke mard ne nasbandi karwali aur uski biwi ka inteqal hogaya ya talaq ho gayi aur phir wo dusri shadi karta hai aur ab nayi biwi aulad ki khwahishmand ho.

۞ Temporary Taur Par Bachho ki Rok-tham ke Mukhtalif Tarike Aur Unki Ijazat

Ek mahdood (limited) muddat tak hamal ki rok tham ke zaraaye (sources) ka istemal ki ijazat hai, Is shart par ke ye nuqsandah asraat se paak ho.

1- Injection Lagwana

Aap temporary taur par Pregnancy ki rok tham ke liye Injection ke bare me kisi Qabil e Aetemad Doctor se ruju kar sakti hai.

2- Birth Control Pills ka Istemal

Jab tak Aurat in 2 sharait par puri nahi utarti use pills ke istemal ki ijazat nahi hai.

1- Pregnancy se usko Jismani kamzori ya bimari ka khatra hoga ya har saal Pregnancy bardasht na hone ki wajah se ye nuqsandah sabit ho.

2- Shauhar ki ijazat ke bagair Pills ka istemal jaiz nahi jab ke shauhar bacche ka khwahishmand ho.

In do sharait ke pura hone par Pills ke istemal ki ijazat hai magar permanently nahi.

Aur Doctors ke mutabik Pills ka zyada istemal aurat ko andruni (internal damage) taur par bahut nuksan pahuncha sakta hai.

3- Condom ka Istemal Karna

Condom Istemal karne ki ijazat hai jab tak isse koi takleef na ho aur dono shauhar aur biwi ki razamandi shamil ho.

4- Azl karna (ejaculating outside the vagina)

Hazrat Jabir r.a. farmate hai ke ham log nuzul e Quran ke zamane me 'Azl' karte the. (Yani inzal ke waqt aurat se alag ho jate the)

Sahih al Bukhari, kitab un nikah (67), hadees- 5208, 5209. 

Muslim Sharif me Itna aur hai,

'Ye baat Nabi ﷺ tak pahunchi to Aap ﷺ ne Mana nahi kiya.'

Sahih Muslim, kitab un nikah (16), hadees- 3561.

'Azl' (cell discharge) ke mutallik aur bhi ahadees hai jisse iski ijazat ka pata chalta hai.

۩ Shaykh Ibn Taymiyyah farmate hai,

'Kuch Ulema ke mutabik ye amal haraam hai magar char Imam ke nazdeek ye jayez hai aur ye bhi ke biwi ki ijazat aur marzi ke khilaf aisa na kare (kyunki isme uski haqtalfi hai). Aur Allah sab se behtar janta hai.'

Majmoo’ al-Fataawa, 32/110.

Musalmano ko ye karna chahiye ke wo zyada se zyada bachhe paida karne ki koshish kare, kyunke ye Nabi ﷺ ka Hukm hai ke 'Shadi usse karo jo Muhabbat karne wali aur zarkhez (fertile) hai, Kyun ke mujhe aqwaam ke saamne tumhari badi tadad par fakhr hoga.'

Sunan Abu Dawood, hadees- 2050 | Hasan Sahih

Wo log jo gareebi ke dar se apni aulaado ko maar daalte hai (abortion, etc) toh aise logo se Allah s.w.t. farmate hain ke,

'Aur Gurbat ke khauf se apne bachho ko mat maaro. Ham unke sath sath Apko bhi faraham karenge. Yaqinan unka katal bahut bada gunah hai.'

Surah Isra (17),  ayat- 31.

۩ Shaykh ibn e Jibreen farmate hain,

'Hamal (pregnancy) ke khatme Ya rok tham ke liye tibbi ilaj karna jaiz nahi hai siwaye zarurt ke muamlat me,

Jab Doctors ne sabit kar diya ke wiladat (delivery) se uska nuqsan hoga ya iski bimari zyada badh jayegi ya khadsha hai ke wiladat ki wajah se maut waqaye hojaygi.

Lekin ye zaruri hai ke shauhar hamal ke khaatme ya rok tham ke liye ijazat de, Fir jab uzar (bimari) khatam ho jaye toh aurat ko mamool par lautna chahiye.'

Fataawa al-Mar’ah al-Muslimah (2/977).

۩ Aur Allah par Tawwakal karo agar tum waqai Momin ho

Surah Maida (5), ayat- 23.

Allah s.w.t. hame haraam se mahfooz rakhe aur halaal kaam karne ki taufeeq ata farmaye.

Ameen Ya Rabbul Aalameen

•٠•●●•٠•

Prepared by:- A. Sayed

Read More »

Sayyid al Istighfaar

Insan fitratan kamzor hai. Apni kamzoriyo aur kuch deegar wujuhat ki bina par gunah kar baithta hai. Agar insan ka zameer zinda ho toh use sharmindagi zarur hoti hai. Fir use Allah taala ki baargah me fauran tawba karni chahiye aur dobara gunah ke qareeb bhi na jaye. Ye Allah ki rahmat hai ke Allah ne hame muafi maangne ki mukhtalif kalimaat sikha diye hai aur apne bando ko bakhshish maangne ka mauqa diya hai.

Shaitan insan ka dushman hai woh insan ko tawba karne me deri karwata rahta hai hatta ke insan ki maut ka waqt aa jata hai aur tawba ka darwaza band ho jata hai.

Gunah sarzad hone ke fauran baad hi tawba kijiye, na jane kab hamari aakhri ghadi aa jaye aur ham gafil ho.

۩ Shaddad bin Aus r.a. riwayat karte hai ki Rasoolullah ﷺ ne farmaya,

Allah se maghfirat maangne ka sabse behtaraeen tareeka Sayyid al Istighfaar hai. Jis ne is dua ke alfaz par yakeen rakhe hue dil se inko kah liya aur usi din us ka intekal ho gaya shaam hone se pahle toh wo Jannati hai aur jis ne is dua ke alfaz par yakeen rakhte hue raat me in ko padh liya aur fir uska subah hone se pahle intekaal ho gaya toh wo Jannati hai.

Sahih al Bukhari, kitab ad dawaat (80), hadees- 6306.

Dua

اللَّهُمَّ أَنْتَ رَبِّي لا إِلَهَ إِلا أَنْتَ خَلَقْتَنِي وَأَنَا عَبْدُكَ وَأَنَا عَلَى عَهْدِكَ وَوَعْدِكَ مَا اسْتَطَعْتُ أَعُوذُ بِكَ مِنْ شَرِّ مَا صَنَعْتُ أَبُوءُ لَكَ بِنِعْمَتِكَ عَلَيَّ وَأَبُوءُ لَكَ بِذَنْبِي فَاغْفِرْ لِي فَإِنَّهُ لا يَغْفِرُ الذُّنُوبَ إِلا أَنْتَ-

Allahumma anta Rabbi la ilaha illa anta khalaqtani wa ana abduka, wa ana ala ahdika wa wa'dika mastata'tu, A'uzu bika min sharri ma sana'tu, abu'u laka bini'matika 'alaiya, wa abu'u laka bizanbi faghfirli fainnahu la yaghfiru azzunuba illa anta.

Aye Allah! Aap mere Rab hai. Aap ke siwa koi mabood nahi. Ap ne mujhe banaya aur mai Aap ka banda hu. Aur mai aap se kiye hue Ahed aur waade par qayam hu, apni taaqat ke mutabik.

Aap ki panah chahta hu bure kaamo ke wabaal se jo mai ne kiye hai. Mujhe iqrar hai us ahsaan ka jo ap ka mujh par hai aur mujhe aetaraaf hai apne gunaho ka, pas baksh de mere gunah kyu ki koi nahi bakshta gunah Aap ke siwa.

•٠•●●•٠•

Read More »

Daanto Se Nikalne Waala Khoon Roza Batil Nahi Karta

Alhamdulillah..

Daanoto se niklne wala khoon roze par asarandaaz nahi hota aur na hi is se roza toot ta hai, chahe woh khud se nikle ya kisi shaks ke usko maarne ke wajah se nikla ho.

Allah taala hi taufeeq bakhsne wala hai. Allah taala hamare Nabi Muhammad ﷺ, un ki aal aur sahaba e karaam par apni rahmate nazil farmaye.

Al-lajnah al-daa’imah li’l-buhooth al-ilmiyyah wa’l-ifta, 10/267.

Lekin rozedaar par is khoon ko nigalna haraam hai, aur agar us nee jaan bujh kar nigal liya toh roza toot jayega.

source: islamqa.info

•٠•●●•٠•

Read More »

Ar Rayyan | Jannat ka Ek Darwaza

۩ Sahl r.a. riwayat karte hai ki Rasoolullah ﷺ ne farmaya,

'Jannat ka ek darwaza hai jise 'Ar Rayyan' kahte hai, Qayamat ke din is darwaze se sirf rozedaar hi Jannat me dakhil honge, unke siwa aur koi is me se nahi dakhil hoga.

Pukara jayega ke Rozdaar kaha hai? Wo khade ho jayenge, unke siwa isse aur koi nahi andar jaane payega aur jab ye log andar chale jayenge toh ye darwaza band kar diya jayeg, fir us se koi andar na jaa sakega.'

Sahih al bukhari, kitab al saum (30), hadees- 1896.

۩ Sahl r.a. riwayat karte hai ki Rasoolullah ﷺ ne farmaya,

'Rozedaar ke liye Jannat me ek darwaza hai jise 'Ar Rayyan' kahte hai. jisme inlogo ke siwa koi aur dakhil nahi hoga. Jab aakhri rozedaar dakhil ho jayega toh darwaza band kar diya jayega. Jo shaks isme dakhil hoga wo piyega aur jis ne ek dafa pi li, kabhi pyasa na hoga.'

Sunan Nasai, kitab al saum (22), hadees- 2238. Ise darussalaam ne sahih karaar diya hai.

۩ Abu Hurairah r.a. riwayat karte hai ki unhone Rasoolullah ﷺ ko ye farmate hue suna,

'Jis ne Allah ki raah me do do cheeze kharch ki use Jannat me aawaz di jaye gi ke Aye Allah ke bande! Yeh (darwaaza) bahot achhha hai.

Jo namaz padhne waalo me se hoga, use namaz ke darwaze se puraka jayega, jo jihad karne walo me se hoga, use jihad ke darwaze se puraka jayega, jo sadaqa dene waalo me se hoga, use sadqe wale darwaze se puraka jayega, aur jo rozedaaro me se hoga, use baab e Rayyan se puraka jayega.

Abu Bakr Siddique r.a. ne kaha, Aye Allah ke Rasool ﷺ kisi insaan ko un tamaam darwazo se pukare jane ki zarurat to nahi hai lekin kya koi aisa bhi (khush naseeb) hoga jise un tamaam darwazo se bulaya jayega?

Rasoolullah ﷺ ne farmaya, 'Ji Haan! Aur mujhe ummeed hai Aap unhi me se hoge.'

Sahih Muslim, kitab al zakat (12), hadees- 2371.

•٠•●●•٠•

Read More »

Hai Koi Dua Maangne Waala | Hadees e Qudsi

Abu Hurairah r.a. riwayat karte hai ki Rasoolullah ﷺ ne farmaya,

'Jab Raat ka pahla tihai hissa guzar jaata hai toh Allah taala aasman e duniya par nuzul farmate hai aur kahte hai ke Mai Baadshah hu, Mai baadshah hu!

Kaun hai jo mujh se dua kare ke mai use qubool kar lu?

Kaun hai jo mujh se sawal kare ke mai use ata karu?

Kaun hai jo mujh se baksish talab kare ke mai use baksh du? Musalsal tuloo e Fajr tak isi tarha hota rahta hai.'

Sahih Muslim, kitab salaat al musafireen (6), hadees- 1773. (pic)

•٠•●●•٠•

Read More »

Ye Ilm Deen Hai Toh Dekho Apna Deen Kis se Le Rahe Ho | Is Qawl ki Tahkeek

Kuch bhai jo bina tahkeek kiye aur aankh band kar ke ulema ki baat maan lete hai wo ek qawl pesh karte hai,

۩ Ibn Sireen kahte hai,

إِنَّ هَذَا الْعِلْمَ دِينٌ فَانْظُرُوا عَمَّنْ تَأْخُذُونَ دِينَكُمْ

'Beshak ye Ilm Deen hai toh ap ye dekho ki ap apna Deen kisse le rahe ho.'

Muqaddamah Sahih Muslim, hadees- 26.

Ab bina is hadees ke aage piche dekhe, bina iska pasmanzar samjhe wo is qawl se Deen ka ek usool bana lete hai ki sirf Apne firqe ke ulema ko sunna chahiye aur sirf unhi se deen ka koi bhi ilm lena chahiye..

Haalanki agar is usool ko maan liya jaaye toh ek shia zindagi bhar shia hi rahe aur ek barelwi zindagi bhar barelwi hi rahe kyuki is usool ke mutabik toh dusre ulema ki na toh baat sunni chahiye aur na hi ilm lena chahiye. Kyuki jab ek galat aqeedah wala shaks apne ulema ko chor kar dusre ko sunta hai tab hi use pata chalta hai ki kis ki baat behtar hai, agar ye usool maan liya jaye fir kyu kar koi apne firqe ke alawa dusre logo ki baat sune.

Ab aaiye Ibn Sireen r.h. ke is qawl ki haqiqat jaante hai,

Ibn Sireen r.h. ka ye qawl Sahih Muslim ke Muqaddamah se hai ki unhone kaha ki, 'Ye ilm Deen hai toh ap ye dekho ki aap apna Deen kisse le rahe ho.'

Pahli baat ye hai ki Ibn Sireen r.h. ka ye qawl aam ilm ke bareme nahi hai balki isnaad yaani usool e hadees ke ilm ke baare me hai.

Imam Muslim ne is hadees par ye baab baandha hai "باب فِي أَنَّ الإِسْنَادَ مِنَ الدِّينِ" yaani "Isnaad Deen me se hai."

Aur baab me aage ye likha hua hai,

'Isnaad Deen me se hai, aur isnaad ko qubul nahi kiya jaata hai jab tak ke wo siqah (trustworthy) raawi na ho.'

(scan dekhne ke liye click kare)

To isse baat wazeh hui ki yaha par Ibn Sireen r.h. isnaad ki ilm ki baat kar rahe hai na ki aam ilm e deen ki. Aur ye dono ilm me bahot farq hai. Usool e hadees ka ilm ek alag ilm ki speciality hai. Aur isme itni zyada sakhti karni bahot zaruri hai kyuki aam ilm toh kitab o sunnat se pata chal jata hai ki kitna sach hai lekin is field me sab kuch ek raawi par depend hota hai, jo bhi raawi Rasoolullah ﷺ ke taraf nisbat kar ke bolega wo Ummat ka Deen ban jayega. Jab ki aam ilm to kitab o sunnat me dekhne ke baad asani se pata chal jaata hai ki kahne wala shaks sach kah raha hai ya jhut.

Misaal ke taur par isi Sahih Muslim ke Muqaddamah ki hadees no. 30 me likha hai,

Ibn Abi Zinad apne walid se riwayat karte hai ki maine Madinah me aese 100 aadmiyo ko paaya hai jo nek sirat the magar unhe hadees riwayat karne ka ahal nahi samjha jata tha, aur unki hadees qubul nahi ki jati thi, kaha jata tha ki ye is (ilm) ke ahal nahi hai.

Sahih Muslim ka Muqaddamah, hadees- 30.

Ye isliye kyuki in logo ko usool e hadees ka ilm nahi tha, yaani koi bhi akar hadees ke naam par inhe kuch suna de to wo ise hadees samajh kar aage bayan kar denge. Toh isi liye usool e hadees ke ilm par aam deeni ilm ka qiyas nahi kiya ja sakta warna fir upar ki hadees ke mutabik toh jo shaks ilm e hadees ya ilm e isnaad se waqif na ho usse ilm lena haraam ho jayega unke usool ke nazdeek.

Dusri baat hamare Deen ne hame ye sikhaya hai ki jab ap kisi se ilm lete ho to uska rang, nasal, zuban, mazhab, zaat, firqa nahi balki uski daleel dekho. Dekho kya wo apni baat ke daleel me Quran ya sahih hadith pesh kar raha hai ya nahi. Rasoolullah ﷺ ne khud farmaya hai ki jab tak Allah ki kitab aur meri sunnat ko mazbuti se pakde rahoge tab tak gumrah nahi hoge. [Mustadrak al Hakim, hadees - 318, sahih].

Allah se dua hai ki wo hame deen par gaur o fikr karne waala talib e ilm banaye aur hame ulema ki taqleed se mahfooz rakhe. aameen.

•٠•●●•٠•

Related

۩ Haq baat ki tashdeek, shaitan ke taraf se bhi

۩ Kis ko suna jaaye aur Deen ka ilm kis se liya jaaye

Read More »

Ramzaan ki Mubarakbaad Dena | Jayez ya Na-Jayez

Alhamdulillah..

Ramzaan, Eid ya Juma ki mubarakbaad dena ye hamare muashre ka ek riwaj hai, aur Deen ka usool ye kahta hai ki koi bhi rasm-riwaj ko apnane ki ijazat hai jab tak ki wo Quran ya sahih hadees ke khilaf na ho.

Toh is liye chahe wo Ramzan ki aamad ki Mubarakbaad dena ho ya Eid ki ya fir Juma ki, isme koi harj nahi hai.

۩ Shaykh ibn Uthaymeen se Eid ki mubarakbaad dene ke mutallik pucha gaya gaya:

'Namaz eid ke baad musafah karne, gale milne aur mubarakbaad dene ka kya hukm hai?'

Toh Shaykh ka jawab tha:

'In chizo me koi harj nahi hai, kyuki log use bataur Ibadat aur Allah taala ka qurb samajh kar nahi karte hai, balki log ye bataur riwaaj (custom) aur izzat o ikraam aur ehtram karte hai, aur jab tak shariyat me kisi rasm-riwaj ki mumaniyat (manaahi) na aaye to bunyadi usool ye hai ki us chiz ki ijazat hoti hai.'

Majmoo’ Fataawa Ibn ‘Uthaymeen, 16/208-210.

Aur akhir me, Ramzan ki mubarakbaad dene me koi harj nahi hai, is baat par Ummat e Muslimah ka Ijma bhi hai.

•٠•●●•٠•

Related:

۩ Islam me rasm-riwaj ka muqam

۩ Juma Mubarak kahna kaisa hai

Read More »

Ek Neki Par Saat Sau (700) Neki | Hadees e Qudsi

Allah paak farmaate hai,

'Jo log apna maal Allah ki raah kharch karte hain, unke kharch ki misaal aisi hai, jaise ek daana boya (sow) jaaye aur uske saat (seven) baaliya nikle aur har baali mein sau (100) daane ho, isi tarah Allah jiske amal ko chahta hai zyada kar deta hai, woh bada khule haath waala hai aur sab kuch janne waala bhi.'

Surah baqarah (2), ayat- 261.

۩ Ibn Abbas r.a. riwayat karte hai ki Rasoolullah ﷺ ne ek hadees e qudsi me farmaya hai,

'Allah talah ne nekiya aur buraiyya muqaddar kar di hai aur unhe saaf saaf bayan kar diya hai pas jis ne kisi neki ka iradah kiya lekin us par amal na kar saka toh Allah taala ne us ke liye ek mukammal neki ka badla likha hai aur agar us ne irada ke baad us par amal bhi kar liya toh Allah talah ne us ke liye apne yaha das guna se saat sau guna tak nekiya likhi hai ya fir us se bhi badh kar kayi guna aur jis ne kisi burayi ka irada kiya aur phir us par amal nahi kiya toh Allah taala ne us ke liye apne yaha neki likhi hai aur agar uss ne irada ke baad us par amal bhi kar liya toh apne yaha us ke liye ek burayi likhi hai.

Sahih al bukhari, kitab al riqaaq (81), hadees- 6491.

SubhanAllah kitna raheem hai wo jiske gunahgaar bande hai ham. Aye Allah hame muaf kar de aur hame qayamat ke din apne gazab se bacha lena beshak tu hi hifazat karne waala hai, Aye hamare Rab hame jahannam ke aag se bacha le. aameen.

•٠•●●•٠•

Related: Ramzan ke Teen Ashre Aur Ek Neki Par 70 Neki | Hadees ki Tahkeek

Read More »

Chand Dekhne ki Dua

Alhamdulillah..

Ibn Umar r.a. riwayat karte hai, Jab bhi Allah ke Rasool ﷺ naya chand dekhte, toh wo ye (dua) kahte the,

اللَّهُ أَكْبَرُ اللَّهُمَّ أَهِلَّهُ عَلَيْنَا بِالْأَمْنِ وَالْإِيمَانِ وَالسَّلَامَةِ وَالْإِسْلَامِ وَالتَّوْفِيقِ لِمَا يُحِبُّ رَبُّنَا وَيَرْضَى رَبُّنَا وَرَبُّكَ اللَّهُ - (pic)

'Allaahu Akbar, Allaahumma ahillahu alayna bil'amni wal'eemaani, wassalaamati wal-'Islaami, wat tawfeeqi lima yuhibbu Rabbunaa wa yarza, Rabbunaa wa Rabbukallahu.'

अल्लाहु अक्बर, अल्लाहुम्मा अहिल्लहु अलयना बिलअमनी वलईमानी, वस्सलामती वल-इस्लामी, वत तवफीकि लिमा युहिब्बु रब्बुना व यरजा, रब्बुना व रब्बुकल्लहु।

Allah sabse bada hai. Aye Allah ham par is chand ko hifazat aur eeman, salamati aur Islam, aur us hidayat ke sath tulu farma jise hamara Rab pasand karta ho aur raazi ho. Mera Rab aur tumhara Rab Allah hai.

Sunan Darimi, hadees- 1729. Is hadees ko Shaykh Arna’ut ne Sahih ibn Hibban, hadees- 888 me sahih (li ghairi) karaar diya hai.

Ek Dusri riwayat bhi hai Jo Imam Tirmizi (hadees- 3451) apni sunan me le kar aaye hai. Lekin is hadees me hamare Muhaddiso ne hukum lagane ke muamle me ikhtilaf kiya. Shaykh Zubair ali zai (darussalaam) is riwayat ko zaif kahte hai jab ki Shaykh Albani ise sahih kahte hai. Imam Tirmizi is hadees ko hasan gareeb kahte hai aur mere ilm aur tajurbe ke mutabik jab Imam Tirmizi kisi hadees ko hasan gareeb kahte hai toh wo dusre muhaddis ke mutabik aksar toh zaif hoti hai aur chand ek hasan. Lekin ye bas ek tajurba hai, usool e hadees nahi hai.

Aur Allah sabse behtar janta hai.

•٠•●●•٠•

Read More »

Kya Ludo/Chess/Carrom Khelna Waaqai Haraam Hai?

۞ Buraida r.a. apne walid se riwayat karte hai ki Allah ke Rasool ﷺ ne farmaya,

'مَنْ لَعِبَ بِالنَّرْدَشِيرِ فَكَأَنَّمَا صَبَغَ يَدَهُ فِي لَحْمِ خِنْزِيرٍ وَدَمِهِ'

“Jis shaks ne 'Nardashir' kheli toh goya us ne apne hath ko khinzeer ke khoon aur gosht se rang liya.”

Sahih Muslim, book of poetry (41), hadees- 5896.

Ab is Nardashir ke lafz ko kuch tarjumaan ne english me dice tarjuma kar diya. Ab kyuki yaha dice alfaz maujud ho gaya toh baaz Ulema ne fatawa de diya ki ludo haraam ho gai, carrom board haraam ho gaya, shatranj haraam ho gayi.

Halaki agar ham Arabic dictionary 'Al Munzir' padhe toh usme iska meaning ye hai,

'Ye Faarsi baadshah ka khel tha, jiski bisaat khujur ke patto ke sath banayi jaati thi.'

Gaur karne ki baat ye hai ki chess ko arabi me shatranj kahte hai toh agar shatranj khelna galat hota toh hadees ke arabi me khud Shatranj alfaz likha hota. Lekin aesa nahi hai.

Jaha tak ludo ki baat hai toh ye toh abhi 100-150 saal pahle aaya tha. Aap ﷺ ke waqt ye khel maujud bhi nahi tha aur na hi kisi hadees me is ludo game ka zikr tak hai.

Aur Carrom board ko toh zabarzasti is hadees me ghaseet diya gaya. Dur dur tak isse aur upar waali hadees se koi lena-dena hi nahi hai.

Ek aur hadees pesh ki jaati hai,

۩ Ali r.a. kahte hai,

'Shatranj ajmiyo ka juwa hai.'

Shobul Eemaan, (Imam Baihaqi) hadees- 6018.  Mishqaat ul Masabih, hadees- 4510.

Lekin ye riwayat munqate hai. Shaykh Zubair ali zai ne Mishqaat ul masabih me is riwayat ko zaif karaar diya hai. [scan]

Is riwayat ki kamzor hone ki wajah ye hai ki Imam Muhammad bin Ali bin Hussain al Bakir ne direct ye hadees Ali r.a. se riwayat ki hai aur Imam Bakir ki mulaqat Ali r.a. se sabit nahi hai.

Lihaza aesi koi sahih riwayat nahi hai jisme shatranj alfaz ka naam lekar ise haraam karaar diya ho.

Ek zaruri nukhta ye hai ki hame kisi cheez ko haraam kahne ke liye boht zyada gaur o fikr karna chahiye, har cheez ko haraam nahi kah dena chahiye kyuki Quran me kayi jagah badi sakhti ke sath is chiz se mana kiya gaya hai:

۩ Aye Nabi, Tum kyu us cheez ko haraam karte ho jo Allah ne tumhare liye halal ki hai? (kya is liye ke) tum apni biwiyo ki khushi chahte ho? Allah muaf karne wala aur raham farmane wala hai.

Surah Tahreem (66), ayat- 1.

۩ Aur yeh jo tumhari zubaane jhuthe ahkaam lagaya karti hai ke yeh cheez halal hai aur woh haraam, toh is tarah ke hukm laga kar Allah par jhoot na baandha karo..

Surah Nahl (16), ayat- 116.

Isi silsile me Rasoolullah ﷺ ki ek taleem hame milti hai:

۩ Abu Salaba r.a. riwayat karte hai ki Rasoolullah ﷺ ne farmaya,

“Beshak Allah ne faraiz ko wajib kiya hai toh use nazarandaaz mat karo. Usne hadd muqarrar ki hai toh usse aage mat badho. Usne kuch chizo ko muqaddas rakha hai, unse khilaaf warzi mat karo. (Aur) usne kuch chizo me khamoshi ikhtiyaar ki hai, tum par raham karne ke liye na ki bhool me, toh unhe talaash mat karo.”

Sunan Daraquṭni, hadees- 4316. Ise Imam ibn Qayyim ne I'lam al-Muqi'in'an (1/221) me sahih karaar diya hai.

Toh isliye ye jo hamari teen indoor games hai in par haraam ka fatawa lagana, ye mere nazdeek deen me gulu hai. Sirf zahiri alfaz ke upar fatawe nahi laga dene chahiye balki hame iske bunyad me jakar haqiqi cheez ko samajh kar raaye deni chahiye.

Sath hi sath ek paigam unlogo ke liye jo aankh aur aqal band kar ke apne ulema ki pairwi karte hai, aur inme wo log bhi shamil hai jo khud kisi zamane me 4 Imam ki taqleed se mana karte the aur aj khud apne ulema ki taqleed karte hai,

Aapke liye paigam ye hai ki:

'Kisi shaks ka ahtaraam apko yaha tak na le jaaye ki ap uski galti ko bhi defend karne lage aur kisi shaks par tanqeed apko yaha tak na le jaaye ki ap uska wajibi ahtaraam karna bhi chhor dein.'

۩ Anas bin Malik r.a. riwayat karte hai ki Rasoolullah ﷺ ne farmaya,

“(Deen me) Logo ke liye aasani karo aur sakhti na karo aur khush karo aur (deen se) nafrat mat dilao.”

Sahih al bukhari, kitab al adab ﴾78﴿, hadees- 6125.

Allah se dua hai ki wo hame deen ki fiqh (sahih samajh) ata kare. aameen.

Note: Ye khelne ke sath sath is baat ka khyaal bhi rakhe ki zarurat se zyada isme waqt na guzre aur na hi inke wajah se namaz ya dusri ibadat par koi asar pade, mard o aurat ka ikhtilat (mixing) na ho. Yaani sharai ahkaam ka khayaal rakha jaaye.

Aur Allah sab se behtar jaanta hai.

•٠•●●•٠•

Read More »

Tableegh ke Aaghaz Me Hikmat | Dr. Farhat Hashmi

Seerat un Nabi ﷺ me, Rasoolullah ﷺ ke shuru ke tableeghi marhale par roshni:

۞ “Islam ke ibtedayi dino me Namaz ke alawa kisi ibadat ya amr o nahi (neki ki dawat, burai se rokna) ka pata nahi chalta, wahee aati thi, Tawheed ke mukhtalif gosho ko bayan karti thi, sahaba e karaam ko nafs ki safaai ki targeeb deti thi, makarim e akhlaq par ubhaarti thi, jannat aur jahannam ke haalaat bayaan karti thi aur aesi zabardast naseehate lekar aati thi ke unse seene khul jaate the, rooh ko giza milti thi.”

Ustazah isko samjhaate hue kahti hai,

'Iska matlab ye hai ki jab ap ibtida (shuru) me kisi ko bhi sikhane lage toh ek taraf Taharat, wuzu, namaz aur akhlaq aur eemaniyaat me Jannat-dozakh ki baate (bataye). Ye basic (ibtedayi) syllabus hai.'

۞ “Idhar Rasoolullah ﷺ bhi kitab o hikmat ki taaleem ke zarye se sahaba e karaam ko yakja (unify) karte. Unhe dilo ki safaai, akhlaq ki pakeezgi, muamlat ki sachhai aur nafs ki iffat (pakeezgi) ki tarbiyat dete (Yaani, Deen sirf ilm ka naam nahi, 'Wa yuzakki him' (Paak karna) bhi sath hi tha).

Tareekiyo (andhero) se nikaal kar roshni me laate, sahih raasta batate, aur Allah ke deen ko mazbuti se pakadne, uski rassi (Quran) ko achhi tarah thaamne aur uske muamle me sabit qadam rahne ki talkeen farmate the.

Yu Teen baras guzar gaye (Yaani teen saal sahaba ki tarbiyat hui) aur sirf afraad ko dawat di jaati rahi. Majliso aur mahfilo me kahi aelaaniya tableegh nahi ki gai (bas one on one base pe).

Lekin Quraish ko iska ilm ho gaya aur baaz ne ispe tankeer bhi ki (tankeer yaani uska inkaar bhi kiya aur thoda resist bhi kiya). Baaz ahle eemaan par kuch zyadtiya ki gai. Taaham umoomi taur par Quraish ne ab tak ise koi ahmiyat nahi di (notice nahi kiya).

Idhar Nabi ﷺ ne bhi unke deen se koi tarruz (mukhalfat) na kiya, na unke mabudo ke bareme koi baat kahi (unke rasm o riwaj aur unke tareeko par koi tanqeed nahi).”

Ustazah isko samjhaate hue kahti hai,

'Achha ham ek aur galti kya karte hai, sabse pahle criticism (tanqeed) se baat shuru karte hai. Ye bhi galat hai, agar kisi ke ghar me tasweere lagi hai toh sabse pahle usko jaake dhanpne lagenge, ya us par baate karne lagenege ya waha nahi ki toh ghar aakar karenge. Ye kya akhlaq hua? Aapko nahi malum kiske kya haalaat hai. Aapne jaana hi nahi. Aur ap aese baato ko lekar shuru ho gaye. Toh jab tak hamare apne dilo ki safai nahi hoti, hamari apni zubano ki safai nahi hoti toh ye paak kalaam aage kaise jayega.

Toh dusro ka tazkiya karne waale khud pahle apne tazkiye ka bandobast farmaye!!!'

(source)

Allah se dua hai ki wo hame hikmat aur khubsurat naseehat ke sath hame dawat o tableegh karne ki taufeeq ata kare. aameen.

•٠•●●•٠•

Related: Islah me sabr aur akhlaq ki ahmiyat

Read More »

Narmi Kare :)

۩ Ammi Ayesha r.a. farmati hai ki Rasoolullah ﷺ ne farmaya,

'Beshak Allah tala narmi karta hai aur narmi ko pasand karta hai Aur narmi pe wo sawab deta hai jo sakhti pe nahi deta, aur wo is tarha kisi aur cheez par ata nahi karta.'

Sahih Muslim, kitab al birr was silati wal adab ﴾45﴿ hadees- 6601.

۩ Ammi Ayesha r.a. farmati hai ki Rasoolullah ﷺ ne farmaya,

'Jis cheez me narmi ho toh wo use khubsurat bana deti hai aur jis cheez se bhi narmi nikaal di jaati hai use badsurat kar deti hai.'

Sahih Muslim, kitab al birr was silati wal adab ﴾45﴿ hadees- 6602.

۩ Abu Hurairah r.a. riwayat karte hai ki ek aarabi (dehati) khada ho kar masjid me peshab karne laga. Toh log us par jhapatne lage. (Ye dekh kar) Rasoolullah ﷺ ne logo se farmaya ke use chhor do aur us ke peshab par paani ka bhara hua dol ya kuch kam bhara hua dol baha do, kyuki tum narmi ke liye bheje gaye ho, sakhti ke liye nahi.

Sahih al Bukhari, kitab al wuzu (4), hadees- 220.

۩ Anas r.a. riwayat karte hai,

'Maine das saal tak Rasool ﷺ ki khidmat ki. Unhone mujhe kabhi 'uff' tak nahi kaha aur unhone mujhe kabhi kisi chiz par nahi toka ki tumne ye kyu nahi kiya, jo kaam maine nahi kiye ya fir us chiz ke bareme ye nahi kaha ki tumne ye kyu kiya, jo kaam maine kiye the.'

Al Adab al Mufrad, hadees- 277. (Sahih)

۩ Ammi Ayesha r.a. farmati hai ki jab bhi RasoolAllah ﷺ ko kisi do chizo me ikhtiyar (choice) diya jaata tha wo un dono maise hamesha aasan chiz ko chunte the, jab tak ke usme koi gunah shamil na ho lekin agar usme gunah hota toh wo logo me us chiz se sabse zyada duri ikhtiyar karte the.

Sahih al Bukhari, kitab al adab ﴾78﴿, hadees- 6126. Sahih Muslim, kitab al fazail ﴾43﴿, hadees- 6048.

۩ Abu Hurairah r.a. se riwayat hai, Nabi ﷺ ne farmaya,

“Beshak Deen aasaan hai, aur jo shakhs deen me sakhti karega toh deen us par ghalib ajaayga. Toh shiddat pasand (extremist) mat bano lekin koshish karo ki takmeel (excellence) ke kareeb raho aur khush raho aur subha aur dopaher aur raat ke aakhri hisse me ibadat karke (Allah se) se madad haasil karo.”

Sahih al Bukhari, kitab al eemaan ﴾2﴿, hadees- 39.

۩ Abu Masud r.a. riwayat karte hai ke ek shaks ne kaha ke Aye Allah ke Rasool qasam Allah ki mai subah ki namaz me falan ki wajah se der me jata hu, kyunki woh namaz ko bahut lamba kar dete hai, raawi e hadees kahte hai ki maine RasoolAllah ﷺ ko naseehat ke waqt us din se zyada (kabhi bhi) itne gusse me nahi dekha. Aap ﷺ ne farmaya ke tum me se kuch log yeh chahte hai ke (aawam ko ibadat se ya deen se) nafrat dila de. Khabardaar tum me logo ko jo shakhs bhi namaz padhaye to choti padhaye kyunki namazio me kamzor, budhe aur zarurat wala sab hi qisam ke log hote hai.

Sahih al Bukhari, kitab al aazaan ﴾10﴿, hadees- 702.

۩ Abdullah bin Abi Qatada riwayat karte hai ki mere walid ne kaha ki Rasoolullah ﷺ ne farmaya,

'Mai namaz der tak padhne ke iradah se khada hota hu, lekin kisi bachhe ke rone ki aawaz sun kar namaz ko halki (shorter) kar deta hu, kyuki uski maa ko (jo namaz me shareek hogi) taqleef me daalna bura samajhta hu.'

Sahih al Bukhari, kitab al aazaan (10), hadees- 707.

۩ Muawiyah bin al-Hakam r.a. kahte hai,

Mai Rasoolullah ﷺ ke sath namaz padh raha tha ke logo me se ek aadmi ko cheenk aayi toh maine kaha, '(يرحمك الله) Allah tujh par raham kare.' Logo ne mujhe ghoorna shuru kar diya. Mai ne (dil me) kaha, 'Meri maa mujhe gum paaye (arabi muhawra), tum sab ko kya ho gaya hai ke mujhe ghoor rahe ho'. Fir wo apne hath apne raano par maarne lage. Jab mai ne unhe dekha ki wo mujhe chup kara rahe hai (toh mujhe ajeeb laga) lekin mai khamosh raha.

Jab Rasoolullah namaz se farig ho gaye, mere maa baap Aap par qurban! Mai ne Aap se pahle aur Aap ke baad, Aap se behtar koi sikhane waala nahi dekha. Allah ki qasam! na toh aap ne mujhe daanta, na mujhe maara aur na mujhe bura bhala kaha.

Aap ne farmaya, 'Ye namaz hai, isme kisi kism ki guftugu nahi karni chahiye, ye toh bas tasbeeh wo taqbeer aur Quran ki tilawat hai.'

Sahih Muslim, kitab al masaajid wa mawazihis salaat (5), hadees- 1199.

•٠•●●•٠•

Related Articles:

۩ Deen Aasaan Hai

۩ Islah Aur Hamara Rawayya

۩ Salafiyat Ka Taaruf - Shaykh Ibn al Uthaymeen

Read More »

Nabi ﷺ ka Akhlaq

Allah s.w.t. farmate hai,

“Aur beshak, Aap (ﷺ) akhlaq ke buland darje par fa'iz hai.”

Surah Qalam (68), ayat- 4.

۝ Abu Huraira r.a. riwayat karte hai ki Rasoolullah ﷺ ne farmaya,

“Mai sirf isliye bheja gaya hu taaki mai acche akhlaq ko kamil (perfect) kardu.”

Al adab al mufrad, hadees- 273. (Sahih)

۝ Rasool ﷺ achhe akhlaq ke liye dua bhi manga karte the ye kah kar,

اللَّهُمَّ كَمَا حَسَّنْتَ خَلْقِي فَحَسِّنْ خُلُقِي

Allaahumma kamaa ḥassanta khalqee fa ḥassin khuluqee.

'Aye Allah tune mere bahari shakl ko khubsurat banaya hai toh mere akhlaq ko bhi achha kar de.'

Sahih ibn Hibban (3/239). Ise al-Albani ne Irwa al-ghaleel (75) me sahih karaar diya hai.

۝ Hazrat Ayesha r.a. riwayat karti hai ki Khadija r.a. ne Rasoolullah ﷺ se farmaya,

'Khuda ki qasam Aap ko Allah kabhi ruswa nahi karega. Aap rishtedaro se sila-rahmi karte hai, Bekaso ka bojh uthate hai, Mufliso (gareebo) ki madad karte hai, Aap dil khol kar mahmaan nawazi karte hai aur mushkil ke waqt me Aap zaruratmando ka saath dete hai.'

Sahih al bukhari, kitab al wahee (1), hadees- 3.

۝ Masruq riwayat karte hai, ham Abdullah bin Amr r.a. ke sath baithe hue the jo hame hadees suna rahe the. Unhone kaha Allah ke Rasool ﷺ na to fahish the aur na hi mutafahhish, aur wo (RasoolAllah) kaha karte the ki tum maise sabse behtareen wo hai jo akhlaq me sabse achha ho.

Sahih al-bukhari, kitab ul adab (78), hadees- 6035.

۝ Anas r.a. riwayat karte hai, "Maine das saal tak Rasool ﷺ ki khidmat ki. Unhone mujhe kabhi 'uff' tak nahi kaha aur unhone mujhe kabhi kisi chiz ke bareme nahi toka ki tumne ye kyu nahi kiya, jo kaam maine nahi kiye ya fir us chiz ke bareme ye nahi kaha ki tumne ye kyu kiya, jo kaam maine kiye the.

Al Adab al Mufrad, hadees- 277. (Sahih)

۝ Abdullah riwayat karte hai,

Jaise mai (us waqt) aan hazrat ﷺ ko dekh raha hu ap ek paigambar (nooh a.s.) ki hikayat bayaan kar rahe the, un ki qaum waalo ne unko itna maara ki lahu-luhaan kar diya, wo apne munhh se khoon pochte the aur yu dua karte jaate, parwardigaar meri qaum waalo ko baksh de wo naadaan hai.

Sahih al Bukhari, kitab us titabatil murtadeena (88), hadees- 6929.

۝ Anas r.a. riwayat karte hai ki Rasoolullah ﷺ na gaali dete the aur na fahash alfaz istemal karte the aur na laanat-malaamat karte the, agar ham me se kisi par naraz hote toh itna farmate ki ise kya ho gaya hai, iske peshani me khaak lage (arabi muhawra).

Sahih al Bukhari, kitab al adab (78), hadees- 6031.

۝ Jabir r.a. kahte hai, 'Kabhi aesa nahi hua ki Rasoolullah ﷺ se kisi ne koi cheez maangi ho aur aapne uske dene se inkaar kiya ho.'

Sahih al-Bukhari, kitab al adab (78), hadees- 6034.

۝ Abdur Rahman bin Abi Laila riwayat karte hai, Nabi ﷺ ke paas se ek jahanzah guzar toh Aap us (janaze) ke liye khade ho gaye. Fir Aap ﷺ se kaha gaya ki ye toh Yahudi ka janazah tha. Aap ﷺ ne farmaya, 'Kya us me jaan nahi hai'. (Yaani ki kya usme rooh nahi thi)

Sahih al Bukhari, kitab al janaiz (23), hadees- 1312, 1313.

۝ Ibn Jaz r.a. riwayat karte hai,

'Maine Rasoolullah ﷺ se zyada kisi ko muskurate hue nahi dekha'

Jamia Tirmizi, kitab al manaqib (49), hadees- 3641. Ise darussalaam ne hasan karaar diya hai.

۝ Abdullah bin Abi Qatada riwayat karte hai ki mere walid ne kaha ki Rasoolullah ﷺ ne farmaya,

'Mai namaz der tak padhne ke iradah se khada hota hu, lekin kisi bachhe ke rone ki aawaz sun kar namaz ko halki (shorter) kar deta hu, kyuki uski maa ko (jo namaz me shareek hogi) taqleef me daalna bura samajhta hu.'

Sahih al Bukhari, kitab al aazaan (10), hadees- 707.

Allah se dua hai ki wo hame amal ki taufeek ata kare. aameen.

•٠•●●•٠•

Related: Achha Akhlaq - Deen Ki Ek Nayab Chiz

Read More »

Nabi ﷺ ke Oontni ka Naam

en    ur   

Alhmdulillah..

Imam ibn Qayyim r.h. Nabi ﷺ ke jaanwaro ki fasal (section) me kahte hai ke jaanwaro me se Nabi ﷺ ke kaun kaun se janwar the:

'Oonto me Nabi ﷺ ke paas Qaswa naami oontni thi.

Kaha jata hai ke yeh wohi oontni hai jis par Nabi ﷺ ne Hijrat ka safar kiya.

Adbaa aur al-Jadaa ke baare me ikhtilaaf hai ke aaya yeh ek hi oontni ke do naam the ya ke do alehda alehda ontniya thi?

Adbaa woh oontni thi jise kisi bhi daud me haraya nahi gaya tha. Fir ek dehaati nawjawaan oont par aaya aur usne is oontni ko shikasht de di jo Musalmano ko bahut naa-gawaar guzri toh Nabi ﷺ farmaane lage,

'Allah taala ka haq hai ke duniya me jis kisi cheez ko bhi bulandi deta hai toh fir use pasti aur zawaal pazeer bhi karta hai.'

Badr waale din Nabi ﷺ ne Abu Jahl ka mahri oont (oont ki ek qism) maal e ganeemat me haasil kiya jis ke nathno (nose) me chandi thi toh Hudaybiyah waale din Nabi ﷺ ne mushriko ko aazaab dilane ke liye use hadiya kar diya.'

Zaad al Maad, safa- 134.

•٠•●●•٠•

Read More »